1 Cunan yalishca jipa Moroni macanajungapa ruraicunata na saquirca, nacashpa paipaj llactapuracunata Lamanitacunamanda huacaichingapa; imashpa pai rurarca ishcai chunga huata callari ricushpa chasquichijcunapaj reinadopi, paipaj macanajuj runacunata allashpa callarichun alpahuan jarcanacunata muyundi tucui llactacunapi, tucui alpacunapi maipi Nefitacuna causanajurca.

2 Alpahuan rurashca jarcashca jahuapi vigascunata churachirca, ari, caspihuan rurashcacuna runapaj altota shayachina, muyundi llactacunapi.

3 Caspihuan rurashca jahuacunapi shayachichun estacacunata muyundi; shinllicuna, jatunguna carca.

4 Rurachirca torrecunata estacacunata yalicunata, rurachirca ali seguro pushtucunata torre jahuacunapi, Lamanitacunapaj rumicuna, flechacuna paicunata ama chugrichichun.

5 Paicuna prepararishca carca rumicunata jahuamanda pigangapa, paicunapaj munai, paicunapaj shinllicaihuanbash, llactapaj pircacunaman quimiringapa munajcunata huañuchingapa.

6 Shina Moroni shinlli jarcashcacunata rurarca paicunapaj napacha ricunayachijcunapaj shamuna contra, muyundi tucui llactapi tucui alpapi.

7 Yalishca jipa Moroni paipaj macanajuj runacunata ñaupachirca indi llujshij lado jichushca pambaman; ari, paicuna rirca tucui Lamanitacunata calpachirca picuna indi llujshij lado jichushca pambapi cajta paicunapaj propio alpacunacaman, caicuna Zarahemla alpacunapaj uraiman carca.

8 Nefipaj alpa derecho rijurca indi llujshij lado jatun mama cochamanda indi huashajuj ladocaman.

9 Yalishca jipa imaura Moroni tucui Lamanitacunata calpachirca indi llujshij lado jichushca pambamanda, cai carca paicunapaj propio charishcacunapa vichai alpaman, Zarahemla alpapi causanajujcunata muyundi alpacunapi causajcunatapash richun indi llujshij lado jichushca pambaman, jatun mama cocha pata manñacunacaman, alpata causangapa japichun.

10 Macanajuj runacunata uraimanbash churarca, paicunapaj charishcacunapaj manñacunapi, jarcanacunata shayachichirca paicunapaj macanajuj runacuna huacaichingapa paicunapaj llactapuracunatapash paicunapaj napacha ricunayachijcunapaj maquicunamanda.

11 Shina pai Lamanitacunapaj tucui shinlli jarcashcacunata shitarca indi llujshij lado jichushca pambapi, ari, indi huashajuj ladopipash, jarcashpa shuj mujunda Nefitacuna, Lamanitacunapa chaupipi, Zarahemla alpa, Nefipaj alpa chaupipi, indi huashajuj lado jatun mama cochamanda, catishpa Sidón jatun yacu pujyuta—Nefitacuna japishpa tucui vichai alpacunata, ari, tucui alpacunata imacuna Ashtacapacha Tiaj alpacunapaj vichaiman cajcunata, paicunapaj munashcashna.

12 Shina Moroni, paipaj macanajuj runacunahuan, picuna punllan punllan miranajurca ali seguro cashpa huacaichinamanda imata paipaj ruraicuna carca, munarca jarcangapa shinllicaita, Lamanitacunapaj ushaitapash paicunapaj charishca alpacunamanda, paicuna ama ushaita charichun paicunapaj charishca alpacunapi.

13 Yalishca jipa Nefitacuna shayachi callarirca shuj llactata, paicuna shutichirca Moroni; cai carca jatun mama cocha indi llujshij ladoman; cai carca Lamanitacuna charishcacuna urai ladoman.

14 Paicuna shayachi callarircapash shuj llactata Moronipaj llacta, Aarón llactapaj chaupipi, Aarón, Moronipaj manñacunata tandachishpa; paicuna llactata shutichirca, nacashpa alpata, Nefíah.

15 Chai huatallata shayachi callarircapash tauca llactacunata vichaipi, shujtaca shuj layatapacha maijan paicuna shutichirca Lehi, cai carca vichaipi jatun mama cocha manña ladopi.

