1 Cunan Alma, shina ricuimanda Amulekpaj shimicuna Zeezromda upallayachishca carca, imashpa pai ricurca Amulek paipaj llullacunapi japishca carca pandachinacunatapash paita tucuchingapa, shina ricuimanda pai chujchui callarirca paipaj juchachimanda yaipi caimanda, Alma shimita pascashpa paihuan parlai callarirca, Amulekpaj shimicunata cutin yachingapa, cuzascunata ali villangapa, Amulek yachachishca achil quilcashcacunata ashtahuan yali ali villangapa.

2 Cunan Alma Zeezromman parlashca shimicunata muyundi llactapuracuna uyarca; imashpa ashtacapacha tandanajushcacuna jatun carca, cashna pai parlarca:

3 Cunan Zeezrom, shina ricuimanda canbaj llullaipi umachipipash japi tucushca cangui, na runacunamanlla llullashcanguichu ashtahuangari Diosta llullashcangui; riqui, pai yachan tucui quiquinba yuyaicunata, quiquin ricushcangui quiquinba yuyaicuna ñucanchiman yachaj chayachishca can paipaj Espírituhuan;

4 Quiquin ricungui ñucanchi yachanchi quiquinba ima ruranaca carcami alipacha ima rurana, ayapaj yachashcamanda, cai llactapuracunata llullangapa umachingapa ñucanchihuan contra cachun, ñucanchita plituchun llujchishpa calpachichunbash—

5 Cunan cai carca na ricunayachijpaj ima rurana, paipaj ushaita quiquingunapi churashca can. Cunan ñuca munaiman canguna yarichun imata ñuca canda nini tucuimanmi nini.

6 Riqui tucui cangunaman nini caica carcami ayapaj trampa, imami pai shitashca japingapa cai llactapuracunata, cangunata apai ushangapa paipaj munaiman curichun, paipaj huatanacunahuan pilluchun, huatangapa urai na tucurina llaquiman, paipaj huatai tucushcashnapaj ushaihuan.

7 Cunan imaura Alma cai shimicunata parlajpi, Zeezrom ninanda chujchui callarirca, pai ashtahuan ashtahuan cri callarirca Diospaj ushaita; pai ashtahuan crishca carca Alma Amulekpash paita yachajta, pai crishcapash carca paicuna yachajta yuyaicunata paipaj shungupaj imata rurasha yaicunatapash; paicunaman cushca ushaimanda paicuna yachaita ushan cai cuzascunata achil villachinapaj espírituhuan.

8 Zeezrom paicunata utsialla tapui callarirca, Diospaj reinomanda ashtahuan yachangapa munashpa. Almata nirca: Imata canga cai Amulek parlashca huañuipaj cutin causarina, huañuimanda tucui jatarina, alicunapash na alicunapash, apamushca can Diospaj ñaupapi shayaringapa paicunapaj rurashcacunamanda ricushpa chasquichishca cangapa?

9 Cunan Alma villai callarirca cai cuzascunata, nishpa: Taucacunaman cushca can Diospaj na villashcacunata yachachun; shina cashpapash caicuna churashca can alipacha mandashcapi na shujman cuchun ashtahuangari paipaj shimipaj ashallamanda imata runacunapaj huahuacunaman cushca can, aliguta ricushpa utsia mascashpa imata paicuna paiman cujpi.

10 Chaimanda, paipaj shunguta shinlliyachijpica, shinallata ashalla shimita chasquinga; paipaj shunguta na shinlliyachijpica, paimanga llashajlla shimitami cushca canga, paiman Diospaj na villashcacunata yachachun cushca canga imaura pai tucuillata yachangacaman.

11 Maijan paicunapaj shungucunata shinlliyachijcunaman ashalla shimita cushca can imaura Diospaj na villashcacunata nimata na yachangacaman; paicuna huatai tucushcashna ayahuan japishca can, paipaj munaihuan ucuman apanga tucuchingapa. Cunan caimi can ucu pachapaj huatashcacuna.

12 Amulek huañuimanda parlashca punchalla can, jatarishca canga cai huañunamanda na huañuna canaman, apamushca canga Diospaj jatun shayarinapaj ñaupaman, ñucanchipaj rurashcacunamanda ricushpa chasquichingapa.

13 Shina ñucanchi shungucuna shinlliyashca cajpi, ari, ñucanchi shungucuna achil shimipaj contra shinlliyajpica, shina ñucanchipi ñana tupashca cajpi, shina ñucanchi manllanayai cana canga, shina ñucanchi ricushpa chasquichishca cashun.

