1 Cunan Mosíahpaj catichunbacha saquishcapi cai carca tucui runacuna catichunbacha saquishcata ricushpa chasquichij cashpa, nacashpa maijan ricushpa chasquichingapa ajllashpa cashpa, chasquinga salariota ima tiempota trabajashca cashpa ricushpa chasquichishpa maijan paicunapaj ñaupaman apamushcacunata ricushpa chasquichingapa.

2 Cunan shuj runa cutishujman dibijpica, pai na pagajpica ima dibishcata, ricushpa chasquichijman quijarina carca; ricushpa chasquichijca autoridadta churashpa, oficialcunata cacharca paipaj ñaupaman runata apamuchun; paica runata ricushpa chasquichingapa catichunbacha saquishcahuan paipaj contra ima nishcacunata cushcata, shina runaca paganapacha carca imata pai dibishcata, nacashpaca quichushca canga, nacashpaca llactapuracunamanda llujchishpa cachai tucunga shuhua, quichuj caimanda.

3 Ricushpa chasquichijca paipaj salariota chasquinga paipa tiempomanda—curipaj shuj senine shuj punllamanda, nacashpaca culquipaj shuj senum, maijan pacta can curipaj shuj senine; cai can catichunbacha saquishcahuan imata cushca carca.

4 Cunan paicunapaj curipaj culquipapash shuj shuj culquicunamanda cai shuticuna can, paipaj valormanda. Nefitacunamanda shuticunata cushca carca, paicuna na yupaj carca Judíocunapaj layapi maijanguna Jerusalénpi carca; na tupujcunapash carca Judíopaj layapi; ashtahuangari paicunapaj yupana shuj laya carca, paicunapaj tupunapash, imashna llactapuracunapaj munaimanda causajushpapash, tucui miraicunapi, imaura ricushpa chasquichijcunapaj reinadocaman, jatun mandaj Mosíah paicuna churashca carca.

5 Cunan yupana shina carca—curipaj shuj senine, curipaj shuj seón, curipaj shuj shum, curipaj shuj limna.

6 Culquipaj shuj senum, culquipaj shuj amnor, culquipaj shuj ezrom, culquipaj shuj onti.

7 Culquipaj shuj senum shinallata valin curipaj shuj seninehuan, caicunamanda maijanbash cebadapaj tupuj, tucui laya muyucunapaj tupujpash.

8 Cunan curipaj shuj seón valorca doble carca shuj seninepaj valormanda.

9 Curipaj shuj shum doble carca shuj seónpaj valor.

10 Curipaj shuj limna tucuihuan igual carca.

11 Culquipaj shuj amnor ishcai senumecunahuan igual carca.

12 Culquipaj shuj ezrom chuscu senumecunahuan igual carca.

13 Shuj onti tucuihuan igual carca.

14 Cunan uchilla númerocunata yupangapa valor cai carca—

15 Shuj shiblón shuj senumemanda chaupi; chaimanda, shuj shiblón cebadapaj tupujpaj chaupi.

16 Shuj shiblum shuj shiblónmanda chaupi.

17 Shuj léah shuj shiblummanda chaupi.

18 Cunan paicunapaj númerocuna cai carca, paicuna yupangapa.

19 Cunan curipaj shuj antión quimsa shiblónguna igual carca.

20 Cunan, cai carca shuj munaihuanlla charijyangapa, paicuna chasquirca paicunapaj salariota paicunapaj trabajomanda, chaimanda, llactapuracunata bulla mascaicunaman tangaj shina carca, tucui laya fiñanajuicunaman na ali ruraicunamanbash, paicuna ashtahuan trabajota charichun, paicuna culquita ganai ushangapa legal cuzascunata ruraimanda caicunata paicunapaj ñaupaman apamushca carca; chaimanda llactapuracunata tangachirca Almapaj, Amulekpapash contra.

21 Cai Zeezrom Amulekta tapuchi callarirca, nishpa: Can munanguichu tigrachingapa huaquin tapuicunata imata ñuca tapugrini? Cunan Zeezrom carca shuj runa pimi ayapaj munaicunapi yachashca carca, pai tucuchi ushan ima ali cashcata; chaimanda, pai Amulekta nirca: Can munanguichu tigrachingapa tapuicunata imata ñuca ruragrijujta?

22 Amulek nirca: Ari, Apunchijpaj Espírituhuan cajpica, imami ñucapi can; imashpa ñuca nimatapash na nishachu Apunchijpaj Espíritupaj contra cajta. Zeezrom nirca: Riqui, caipi can culquipaj sujta ontíes, tucui caicunata quiquinman cusha shuj Jatun Causajuj tiajta negajpica.

23 Cunan Amulek nirca: Oh can ucu pachapaj huahua, imashpata ñucata tentahuangui? Nachu yachangui ali rurajcunaca shina tentacióncunaman na curinllu?

24 Cringuichu Dios na tiajta? canda nini, Na, yachanguimi shuj Dios tiajta, ashtahuangari paita yali juyangui culquita gananata.