16 Shina ishcai chunga huata tucurirca.

17 Cai ali mirai canapi carca Nefipaj llactapuracuna ishcai chunga shuj ricushpa chasquichijcunapaj reinadopaj callari huatapi Nefipaj llactapuracunapaj jahuapi.

18 Paicuna ninandapacha ali mirarca, ninan charijcunaman tigrarca; ari, paicuna mirarircapash shinllicunaman tigrarcapash alpapi.

19 Shina ñucanchi ricunchi imashna shungumanda llaquij cashca, ali can tucui Apunchijpaj ruraicuna, pactachingapa tucui paipaj shimicunata runacunapaj huahuacunaman; ari, ñucanchi ricui ushanchi paipaj shimicuna ciertopacha can, cunan punllacaman, imata Lehiman parlarca, nishpa:

20 Achilyachishca cangui, quiquinba huahuacunapash; paicunapash achilyachishca canga, shinashpa imashna paicuna ñuca rurachunbacha saquishcacunata alichishpaca paicuna cai pambapi ali miranga. Ashtahuangari yari, shinashpa imashna paicuna ñuca rurachunbacha saquishcacunata na alichishpaca paicuna Apunchijpaj ñaupamanda anchuchi tucunga.

21 Ñucanchi ricunchi cai nishcapachacuna cierto cashca can Nefipaj llactapuracunapa; imashpa cai cashca paicunapaj plituricuna, paicunapaj fiñanajuicuna, ari, paicunapaj huañuchicuna, paicunapaj shuhuaicuna, paicunapaj yanga dioscunata cunguri, paicunapaj fornicacióncuna, paicunapaj millanayaicuna, imacuna paipuracunapi tiarca, imami paicunapaman macanajuicunata, tucuchicunatapash apamurca.

22 Maijanguna fielcuna carca Apunchijpaj rurachunbacha saquishcacunata alichinapi huacaichishca carca tucui punllacuna, chai horasllata huaranga paicunapaj na alita ruraj huauquicuna huatai tucushcashnaman churashca cashca, nacashpa tucuchina espadahuan, nacashpa na crishpa asha asha chingarina, Lamanitacunahuan chapurishpa.

23 Ashtahuangari riqui nimaura na tiarca cushijui punlla Nefipaj llactapuracunapi, Nefipaj punllacunamanda, Moronipaj punllacunapi, ari, cai punlla, ricushpa chasquichijcunapaj reinado ishcai chunga shuj huatapi.

24 Yalishca jipa ricushpa chasquichijcunapaj reinado ishcai chunga ishcaipash sumaj causaipi tucurirca; ari, ishcai chunga quimsa huatapash.

25 Yalishca jipa ricushpa chasquichijchijcunapaj reinado ishcai chunga chuscu callari huatapi, tiarcapash sumaj causai Nefipaj llactapuracunapi randimanda plituri na cashca cajpica imami carca Lehipaj alpamanda, Moriantónpaj alpamandapash, imami Lehipaj manñacunapi tandanajurca; ishcandi jatun mama cocha pata manñapi carca.

26 Riqui, Moriantónpaj alpata chasquishca llactapuracuna Lehipaj alpata asha pushtuta mañarca; chaimanda randimanda plituri millayashpa callarirca paipuracunapi, shinashpa Moriantónpaj llactapuracuna macanajunacunata japirca paicunapaj huauquicunapaj contra, paicunata huañuchingapa munashcapacha carca espadahuan.

27 Ashtahuangari riqui, Lehipaj alpata charij llactapuracuna Moronipaj causana pambaman calparca, ayudata mañangapa; riqui paicuna na pandapi carca.

28 Yalishca jipa imaura Moriantónpaj llactapuracuna, shuj runahuan pushai tucushca carca paipaj shuti carca Moriantón, tuparca Lehipaj llactapuracuna Moronipaj causana pambaman calpashcata, paicuna ninan manllaihuan carca Moronipaj macanajuj runacuna paicunapaj jahuaman shamushpa tucuchinata.

29 Chaimanda, Moriantón paicunapaj shungucunapi caita churarca vichai alpaman calpachun, maipi ashtaca yacucuna junda carca, vichai alpata japichun.

