ສາດສະດາຊາມູເອນ

ການສິດສອນກ່ຽວກັບການກຳເນີດ ແລະ ການສິ້ນພຣະຊົນຂອງພຣະເຢຊູ

ສາດສະດາຊາວເລມັນຄົນໜຶ່ງຊື່ ຊາມູເອນ ໄດ້ໄປສິດສອນຊາວນີໄຟຢູ່ໃນເມືອງເຊຣາເຮັມລາ. ເພິ່ນໄດ້ສິດສອນກ່ຽວກັບການກັບໃຈ. ຊາວນີໄຟບໍ່ຟັງ ແລະ ໄດ້ໂຍນເພິ່ນອອກຈາກເມືອງ.

ຮີລາມັນ 13:1–2

ຊາມູເອນກຳລັງຈະກັບຄືນໄປຫາຜູ້ຄົນຂອງເພິ່ນ. ແຕ່ພຣະຜູ້ເປັນເຈົ້າໄດ້ບອກເພິ່ນໃຫ້ກັບຄືນໄປສິດສອນຊາວນີໄຟ.

ຮີລາມັນ 13:2–3

ຊາມູເອນຢືນຢູ່ນອກເມືອງ ແລະ ຫລຽວຂຶ້ນເບິ່ງເມືອງ

ພຣະຜູ້ເປັນເຈົ້າໄດ້ບອກຊາມູເອນວ່າ ພຣະອົງຈະບອກເພິ່ນສິ່ງທີ່ຈະເວົ້າ. ຊາມູເອນໄດ້ເຊື່ອຟັງພຣະຜູ້ເປັນເຈົ້າ. ເພິ່ນໄດ້ກັບຄືນໄປເມືອງເຊຣາເຮັມລາ. ແຕ່ຊາວນີໄຟບໍ່ອະນຸຍາດໃຫ້ເພິ່ນເຂົ້າໄປໃນເມືອງ.

ຮີລາມັນ 13:3–4

ຊາມູເອນຢືນຢູ່ເທິງກຳແພງເມືອງ ແລະ ກ່າວກັບຜູ້ຄົນກຸ່ມໃຫຍ່.

ຊາມູເອນໄດ້ປີນຂຶ້ນກຳແພງເມືອງ. ເພິ່ນໄດ້ກ່າວສິ່ງທີ່ພຣະຜູ້ເປັນເຈົ້າໃສ່ໄວ້ໃນໃຈຂອງເພິ່ນ. ເພິ່ນໄດ້ເຕືອນຜູ້ຄົນວ່າ ພວກເຂົາຈະຖືກທຳລາຍ ເພາະພວກເຂົາກຳລັງເຮັດສິ່ງທີ່ບໍ່ດີ. ເພິ່ນໄດ້ເວົ້າວ່າ ພຽງແຕ່ການກັບໃຈ ແລະ ສັດທາໃນພຣະເຢຊູຄຣິດເທົ່ານັ້ນທີ່ຈະຊ່ວຍພວກເຂົາໃຫ້ລອດໄດ້. ເພິ່ນໄດ້ເວົ້າວ່າພຣະເຢຊູ, ພຣະບຸດຂອງພຣະເຈົ້າ, ຈະມາກຳເນີດໃນຫ້າປີຂ້າງໜ້າ.

ຮີລາມັນ 13:4–11; 14:2, 8, 12–18

ຊາມູເອນຢືນຢູ່ເທິງກຳແພງເມືອງ ແລະ ກ່າວ, ແລະ ມີຮູບພາບພຣະເຢຊູຕອນຍັງເປັນທາລົກ, ນາງມາຣີ, ແລະ ໂຢເຊັບ ຢູ່ທາງຂ້າງເພິ່ນ

ຊາມູເອນໄດ້ກ່າວວ່າ ມັນຈະມີເຄື່ອງໝາຍເຖິງການກຳເນີດຂອງພຣະເຢຊູ. ເພິ່ນໄດ້ບອກຜູ້ຄົນໃຫ້ເບິ່ງຫາເຄື່ອງໝາຍດັ່ງກ່າວ. ເຄື່ອງໝາຍຢ່າງໜຶ່ງຈະເປັນໜຶ່ງຄືນທີ່ບໍ່ມີຄວາມມືດ. ເຄື່ອງໝາຍໜຶ່ງອີກແມ່ນດາວດວງໃໝ່ ແລະ ສິ່ງມະຫັດສະຈັນຈະປະກົດຂຶ້ນໃນທ້ອງຟ້າ.