14 Ñucanchi shimicuna ricushpa chasquichinga, ari, tucui ñucanchi rurashcacuna ricushpa chasquichinga; mapa illa na cashunllu; ñucanchipaj yuyaicunapash ricushpa chasquichishca canga; cai manllanayai canapi ñucanchi Diosta na ricui ushashunchi; ñucanchi ninanda munashun mandai ushangapa rumicunata urcucunatapash ñucanchi jahuapi urmachun paipaj ñaupapi canamanda pacachun.

15 Ashtahuangari cai na cangachu; ñucanchi rinapacha canchi paipaj ñaupapi shayaringapa paipaj punchapambapi, paipaj ushaipipash, paipaj jatun ushaipipash, mandana ushaipipash, dominiopipash, rijsina ñucanchi na tucuri pinganayaipa tucui paipaj ricushpa chasquichishcacuna ali can; pai ali can tucui paipaj ruraicunapi, pai ali llaquij can runacunapaj huahuacunata, pai tucui ushaita charin quishpichingapa tucui runacunata pimi paipaj shutipi crin apamumbash arrepentiringapa munai ruranacunata.

16 Cunan riqui, cangunaman nini shuj huañui shamun jipaman, cati huañui, maijan espiritual huañui can; shina tiempo can pipash paipaj juchacunapi huañun, temporal huañuipa, espiritual huañuitapash huañunga; ari, huañunga ali ruraipa cuzascunapaj cajcuna.

17 Shina tiempo can imaura paicunapaj llaqui apaicuna shuj nina azufrepash cocha laya canga, caipa rupajuj nina vichai rin imaurapash na tucurina imaurapash na tucurinacaman; shina tiempo can paipaj huatanacunahuan pillushca, urai huatangapa na tucurina llaquiman Satanáspaj ushaiman huatai tucushcashnamanbash, paipaj munashcaman paicuna curishca caimanda.

18 Shina, cangunaman nini, paicuna catinga nima jatun causachina na rurashca cajpishna; paicuna na jatun causachirita ushanga Diospaj alicaihuan; paicuna na huañui ushan, ashtahuan ismuna na tiaimanda.

19 Cunan yalishca jipa imaura Alma cai shimicunata tucuchijpi, llactapuracuna ashtahuan manllarishca cangapa callarirca;

20 Ashtahuangari Antiona runa tiarca, paicunamanda yalishca mandaj carca, llujshishpa paiman nircapash: Imata can cai quiquin nishca, runa huañuimanda jataringa tigrachishca cangapa cai huañuimanda na huañuna canaman, alma nimaura na huañuita ushan?

21 Imata can achil quilcashca, maijan nin Dios querubinda churarca shuj rupajuj espadatapash Edén jardínpaj indi llujshij ladoman, imashpapash ñucanchi callari taitacuna yaicushpa japinman causana yurapaj fucushcata, causaipash na tucurinacaman? Shina ñucanchi ricunchi na chari ushana carca paicuna na tucurinacaman causaita.

22 Cunan Alma nirca: Caita ña ali villagrijurcani. Cunan ñucanchi rijsinchi Adán urmarca na saquishca fucushcata micuimanda, imashna Diospaj shimi nin; shina ñucanchi ricunchi, cai paipaj urmaimanda tucui runacuna chingashca urmashcapash llactapuracunaman tigrashca.

23 Cunan riqui, cangunata nini Adán cashna caita ushashpaca tucui tiempo causana yuramanda fucushcata micushca cashpa, huañui na tianmanllu carca, achil shimica na pactashca canman carca Diosta shuj llullapi churashpa, imashpa pai nirca: micushpaca huañunguipachami.

24 Ñucanchi rijsinchi huañui shamun tucui runacunaman, ari, huañui imamanda Amulek parlashca cai can temporal huañui; shina cajpipash shuj tiempo tian cushca runacunaman maipi pai arrepentiri ushan; chaimanda cai causai tigran ruran na ruran ricuj canaman; shuj tiempo prepararingapa Diospaman yaicungapa; shuj tiempo prepararingapa chai na tucuri canapa imata ñucanchi parlarcanchi, imami can huañuimanda cutin causarishca jipa.

