ນີໄຟ ແລະ ແຜ່ນຈາລຶກທອງເຫລືອງ

ການຮຽນຮູ້ທີ່ຈະຕິດຕາມພຣະວິນຍານ

ນີໄຟກຳລັງມຸ້ງໄປຫາອາຄານ ແລະ ພວກອ້າຍກຳລັງຊອມເບິ່ງ

ເລມັນ, ເລມູເອນ, ແຊມ, ແລະ ນີໄຟໄດ້ກັບໄປເຢຣູຊາເລັມໃນຕອນກາງຄືນ. ນີໄຟໄດ້ໄປຫາເຮືອນຂອງລາບານ ຂະນະທີ່ພວກອ້າຍຂອງເພິ່ນລີ້ຊ່ອນຕົວຢູ່ນອກກຳແພງ.

1 ນີໄຟ 4:4–5

ນີໄຟກຳລັງຫລຽວເບິ່ງລາບານທີ່ນອນຟຸບຢູ່ເທິງພື້ນດິນ

ນີໄຟໄດ້ໃຫ້ພຣະວິນຍານຊົງນຳເພິ່ນ. ເພິ່ນບໍ່ຮູ້ວ່າ ເພິ່ນຄວນເຮັດຫຍັງ, ແຕ່ເພິ່ນຮູ້ວ່າພຣະຜູ້ເປັນເຈົ້າຈະຊ່ວຍເພິ່ນໃຫ້ໄດ້ຮັບແຜ່ນຈາລຶກທອງເຫລືອງ.

1 ນີໄຟ 4:6

ເມື່ອນີໄຟເຂົ້າໄປໃກ້ເຮືອນຂອງລາບານ, ເພິ່ນໄດ້ເຫັນລາບານນອນຟຸບຢູ່ເທິງພື້ນດິນ. ລາບານເມົາເຫລົ້າ. ນີໄຟໄດ້ເຫັນດາບຂອງລາບານ ແລະ ຈັບມັນຂຶ້ນມາ.

1 ນີໄຟ 4:7–9

ຂະນະທີ່ນີໄຟຫລຽວເບິ່ງດາບ, ພຣະວິນຍານໄດ້ບອກເພິ່ນໃຫ້ຂ້າລາບານ. ແຕ່ນີໄຟບໍ່ຢາກຂ້າລາວ. ພຣະວິນຍານໄດ້ບອກນີໄຟວ່າ ຈະດີກວ່າຖ້າລາບານຕາຍ ແທນທີ່ຄອບຄົວຂອງນີໄຟຈະບໍ່ມີພຣະຄຳພີ. ເຂົາເຈົ້າຕ້ອງການພຣະບັນຍັດຂອງພຣະເຈົ້າ ທີ່ຖືກຂຽນໄວ້ຢູ່ໃນແຜ່ນຈາລຶກທອງເຫລືອງ.

1 ນີໄຟ 4:10–11, 13–17

ນີໄຟຮູ້ວ່າລາບານໄດ້ພະຍາຍາມຂ້າເພິ່ນ. ລາບານບໍ່ພຽງແຕ່ໄດ້ລັກເອົາຊັບສົມບັດຂອງເຂົາເຈົ້າເທົ່ານັ້ນ ແຕ່ຍັງບໍ່ເຊື່ອຟັງພຣະບັນຍັດຂອງພຣະເຈົ້ານຳອີກ.

1 ນີໄຟ 4:11

ພຣະວິນຍານໄດ້ບອກນີໄຟອີກວ່າໃຫ້ຂ້າລາບານ. ນີໄຟຮູ້ວ່າພຣະຜູ້ເປັນເຈົ້າໄດ້ຈັດກຽມທາງໃຫ້ເພິ່ນ ເພື່ອຈະໄດ້ຮັບແຜ່ນຈາລຶກທອງເຫລືອງ. ເພິ່ນໄດ້ເລືອກເຊື່ອຟັງພຣະວິນຍານ. ນີໄຟໄດ້ຂ້າລາບານ ແລະ ໄດ້ເອົາເຄື່ອງນຸ່ງຂອງລາບານມາໃສ່.

1 ນີໄຟ 4:12–13, 17–19

ແລ້ວນີໄຟໄດ້ໄປຫາຄັງສົມບັດຂອງລາບານ ແລະ ໄດ້ພົບກັບໂຊຣຳ ຄົນໃຊ້ຂອງລາບານ. ນີໄຟໄດ້ກະທຳ ແລະ ເວົ້າຈາແບບລາບານ.

1 ນີໄຟ 4:20–23, 35

ນີໄຟໄດ້ບອກໂຊຣຳວ່າ ເພິ່ນຕ້ອງການແຜ່ນຈາລຶກທອງເຫລືອງ. ແລ້ວນີໄຟໄດ້ບອກໂຊຣຳໃຫ້ໄປກັບເພິ່ນ. ໂຊຣຳຄິດວ່ານີໄຟແມ່ນລາບານ, ສະນັ້ນລາວຈຶ່ງໄດ້ເຮັດຕາມສິ່ງທີ່ນີໄຟບອກກ່າວ.

