“ເອໂນດ,” ເລື່ອງພຣະຄຳພີມໍມອນ (2023)
“ເອໂນດ,” ເລື່ອງພຣະຄຳພີມໍມອນ
ເອໂນດ
ຄຳອະທິຖານທີ່ຍິ່ງໃຫຍ່ຫາພຣະຜູ້ເປັນເຈົ້າ
ຢາໂຄບໄດ້ມອບແຜ່ນຈາລຶກໃຫ້ເອໂນດ ລູກຊາຍຂອງເພິ່ນ. ເອໂນດໄດ້ຂຽນໃສ່ໃນນັ້ນຄືກັນກັບທີ່ຢາໂຄບໄດ້ເຮັດ. ມີມື້ໜຶ່ງ, ເອໂນດໄດ້ໄປລ່າສັດຢູ່ໃນປ່າ. ເພິ່ນຈື່ໄດ້ວ່າບິດາຂອງເພິ່ນໄດ້ສິດສອນກ່ຽວກັບພຣະຜູ້ເປັນເຈົ້າ. ຢາໂຄບໄດ້ສິດສອນເອໂນດວ່າການຕິດຕາມພຣະຜູ້ເປັນເຈົ້າຈະນຳຄວາມຊື່ນຊົມມາໃຫ້ເພິ່ນ.
ເອໂນດຢາກຮູ້ສຶກຊື່ນຊົມດັ່ງທີ່ບິດາຂອງເພິ່ນໄດ້ກ່າວເຖິງ. ເພິ່ນໄດ້ຕັດສິນໃຈອະທິຖານຫາພຣະຜູ້ເປັນເຈົ້າ. ເພິ່ນໄດ້ອະທິຖານໝົດມື້ ແລະ ຈົນເຖິງຕອນຄ່ຳ.
ພຣະຜູ້ເປັນເຈົ້າໄດ້ບອກເອໂນດວ່າ ບາບຂອງເພິ່ນໄດ້ຖືກອະໄພໃຫ້ແລ້ວ. ເອໂນດຮູ້ສຶກດີໃຈຫລາຍ. ເອໂນດໄດ້ຮັບພອນຍ້ອນຄວາມຊື່ສັດຂອງເພິ່ນໃນພຣະເຢຊູຄຣິດ.
ເອໂນດຕ້ອງການໃຫ້ຊາວນີໄຟຮູ້ສຶກມີຄວາມສຸກເຊັ່ນກັນ. ເພິ່ນໄດ້ອະທິຖານຕໍ່ໄປ. ເພິ່ນໄດ້ຂໍໃຫ້ພຣະຜູ້ເປັນເຈົ້າຊ່ວຍໃຫ້ຊາວນີໄຟຮູ້ສຶກຊື່ນຊົມເຊັ່ນດຽວກັນ.
ພຣະຜູ້ເປັນເຈົ້າໄດ້ບອກເອໂນດວ່າ ພຣະອົງຈະສະຖິດຢູ່ກັບຊາວນີໄຟ ຖ້າຫາກພວກເຂົາຮັກສາພຣະບັນຍັດຂອງພຣະອົງ. ເມື່ອເອໂນດໄດ້ຍິນແນວນີ້, ສັດທາຂອງເພິ່ນໃນພຣະຜູ້ເປັນເຈົ້າເລີ່ມເຂັ້ມແຂງຫລາຍຂຶ້ນ.
ເອໂນດໄດ້ອະທິຖານອີກຄັ້ງ. ເພິ່ນໄດ້ຂໍໃຫ້ພຣະຜູ້ເປັນເຈົ້າອວຍພອນຊາວເລມັນ ແລະ ຮັກສາການຂຽນຢູ່ໃນແຜ່ນຈາລຶກໃຫ້ປອດໄພ. ເພິ່ນຢາກໃຫ້ຊາວເລມັນສາມາດອ່ານແຜ່ນຈາລຶກ ແລະ ເຊື່ອໃນພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ສັນຍາກັບເອໂນດວ່າ ຊາວເລມັນຈະໄດ້ອ່ານການຂຽນໃນມື້ໜຶ່ງ.