“ເລຍໂຮນາ ແລະ ຄັນທະນູຫັກ,” ເລື່ອງພຣະຄຳພີມໍມອນ (2023)
ເລຍໂຮນາ ແລະ ຄັນທະນູຫັກ
ການສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າ
ຄອບຄົວຂອງລີໄຮ ແລະ ອິດຊະມາເອນໄດ້ເດີນທາງໄປໃນຖິ່ນແຫ້ງແລ້ງກັນດານເປັນເວລາຫລາຍປີ. ພຣະຜູ້ເປັນເຈົ້າໄດ້ນຳພາເຂົາເຈົ້າຜ່ານໄປທາງດິນແດນທີ່ດີກວ່າບ່ອນອື່ນ. ເຂົາເຈົ້າຕ້ອງໄດ້ລ່າສັດ ແລະ ເກັບຕຸນອາຫານໄປຕະຫລອດທາງ. ມັນເປັນການເດີນທາງທີ່ຍາກລຳບາກ.
ພຣະຜູ້ເປັນເຈົ້າໄດ້ສັນຍາວ່າຈະນຳຄອບຄົວນີ້ໄປຫາດິນແດນທີ່ດີ ຖ້າຫາກເຂົາເຈົ້າຮັກສາພຣະບັນຍັດ. ເຂົາເຈົ້າບໍ່ຮູ້ວ່າຈະໄປຊອກຫາດິນແດນນັ້ນໄດ້ຢູ່ບ່ອນໃດ, ແຕ່ພຣະອົງຈະນຳພາເຂົາເຈົ້າໄປ.
ເຊົ້າມື້ໜຶ່ງ, ລີໄຮຕົກໃຈເມື່ອພົບເຫັນລູກກົມທອງເຫລືອງຢູ່ນອກຜ້າເຕັນຂອງເພິ່ນ. ລູກກົມໜ່ວຍນີ້ຖືກເອີ້ນວ່າ ເລຍໂຮນາ. ຢູ່ຂ້າງໃນເລຍໂຮນາ, ມີເຂັມຊີ້ບອກເສັ້ນທາງທີ່ກຸ່ມນີ້ຈະຕ້ອງເດີນໄປ. ບາງຄັ້ງເຂົາເຈົ້າໄດ້ພົບເຫັນຂ່າວສານຈາກພຣະຜູ້ເປັນເຈົ້າ ຢູ່ເທິງເລຍໂຮນາ. ນີ້ຄືວິທີທີ່ພຣະຜູ້ເປັນເຈົ້າໄດ້ນຳພາເຂົາເຈົ້າ.
1 ນີໄຟ 16:10, 16, 26–29; ແອວມາ 37:38
ມີມື້ໜຶ່ງ ຂະນະທີ່ນີໄຟກຳລັງລ່າສັດ, ຄັນທະນູໄດ້ຫັກ. ຄອບຄົວບໍ່ສາມາດຊອກຫາອາຫານເມື່ອບໍ່ມີຄັນທະນູ. ພວກອ້າຍຂອງນີໄຟໄດ້ໃຈຮ້າຍໃຫ້ເພິ່ນ ແລະ ພຣະຜູ້ເປັນເຈົ້າ.
ເຂົາເຈົ້າທຸກຄົນອ່ອນແຮງ ແລະ ຫິວເຂົ້າ. ບາງຄົນໂສກເສົ້າ ແລະ ເວົ້າຈົ່ມ. ເຂົາເຈົ້າຢ້ານວ່າເຂົາເຈົ້າຈະຕາຍຫິວ. ແມ່ນແຕ່ລີໄຮກໍໄດ້ເວົ້າຈົ່ມໃຫ້ພຣະຜູ້ເປັນເຈົ້າ.
ນີໄຟໄດ້ເຮັດຄັນທະນູ ແລະ ລູກທະນູອັນໃໝ່ຈາກໄມ້. ເພິ່ນມີສັດທາວ່າພຣະຜູ້ເປັນເຈົ້າຈະຊ່ວຍເພິ່ນພົບເຫັນອາຫານ.
ນີໄຟໄດ້ຖາມລີໄຮວ່າເພິ່ນຄວນໄປທາງໃດເພື່ອລ່າສັດ. ລີໄຮໂສກເສົ້າທີ່ເພິ່ນໄດ້ເວົ້າຈົ່ມ. ເພິ່ນໄດ້ກັບໃຈ ແລະ ໄດ້ທູນຂໍຄວາມຊ່ວຍເຫລືອຈາກພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ບອກລີໄຮໃຫ້ເບິ່ງເລຍໂຮນາ. ຂ່າວສານໄດ້ຖືກຂຽນໄວ້ເທິງເລຍໂຮນາ. ຄອບຄົວຮຽນຮູ້ວ່າເລຍໂຮນາທຳງານພຽງແຕ່ໃນເວລາທີ່ເຂົາເຈົ້າມີສັດທາໃນພຣະຜູ້ເປັນເຈົ້າ ແລະ ເຊື່ອຟັງພຣະບັນຍັດເທົ່ານັ້ນ.
ບາງຄັ້ງພຣະຜູ້ເປັນເຈົ້າໄດ້ປ່ຽນຂ່າວສານຢູ່ເທິງເລຍໂຮນາ ເພື່ອຊ່ວຍເຂົາເຈົ້າລະຫວ່າງການເດີນທາງຂອງເຂົາເຈົ້າ. ເລຍໂຮນາໄດ້ຊ່ວຍນີໄຟໃຫ້ຮູ້ຈັກບ່ອນທີ່ຈະໄປລ່າສັດ. ເພິ່ນໄດ້ນຳອາຫານມາໃຫ້ກິນ, ແລະ ເຂົາເຈົ້າທຸກຄົນດີໃຈ. ເຂົາເຈົ້າໄດ້ກັບໃຈ ແລະ ຂອບພຣະໄທພຣະຜູ້ເປັນເຈົ້າ.