1 Riqui, cunan yalishca jipa Moroni cai cartata cachashca jipalla gobernador yali mandajman, pai chasquirca Pahoránmanda shuj cartata, gobernador yali mandaj. Cai can shimicuna imata chasquirca:

2 Ñuca, Pahorán, pimi cani cai alpapaj yali mandaj gobernador, cachani cai shimicunata Moroniman, macanajuj runacunapaj yali mandaj capitán. Riqui, ñuca nini, Moroni, ñuca na cushijunichu cangunapaj jatun llaquicunapi, ari, caica ñuca almata llaquichin.

3 Ashtahuangari riqui, tianmi maijanguna cangunapaj llaquicunapi cushijujcuna, ari, shinashpa ñucata na cazushpa jatarishca, ñuca llactapuracunatapash picuna libre runacuna can, ari, chai jatarishcacuna ashtacapacha can.

4 Chaicuna can maijanguna ñuca ricushpa chasquichina jatun tiarinata ñucata quichungapa munashca caimanda cashca cai jatun na ali ruraicuna; paicuna jatun uyanayai llullacunata charishca carca, pandachircapash tauca llactapuracunapaj shungucunata, caimanda canga ñucanchipurapi shinlli llaqui; ñucanchipa minishtirishcacunata jarcashca, ñucanchi libre runacunatapash manllachishpa saquishca shina cangunapaman na rishca.

5 Riqui, paicunapamanda tigrachihuashca, Gedeón alpaman calpashcani, mashna tandachita ushashca runacunahuan.

6 Riqui, ñuca cachashcani shuj proclamaciónda tucui cai alpa pushtucunaman; riqui, paicuna ñucanchipaman punllan punllan tandanajunajun, macanajunacunata japingapa, paicunapaj llactata huacaichingapa, paicunapaj libertadtapash, ñucanchi llaquicunata shinallata rurangapa.

7 Ñucanchipaman shamushca, shinashpa maijanguna ñucanchipaj contra na cazuipi jatarishcacuna chimbapurashcacuna can, ari, shinashpa paicuna ñucanchita manllan na shamui ushanbash macanajungapa ñucanchipaj contra.

8 Paicuna alpata mishashpa japishca, nacashpa llactata, Zarahemlata; paicunapaj jahuapi shuj jatun mandajta ajllashca can, Lamanitacunapaj jatun mandajman pai quilcashca; chaipi tandanajun Zarahemla llactata charishpa catingapa, cai tandanajuipi pai yanmi Lamanitacuna ushanga puchu alpacunata mishaita, paipaj llactapuracunapaj jahuapi jatun mandajta churangapa imaura Lamanitacuna mishashca cajpi.

9 Cunan, canbaj cartapi ñucata tacurihuangui, ashtahuangari na imapash can; ñuca na fiñashca cani, ashtahuangari cushijuni canbaj shungu jatunbachapi. Ñuca, Pahorán, ushaita na mascani, ñuca ricushpa chasquichina jatun tiarinata charinatalla ñuca alchishpa chari ushangapa derechocunata, ñuca llactapurapaj libertadtapash. Ñuca alma shinlli can libertadpi imapi Dios ñucanchita librecunata rurashca.

10 Cunan, riqui, ñucanchi na ali ruraicunata jarcashun yahuarta jichangacaman. Ñucanchi Lamanitacunapaj yahuarta na jichashun paicunapaj propio alpapi cajpica.

11 Ñucanchipaj huauquicunapaj yahuarta na jichashunllu paicuna na cazuipi na jatarijpica, ñucanchipaj contra espadatapash na japijpica.

12 Ñucanchillata mandai tucungapa curinchiman huatai tucushcashnapaj yugoman cai minishtirishca cajpica Diospaj alicaihuan, nacashpa caita rurachun mandashca cajpica.

13 Ashtahuangari riqui ñucanchita na mandashca ñucanchipaj napacha ricunayachijcunapaj mandaiman curichun, ashtahuangari ñucanchipaj confianzata paipi churachun, pai ñucanchita cacharichinga.

14 Chaimanda, ñuca juyashca huauqui, Moroni, na alita shinlliyashun, ima na alita na shinlliyaita ushashpa ñucanchi shimicunahuan, ari, shina na cazuicunahuan, ninanda fiñarishpa rimarinacunahuanbash, shinlliyashun caicunata ñucanchi espadacunahuan, ñucanchipaj libertadhuan cati ushangapa, cushijungapapash ñucanchi iglesiapaj jatun privilegiopi, ñucanchi Jatun Causachij yuyaicunamanda, ñucanchi Diospash.

15 Chaimanda, ñucapaman ña shamui canba huaquin runacunahuan, puchucunata saqui Lehi, Teáncum mandachun; paicunaman ushaita cui macanajuita apachun chai alpa pushtupi, Diospaj Espírituhuan, ima can libertadpaj espíritupash imami paicunahuan can.

16 Riqui, paicunaman huaquin minishtirishcacunata cachashcani, paicuna ama huañuchun imaura ñucapaman can shamungacaman.

17 Tandachi usharishca macanajujcunata ñucapaman shamujushpa, ñucanchi ringapa ñapash chai chaupirishcacunapaj contra, ñucanchi Diospaj ushaipi fehuan imami ñucanchipi can.

18 Ñucanchi Zarahemla llactata japishun, ashtahuan micunacunata japingapa Lehiman, Teáncummanbash cachangapa; ari, ñucanchi rishun paicunapaj contra Apunchijpaj ushaipi, ñucanchi tucuchishun cai jatun na ali ruraicunata.

19 Cunan, Moroni, ñuca cushijuni canba cartata chasquishpa, ñuca ashata llaquilla carcani imata ñucanchi rurai ushanamanda, ali canmanlla ñucanchipa huauquicunapaj contra rina.

20 Ashtahuangari nishcangui, paicuna imashpapash arrepentirijpilla Apunchij mandashca canda paicunapaj contra richun.

21 Shinlliyachipacha Lehi, Teáncummanbash Apunchijpi; paicunaman ni ama manllachun, imashpa paicunata Dios cacharichinga, ari, tucui maijanguna chai libertadpi shinllicuna cajcunatapash imahuan Dios paicunata librecunata rurashca. Cunan ñuca cartata tucuchini ñuca juyashca huauquiman, Moroni.