25 Cunan ñucaman Diospaj ñaupapi llullahuashcangui. Nihuashcangui—Riqui cai sujta ontíes, imacuna can jatun valishca, quiquinman cusha—ashtahuangari canba shungupi munajurcangui caicunata charishpa catingapa; canba munaica carcami ñuca negachun ciertopacha causajuj Diosta, shina imamanda ñucata tucuchi ushangapa. Cunan riqui, cai jatun na alimanda caraita charingui.

26 Zeezrom paita nirca: Tian ninguichu shuj ciertopacha causajuj Dios?

27 Amulek nirca: Ari, shuj ciertopacha causajuj Dios tian.

28 Cunan Zeezrom nirca: Tianllu shuj Diosmanda cutishujpash?

29 Tigrachircapash, Na.

30 Cunan Zeezrom cutin nirca: Imashnata cai cuzascunata yachangui?

31 Pai nirca: Shuj ángel ñucaman yachaj chayachihuarca.

32 Zeezrom cutin nirca: Pita shamujgrijun? Diospaj Churichu can?

33 Pai nirca, Ari.

34 Zeezrom cutin nirca: Pai quishpichingacha paipaj llactapuracunata paicunapaj juchacunapi? Amulek tigrachirca paita nircapash: Ñuca ninimi na, imashpa paipaj shimita na negai ushanllu.

35 Cunan Zeezrom llactapuracunaman nirca: Ricui cai cuzascunata yarichi; pai nirca shujlla Dios tian; shina cashpapash pai nirca Diospaj Churi shamunga, ashtahuangari paipaj llactapuracunata na quishpichingachu—pai autoridadta charijshna Diosta mandangapa.

36 Cunan Amulek paita cutin nirca: Riqui can llullashcangui, can ningui ñuca parlashcani autoridadta charijshna Diosta mandangapa ñuca nircani pai na quishpichingachu paipaj llactapuracunata paicunapaj juchacunapi.

37 Cutin nini pai na quishpichingachu paicunapaj juchacunapi; paipaj shimita negaita na ushanllu, pai nishca nima mapalla cuzas jahua pachapaj reinota na chasqui ushanllu; chaimanda, imashnata quishpiri ushangui na jahua pachapaj reinota chasquishpaca? Chaimanda, quishpirita na ushangui cangunapa juchacunapi.

38 Cunan Zeezrom cutin nirca: Canllu Diospaj Churi Na Tucuri Taitallata?

39 Amulek nirca: Ari, pai can jahua pachapaj cai pachapapash Na Tucuri Taitallata, tucui cuzascuna imacuna caipi can; pai callari tucuripash can, primero últimopash;

40 Pai shamunga cai pachaman paipaj llactapuracunata jatun causachingapa; paipaj jahuapi japinga na ali ruraicunata picunapaj paipaj shutipi crin; paicuna can picuna na tucurina causaita charinga, pimanbash quishpirina na shamunllu.

41 Chaimanda na alita rurajcuna catin nima jatun causachina na rurashca cajpishna, huañui huatanacunamanda cacharirishpalla; riqui, punlla shamun imaura huañuimanda tucui jataringa Diospaj ñaupapi shayaringapash, paicunapaj rurashcacunamanda ricushpa chasquichi tucungapapash.

42 Cunan, shuj huañui tian cai shutichishca can temporal huañui; Cristopaj huañui cai temporal huañuipaj huatashcacunata cacharichin, shina tucuicuna jataringa cai temporal huañuimanda.

43 Espíritu cuerpopash cutin tandanajushca canga alipacha formapi; ishcandi cuerpo miembrocunapash coyunturacunapash cutin tandanajushca canga propio formaman, imashna cunan canchi layapi; apamushca cashun Diospaj ñaupapi shayaringapa, yachashpa imashna cunan yachanchi shinallata, charishunchipash shuj punchalla yarita tucui ñucanchipaj juchachinata.

44 Cunan, cai cutin tandanajui tucuiman shamun, rucucunapa viñaj huambracunapapash, esclavocunapa librecunapapash, jaripa huarmipa, na alita rurajcunapa alita rurajcunapapash; na chingangachu nishuj ajchallapash paicunapaj umacunamanda; ashtahuangari tucui cuzascuna cutin tandachishca canga alipacha formapi, nacashpa cuerpopi, cunan can shina, apai tucushca canga jatun shayarina ñaupaman Churi Cristopaj, Dios Taitapash, Achil Espíritupash, pimi can shujlla Na Tucuri Dios, ricushpa chasquichi tucungapa paicunapaj rurashcacunamanda, ali cajpipash na ali cajpipash.

45 Cunan, riqui, ñuca parlashcani ismuna cuerpopaj huañuimanda, ismuna cuerpopaj cutin causarinamandapash. Ñuca nini cai ismuna cuerpo jataringa na huañuna cuerpoman, cai can huañuimanda, callari huañuimanda causaiman, paicuna ñana ashtahuan huañui ushan; paicunapaj espíritucuna tandanajun paicunapaj cuerpocunahuan, nimaura na shicanyaringapa; shina tucuilla tigran espiritual ñana huañunapash, ashtahuan paicuna ismunata ama ricungapa.

46 Cunan, Amulek cai shimicunata tucuchijpi llactapuracuna cutin manllari callarirca, Zeezrombash chujchui callarirca. Shina tucurin Amulekpaj shimicuna, nacashpa ñuca quilcashca caimi tucuilla can.