25 Cunan, cai na canman carca jatun causachinapaj planmanda, maijan tiarca cai pacha rurashcamanda, huañuipaj cutin causari na tianman carca; ashtahuangari churashca carca jatun causachinapaj plan, ima yalichun apamui ushan huañuipaj cutin causarita, imamanda parlashcani.

26 Cunan riqui, cashna caita ushajpica ñucanchi callari taitacuna rishpa causana yuramanda micui ushashpaca paicuna llaquinayaicuna canman carca na tucurinacaman, prepararina caita na charishpa; shina jatun causachinapaj plan na pactashca canman carca, Diospaj shimi na pactashcapash, nimata na cushpa.

27 Ashtahuangari riqui, na shina carca; ashtahuangari cushca carca runacunaman paicuna huañunapacha; huañui jipa, paicuna shamunapacha ricushpa chasquichi tucungapa, chai ricushpa chasquichina imamanda ñucanchi parlashcanchi, imami tucuri can.

28 Dios cai cuzascunata cushca jipa runacunaman shamuchun, riqui, jipa pai ricurca cai minishtirishca cajta runacuna yachachun cai cuzascunamanda paicunaman saquishcacunata.

29 Chaimanda pai ángelcunata cachamurca paicunahuan parlachun, paipaj punchapamba caita runacunaman ricui ushachun.

30 Paicuna chai punllamanda paipaj shutipi mañai callarirca; chaimanda Dios runacunahuan parlarca, paicunaman yachaj chayachishpa jatun causachinapaj planmanda, imami alichishca cashca cai pachata rurashcamanda; paicunaman caita yachachishca carca paicunapaj femanda arrepentimientomandapash paicunapaj achil rurashcacunamanda.

31 Chaimanda, pai runacunaman rurachunbacha saquishcacunata cushca, paicuna callaripi na alita rurashca cashpa callari rurachunbacha saquishcacunata temporal cuzascunamanda, dioscuna laya cai callarishpa, yachashpa alita na alimanda, churarishpa paicunamandallata rurana canapi, nacashpaca churai tucushpa rurana canapi paicunapaj munaicunahuan ajllaicunatapash, na alita rurashpa alita rurashpapash—

32 Chaimanda Dios paicunaman rurachunbacha saquishcacunata cushca, paicunaman jatun causachinapaj planmanda yachaj chayachishpa jipa, paicuna ama na ali ruraicunata rurachun, caipa castigo canga cati huañui, ima carca na tucurina huañui ali ruraicunapaj cuzascuna cajta; paicunapica jatun causachinapaj planga na ushaita charinmanllu, ali ruraicunamanda na tucuchishca cangachu, supremo Diospaj alicaimanda.

33 Ashtahuangari Dios runacunata cayashca, paipaj Churipaj shutipi, (cai cashca jatun causachinapaj plan churashca) nishpa: Canguna arrepentirijpica cangunapaj shungucunata na shinlliyachijpica, shinaca cangunata llaquishami, ñucapa Shujlla Churimanda;

34 Chaimanda, pipash arrepentirijpi, paipaj shunguta na shinlliyachijpi, pai mañanga llaquinata ñuca Shujlla Churimanda, paipaj juchacunata anchuchingapa; cai yaicunga ñuca samanapi.

35 Pipash paipaj shunguta shinlliyachijpi na ali ruraicunata rurajpi, riqui, ñuca jurani ñuca fiñaipi pai na yaicunga ñuca samanapi.

36 Cunan, ñuca huauquicuna, riqui cangunata nini, cangunapaj shungucunata shinlliyachishpaca na yaicui ushanguichichu Apunchijpaj samanapi; chaimanda cangunapaj na ali ruraicuna tangai shina paipaj fiñaita urai cachamunga callari tangai shinapillata, ari, imashna paipaj shimi nishcashna tucuri tangai shinapipash callaripipash; cangunapaj almacunapaj na tucurina tucuchinaman; chaimanda, paipaj shimimanda, tucuri huañuiman, callarimambash.

37 Cunan, ñuca huauquicuna, ñucanchi cai cuzascunata yachaimanda, caicuna ciertopacha can, arrepentirishunchi, ñucanchi shungucunata ama shinlliyachishunchi, ama tangaj shina Apunchij ñucanchi Diospaj fiñaita ñucanchipaman urai apamushun cai paipaj cati rurachunbacha saquishcacunapi imata ñucanchiman cushca; ashtahuangari Diospaj samanapi yaicushunchi, imami alichishca can paipaj shimi imashna nishca.