“ເຮືອໃຫຍ່ເພື່ອຂ້າມທະເລ,” ເລື່ອງພຣະຄຳພີມໍມອນ (2023)
“ເຮືອໃຫຍ່ເພື່ອຂ້າມທະເລ,” ເລື່ອງພຣະຄຳພີມໍມອນ
ເຮືອໃຫຍ່ເພື່ອຂ້າມທະເລ
ການກຽມພ້ອມເພື່ອໄປຫາແຜ່ນດິນແຫ່ງຄຳສັນຍາ
ອຸດົມສົມບູນ ແມ່ນດິນແດນທີ່ເຕັມໄປດ້ວຍໝາກໄມ້ ແລະ ນ້ຳເຜິ້ງ. ມັນເປັນບ່ອນທີ່ໜ້າຢູ່. ຄອບຄົວຂອງລີໄຮ ແລະ ຊາໄຣຢາໄດ້ອາໄສຢູ່ໃກ້ທະເລ ແລະ ມີທຸກສິ່ງທີ່ເຂົາເຈົ້າຕ້ອງການ.
ຫລັງຈາກຫລາຍມື້, ພຣະຜູ້ເປັນເຈົ້າໄດ້ບອກນີໄຟໃຫ້ໄປຍັງພູເພື່ອອະທິຖານ. ຢູ່ທີ່ນັ້ນ, ພຣະຜູ້ເປັນເຈົ້າໄດ້ບອກເພິ່ນໃຫ້ສ້າງເຮືອໃຫຍ່ ເພື່ອນຳຄອບຄົວຂອງເພິ່ນຂ້າມທະເລ.
ພຣະຜູ້ເປັນເຈົ້າໄດ້ສະແດງໃຫ້ນີໄຟເຫັນວິທີການສ້າງເຮືອໃຫຍ່. ແຕ່ນີໄຟບໍ່ຮູ້ວ່າຈະໄປຊອກຫາໂລຫະໄດ້ຢູ່ໃສເພື່ອມາເຮັດເປັນເຄື່ອງມື. ພຣະຜູ້ເປັນເຈົ້າໄດ້ສະແດງໃຫ້ນີໄຟຮູ້ວ່າ ຈະໄປຊອກຫາໂລຫະໄດ້ຢູ່ບ່ອນໃດ.
ຕໍ່ມາ, ນີໄຟໄດ້ກໍ່ໄຟເພື່ອເຮັດເຄື່ອງມື. ເລມັນ ແລະ ເລມູເອນໄດ້ຫລຽວເບິ່ງນີໄຟນ້ອງຊາຍຂອງພວກເຂົາ. ພວກເຂົາບໍ່ຢາກຊ່ວຍເພິ່ນສ້າງເຮືອໃຫຍ່. ພວກເຂົາຄິດວ່າມັນເປັນແນວຄິດບໍ່ດີທີ່ຈະພະຍາຍາມຂ້າມນ້ຳທະເລ.
ເລມັນ ແລະ ເລມູເອນບໍ່ເຊື່ອວ່າພຣະຜູ້ເປັນເຈົ້າໄດ້ບອກນີໄຟໃຫ້ສ້າງເຮືອໃຫຍ່. ນີໄຟໄດ້ຖາມພວກເຂົາວ່າ ເປັນຫຍັງພວກເຂົາຍັງບໍ່ມີສັດທາໃນພຣະຜູ້ເປັນເຈົ້າ. ເພິ່ນໄດ້ເຕືອນພວກອ້າຍຂອງເພິ່ນວ່າ ພວກເຂົາໄດ້ເຫັນທູດສະຫວັນ ແລະ ຮູ້ເຖິງອຳນາດຂອງພຣະຜູ້ເປັນເຈົ້າແລ້ວ. ເລມັນ ແລະ ເລມູເອນໃຈຮ້າຍທີ່ສຸດຈົນຢາກຂ້ານີໄຟ.
ແຕ່ນີໄຟໄດ້ເຕັມໄປດ້ວຍອຳນາດຂອງພຣະເຈົ້າ. ນີໄຟໄດ້ເຕືອນເລມັນ ແລະ ເລມູເອນບໍ່ໃຫ້ແຕະຕ້ອງເພິ່ນ. ພວກເຂົາຢ້ານ ແລະ ບໍ່ກ້າແຕະຕ້ອງນີໄຟ ເປັນເວລາຫລາຍມື້. ແລ້ວພຣະຜູ້ເປັນເຈົ້າໄດ້ບອກນີໄຟໃຫ້ເດ່ມືອອກໄປຫາພວກອ້າຍຂອງເພິ່ນ. ເມື່ອນີໄຟເດ່ມືອອກໄປຫາພວກເຂົາ, ພວກເຂົາໄດ້ສັ່ນສາຍໂດຍອຳນາດຂອງພຣະຜູ້ເປັນເຈົ້າ.
ເລມັນ ແລະ ເລມູເອນໄດ້ນະມັດສະການພຣະຜູ້ເປັນເຈົ້າ ແລະ ຊ່ວຍສ້າງເຮືອໃຫຍ່. ນີໄຟໄດ້ອະທິຖານຫາພຣະຜູ້ເປັນເຈົ້າຫລາຍຄັ້ງເພື່ອຂໍຄວາມຊ່ວຍເຫລືອ. ເຮືອໃຫຍ່ທີ່ຄອບຄົວຂອງນີໄຟໄດ້ສ້າງນັ້ນສວຍງາມຫລາຍ. ຫລັງຈາກຫລາຍມື້, ເຮືອໃຫຍ່ກໍສຳເລັດ, ແລະ ເຂົາເຈົ້າເຫັນວ່າມັນດີ. ຄອບຄົວຂອງນີໄຟຮູ້ວ່າພຣະຜູ້ເປັນເຈົ້າໄດ້ຊ່ວຍເຫລືອເຂົາເຈົ້າ.