“ຢາໂຄບ ແລະ ເຊເຣັມ,” ເລື່ອງພຣະຄຳພີມໍມອນ (2023)
ຢາໂຄບ ແລະ ເຊເຣັມ
ປະຈັກພະຍານຂອງສາດສະດາເຖິງພຣະເຢຊູຄຣິດ
ຢາໂຄບເປັນສາດສະດາທີ່ໄດ້ເຫັນພຣະເຢຊູຄຣິດ. ເພິ່ນຕ້ອງການໃຫ້ຜູ້ຄົນເຊື່ອໃນພຣະເຢຊູ. ຢາໂຄບໄດ້ສິດສອນຜູ້ຄົນໃຫ້ຮັກສາພຣະບັນຍັດຂອງພຣະເຈົ້າ. ເພິ່ນໄດ້ເຮັດວຽກໜັກເພື່ອສິດສອນຜູ້ຄົນກ່ຽວກັບພຣະເຢຊູ.
2 ນີໄຟ 11:2–3; ຢາໂຄບ 1:1–8, 17–19
ມີມື້ໜຶ່ງ, ຊາຍຄົນໜຶ່ງຊື່ ເຊເຣັມ ໄດ້ເລີ່ມສິດສອນຜູ້ຄົນ. ແຕ່ເຊເຣັມໄດ້ສິດສອນວ່າພຣະເຢຊູບໍ່ມີຈິງ. ເຊເຣັມເປັນຄົນເວົ້າເກັ່ງ, ແລະ ຊາວນີໄຟຫລາຍຄົນເຊື່ອສິ່ງທີ່ລາວເວົ້າ. ເປັນເພາະລາວ, ຫລາຍຄົນຈຶ່ງຢຸດເຊື່ອໃນພຣະເຢຊູ. ເຊເຣັມກໍຕ້ອງການໃຫ້ຢາໂຄບຢຸດເຊື່ອໃນພຣະເຢຊູເຊັ່ນກັນ.
ເຊເຣັມໄດ້ເວົ້າວ່າ ບໍ່ມີໃຜສາມາດຮູ້ໄດ້ວ່າຈະມີຫຍັງເກີດຂຶ້ນໃນອະນາຄົດ. ລາວເວົ້າສິ່ງນີ້ໝາຍຄວາມວ່າ ບໍ່ມີໃຜຮູ້ວ່າພຣະເຢຊູມີຈິງ, ເພາະພຣະເຢຊູຍັງບໍ່ໄດ້ມາສູ່ໂລກເທື່ອ. ແຕ່ຢາໂຄບເວົ້າວ່າ ພຣະຄຳພີ ແລະ ສາດສະດາທັງໝົດໄດ້ສິດສອນກ່ຽວກັບພຣະເຢຊູ. ພຣະເຈົ້າໄດ້ສະແດງໃຫ້ຢາໂຄບເຫັນວ່າ ພຣະເຢຊູຈະມາສູ່ໂລກ.
ເຊເຣັມຍັງຈະບໍ່ເຊື່ອ. ລາວຕ້ອງການໃຫ້ຢາໂຄບສະແດງໃຫ້ລາວເຫັນເຄື່ອງໝາຍວ່າ ພຣະເຢຊູມີຈິງ.
ຢາໂຄບໄດ້ກ່າວວ່າ ເຊເຣັມຮູ້ວ່າພຣະເຢຊູຈະມາ ແລະ ບໍ່ຈຳເປັນຕ້ອງມີເຄື່ອງໝາຍ. ແຕ່ຢາໂຄບໄດ້ກ່າວວ່າ ພຣະເຈົ້າຈະເຮັດໃຫ້ເຊເຣັມເປັນລົມ ເພື່ອສະແດງໃຫ້ເຫັນວ່າພຣະເຈົ້າມີອຳນາດ ແລະ ພຣະເຢຊູມີຈິງ.
ທັນໃດນັ້ນ, ເຊເຣັມກໍເກີດບໍ່ສະບາຍ ແລະ ລົ້ມລົງຢູ່ກັບພື້ນດິນ. ຫລັງຈາກຫລາຍມື້, ລາວຮູ້ວ່າລາວກຳລັງຈະຕາຍ. ລາວບອກຜູ້ຄົນວ່າ ລາວໄດ້ຖືກຫລອກລວງໂດຍຊາຕານ. ລາວເວົ້າວ່າ ລາວໄດ້ຕົວະພຣະເຈົ້າ. ລາວຮູ້ຕະຫລອດເວລາວ່າ ພຣະເຢຊູມີຈິງ. ແລ້ວເຊເຣັມໄດ້ຕາຍໄປ. ຜູ້ຄົນໄດ້ອ່ານພຣະຄຳພີ ແລະ ເຊື່ອໃນພຣະເຢຊູ.