1 Cunan yalishca jipa Alma iglesia llactapuracunaman parlaita tucuchishpa jipa, maijan Zarahemla llactapi shayachishca carca, pai sacerdotecuna, éldercunata ordenan, paipaj maquicunata umapi churashpa Diospaj ordenmanda, iglesiata ñaupachichun, ricuchun.

2 Yalishca jipa maijanbash iglesiata na catij cashpa, picuna arrepentirijpi paicunapaj juchacunamanda arrepentimientopa bautizarirca, iglesiapipash chasquishca carca.

3 Yalishca jipapash maijanbash iglesiata catij cashpa picuna na arrepentirirca paicunapaj na ali ruraicunamanda, Diospaj ñaupapi na humillarircapash—Ñuca ningapa munani maijan paicunapaj shungucunapi jariyaihuan vichai alsarirca—caicuna na chasqui tucushca carca, paicunapaj shuticunapash anchuchishca carca, chaimanda paicunapaj shuticuna na yupashca carca ali rurajcunahuan.

4 Shina paicuna shayachishpa callarirca iglesiapaj orden ali catichun Zarahemla llactapi.

5 Cunan ñuca munani canguna yuyaipi chasquichun Diospaj shimica tucui chasquina carca, pimanbash na nishca carcachu privilegiota paipuracuna tandanajuchun Diospaj shimita uyangapa.

6 Shina cajpipash Diospaj huahuacunata catilla tandanajui ushachun mandashca carca, ayunopi quimirichun, ninan achil mañaipi almacunapaj ali cachun maijan Diosta na rijsicunapaj.

7 Cunan yalishca jipa imaura Alma cai regulacióngunata rurashca cashpa paicunata saquishpa rirca, ari, iglesiamanda maijan Zarahemla llactapi carca, indi llujshij lado Sidón jatun yacuman rirca, Gedeón pugru pambaman, maipi shuj llactata huasichishca carca, maijan Gedeón shutichishca carca, shutichishca cashpa runamanda pitami Nehor huañuchirca espadahuan.

8 Alma rirca Diospaj shimita villachi callarirca iglesiaman maijan Gedeón pugru pambapi shayachishca carca, achil ricuchimanda ciertopacha shimimanda, imata paipaj taitacuna parlashca carca, achil villachinapaj espíritumanda imami paihuan carca, Jesucristopaj testimoniomanda, Diospaj Churi, pimi shamunga paipaj llactapuracunata jatun causachingapa paicunapaj juchacunamanda, achil ordenhuan maijanhuan pai cayashca carca. Shina quilcashca can. Shinacapashcachun.