30 Riqui, cai rurai shina canman carca, (imami shina rurashca cashpa llaquichishca canman carca) ashtahuangari riqui, Moriantón ninan millai runa caimanda, chaimanda pai fiñashca carca paipaj sirvij huarmihuan, japishpa ninanda macarca.

31 Yalishca jipa pai calparca, Moronipaj causaj pambaman chayarca, Moroniman ima cashcata tucui cuzascunata villarca, paicunapaj munaicunamandapash vichai alpaman rinata.

32 Cunan riqui, Ashtacapacha Tiaj alpapi causaj llactapuracuna, nacashpa Moroni, manllarca Moriantónpaj shimicunata uyanata paipaj llactapuracunahuan tandanajunata, shina chai alpa pushtucunata chasquishpa japingapa, imami shayachinman carca llaqui catimunacunata Nefipaj llactapuracunaman, ari, cai catimuicuna apanman carca paicunapaj libertad chingachinaman.

33 Chaimanda Moroni macanajuj runacunata cacharca, paicunapaj causana pambacunahuan, Moriantónpaj llactapuracunata jarcachun, vichai alpaman paicunapaj calpaicunata saquichun.

34 Yalishca jipa paicunata na jarcarca imaura Imapash Illaj alpa manñacunaman chayamungacaman; paicunata jarcarca, quichiji yalinahuan imami pushan jatun mama cocha ladoman vichai alpapi, ari, jatun mama cocha ladoman, indi huashajuj ladoman, indi llujshij ladomanbash.

35 Yalishca jipa macanajuj runacunata Moroni cacharca, apai tucushca carca shuj runahuan paipaj shuti carca Teáncum, Moriantónpaj llactapuracunata tuparca; shina na cazuj carca Moriantónpaj llactapuracuna, (ruraipacha nishca caimanda paipaj na ali ruraicunahuan paipaj llulla shimicunahuan) shina paicunahuan shuj macanajui callarirca, maipi Teáncum Moriantónda huañuchirca paipaj macanajuj runacunata misharca, paicunata prezu japirca, Moronipaj causana pambaman tigrarca. Shina ricushpa chasquichijcunapaj reinado ishcai chunga chuscu huata tucurirca Nefipaj llactapuracunapaj jahuapi.

36 Shina tigrachishca carca Moriantónpaj llactapuracuna. Paicuna pactachinata rurashpa sumaj causaita charingapa paicuna cutin apai tucurca Moriantónpaj alpaman, paicunahuan Lehipaj llactapuracunahuan shuj tandanajuita rurarca; paicunapash cutin apai tucurca paicunapaj alpacunaman.

37 Yalishca jipa chai huatallata Nefipaj llactapuracuna sumaj causaita paicunapaman cutin apamushca cajpi, Nefíah, cati ricushpa chasquichijcunapaj yali mandaj, huañurca, ricushpa chasquichina jatun tiarinata ali jari tarishca cashpa tucui alipacha rectitudhuan Diospaj ñaupapi.

38 Shina cajpipash, Almata na nishca carca chai tandachishpa quilcashcacunata japishpa chasquingapa chai cuzascuna imata charirca Alma paipaj taitacunapash achilyachishcapacha cachun; chaimanda Alma caicunata cushca carca paipaj churi, Helamánman.

39 Riqui, yalishca jipa Nefíahpaj churi ajllai tucushca carca ricushpa chasquichina jatun tiarinapi tiarichun, paipaj taitapaj pushtupi; ari, pai ajllai tucushca carca ricushpa chasquichijcunapaj yali mandaj, llactapuracunapaj mandajpash, juramentohuan, achil ordenanzahuan rectitudhuan ricushpa chasquichingapa, sumaj causaita huacaichingapa, llactapuracunapaj libertad, paicunaman cungapa paicunapaj achil privilegiota Apunchij paicunapaj Diosta adorachun, ari, shinllichina, charishpa catinapash Diospaj caita tucui paipaj punllacuna, na ali rurajcunata alicaihuan apangapapash paicunapaj juchacunamanda.

40 Cunan riqui, paipaj shuti carca Pahorán. Pahorán paipaj taitapaj tiarinapi carca, paipaj reinado callarirca ishcai chunga chuscu huata tucuripi, Nefipaj llactapuracunapaj jahuapi.