1 ນີໄຟ 4:24–26

ເມື່ອນີໄຟ ແລະ ໂຊຣຳໄດ້ອອກມາຈາກເມືອງ, ເລມັນ, ເລມູເອນ, ແລະ ແຊມຄິດວ່ານີໄຟແມ່ນລາບານ. ພວກເຂົາຢ້ານ ແລະ ກຳລັງຈະແລ່ນໜີ.

1 ນີໄຟ 4:28

ອ້າຍນ້ອງເຂົາເຈົ້າກຳລັງເວົ້າລົມກັນ ແລະ ໂຊຣຳກຳລັງຫລຽວກັບຄືນຫລັງ

ນີໄຟໄດ້ເອີ້ນພວກອ້າຍຂອງເພິ່ນ. ເມື່ອພວກເຂົາຮູ້ວ່ານັ້ນແມ່ນນີໄຟ, ພວກເຂົາຈຶ່ງຢຸດແລ່ນ. ແຕ່ແລ້ວໂຊຣຳເລີ່ມຢ້ານກົວ ແລະ ພະຍາຍາມທີ່ຈະກັບຄືນໄປເຢຣູຊາເລັມ.

1 ນີໄຟ 4:29–30

ນີໄຟໄດ້ຢຸດໂຊຣຳໄວ້. ເພິ່ນໄດ້ບອກໂຊຣຳວ່າ ພຣະຜູ້ເປັນເຈົ້າໄດ້ບັນຊາເຂົາເຈົ້າໃຫ້ໄປເອົາແຜ່ນຈາລຶກ. ເພິ່ນໄດ້ເຊື້ອເຊີນໂຊຣຳໃຫ້ໄປຫາແຜ່ນດິນແຫ່ງຄຳສັນຍາກັບເຂົາເຈົ້າ. ໂຊຣຳຮູ້ວ່າ ລາວສາມາດເປັນອິດສະລະ, ບໍ່ແມ່ນຄົນໃຊ້, ແລະ ໄດ້ສັນຍາວ່າຈະໄປກັບນີໄຟ ແລະ ຄອບຄົວຂອງເພິ່ນ.

1 ນີໄຟ 4:31–37

ນີໄຟ ແລະ ພວກອ້າຍ ແລະ ໂຊຣຳກຳລັງທັກທາຍຊາໄຣຢາ ແລະ ລີໄຮ

ເຂົາເຈົ້າໄດ້ເດີນທາງກັບໄປຫາລີໄຮ ແລະ ຊາໄຣຢາ. ລີໄຮ ແລະ ຊາໄຣຢາດີໃຈຫລາຍທີ່ໄດ້ເຫັນພວກລູກຊາຍຂອງພວກເພິ່ນ. ຊາໄຣຢາຄິດວ່າພວກລູກຊາຍຂອງເພິ່ນໄດ້ຕາຍແລ້ວ. ເພາະພຣະຜູ້ເປັນເຈົ້າໄດ້ປົກປັກຮັກສາພວກລູກຊາຍຂອງເພິ່ນ, ບັດນີ້ເພິ່ນຈຶ່ງໄວ້ວາງໃຈວ່າ ຄອບຄົວຂອງພວກເພິ່ນໄດ້ຖືກບັນຊາໃຫ້ໜີຈາກເຢຣູຊາເລັມ. ຄອບຄົວຂອງລີໄຮ ແລະ ຊາໄຣຢາໄດ້ຖວາຍເຄື່ອງບູຊາເພື່ອຂອບພຣະໄທພຣະຜູ້ເປັນເຈົ້າ.

1 ນີໄຟ 4:38; 5:1–9

ລີໄຮກຳລັງອ່ານແຜ່ນຈາລຶກທອງເຫລືອງກັບຄອບຄົວຂອງເພິ່ນ

ລີໄຮອ່ານແຜ່ນຈາລຶກທອງເຫລືອງ. ເພິ່ນເຫັນວ່າແຜ່ນຈາລຶກມີຄຳສອນຂອງສາດສະດາ. ເພິ່ນກໍໄດ້ຮຽນຮູ້ນຳອີກວ່າ ບັນພະບຸລຸດຄົນໜຶ່ງຂອງເພິ່ນແມ່ນ ໂຢເຊັບ, ຜູ້ທີ່ຖືກຂາຍໄປເອຢິບ ໂດຍພວກອ້າຍຂອງເພິ່ນດົນນານມາແລ້ວ. ລີໄຮຮູ້ວ່າແຜ່ນຈາລຶກທອງເຫລືອງສຳຄັນຫລາຍຂະໜາດໃດ. ເພິ່ນຮູ້ວ່າພຣະຜູ້ເປັນເຈົ້າຕ້ອງການໃຫ້ຄອບຄົວຂອງເພິ່ນມີພຣະບັນຍັດ.

1 ນີໄຟ 5:10–22