“ພວກຜູ້ຍິງໃນຖິ່ນແຫ້ງແລ້ງກັນດານ,” ເລື່ອງພຣະຄຳພີມໍມອນ (2023)
ພວກຜູ້ຍິງໃນຖິ່ນແຫ້ງແລ້ງກັນດານ
ການເດີນໄປກັບພຣະຜູ້ເປັນເຈົ້າ
ພວກລູກສາວຂອງອິດຊະມາເອນໄດ້ເດີນທາງໄປກັບຄອບຄົວຂອງພວກເຂົາໃນຖິ່ນແຫ້ງແລ້ງກັນດານ. ການເດີນທາງແມ່ນຍາກລຳບາກ. ຫລັງຈາກຊົ່ວໄລຍະໜຶ່ງ, ພວກເຂົາກໍໄດ້ແຕ່ງງານກັບພວກລູກຊາຍຂອງລີໄຮ ແລະ ຊາໄຣຢາ.
ມີມື້ໜຶ່ງ, ອິດຊະມາເອນໄດ້ເສຍຊີວິດໄປ. ພວກລູກສາວຂອງເພິ່ນໂສກເສົ້າຫລາຍ. ພວກເຂົາຄິດຮອດພໍ່ຂອງພວກເຂົາ. ພວກລູກສາວເປັນຫ່ວງວ່າ ພວກເຂົາ ແລະ ຄອບຄົວຂອງພວກເຂົາກໍຈະຕາຍຄືກັນຢູ່ໃນຖິ່ນແຫ້ງແລ້ງກັນດານ. ພວກເຂົາໄດ້ໃຈຮ້າຍໃຫ້ລີໄຮ ແລະ ນີໄຟ, ແລະ ພວກເຂົາຢາກກັບຄືນໄປເຢຣູຊາເລັມ.
ສຸລະສຽງຂອງພຣະຜູ້ເປັນເຈົ້າໄດ້ກ່າວກັບພວກລູກສາວຂອງອິດຊະມາເອນ ແລະ ຄອບຄົວຂອງພວກເຂົາ. ພວກເຂົາໄດ້ກັບໃຈ, ແລະ ພຣະຜູ້ເປັນເຈົ້າກໍໄດ້ອວຍພອນພວກເຂົາ.
ພວກຜູ້ຍິງໄດ້ເກີດລູກຢູ່ໃນຖິ່ນແຫ້ງແລ້ງກັນດານ. ຊາໄຣຢາກໍໄດ້ມີລູກຊາຍອີກສອງຄົນ, ຢາໂຄບ ແລະ ໂຢເຊັບ.
ພຣະຜູ້ເປັນເຈົ້າໄດ້ຊ່ວຍພວກຜູ້ຍິງໃນການເດີນທາງຂອງພວກເຂົາ. ພຣະອົງໄດ້ອວຍພອນພວກເຂົາໃຫ້ມີນ້ຳນົມຫລາຍສຳລັບລູກນ້ອຍຂອງພວກເຂົາ. ພຣະອົງໄດ້ຊ່ວຍພວກຜູ້ຍິງໃຫ້ເຂັ້ມແຂງຂຶ້ນ ຂະນະທີ່ພວກເຂົາເດີນທາງ.
ພຣະຜູ້ເປັນເຈົ້າໄດ້ກ່າວວ່າ ພຣະອົງຈະນຳພາພວກລູກສາວ ແລະ ຄອບຄົວຂອງພວກເຂົາໄປຫາແຜ່ນດິນແຫ່ງຄຳສັນຍາ. ພຣະຜູ້ເປັນເຈົ້າໄດ້ສັນຍາກັບຄອບຄົວເຫລົ່ານັ້ນວ່າ ພວກເຂົາຈະໄດ້ຮັບທຸກສິ່ງທີ່ຈຳເປັນສຳລັບການເດີນທາງຂອງພວກເຂົາ. ພຣະອົງໄດ້ເຮັດໃຫ້ຊີ້ນທີ່ຫາມາໄດ້ມີລົດແຊບ, ແລະ ພຣະອົງໄດ້ນຳພາພວກເຂົາ.
ຫລັງຈາກໄດ້ຢູ່ໃນຖິ່ນແຫ້ງແລ້ງກັນດານເປັນເວລາແປດປີ, ຄອບຄົວເຫລົ່ານັ້ນກໍໄດ້ໄປເຖິງທະເລ. ພວກຜູ້ຍິງມີຄວາມປິຕິຍິນດີກັບຄອບຄົວຂອງພວກເຂົາ. ດິນແດນຢູ່ແຄມທະເລນັ້ນສວຍງາມຫລາຍ. ພວກເຂົາເອີ້ນມັນວ່າ ອຸດົມສົມບູນ ຍ້ອນມັນເຕັມໄປດ້ວຍໝາກໄມ້ ແລະ ນ້ຳເຜິ້ງທີ່ຈະກິນ. ພຣະຜູ້ເປັນເຈົ້າໄດ້ຈັດຕຽມທຸກສິ່ງໄວ້ໃຫ້ພວກເຂົາ.