Almapaj Quilcashca
Almapaj Churi

1 Cunan yalishca jipa callari huata ricushpa chasquichijcunapaj reinado Nefi llactapuracunata, cunan punllamanda chaiman, jatun mandaj Mosíah tucui alpapaj ñangunata rishca caimanda, ali macanajuita macanajushca caimanda, Diospaj ñaupapi derecho purishca caimanda, nipita paipaj pushtupi na saquimanda; shina cashpapash catichunbacha saquishcacunata churashca carca, caicuna llactapuracunahuan rijsishca carca; chaimanda pai rurashca catichunbacha saquishcacunata ruranapacha carca.

2 Yalishca jipa callari huata Almapaj reinadopi ricushpa chasquichina jatun tiarinapi, paipaj ñaupaman apamurca shuj runata ricushpa chasquichishca cachun, shuj runa pimi jatun carca, ninan shinlli caimanda ali rijsishcapash carca.

3 Pai llactapuracunapi purishca carca, Diospaj shimi nishpa pai shutichishcata yachachishpa, iglesiata pandachishpa; llactapuracunaman villashpa shujllangaman sacerdotecuna, yachachijcunapash tucuihuan rijsi tucushca cana carca; paicunapaj maquicunahuan na trabajana carca, ashtahuangari llactapuracuna paicuna causangapa minishtishcacunata cuna carca.

4 Llactapuracunaman testificarcapash, tucui runacuna chai tucuri punllapi quishpirishca canga, paicuna manllachun, chujchuchunbash na minishtirishca canllu, ashtahuangari paicunapaj umacunata vichai alsana, cushijunapash; imashpa Apunchij tucui runacunata rurashca can, tucui runacunata quishpichishcapash; tucuripi, tucui runacuna mana tucuri causaita charinga.

5 Yalishca jipa cai cuzascunata ninanda yachachirca taucacuna paipaj shimicunata crirca, taucacuna pai causangapa minishtishcacunata carai callarirca, culquitapash cushpa.

6 Pai callarirca paipaj shungu jariyaihuan vichai alsarishpa, ninan valishca churajunacunata churajurca, ari, shuj iglesia shayachi callarircapash paipaj yachachishca layapi.

7 Yalishca jipa pai rijushpa, yachachishpa maijan paipaj shimipi crijcunaman, tuparca shuj runata Diospaj iglesia catijta, ari, paicunapaj shuj yachachijta; shinlli shimicunahuan fiñachi callarirca, iglesia llactapuracunata pandachingapa; ashtahuangari runaca paihuan shinlliyarca, Diospaj shimicunahuan tacurishpa.

8 Cunan runapaj shuti carca Gedeón; pai Diospaj maquicunapi shuj imatalla rurana cashca carca Limhi llactapuracunata huatai tucushcashnamanda cacharichingapa.

9 Cunan, Gedeón paihuan Diospaj shimicunahuan shinlliyaimanda, ninanda fiñarca, paipaj espadata llujchishpa, huajtai callarirca. Cunan Gedeón tauca huatacunapi yaicushca carca, chaimanda na shinlliyai usharca paipaj huajtashcacunata, chaimanda espadahuan huañushca carca.

10 Iglesia llactapuracunahuan huañuchij runa japi tucurca, Almapaj ñaupaman apai tucurca, pai na ali ruraicunaman ricushpa chasquichi tucungapa pai rurashcacunamanda.

11 Yalishca jipa Almapaj ñaupapi cashpa paillata manllai illa defendirirca.

12 Ashtahuangari Alma nirca: Riqui, cai callari can superchería sacerdotal cai llactapuracunaman yaicumushca. Riqui, superchería sacerdotalmandalla culpayulla na canguichu, ashtahuangari espadahuan churangapa munashcangui; superchería sacerdotalta cai llactapuracunaman shina churashpaca, tucuillata tucuchishca canga.

13 Alita ruraj runapaj yahuarta jichashcangui, ari, shuj runa ashtaca alicunata cai llactapuracunaman rurashcata; quiquinda ñucanchi llaquijpica paipaj yahuar venganzamanda ñucanchipaman shamunga.

14 Chaimanda huañuchun ricushpa chasquichinchi, Mosíah, ñucanchi tucuripi jatun mandaj cushca catichunbacha saquishcacunahuan; cai llactapuracuna cai ali rijsishca can; chaimanda cai llactapuracuna cai catichunbacha saquishcacunaman quimiringami.

15 Yalishca jipa paicuna paita japirca; paipa shutica Nehor carca; paicuna Manti urcu jahuaman aparca, chaipi chasqui tucurca, nacashpaca rijsichirca, jahua pachaman, alpamambash, imata pai llactapuracunaman yachachishca Diospaj shimipaj contra cashcata; chaipi shuj pinganayai huañuita yalirca.

16 Shina cajpipash, caihuan na tucurirca superchería sacerdotal alpacunaman jicharina; chaipi tiarca tauca picuna cai pachapa yanga cuzascunata juyajcuna, paicuna llulla yachachinacunatapash villashpa catirca; caita rurarca cuzascunata charijyangapa, honorta munaimandapash.

17 Shina cashpapash, llullanata manllarca, yachaj chayanga yashpa, catichunbacha saquishcacunata manllaimanda, imashpa llullacuna castigashca carca; chaimanda paicunapaj crishcacunata yachachij laya carca; cunan catichunbacha saquishcacunaca maijan runapaj paipaj crishcapi na ushaita charirca.

