“ປ້າຍແຫ່ງເສລີພາບ,” ເລື່ອງພຣະຄຳພີມໍມອນ (2023)
ປ້າຍແຫ່ງເສລີພາບ
ການປົກປ້ອງສິດທິທີ່ຈະເຊື່ອໃນພຣະເຈົ້າ
ອະມາລີໄຄຢາເປັນຊາວນີໄຟທີ່ໃຫຍ່ ແລະ ແຂງແຮງ. ລາວຢາກເປັນກະສັດ. ລາວໄດ້ສັນຍາວ່າຈະມອບອຳນາດໃຫ້ຜູ້ທີ່ຊ່ວຍເຫລືອລາວ. ຫລາຍຄົນມັກລາວ ແລະ ໄດ້ພະຍາຍາມເຮັດໃຫ້ຄົນອື່ນຕິດຕາມລາວເຊັ່ນກັນ. ອະມາລີໄຄຢາໄດ້ພາຜູ້ຄົນເຮັດສິ່ງທີ່ບໍ່ດີ. ລາວ ແລະ ຜູ້ຕິດຕາມຂອງລາວຕ້ອງການທີ່ຈະຂ້າຜູ້ຄົນທີ່ໄດ້ສິດສອນກ່ຽວກັບພຣະເຢຊູຄຣິດ
ນາຍທັບໂມໂຣໄນ, ຜູ້ນຳກອງທັບຊາວນີໄຟ, ເຊື່ອໃນພຣະເຢຊູ. ເພິ່ນຮູ້ວ່າຊາວນີໄຟໄດ້ຮັບພອນເພາະພວກເຂົາຮັກສາພຣະບັນຍັດຂອງພຣະເຈົ້າ. ເພິ່ນໃຈຮ້າຍຫລາຍທີ່ອະມາລີໄຄຢາກຳລັງພາຜູ້ຄົນໜີໄປຈາກພຣະເຈົ້າ, ພະຍາຍາມທີ່ຈະກາຍເປັນກະສັດ, ແລະ ພະຍາຍາມທຳຮ້າຍຜູ້ຄົນ.
ໂມໂຣໄນໄດ້ຈີກເສື້ອຄຸມຂອງເພິ່ນ. ເພິ່ນໄດ້ຂຽນໃສ່ໃນນັ້ນວ່າ ຜູ້ຄົນຄວນລະນຶກເຖິງພຣະເຈົ້າຂອງພວກເຂົາ, ອິດສະລະພາບຂອງພວກເຂົາ, ແລະ ຄອບຄົວຂອງພວກເຂົາ. ແລ້ວເພິ່ນໄດ້ມັດມັນໃສ່ສົ້ນໄມ້ ແລະ ເອີ້ນມັນວ່າປ້າຍແຫ່ງເສລີພາບ. ໂມໂຣໄນໄດ້ອະທິຖານທູນຂໍພອນຈາກພຣະເຈົ້າ. ເພິ່ນໄດ້ສະແດງປ້າຍແຫ່ງເສລີພາບແກ່ຊາວນີໄຟ ແລະ ໄດ້ຂໍໃຫ້ພວກເຂົາເຂົ້າຮ່ວມກັບເພິ່ນໃນການຕໍ່ສູ້ກັບອະມາລີໄຄຢາ.
ຜູ້ຄົນໄດ້ສວມເຄື່ອງປ້ອງກັນຂອງພວກເຂົາ ແລະ ໄດ້ແລ່ນໄປຫາໂມໂຣໄນ. ພວກເຂົາພ້ອມແລ້ວທີ່ຈະຕໍ່ສູ້ເພື່ອພຣະເຈົ້າ ແລະ ບ້ານເຮືອນ, ຄອບຄົວ, ແລະ ອິດສະລະພາບຂອງພວກເຂົາ. ພວກເຂົາໄດ້ເຮັດພັນທະສັນຍາ, ຫລື ຄຳສັນຍາພິເສດ, ກັບພຣະເຈົ້າວ່າ ພວກເຂົາຈະຕິດຕາມພຣະອົງສະເໝີ. ແລ້ວພວກເຂົາກໍພ້ອມແລ້ວທີ່ຈະຕໍ່ສູ້ກັບອະມາລີໄຄຢາ.
ກອງທັບຂອງໂມໂຣໄນມີຈຳນວນຫລາຍ. ອະມາລີໄຄຢາຢ້ານກົວ. ລາວພະຍາຍາມແລ່ນໜີໄປກັບຜູ້ທີ່ຕິດຕາມລາວ. ແຕ່ພວກເຂົາຫລາຍຄົນເປັນຫ່ວງວ່າອະມາລີໄຄຢາກຳລັງຕໍ່ສູ້ເພື່ອເຫດຜົນທີ່ຜິດໆ. ຫລາຍຄົນບໍ່ໄດ້ຕິດຕາມລາວອີກຕໍ່ໄປ. ກອງທັບຂອງໂມໂຣໄນໄດ້ຢຸດຢັ້ງຜູ້ທີ່ຕິດຕາມອະມາລີໄຄຢາ, ແຕ່ອະມາລີໄຄຢາ ແລະ ຄົນອື່ນໆຈຳນວນນ້ອຍໜຶ່ງໄດ້ໜີໄປໄດ້.
