“ແອວມາ ແລະ ຜູ້ຄົນຂອງເພິ່ນ,” ເລື່ອງພຣະຄຳພີມໍມອນ (2023)
ແອວມາ ແລະ ຜູ້ຄົນຂອງເພິ່ນ
ຄວາມເຂັ້ມແຂງຈາກພຣະເຈົ້າໃນຊ່ວງເວລາທີ່ຫຍຸ້ງຍາກ
ແອວມາ ແລະ ຜູ້ຄົນຂອງເພິ່ນໄດ້ອາໄສຢູ່ໃນແຜ່ນດິນທີ່ສວຍງາມ. ພວກເຂົາໄດ້ປູກພືດພັນ ແລະ ສ້າງບ້ານເຮືອນ. ແອວມາເປັນປະໂລຫິດຂອງພຣະເຈົ້າ. ເພິ່ນໄດ້ສິດສອນຜູ້ຄົນຂອງເພິ່ນໃຫ້ຮັກກັນແລະກັນ. ຜູ້ຄົນໄດ້ເຊື່ອຟັງແອວມາ ແລະ ຮັກສາພຣະບັນຍັດຂອງພຣະເຈົ້າ. ຄອບຄົວຂອງພວກເຂົາໄດ້ເຕີບໂຕ, ແລະ ພວກເຂົາໄດ້ສ້າງເມືອງ.
ມື້ໜຶ່ງ, ກອງທັບຊາວເລມັນໄດ້ມາ. ພວກເຂົາຫລົງທາງ. ຊາວເລມັນໄດ້ສັນຍາວ່າຈະບໍ່ເຮັດຫຍັງໃຫ້ຜູ້ຄົນຂອງແອວມາ ຖ້າຫາກແອວມາຊ່ວຍບອກທາງກັບບ້ານໃຫ້ພວກເຂົາ. ແອວມາໄດ້ບອກທາງໃຫ້ຊາວເລມັນເພື່ອກັບໄປຫາແຜ່ນດິນຂອງພວກເຂົາ.
ຊາວເລມັນບໍ່ໄດ້ຮັກສາຄຳສັນຍາຂອງພວກເຂົາ. ກົງກັນຂ້າມ, ພວກເຂົາໄດ້ຍຶດເອົາແຜ່ນດິນ ແລະ ໄດ້ຈັດທະຫານເຝົ້າຍາມຜູ້ຄົນຂອງແອວມາ. ພວກເຂົາຍັງໄດ້ແຕ່ງຕັ້ງຊາວນີໄຟຄົນໜຶ່ງຊື່ ອະມິວລອນ ໃຫ້ເປັນກະສັດຂອງຜູ້ຄົນຂອງແອວມານຳອີກ. ອະມິວລອນເປັນຜູ້ນຳຂອງພວກປະໂລຫິດປອມ. ເພິ່ນກັບພວກປະໂລຫິດຂອງເພິ່ນໄດ້ຂ້າສາດສະດາຂອງພຣະເຈົ້າ ແລະ ໄດ້ເຮັດຫລາຍສິ່ງທີ່ບໍ່ດີ.
ໂມໄຊຢາ 17:12–13; 23:31–32, 37–39; 24:9
ອະມິວລອນໄດ້ໃຈຮ້າຍໃຫ້ແອວມາ. ເພິ່ນໄດ້ສັ່ງໃຫ້ຜູ້ຄົນຂອງແອວມາທຳງານໜັກ ແລະ ໂຫດຮ້າຍກັບພວກເຂົາ. ມັນຫຍຸ້ງຍາກສຳລັບຜູ້ຄົນຂອງແອວມາ.
ພວກເຂົາໄດ້ອະທິຖານຂໍຄວາມຊ່ວຍເຫລືອຈາກພຣະເຈົ້າ. ອະມິວລອນໄດ້ບອກພວກເຂົາໃຫ້ເຊົາອະທິຖານ. ເພິ່ນເວົ້າວ່າ ຖ້າຄົນໃດອະທິຖານຄົນນັ້ນຈະຖືກຂ້າ.
ແອວມາ ແລະ ຜູ້ຄົນຂອງເພິ່ນໄດ້ຢຸດອະທິຖານອອກສຽງ. ແທນນັ້ນ, ພວກເຂົາໄດ້ອະທິຖານຢູ່ໃນໃຈ. ພຣະເຈົ້າໄດ້ຍິນຄຳອະທິຖານຂອງພວກເຂົາ. ພຣະອົງໄດ້ປອບໂຍນພວກເຂົາ ແລະ ສັນຍາທີ່ຈະຊ່ວຍພວກເຂົາໃຫ້ຫລົບໜີໄປ. ພຣະເຈົ້າໄດ້ເຮັດໃຫ້ວຽກງານໜັກຂອງພວກເຂົາງ່າຍຂຶ້ນ. ຜູ້ຄົນມີຄວາມອົດທົນ ແລະ ມີຄວາມສຸກ ຂະນະທີ່ພວກເຂົາເຊື່ອຟັງພຣະເຈົ້າ. ພວກເຂົາຮູ້ວ່າພຣະອົງກຳລັງຊ່ວຍພວກເຂົາ.
ຜູ້ຄົນຂອງແອວມາໄດ້ໄວ້ວາງໃຈພຣະເຈົ້າ ແລະ ມີສັດທາອັນແຮງກ້າໃນພຣະອົງ. ມື້ໜຶ່ງ, ພຣະເຈົ້າໄດ້ບອກພວກເຂົາວ່າ ມັນເຖິງເວລາທີ່ຈະໜີ. ຄືນນັ້ນ, ແອວມາ ແລະ ຜູ້ຄົນຂອງເພິ່ນໄດ້ກຽມພ້ອມ. ພວກເຂົາໄດ້ເຕົ້າໂຮມສັດ ແລະ ອາຫານຂອງພວກເຂົາທັງໝົດ. ໃນຕອນເຊົ້າ, ພຣະເຈົ້າໄດ້ເຮັດໃຫ້ຊາວເລມັນນອນຫລັບສະໜິດ. ແລ້ວແອວມາ ແລະ ຜູ້ຄົນຂອງເພິ່ນໄດ້ລັກໜີ ແລະ ເດີນທາງໝົດມື້.
ຄືນນັ້ນ, ຜູ້ຊາຍ, ຜູ້ຍິງ, ແລະ ເດັກນ້ອຍທຸກຄົນໄດ້ຂອບພຣະໄທພຣະເຈົ້າ. ພວກເຂົາຮູ້ວ່າພຣະເຈົ້າເທົ່ານັ້ນທີ່ສາມາດຊ່ວຍພວກເຂົາໄດ້. ພວກເຂົາໄດ້ເດີນທາງຫລາຍມື້ ແລະ ໄດ້ມາເຖິງແຜ່ນດິນເຊຣາເຮັມລາ. ຊາວນີໄຟໄດ້ຕ້ອນຮັບພວກເຂົາ, ແລະ ແອວມາໄດ້ສິດສອນທຸກຄົນກ່ຽວກັບການມີສັດທາໃນພຣະເຢຊູຄຣິດ. ຫລາຍຄົນເຊື່ອ ແລະ ໄດ້ຮັບບັບຕິສະມາ.