ຮີລາມັນ 14:3–7

ຊາມູເອນກ່າວ, ແລະ ມີຮູບພາບພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນແລ້ວ ຢູ່ນອກອຸບມຸງຂອງພຣະອົງ ກຳລັງເວົ້າກັບນາງມາຣີໄທມັກດາລາ ຢູ່ທາງຂ້າງເພິ່ນ

ຊາມູເອນຢາກໃຫ້ຜູ້ຄົນມີສັດທາໃນພຣະເຢຊູ. ເພິ່ນໄດ້ເວົ້າວ່າພຣະເຢຊູຈະສິ້ນພຣະຊົນ ແລະ ຟື້ນຄືນພຣະຊົນ ເພື່ອວ່າທຸກຄົນຈະສາມາດໄດ້ຮັບຄວາມລອດ ຖ້າຫາກພວກເຂົາກັບໃຈ.

ຮີລາມັນ 14:8, 12–18

ຊາມູເອນເວົ້າ, ແລະ ມີຮູບພາບເມືອງທີ່ມືດໆ ຢູ່ຂ້າງຫລັງເພິ່ນ

ຊາມູເອນໄດ້ກ່າວວ່າ ຈະມີເຄື່ອງໝາຍເຖິງການສິ້ນພຣະຊົນຂອງພຣະເຢຊູ. ຜູ້ຄົນຈະບໍ່ສາມາດເຫັນດວງຕາເວັນ, ດວງເດືອນ, ຫລື ດວງດາວ. ມັນຈະບໍ່ມີແສງສະຫວ່າງເປັນເວລາສາມມື້.

ຮີລາມັນ 14:20, 27

ຊາມູເອນເວົ້າ, ແລະ ມີຮູບພາບເມືອງທີ່ຖືກໄຟໄໝ້ດ້ວຍຟ້າຜ່າ ຢູ່ທາງຂ້າງເພິ່ນ

ມັນຈະມີຟ້າຮ້ອງ ແລະ ຟ້າແມບເຫລື້ອມ. ແຜ່ນດິນໄຫວຈະເກີດຂຶ້ນ, ແລະ ເມືອງຕ່າງໆຈະຖືກທຳລາຍ.

ຮີລາມັນ 14:21–27

ຊາມູເອນຢືນຢູ່ເທິງກຳແພງເມືອງ, ແລະ ກຸ່ມຜູ້ຄົນຢູ່ຂ້າງລຸ່ມທີ່ໃຈຮ້າຍພະຍາຍາມຍິງລູກທະນູ ແລະ ໂຍນກ້ອນຫີນໃສ່ເພິ່ນ, ແຕ່ກໍບໍ່ຖືກຊາມູເອນ

ບາງຄົນເຊື່ອຊາມູເອນ, ແຕ່ຊາວນີໄຟຫລາຍຄົນໃຈຮ້າຍໃຫ້ເພິ່ນ. ພວກເຂົາໄດ້ໂຍນກ້ອນຫີນ ແລະ ຍິງລູກທະນູໄປໃສ່ເພິ່ນ. ພຣະຜູ້ເປັນເຈົ້າໄດ້ປົກປ້ອງຊາມູເອນ ຂະນະທີ່ເພິ່ນຢືນຢູ່ເທິງກຳແພງ. ຫີນ ແລະ ລູກທະນູບໍ່ສາມາດແຕະຕ້ອງເພິ່ນໄດ້.

ຮີລາມັນ 16:1–2

ບາງຄົນອະທິຖານ ແລະ ເບິ່ງຄືເປັນຫ່ວງ, ບາງຄົນໃຈຮ້າຍ, ແລະ ຊາມູເອນໜີໄປ

ເມື່ອບໍ່ມີຄົນໃດສາມາດແຕະຕ້ອງຊາມູເອນ, ຫລາຍຄົນຕື່ມອີກໄດ້ເຊື່ອຖ້ອຍຄຳຂອງເພິ່ນ. ແຕ່ຄົນສ່ວນຫລາຍຍັງໃຈຮ້າຍຢູ່. ພວກເຂົາໄດ້ພະຍາຍາມຈັບຊາມູເອນ ແລະ ມັດເພິ່ນໄວ້. ຊາມູເອນໜີໄປໄດ້ ແລະ ເພິ່ນໄດ້ກັບໄປບ້ານ. ເພິ່ນໄດ້ສືບຕໍ່ສິດສອນຜູ້ຄົນຂອງເພິ່ນ.

ຮີລາມັນ 16:3, 6–8

ສາດສະດາຄົນໜຶ່ງຊື່ ນີໄຟ ເວົ້າກັບຜູ້ຄົນຢູ່ໃກ້ຫ້ວຍນ້ຳ

ຊາວນີໄຟຜູ້ທີ່ເຊື່ອຊາມູເອນໄດ້ກັບໃຈ ແລະ ໄດ້ຮັບບັບຕິສະມາຈາກສາດສະດານີໄຟ. ພວກເຂົາເຊື່ອໃນພຣະເຢຊູ ແລະ ເຝົ້າເບິ່ງເຄື່ອງໝາຍເຖິງການກຳເນີດຂອງພຣະເຢຊູ ທີ່ຊາມູເອນໄດ້ບອກພວກເຂົາ.

ຮີລາມັນ 16:1, 3–5; 3 ນີໄຟ 1:8