“ນາຍທັບໂມໂຣໄນ ແລະ ເຊຣາເຮັມນາ,” ເລື່ອງພຣະຄຳພີມໍມອນ (2023)
ນາຍທັບໂມໂຣໄນ ແລະ ເຊຣາເຮັມນາ
ສົງຄາມ ແລະ ຄຳສັນຍາທີ່ຈະດຳລົງຊີວິດຢ່າງສັນຕິ
ເຊຣາເຮັມນາແມ່ນຜູ້ນຳຂອງກອງທັບຊາວເລມັນ. ລາວຕ້ອງການປົກຄອງຊາວນີໄຟ ແລະ ໃຫ້ພວກເຂົາຮັບໃຊ້ຜູ້ຄົນຂອງລາວ. ເຊຣາເຮັມນາໄດ້ນຳພາກອງທັບຂອງລາວໄປໂຈມຕີຊາວນີໄຟ.
ຊາວນີໄຟຕ້ອງການທີ່ຈະປົກປ້ອງບ້ານເຮືອນ, ຄອບຄົວ, ແລະ ສາດສະໜາຂອງພວກເຂົາ. ພວກເຂົາຮູ້ວ່າພວກເຂົາຈະບໍ່ສາມາດນະມັດສະການພຣະຜູ້ເປັນເຈົ້າ ຖ້າຫາກຊາວເລມັນໄດ້ປົກຄອງພວກເຂົາ. ຊາວນີໄຟໄດ້ເລືອກທີ່ຈະຕໍ່ສູ້ສັດຕູຂອງພວກເຂົາ.
ຊາຍຄົນໜຶ່ງຊື່ ໂມໂຣໄນ ເປັນນາຍທັບຂອງກອງທັບຊາວນີໄຟ. ໂມໂຣໄນໄດ້ເບິ່ງວ່າກອງທັບຂອງເພິ່ນກຽມພ້ອມແລ້ວທີ່ຈະຕໍ່ສູ້.
ທະຫານຂອງໂມໂຣໄນໄດ້ເອົາອາວຸດມານຳ, ແລະ ໂມໂຣໄນໄດ້ມອບເຄື່ອງປ້ອງກັນ ແລະ ໂລ່ທີ່ທົນທານໃຫ້ພວກເຂົາ ເພື່ອປົກປ້ອງພວກເຂົາ.
ໂມໂຣໄນໄດ້ນຳພາກອງທັບຂອງເພິ່ນໄປຕໍ່ສູ້ກັບຊາວເລມັນ. ແຕ່ເມື່ອຊາວເລມັນໄດ້ເຫັນຊາວນີໄຟທີ່ມີເຄື່ອງປ້ອງກັນ ແລະ ໂລ່, ພວກເຂົາບໍ່ກ້າທີ່ຈະຕໍ່ສູ້. ຊາວເລມັນພຽງແຕ່ນຸ່ງເສື້ອຜ້າບາງໆ ແລະ ບໍ່ມີເຄື່ອງປ້ອງກັນເພື່ອປົກປ້ອງພວກເຂົາ.
ຊາວເລມັນໄດ້ໜີໄປ. ພວກເຂົາໄດ້ພະຍາຍາມແອບເຂົ້າໄປໃນດິນແດນບ່ອນອື່ນຂອງແຜ່ນດິນນີໄຟ. ພວກເຂົາຄິດວ່າໂມໂຣໄນຈະບໍ່ຮູ້ວ່າພວກເຂົາໄດ້ໄປບ່ອນໃດ.
ແຕ່ບໍ່ດົນຫລັງຈາກຊາວເລມັນໄດ້ໜີໄປ, ໂມໂຣໄນກໍໄດ້ສົ່ງນັກສືບໃຫ້ຕິດຕາມພວກເຂົາໄປ.
ແລ້ວໂມໂຣໄນໄດ້ສົ່ງຂ່າວສານໄປຫາສາດສະດາແອວມາ. ເພິ່ນຢາກໃຫ້ແອວມາທູນຖາມພຣະຜູ້ເປັນເຈົ້າວ່າຊາວເລມັນກຳລັງວາງແຜນທີ່ຈະເຮັດຫຍັງ. ພຣະຜູ້ເປັນເຈົ້າໄດ້ບອກແອວມາວ່າ ຊາວເລມັນກຳລັງວາງແຜນໂຈມຕີແຜ່ນດິນບ່ອນອ່ອນແອທີ່ເອີ້ນວ່າ ແມນທາຍ. ໂມໂຣໄນໄດ້ເຊື່ອຟັງແອວມາ. ເພິ່ນໄດ້ນຳພາກອງທັບຂອງເພິ່ນໄປຕໍ່ສູ້ກັບຊາວເລມັນ.
ກອງທັບໄດ້ຕໍ່ສູ້. ຊາວເລມັນເຂັ້ມແຂງຫລາຍ ແລະ ໃຈຮ້າຍ. ຊາວນີໄຟເລີ່ມຢ້ານກົວຊາວເລມັນ ແລະ ກຳລັງຈະແລ່ນໜີ. ແຕ່ໂມໂຣໄນໄດ້ເຕືອນພວກເຂົາເຖິງຄອບຄົວ ແລະ ສັດທາຂອງພວກເຂົາ, ສະນັ້ນພວກເຂົາຈຶ່ງຕໍ່ສູ້ຕໍ່ໄປ.
ຊາວນີໄຟໄດ້ອະທິຖານຂໍຄວາມຊ່ວຍເຫລືອຈາກພຣະຜູ້ເປັນເຈົ້າ. ພຣະຜູ້ເປັນເຈົ້າໄດ້ຕອບຄຳອະທິຖານຂອງພວກເຂົາ ແລະ ໄດ້ປະທານພະລັງທີ່ຍິ່ງໃຫຍ່ໃຫ້ພວກເຂົາ. ບັດນີ້ຊາວເລມັນເກີດຄວາມຢ້ານກົວ. ພວກເຂົາຖືກປິດລ້ອມ ແລະ ບໍ່ສາມາດຫລົບໜີໄປໄດ້. ເມື່ອໂມໂຣໄນໄດ້ເຫັນວ່າຊາວເລມັນຢ້ານກົວ, ເພິ່ນຈຶ່ງໄດ້ບອກທະຫານຂອງເພິ່ນໃຫ້ຢຸດການຕໍ່ສູ້. ໂມໂຣໄນບໍ່ຢາກຂ້າຊາວເລມັນ.
ໂມໂຣໄນໄດ້ບອກເຊຣາເຮັມນາວ່າຊາວເລມັນສາມາດໄປໄດ້ ຖ້າຫາກພວກເຂົາສັນຍາວ່າຈະບໍ່ຕໍ່ສູ້ກັບຊາວນີໄຟອີກຕໍ່ໄປ. ເຊຣາເຮັມນາໃຈຮ້າຍ ແລະ ພະຍາຍາມຕໍ່ສູ້ຕໍ່ໄປ, ແຕ່ລາວບໍ່ສາມາດເອົາຊະນະທະຫານຂອງໂມໂຣໄນໄດ້. ແລ້ວເຊຣາເຮັມນາ ແລະ ກອງທັບຂອງລາວຈຶ່ງໄດ້ສັນຍາວ່າຈະດຳລົງຊີວິດຢ່າງສັນຕິ, ແລະ ໂມໂຣໄນກໍໄດ້ປ່ອຍພວກເຂົາໄປ.