“ເຄື່ອງໝາຍຂອງການກຳເນີດຂອງພຣະເຢຊູ,” ເລື່ອງພຣະຄຳພີມໍມອນ (2023)
ເຄື່ອງໝາຍຂອງການກຳເນີດຂອງພຣະເຢຊູ
ສັດທາໃນຄຳສອນຂອງສາດສະດາ
ມັນເປັນເວລາປະມານຫ້າປີນັບຕັ້ງແຕ່ຊາມູເອນຜູ້ເປັນສາດສະດາໄດ້ສິດສອນກ່ຽວກັບເຄື່ອງໝາຍຂອງການກຳເນີດຂອງພຣະເຢຊູຄຣິດ. ຫລາຍຄົນໄດ້ເຊື່ອ ແລະ ລໍຖ້າເຄື່ອງໝາຍເຫລົ່ານັ້ນ. ຄົນອື່ນໆໄດ້ເວົ້າວ່າຊາມູເອນຜິດ ແລະ ເວລາສຳລັບເຄື່ອງໝາຍເຫລົ່ານັ້ນໄດ້ລ່ວງກາຍໄປແລ້ວ. ພວກເຂົາໄດ້ເວົ້າເຍາະເຍີ້ຍຜູ້ທີ່ເຊື່ອ ແລະ ເວົ້າວ່າພຣະເຢຊູຈະບໍ່ສະເດັດມາ.
ຮີລາມັນ 14:2–7; 3 ນີໄຟ 1:4–6
ຜູ້ທີ່ເຊື່ອໄດ້ມີຄວາມກັງວົນ, ແຕ່ພວກເຂົາມີສັດທາ. ພວກເຂົາສືບຕໍ່ລໍຖ້າເຄື່ອງໝາຍເຫລົ່ານັ້ນ. ເຄື່ອງໝາຍຢ່າງໜຶ່ງແມ່ນຄືນໜຶ່ງທີ່ຈະບໍ່ມີຄວາມມືດ. ມັນຈະແຈ້ງສະຫວ່າງຄືກັນກັບຕອນກາງເວັນ ເຖິງແມ່ນວ່າດວງອາທິດໄດ້ຕົກດິນແລ້ວກໍຕາມ. ຄືນທີ່ບໍ່ມີຄວາມມືດຈະເປັນເຄື່ອງໝາຍວ່າ ພຣະເຢຊູຈະມາກຳເນີດໃນມື້ຕໍ່ມາ ໃນແຜ່ນດິນໜຶ່ງອີກ.
ຮີລາມັນ 14:2–4; 3 ນີໄຟ 1:7–8
ຜູ້ຄົນທີ່ບໍ່ເຊື່ອໄດ້ວາງແຜນ. ພວກເຂົາໄດ້ຕັ້ງມື້ໄວ້ ແລະ ເວົ້າວ່າຖ້າຫາກເຄື່ອງໝາຍນັ້ນບໍ່ເກີດຂຶ້ນພາຍໃນມື້ນັ້ນ, ແລ້ວຜູ້ທີ່ເຊື່ອຈະຖືກຂ້າ.
ຊາຍຄົນໜຶ່ງຊື່ ນີໄຟ ເປັນສາດສະດາໃນເວລານັ້ນ. ເພິ່ນໂສກເສົ້າຫລາຍທີ່ບາງຄົນຢາກຂ້າຜູ້ທີ່ເຊື່ອ.
ນີໄຟໄດ້ກົ້ມຂາບລົງຢູ່ພື້ນດິນ ແລະ ອະທິຖານຫາພຣະເຈົ້າເພື່ອຜູ້ທີ່ເຊື່ອ ຜູ້ທີ່ກຳລັງຈະຕາຍຍ້ອນສັດທາຂອງພວກເຂົາ. ເພິ່ນໄດ້ອະທິຖານໝົດມື້.
ໃນການຕອບຕໍ່ຄຳອະທິຖານຂອງເພິ່ນ, ນີໄຟໄດ້ຍິນສຸລະສຽງຂອງພຣະເຢຊູ. ພຣະເຢຊູໄດ້ກ່າວວ່າ ເຄື່ອງໝາຍຈະເກີດຂຶ້ນໃນຄືນນັ້ນ ແລະ ແລ້ວພຣະອົງຈະມາກຳເນີດໃນມື້ຕໍ່ມາ.
ຄືນນັ້ນມັນບໍ່ມີຄວາມມືດ ເຖິງແມ່ນວ່າດວງອາທິດໄດ້ຕົກດິນແລ້ວກໍຕາມ. ຜູ້ຄົນທີ່ບໍ່ເຊື່ອຄຳເວົ້າຂອງຊາມູເອນມີຄວາມແປກໃຈຫລາຍ ຈົນວ່າພວກເຂົາໄດ້ລົ້ມລົງຢູ່ກັບພື້ນດິນ. ພວກເຂົາຢ້ານກົວເພາະພວກເຂົາບໍ່ເຊື່ອ. ຜູ້ຄົນທີ່ເຊື່ອບໍ່ໄດ້ຖືກຂ້າ.
ມື້ຕໍ່ມາ, ດວງອາທິດໄດ້ຂຶ້ນອີກຄັ້ງ ແລະ ມື້ນັ້ນກໍແຈ້ງສະຫວ່າງທັງວັນ. ທຸກຄົນຮູ້ວ່ານັ້ນເປັນມື້ທີ່ພຣະເຢຊູຈະກຳເນີດ.
ຜູ້ຄົນໄດ້ເຫັນເຄື່ອງໝາຍໃໝ່. ດາວດວງໃໝ່ໄດ້ປະກົດຂຶ້ນໃນທ້ອງຟ້າ. ເຄື່ອງໝາຍທຸກຢ່າງທີ່ຊາມູເອນໄດ້ເວົ້າໄວ້ກຳລັງຈະເກີດເປັນຈິງ. ຫລາຍຄົນຕື່ມອີກໄດ້ເຊື່ອໃນພຣະເຢຊູ ແລະ ຮັບບັບຕິສະມາ.