“ສາດສະດາອີເທີ,” ເລື່ອງພຣະຄຳພີມໍມອນ (2023)
ສາດສະດາອີເທີ
ຄຳເຕືອນຂອງພຣະຜູ້ເປັນເຈົ້າຕໍ່ປະຊາຊາດ
ພຣະຜູ້ເປັນເຈົ້າໄດ້ນຳນ້ອງຊາຍຂອງຢາເຣັດ ແລະ ຄອບຄົວມາຫາແຜ່ນດິນແຫ່ງຄຳສັນຍາ. ພວກເຂົາຖ່ອມຕົວ ແລະ ຮັກສາພຣະບັນຍັດຂອງພຣະເຈົ້າ. ກຸ່ມຂອງພວກເຂົາເຕີບໂຕເປັນເວລາຫລາຍປີ, ແລະ ພວກເຂົາຢາກມີກະສັດນຳພາພວກເຂົາ. ນ້ອງຊາຍຂອງຢາເຣັດໄດ້ເຕືອນພວກເຂົາວ່າ ການມີກະສັດສາມາດນຳໄປສູ່ບັນຫາ, ແຕ່ລາວຈະໃຫ້ພວກເຂົາເລືອກເອົາກະສັດ.
ເປັນເວລາຫລາຍຮ້ອຍປີ, ຊາວຢາເຮັດໄດ້ອາໄສຢູ່ໃນແຜ່ນດິນແຫ່ງຄຳສັນຍາ. ບາງເທື່ອກະສັດຂອງພວກເຂົາໄດ້ນຳພາພວກເຂົາເຮັດສິ່ງທີ່ດີ, ແຕ່ບາງເທື່ອກໍບໍ່ໄດ້ເຮັດສິ່ງທີ່ດີ. ສາດສະດາຂອງພຣະເຈົ້າໄດ້ເຕືອນຜູ້ຄົນໃຫ້ກັບໃຈ. ເມື່ອພວກເຂົາຮັບຟັງ ແລະ ຮັກສາພຣະບັນຍັດຂອງພຣະເຈົ້າ, ພຣະອົງໄດ້ອວຍພອນພວກເຂົາ. ສາດສະດາຊາວຢາເຮັດຄົນສຸດທ້າຍຊື່ວ່າ ອີເທີ.
ອີເທີ 7:23–27; 9:26–30; 10:16–17, 28; 11:1–8, 12–13, 20–22; 12:2
ຜູ້ຄົນບໍ່ໄດ້ເຊື່ອຟັງພຣະເຈົ້າ. ແຕ່ພຣະວິນຍານຂອງພຣະຜູ້ເປັນເຈົ້າໄດ້ຢູ່ກັບອີເທີ. ເພິ່ນໄດ້ສິດສອນພວກເຂົາຈາກຕອນເຊົ້າເຖິງຕອນຄ່ຳ. ເພິ່ນໄດ້ເວົ້າວ່າ ໃຫ້ເຊື່ອໃນພຣະເຈົ້າ ແລະ ກັບໃຈ ຖ້າບໍ່ດັ່ງນັ້ນ ພວກເຂົາຈະຖືກທຳລາຍ. ຖ້າຫາກພວກເຂົາມີສັດທາ, ພວກເຂົາສາມາດມີຄວາມຫວັງທີ່ຈະໄດ້ຢູ່ກັບພຣະເຈົ້າອີກຄັ້ງ ແລະ ມີຄວາມເຂັ້ມແຂງທີ່ຈະເຮັດສິ່ງທີ່ດີ. ຜູ້ຄົນບໍ່ເຊື່ອ.
ອີເທີໄດ້ເບິ່ງສິ່ງທີ່ຜູ້ຄົນເຮັດ. ເພິ່ນໄດ້ລີ້ຊ່ອນຕົວຢູ່ໃນຖ້ຳໃນຕອນກາງເວັນ ແລະ ໄດ້ຂຽນສິ່ງທີ່ເພິ່ນເຫັນລົງໄວ້. ຜູ້ຄົນບໍ່ກັບໃຈ ແລະ ເລີ່ມຕົ້ນຕໍ່ສູ້ກັນແລະກັນ.
ອີເທີໄດ້ເຫັນວ່າກະສັດຊາວຢາເຣັດ, ໂຄຣິອານທະເມີ, ໄດ້ຕໍ່ສູ້ກັບຫລາຍຄົນທີ່ຢາກເປັນກະສັດ. ໂຄຣິອານທະເມີໄດ້ໃຊ້ກອງທັບຂອງເພິ່ນເພື່ອປົກປ້ອງຕົວເອງ.
ມື້ໜຶ່ງ, ພຣະຜູ້ເປັນເຈົ້າໄດ້ບອກອີເທີໃຫ້ເຕືອນໂຄຣິອານທະເມີ ແລະ ຜູ້ຄົນຂອງເພິ່ນໃຫ້ກັບໃຈ. ຖ້າຫາກພວກເຂົາກັບໃຈ, ພຣະຜູ້ເປັນເຈົ້າຈະຊ່ວຍຜູ້ຄົນ ແລະ ຈະປ່ອຍໃຫ້ໂຄຣິອານທະເມີຮັກສາອານາຈັກຂອງເພິ່ນໄວ້. ຖ້າບໍ່ດັ່ງນັ້ນ, ຜູ້ຄົນຈະທຳລາຍກັນແລະກັນ. ໂຄຣິອານທະເມີຈະມີຊີວິດຢູ່ດົນນານພໍທີ່ຈະໄດ້ເຫັນພຣະຄຳຂອງພຣະຜູ້ເປັນເຈົ້າເກີດເປັນຈິງ. ແລ້ວເພິ່ນຈະຕາຍເຊັ່ນກັນ.