18 Shuhuanatapash manllarca, catichunbacha saquishcacunata manllaimanda, caicunamanda castigashca carca; shujpata japinatapash manllarca, huañuchinatapash manllarca, huañuchijca huañuihuan castigashca carca.

19 Ashtahuangari yalishca jipa maijan Diospaj iglesiata na catijcuna, Diospaj iglesiata catijcunata, Cristopaj shutita paicunapa jahuapi japishca cajcunata na ricunayachishpa cati callarirca.

20 Ari, na ricunayachishpa catishpa, llaquichirca tucui laya shimicunahuan, caica paicunapaj humildadmanda; paicunapaj ñavicunapi na jariyashca caimanda, Diospaj shimita caishuhuan chaishuman caraimanda, culqui illa, preciopash illa.

21 Cunan shuj catichunbacha saquishca tiarca iglesia llactapuracunapa, maijan iglesiata catij, maijan iglesiata na catijcunata na ricunayachishpa na cati callarina, paipuracunapi na ricunayachishpa na catirianapash.

22 Shina cajpipash, paicunapi tauca tiarca maijan jariyaita chari callarirca, millayashpapacha fiñanajui callarirca paicunata na ricunayachijcunahuan, huajtarinacamanbash; ari, caishuhuan chaishuhuan huajtarirca paicunapaj muquiticunahuan.

23 Cunan cai carca cati huatapi Almapaj reinadopaj, iglesiata ashtacata llaquichirca; ari, cai carca ashtaca shinlli llaqui iglesiapa.

24 Taucapaj shungucuna shinlliyashca carca, paicunapaj shuticuna fichashca carca, Diospaj llactapuracunahuan ñana ashtahuan yarishca carca. Taucacunapash paipuracunamanda anchurirca.

25 Cunan shuj jatun shinlli llaqui carca picuna fepi shinlli cajcunapa; shina cashpapash, paicuna na shaijujcuna na cuyurishpa Diospaj rurachunbacha saquishcacunata alichijcuna carca, chasquircapash pacienciahuan na ricunayachita maijan paicunaman churajpi.

26 Imaura sacerdotecuna trabajota saquishpa llactapuracunaman Diospaj shimita yachachijpi, llactapuracunapash paicunapaj trabajota saquirca Diospaj shimita uyangapa. Imaura sacerdotecuna Diospaj shimita cushca jipa tucuilla paicunapaj trabajocunaman cutin utsia tigrarca; sacerdotecunaca uyajcunata na ashtahuan yali cani yarcachu, villajcunapash uyajcunata yali ali na carcachu, yachachijcunapash yachajujcunata yali ali na carcachu; shina tucuicuna pactalla carca, tucui trabajota shujllangaman runacuna paicunapaj ushaihuan rurarca.

27 Paicunapaj minishtirishcapachacunata cararca, shujllangaman imashna charishca, huajchacunaman, minishtishcacunaman, ungushcacunaman, llaqui yalijujcunaman; paicuna valishca churajunata na churajurca, shina cashpapash ali juyailla ricunajujcuna carca.

28 Shina iglesia ruranacunata churarca; shina sumaj causaita cutin charishpa catirca, masqui tucui na ricunayachishpa catijcunapipash.

29 Cunan, iglesiapi shinlli caimanda, ninan charijcuna cai callarirca, tucui minishtishca cuzascunata ashtacatapacha charishpa—ashtacapacha ataju llamacuna, huagracuna, tucui laya huasi animalcuna, ashtacapacha murucuna, curicuna, culquicuna, juyailla cuzascuna, ashtacapacha seda, linohuan fino ahuashcacuna, tucui laya ali shinalla finducunapash.

30 Shina, paicunapa ninanda ali mirai canacunapi, churajuna illacunata nimaijanda na llujchishpa cacharca, yarjachijcunata, yacunayachijcunata, ungushcacunata, na micushcacuna cajpipash; paicunapaj shungucunata valishca charijyanacunapi na churarca; chaimanda tucui ninan carajcuna carca, rucucuna viñaj huambracunapash, esclavocuna librecunapash, jaricuna huarmicunapash, iglesiata na catijcuna iglesiata catijcunapash, maijan minishtij genticunata maijandapash na ajllashpa.

31 Shina charijyarca ashtahuan ali mirajcunaman tigrarcapash paicunapa picuna iglesiata na catijcunata yalishpa.

32 Picuna iglesiata na catijcuna paipura tandanajurca hechiceríapi, yanga diosta cungurinapi, quilla caicunapi, chismecunapi, envidiacunapi, fiñanajuicunapipash; valishca churajunacunata churajushpa; vichai alsarishpa jariyaicuna paicunapaj ñavipillata; na ricunayachishpa catirca, llullarca, shuhuarca, quichurca, fornicacióncunata rurarca, huañuchirca, tucui laya na ali ruraicunatapash; shina cashpapash, catichunbacha saquishcacunata maijan faquijcunaman churarcapacha, imashna usharishcaman.

33 Yalishca jipa catichunbacha saquishcacunata shina paicunaman churashpa, shujllangaman runacuna llaqui yalirca imata rurashca cashpapash, casillacunaman tigrarca, yachashca na ali ruraicunata rurangapa manllarca; chaimanda, ashtaca sumaj causai tiarca Nefi llactapuracunahuan, ricushpa chasquichijcunapaj reinado picha huatacaman.