Potutusi
Soifua Mai o Iesu Keriso

“Soifua Mai o Iesu Keriso,” Mataupu Faavae o le Talalelei (2023)

o le soifua mai o Iesu

Taiala mo le Suesueina o le Talalelei

Soifua Mai o Iesu Keriso

“Ona ua fanau mai mo i tatou se tama, ua foaiina mai mo i tatou se atalii”

O le faamanatuina o le soifua mai o Iesu i vaitau uma o le Kerisimasi e faamanatu mai ai ia i tatou le taua moni o le tala i le Soifua Mai o Iesu. E ui e le tele ni mea tatou te iloa e uiga i tulaga o le soifua mai o Iesu, ae ua tatou iloa e uiga i faailoga faavavega ma mea ofoofogia na tuuina mai ma tagata na tuuina mai molimau e faapea na afio mai le Alo o le Atua i le lalolagi. O le a faateleina lou lotofaafetai ma le alofa mo Iesu Keriso a o e saili e aoao e uiga i lenei mea paia na tupu.

Aisea e Taua Tele ai le Soifua Mai o Iesu Keriso?

E pei ona valoia e perofeta anamua, sa soifua mai Iesu Keriso i le taulotoaiga o taimi i Peteleema, e latalata i Ierusalema. O Iesu o le Alo e Toatasi Na Fanaua o le Tamā Faalelagi. O lona tina o Maria, o lē sa faufautane ia Iosefa. O faailoga faavavega ma mea ofoofogia na o mai faatasi ma Lona soifua mai, ma molimauina ai ua afio mai le Mesia ua loa ona folafola mai i le lalolagi e laveai fanau a le Atua ma mafai ai ona maua le ola e faavavau.

Vaaiga aoao i le autu: Soifua Mai o Iesu Keriso

Taiala fesootai mo le suesueina o le talalelei: Muai Olaga, Iesu Keriso, Galuega Faaletino a Iesu Keriso

Vaega 1

Aoao e uiga i le Soifua Mai o Iesu Keriso e ala i Valoaga Anamua

O Isaia o loo tusitusi i luga o se taaiga pa’ulaau

O perofeta uma talu mai ona po o Atamu na molimau mai e uiga ia Iesu Keriso ma sa tulimatai atu ma le naunautaiga tele i le taimi o le a afio mai ai le Mesia ma mafai ai ona maua le faaolataga ma le ola e faavavau mo tagata uma. “Na vaai Enoka i le aso o le afio mai o le Atalii o le Tagata, i le tino lava; ma sa olioli lona agaga” (Mose 7:47). Na vavalo mai Isaia, “Auā ua fanau mai mo i tatou le tama, ua foaiina mai mo i tatou le atalii” (Isaia 9:6). Na vaai Nifae i se faaaliga vaaia ia Maria ma le soifua mai o le Mesia folafolaina (tagai i le 1 Nifae 11:13–23). Na molimau mai Apinati, “O le a afio mai i lalo le Atua lava ia i totonu o le fanauga a tagata, ma o le a togiola e ia ona tagata” (Mosaea15:1). A e suesue i valoaga ma aoaoga e uiga i Lona soifua mai, e mafai ona e amata vaai i le taua tele o le auina mai e le Atua le Tama o Lona Alo o Iesu Keriso i le lalolagi.

Mea e mafaufau i ai

  • Na molimau mai perofeta o faailoga ma mea ofoofogia maoae o le a faailo mai ai le soifua mai o Iesu Keriso i tagata o le Tusi a Mamona. Faitau le Helamana 14:1–9 ma le 3 Nifae 1:4–22. Aisea na toatele ai tagata na mumusu e talitonu i le savali a perofeta? O le a se faamaoniga o ia te oe o loo soifua Iesu Keriso i le asō ma o loo aapa mai i le alofa i fanau uma a le Atua?

Gaoioiga mo le aoao faatasi ma isi

  • Matamata le vitio “Aisea Tatou Te Manaomia ai se Faaola” (2:15). Talanoa faatasi e uiga i le fesili “Faamata e faape’i le olaga e aunoa ma se Faaola?” E mafai foi ona outou talanoaina pe aisea e tatau ai ona faaauau pea ona aumaia e le savali o le soifua mai o Iesu le olioli tele ma le filemu i le lalolagi.

Aoao atili

Vaega 2

Na Molimau Mai Molimau Na Soifua Mai le Faaola

Maria o loo siiina le tamameamea o Iesu Keriso

Ona o le soifua mai o Iesu Keriso o se tasi o mea aupito sili ona taua na tupu i le talafaasolopito, o lea na saunia ai e le Atua le tele o molimau e molimau i ai, a o lei tupu ma ina ua mavae lena mea. O nisi o nei molimau o le agelu o Kaperielu (Luka 1:26–33), Maria (Luka 1:46–49), o le tausoga o Maria o Elisapeta (Luka 1:41–45), o leoleo mamoe (Luka 2:16–17), Simeona (Luka 2:25–33), Ana (Luka 2:36–38), ma le Au Makoi mai sasae (Mataio 2:1–2, 9–11). 