ອະມາລີໄຄຢາໄດ້ໄປຫາແຜ່ນດິນຂອງຊາວເລມັນ. ລາວຢາກໃຫ້ຊາວເລມັນຊ່ວຍລາວຕໍ່ສູ້ກັບຊາວນີໄຟ. ແລ້ວລາວຈະມີກອງທັບໃຫຍ່ ແລະ ເຂັ້ມແຂງ. ລາວໄດ້ເຮັດໃຫ້ຊາວເລມັນຫລາຍຄົນໃຈຮ້າຍໃຫ້ຊາວນີໄຟ. ກະສັດຂອງຊາວເລມັນໄດ້ບອກຊາວເລມັນທຸກຄົນໃຫ້ກຽມພ້ອມທີ່ຈະໄປຕໍ່ສູ້ກັບຊາວນີໄຟ.
ກະສັດມັກອະມາລີໄຄຢາ. ເພິ່ນໄດ້ແຕ່ງຕັ້ງອະມາລີໄຄຢາໃຫ້ເປັນຜູ້ນຳຄົນໜຶ່ງຂອງກອງທັບຊາວເລມັນ. ແຕ່ອະມາລີໄຄຢາຕ້ອງການອຳນາດຫລາຍກວ່ານັ້ນ.
ອະມາລີໄຄຢາໄດ້ມີແຜນການທີ່ຈະປົກຄອງຊາວເລມັນ. ລາວໄດ້ຄວບຄຸມກອງທັບຊາວເລມັນທັງໝົດ. ແລ້ວລາວໄດ້ສົ່ງຂ້າໃຊ້ຂອງລາວໃຫ້ໄປຂ້າກະສັດ ແລະ ຕົວະວ່າຄົນອື່ນເປັນຜູ້ເຮັດ.
ອະມາລີໄຄຢາທຳທ່າໃຈຮ້າຍທີ່ກະສັດຖືກຂ້າ. ຊາວເລມັນມັກອະມາລີໄຄຢາ. ລາວໄດ້ແຕ່ງງານກັບລາຊີນີ ແລະ ກາຍເປັນກະສັດອົງໃໝ່. ລາວຕ້ອງການທີ່ຈະປົກຄອງຊາວນີໄຟເຊັ່ນກັນ. ລາວເວົ້າບໍ່ດີກ່ຽວກັບຊາວນີໄຟ ເພື່ອວ່າຊາວເລມັນຈະໃຈຮ້າຍໃຫ້ພວກເຂົາ. ບໍ່ດົນ, ຊາວເລມັນຫລາຍຄົນກໍຢາກຕໍ່ສູ້ກັບພວກເຂົາ.
ຂະນະທີ່ອະມາລີໄຄຢາມີອຳນາດໂດຍການເວົ້າຕົວະ, ໂມໂຣໄນໄດ້ກະກຽມຊາວນີໄຟໃຫ້ໄວ້ວາງໃຈພຣະເຈົ້າ. ເພິ່ນໄດ້ປັກປ້າຍແຫ່ງເສລີພາບໄວ້ເທິງຫໍສູງທຸກບ່ອນໃນແຜ່ນດິນ ເພື່ອເຕືອນພວກເຂົາເຖິງຄຳສັນຍາຂອງພວກເຂົາ. ກອງທັບຂອງໂມໂຣໄນກໍໄດ້ກະກຽມເມືອງນີໄຟຕ່າງໆສຳລັບສົງຄາມນຳອີກ. ພວກເຂົາໄດ້ສ້າງກຳແພງ ແລະ ຂຸດຮ່ອງ ເພື່ອເຮັດໃຫ້ເມືອງປອດໄພ ແລະ ເຂັ້ມແຂງ.
ເມື່ອຊາວເລມັນໄດ້ມາຕໍ່ສູ້, ພວກເຂົາບໍ່ສາມາດເຂົ້າໄປໃນເມືອງນີໄຟຕ່າງໆ. ພວກເຂົາຖືກສະກັດກັ້ນດ້ວຍກຳແພງ ແລະ ຮ່ອງທີ່ທະຫານຂອງໂມໂຣໄນໄດ້ສ້າງໄວ້. ຊາວເລມັນຫລາຍຄົນໄດ້ຕາຍໄປເມື່ອພວກເຂົາໂຈມຕີຊາວນີໄຟ. ອະມາລີໄຄຢາໃຈຮ້າຍທີ່ສຸດ. ລາວໄດ້ສັນຍາວ່າຈະຂ້າໂມໂຣໄນ.
ຊາວນີໄຟໄດ້ຂອບພຣະໄທພຣະເຈົ້າສຳລັບຄວາມຊ່ວຍເຫລືອ ແລະ ປົກປ້ອງພວກເຂົາ. ພວກເຂົາໄດ້ເຮັດໃຫ້ເມືອງຕ່າງໆຂອງພວກເຂົາປອດໄພກວ່າເກົ່າ ແລະ ໄດ້ສ້າງຫລາຍເມືອງຂຶ້ນອີກ. ສົງຄາມກັບຊາວເລມັນດຳເນີນຕໍ່ໄປ, ແຕ່ພຣະເຈົ້າໄດ້ຊ່ວຍໂມໂຣໄນ ແລະ ກອງທັບຂອງເພິ່ນຮັກສາຊາວນີໄຟໃຫ້ປອດໄພ. ຊາວນີໄຟມີຄວາມສຸກ. ພວກເຂົາໄດ້ເຊື່ອຟັງພຣະເຈົ້າ ແລະ ຊື່ສັດຕໍ່ພຣະອົງ.