ໂຄຣິອານທະເມີ ແລະ ຜູ້ຄົນຂອງເພິ່ນບໍ່ໄດ້ກັບໃຈ. ຜູ້ຄົນໄດ້ພະຍາຍາມຂ້າອີເທີ, ແຕ່ອີເທີໄດ້ຫລົບໜີໄປຫາຖ້ຳຂອງເພິ່ນ. ຊາຍຄົນໜຶ່ງຊື່ ຊີດ ໄດ້ຕໍ່ສູ້ກັບໂຄຣິອານທະເມີ. ຜູ້ຄົນໄດ້ເລືອກເຂົ້າຮ່ວມກອງທັບຂອງຊີດ ຫລື ກອງທັບຂອງໂຄຣິອານທະເມີ. ກອງທັບທັງສອງໄດ້ສູ້ຮົບກັນຫລາຍຄັ້ງ. ຜູ້ຄົນຢ່າງຫລວງຫລາຍໄດ້ຕາຍໄປ.
ອີເທີ 13:22–25; 14:17–20; 15:2
ໂຄຣິອານທະເມີຈື່ສິ່ງທີ່ອີເທີເວົ້າໄວ້. ເພິ່ນໂສກເສົ້າທີ່ຜູ້ຄົນຂອງເພິ່ນຢ່າງຫລວງຫລາຍໄດ້ຕາຍໄປ. ເພິ່ນຈື່ວ່າສາດສະດາທັງໝົດໄດ້ເຕືອນວ່າສິ່ງນີ້ຈະເກີດຂຶ້ນ. ເພິ່ນເລີ່ມກັບໃຈ ແລະ ໄດ້ສົ່ງຈົດໝາຍໄປຫາຊີດ. ເພິ່ນເວົ້າວ່າ ເພິ່ນຈະຍົກອານາຈັກໃຫ້ ຖ້າຫາກຜູ້ຄົນຂອງເພິ່ນຈະຖືກໄວ້ຊີວິດ. ແຕ່ຊີດຕ້ອງການທີ່ຈະຕໍ່ສູ້.
ຜູ້ຄົນຂອງໂຄຣິອານທະເມີໃຈຮ້າຍ ແລະ ຕ້ອງການທີ່ຈະຕໍ່ສູ້. ຜູ້ຄົນຂອງຊີດກໍໃຈຮ້າຍ ແລະ ຕ້ອງການທີ່ຈະຕໍ່ສູ້. ບໍ່ມີຄົນໃດຢາກກັບໃຈ. ອີເທີໄດ້ເຫັນທຸກຄົນໄປສູ້ຮົບ. ຫລາຍຄົນຕື່ມອີກໄດ້ຕາຍໄປ.
ໂຄຣິອານທະເມີຢາກຢຸດສົງຄາມ. ເພິ່ນໄດ້ຂໍໃຫ້ຊີດຂຶ້ນຄອງອານາຈັກ ແລະ ບໍ່ໃຫ້ທຳຮ້າຍຜູ້ຄົນຂອງເພິ່ນ. ແຕ່ທຸກຄົນຕ່າງກໍໃຈຮ້າຍ. ພວກເຂົາບໍ່ມີພຣະວິນຍານຂອງພຣະຜູ້ເປັນເຈົ້າ. ອີເທີໄດ້ເຫັນວ່າທຸກຄົນໄດ້ຕໍ່ສູ້ກັນຕໍ່ໄປ ຈົນກວ່າໂຄຣິອານທະເມີ ເປັນພຽງຊາວຢາເຣັດອີກຄົນທີ່ຍັງມີຊີວິດຢູ່. ແລ້ວ ໂຄຣິອານທະເມີໄດ້ລົ້ມລົງໝົດສະຕິໄປ.
ອີເທີໄດ້ເຫັນວ່າທຸກສິ່ງທີ່ພຣະຜູ້ເປັນເຈົ້າກ່າວໄວ້ໄດ້ເກີດເປັນຈິງ. ອີເທີໄດ້ສຳເລັດການຂຽນສິ່ງທີ່ໄດ້ເກີດຂຶ້ນ. ແລ້ວເພິ່ນໄດ້ເຮັດໃຫ້ແນ່ໃຈວ່າ ຜູ້ຄົນຈະສາມາດພົບເຫັນການຂຽນຂອງເພິ່ນຫລັງຈາກທີ່ເພິ່ນຈາກໄປແລ້ວ. ອີເທີໄດ້ໄວ້ວາງໃຈພຣະເຈົ້າ ແລະ ຄອຍຖ້າການທີ່ຈະໄດ້ຢູ່ກັບພຣະອົງໃນມື້ໜຶ່ງ.