“ກີເດໂອນ, ແອວມາ, ແລະ ນີຮໍ,” ເລື່ອງພຣະຄຳພີມໍມອນ (2023)
“ກີເດໂອນ, ແອວມາ, ແລະ ນີຮໍ,” ເລື່ອງພຣະຄຳພີມໍມອນ
ກີເດໂອນ, ແອວມາ, ແລະ ນີຮໍ
ການປົກປ້ອງຄວາມຈິງດ້ວຍພຣະຄຳຂອງພຣະເຈົ້າ
ຊາວນີໄຟໄດ້ເລືອກເອົາແອວມາຜູ້ເປັນລູກໃຫ້ເປັນຫົວໜ້າຜູ້ຕັດສິນຂອງພວກເຂົາ. ແອວມາກໍເປັນມະຫາປະໂລຫິດຂອງສາດສະໜາຈັກນຳອີກ.
ມີຊາຍຄົນໜຶ່ງຊື່ ນີຮໍ ໄດ້ເລີ່ມສິດສອນຜູ້ຄົນກ່ຽວກັບບາງສິ່ງທີ່ລາວເອີ້ນວ່າ ພຣະຄຳຂອງພຣະເຈົ້າ. ແຕ່ລາວໄດ້ສິດສອນຜູ້ຄົນວ່າ ພວກເຂົາບໍ່ຈຳເປັນຕ້ອງເຊື່ອຟັງພຣະເຈົ້າ ຫລື ກັບໃຈ.
ຫລາຍຄົນມັກ ແລະ ເຊື່ອໃນສິ່ງທີ່ນີຮໍກ່າວ. ລາວຕ້ອງການໃຫ້ຜູ້ຄົນມອບເງິນໃຫ້ລາວ ແລະ ສັນລະເສີນລາວ. ລາວຄິດວ່າລາວດີກວ່າຄົນອື່ນໆ. ລາວໄດ້ຕັ້ງໂບດຂອງລາວເອງຂຶ້ນ, ແລະ ຫລາຍຄົນເຊື່ອຟັງລາວ.
ມີມື້ໜຶ່ງ, ນີຮໍໄດ້ພົບກັບຜູ້ຊາຍແກ່ຄົນໜຶ່ງຊື່ ກີເດໂອນ. ກີເດໂອນເປັນຄູສອນໃນສາດສະໜາຈັກຂອງພຣະເຈົ້າ ແລະ ໄດ້ເຮັດຫລາຍສິ່ງທີ່ດີ. ນີຮໍຢາກໃຫ້ຜູ້ຄົນໜີຈາກສາດສະໜາຈັກ, ສະນັ້ນລາວຈຶ່ງໄດ້ໂຕ້ຖຽງກັບກີເດໂອນ. ກີເດໂອນໄດ້ໃຊ້ພຣະຄຳຂອງພຣະເຈົ້າ ເພື່ອສະແດງໃຫ້ເຫັນວ່ານີຮໍບໍ່ໄດ້ສິດສອນຄວາມຈິງ. ນີຮໍໃຈຮ້າຍ! ລາວໄດ້ຂ້າກີເດໂອນດ້ວຍດາບຂອງລາວ.
ຜູ້ຄົນໄດ້ນຳນີຮໍໄປຫາແອວມາເພື່ອການຕັດສິນ. ນີຮໍໄດ້ພະຍາຍາມປົກປ້ອງຕົວກັບສິ່ງທີ່ລາວໄດ້ເຮັດໄປ. ລາວບໍ່ຢາກຖືກລົງໂທດ.
ແອວມາໄດ້ກ່າວວ່າ ຄຳສອນຂອງນີຮໍບໍ່ຖືກຕ້ອງ ແລະ ສາມາດທຳຮ້າຍຜູ້ຄົນໄດ້. ແອວມາໄດ້ປະຕິບັດຕາມກົດໝາຍ. ຍ້ອນວ່ານີຮໍໄດ້ຂ້າກີເດໂອນ, ນີຮໍຕ້ອງຖືກປະຫານ.
ກ່ອນລາວຖືກປະຫານ, ນີຮໍໄດ້ບອກຜູ້ຄົນວ່າລາວໄດ້ເວົ້າຕົວະ. ລາວບໍ່ໄດ້ສິດສອນພຣະຄຳຂອງພຣະເຈົ້າ. ເຖິງແມ່ນວ່ານີຮໍເວົ້າວ່າ ລາວໄດ້ເຮັດຜິດ, ແຕ່ຫລາຍຄົນກໍຍັງຕິດຕາມຕົວຢ່າງຂອງລາວຢູ່. ພວກເຂົາໄດ້ຕົວະຜູ້ຄົນເພື່ອການສັນລະເສີນ ແລະ ເພື່ອເງິນ. ແຕ່ຄົນອື່ນໆໄດ້ເຊື່ອຟັງແອວມາ. ພວກເຂົາໄດ້ດູແລຄົນຍາກຈົນ ແລະ ຮັກສາພຣະບັນຍັດຂອງພຣະເຈົ້າ.