Mea e mafaufau i ai  

  • Faitau le savali o le Kerisimasi 2020 a Peresitene Russell M. Nelson, “Meaalofa Faalelagi,”1 ma vaavaai mo nisi o faailoga anoa e o faatasi ma le soifua mai o Iesu Keriso. O a ni mea e mafai e nei faatusa ona aoao atu ia te oe e uiga i le misiona a Iesu Keriso i le olaga nei?

Gaoioiga mo le aoao faatasi ma isi

  • Matamata faatasi i le Pepe o Keriso (17:56). Ona talanoaina lea o le fesili “O a ni o tatou lagona e uiga i le soifua mai o Iesu Keriso pe a tatou mafaufau i le matafaioi o lena mea taua na tupu i le fuafuaga a le Atua mo lo tatou faaolataga?” Afai o e aoao faatasi ma tamaiti, valaaulia i latou e tusi se ata o le vaaiga e sili ona latou fiafia i ai mai le ata. Uunaia i latou e faasoa mai o latou manatu e uiga i le soifua mai o Iesu Keriso.

Aoao atili

Vaega 3

O le Suesueina o le Soifua Mai o Iesu e Mafai ona Faalatalata Atili atu ai i Tatou ia te Ia

Na faamatala e Peresitene Ezra Taft Benson: “E le taitai ona fesiligia matua o Iesu Keriso ona o mau ua tuuina mai e molimau filifilia. O le Atua o le Tama o Lona tino fou, a o Maria, o se tamaitai i le tino, o Lona tina. … E le o Ia o se atalii o Iosefa, e lei fanaua foi o Ia e le Agaga Paia. O Ia o le Alo o le Tama Faavavau!”2

Ua ta’ua Iesu Keriso o le Alo e Toatasi na Fanaua aua o Ia lava le Alo e toatasi o le Tama na soifua mai i la le tino (tagai i le 1 Nifae 11:13–22). Na auina mai o Ia iinei e faia le finagalo o Lona Tama—e togiola mo agasala a tagata uma (tagai Ioane 3:16–17).

Mea e mafaufau i ai 

  • O le fuafuaga a le Atua e laveai Ana fanau e manaomia ai se “taulaga e le iu ma faavavau” lea e leai se manu po o se tagata e mafai ona faataunuuina. Sa tatau ona avea ma taulaga a le Alo o le Atua. (Tagai i le Alema 34:9–14.) O le a se mea ua tatou iloa e uiga i le natura o le soifua mai o Iesu Keriso lea na mafai ai e Ia ona faataunuu le “taulaga e le iu ma faavavau” e manaomia i le fuafuaga a le Atua? E lei faaalia mai e le Tama Faalelagi le faagasologa lea na avea ai Iesu ma Lona Alo e Toatasi na Fanaua i le lalolagi; ua na o mea lava ua faasoaina mai i tusitusiga paia ua tatou iloa—mo se faataitaiga, Mataio 1:18–25; Luka 1:26–35; Mosaea 15:1–3; ma le Alema 7:9–10.

  • I lana lauga “O le Tala Moni ma le Ofoofogia o le Kerisimasi,” na saunoa ai Peresitene Gordon B. Hinckley: “O le a leai se Kerisimasi pe ana faapea e leai se Eseta. O le pepe o Iesu o Peteleema o le a pei o se isi lava pepe e aunoa ma le Keriso togiola o Ketesemane ma Kalevaria, ma le manumalo moni o le Toetu. … Ou te manao ia taitasi outou ma faaavanoa se taimi, atonu pe na o se itula, e faaalu e manatunatu filemu ma tomanatu lemu i le maofa ma le mamalu o lenei, le Alo o le Atua.”3 Aisea e taua ai le faafesootai o le mea na tupu i Peteleema ma i Ketesemane ma Kalevaria?

Gaoioiga mo le aoao faatasi ma isi  

  • O le tele o aganuu e faamanatuina ai le soifua mai o Keriso i le tu masani o le tuuina atu o meaalofa. Toe faamanatu nisi o meaalofa na faamamafa mai e Peresitene Russell M. Nelson i lana saunoaga “O Meaalofa e Fa ua Ofoina atu e Iesu Keriso ia te Oe.”4 Fesili atu, “O a nisi o meaalofa mai ia Iesu Keriso ua faia ai se eseesega i lou olaga?”

Aoao atili  

Isi Punaoa e uiga i le Soifua mai o Iesu Keriso

Faamatalaga

  1. Russell M. Nelson, “Divine Gifts” (Faigalotu o le Kerisimasi a le Au Peresitene Sili, 6 Tes., 2020), Gospel Library.

  2. Ezra Taft Benson, “Lima Faailoga e Uiga i le Paia o Iesu Keriso,” Ensign, Tes. 2001, 10, 11.

  3. Gordon B. Hinckley, “The Wondrous and True Story of Christmas,” Ensign, Tes. 2000, 5.

  4. Russell M. Nelson, “O Meaalofa e Fa ua Ofo Mai e Iesu Keriso ia te Oe” Faigalotu o le Kerisimasi a le Au Peresitene Sili, 2 Tes., 2018), Gospel Library.