“ຊາວອານໄທ-ນີໄຟ-ລີໄຮ,” ເລື່ອງພຣະຄຳພີມໍມອນ (2023)
ຊາວອານໄທ-ນີໄຟ-ລີໄຮ
ຜູ້ຄົນທີ່ໄດ້ເລືອກຮັກສັດຕູຂອງພວກເຂົາ
ຊາວເລມັນຫລາຍຄົນໄດ້ຮຽນຮູ້ກ່ຽວກັບພຣະເຈົ້າ ຈາກອຳໂມນ ແລະ ພວກອ້າຍນ້ອງຂອງລາວ. ຊາວເລມັນເຫລົ່ານີ້ມີສັດທາອັນແຮງກ້າໃນພຣະຜູ້ເປັນເຈົ້າ ແລະ ໄດ້ເຮັດຕາມພຣະບັນຍັດຂອງພຣະເຈົ້າ. ພວກເຂົາມີຊື່ໃໝ່, ສະນັ້ນພວກເຂົາຈຶ່ງເອີ້ນຕົນເອງວ່າ ຊາວອານໄທ-ນີໄຟ-ລີໄຮ ແທນຄຳວ່າຊາວເລມັນ.
ຊາວອານໄທ-ນີໄຟ-ລີໄຮໄດ້ປ່ຽນແປງເພາະສັດທາຂອງພວກເຂົາໃນພຣະເຈົ້າ. ພວກເຂົາໄດ້ກັບໃຈຈາກສິ່ງທີ່ບໍ່ດີທີ່ພວກເຂົາເຄີຍເຮັດ. ພວກເຂົາຮູ້ວ່າພຣະເຈົ້າຮັກພວກເຂົາ ແລະ ໄດ້ອະໄພໃຫ້ພວກເຂົາ.
ຊາວເລມັນໄດ້ໃຈຮ້າຍ ແລະ ກຽມພ້ອມທີ່ຈະໂຈມຕີຊາວອານໄທ-ນີໄຟ-ລີໄຮ. ແທນທີ່ຈະຕໍ່ສູ້, ຊາວອານໄທ-ນີໄຟ-ລີໄຮໄດ້ເຮັດຄຳສັນຍາກັບພຣະເຈົ້າ. ພວກເຂົາເວົ້າວ່າ ພວກເຂົາຈະບໍ່ທຳຮ້າຍຜູ້ຄົນອີກ. ເພື່ອສະແດງສິ່ງນີ້, ພວກເຂົາໄດ້ຝັງອາວຸດຂອງພວກເຂົາ. ພວກເຂົາໄດ້ເລືອກຮັກສັດຕູຂອງພວກເຂົາ ແທນທີ່ຈະທຳຮ້າຍ ຫລື ຂ້າພວກເຂົາ.
ຊາວເລມັນຜູ້ທີ່ບໍ່ເຊື່ອໃນພຣະເຈົ້າໄດ້ໂຈມຕີຊາວອານໄທ-ນີໄຟ-ລີໄຮ.
ຊາວອານໄທ-ນີໄຟ-ລີໄຮໄດ້ມີສັດທາວ່າ ຖ້າຫາກພວກເຂົາຖືກຂ້າ, ພວກເຂົາຈະໄດ້ຢູ່ກັບພຣະເຈົ້າ. ພວກເຂົາໄດ້ຮັກສາຄຳສັນຍາຂອງພວກເຂົາກັບພຣະເຈົ້າ ແລະ ບໍ່ໄດ້ຕໍ່ສູ້ກັບຊາວເລມັນ.
ແທນທີ່ຈະຕໍ່ສູ້, ຊາວອານໄທ-ນີໄຟ-ລີໄຮໄດ້ອະທິຖານ. ເມື່ອຊາວເລມັນໄດ້ເຫັນສິ່ງນີ້, ພວກເຂົາຫລາຍຄົນໄດ້ຢຸດໂຈມຕີ. ພວກເຂົາຮູ້ສຶກບໍ່ດີກັບການຂ້າຜູ້ຄົນ. ຊາວເລມັນເຫລົ່ານັ້ນກໍໄດ້ເລືອກທີ່ຈະບໍ່ທຳຮ້າຍຜູ້ຄົນອີກ. ພວກໄດ້ເຂົ້າຮ່ວມຊາວອານໄທ-ນີໄຟ-ລີໄຮ.
ເມື່ອເວລາຜ່ານໄປ, ຫລາຍຄົນໄດ້ມາໂຈມຕີ. ອຳໂມນ ແລະ ພວກອ້າຍນ້ອງຂອງລາວໂສກເສົ້າທີ່ຊາວອານໄທ-ນີໄຟ-ລີໄຮຮັບທຸກທໍລະມານ. ເຂົາເຈົ້າໄດ້ຂໍໃຫ້ກະສັດພາຜູ້ຄົນຂອງເພິ່ນໄປອາໄສຢູ່ກັບຊາວນີໄຟ. ກະສັດໄດ້ກ່າວວ່າພວກເຂົາຈະໄປຖ້າຫາກພຣະຜູ້ເປັນເຈົ້າຕ້ອງການໃຫ້ເຮັດເຊັ່ນນັ້ນ. ອຳໂມນໄດ້ອະທິຖານ. ພຣະຜູ້ເປັນເຈົ້າໄດ້ກ່າວວ່າ ພວກເຂົາຄວນໄປ ແລະ ວ່າພຣະອົງຈະຮັກສາພວກເຂົາໃຫ້ປອດໄພ.
ຊາວນີໄຟໄດ້ມອບພື້ນທີ່ໃຫ້ຊາວອານໄທ-ນີໄຟ-ລີໄຮອາໄສຢູ່ ແລະ ປົກປ້ອງພວກເຂົາ. ໃນການຕອບສະໜອງ, ຊາວອານໄທ-ນີໄຟ-ລີໄຮໄດ້ມອບອາຫານໃຫ້ຊາວນີໄຟ. ຊາວອານໄທ-ນີໄຟ-ລີໄຮໄດ້ມີສັດທາອັນຍິ່ງໃຫຍ່ ແລະ ຮັກພຣະເຈົ້າ. ພວກເຂົາຊື່ສັດກັບທຸກຄົນ ແລະ ຮັກສາຄຳສັນຍາວ່າຈະບໍ່ຕໍ່ສູ້ອີກ. ພວກເຂົາຊື່ສັດຕະຫລອດຊົ່ວຊີວິດຂອງພວກເຂົາ.