1 Cunan yalishca jipa Moroni cai cartata chasquishpa paipaj shungu na manllaita japirca, ninan jatun cushijuihuan jundarca Pahoránpaj fidelidadmanda, paipash na cashcajpi libertadta umachishpa japichij, paipa llactapaj yuyaicunatapash.

2 Ashtahuangaripai llaquirircapash ninan na ali ruraicunamanda maijanguna Pahoránda ricushpa chasquichina jatun tiarinamanda anchuchishcacunamanda, ari, tucuripi maijangunamanda paicunapaj llactapa, paicunapaj Diostapash contra na cazushcacunamanda.

3 Yalishca jipa Moroni huaquin runacunata pusharca, Pahorán munashcamanda, Lehiman, Teáncummanbash paipaj puchushca macanajuj runacunapaj jahuapi mandachun curca, paipaj purita catirca Gedeón llactaman.

4 Pai alsarca libertadpaj estandarteta maijan pushtuman yaicushcapi, tandachircapash mashna runacunata ushashcata tucui paipaj purishcapi Gedeón alpaman.

5 Yalishca jipa huaranga huarangacuna paipaj estandarteman quimirirca, paicunapaj espadacunata paicunapaj libertadta huacaichingapa japirca, huatai tucushcashnapi ama urmangapa.

6 Shina, Moroni tandachirca mashna runacunata ushashcata tucui paipaj purishcapi, pai shamurca Gedeón alpaman; tandachircapash paipaj macanajujcunata Pahoránbacunahuan paicuna ninan shinllicuna tigrarca, Pacuspaj runacunatapash yali shinllicuna, pimi carca jatun mandaj maijan chaupirishcacunapaj pimi calpachirca libre runacunata Zarahemla alpamanda chai alpatapash japishca carca.

7 Yalishca jipa Moroni, Pahoránbash urai rirca paicunapaj macanajuj runacunahuan Zarahemla alpacaman, llactapaj contra rirca, Pacuspaj runacunahuan tuparirca, shinashpa macanajungapa shamurca.

8 Riqui, Pacus huañuchi tucurca, paipaj runacunapash prezucuna japi tucushca carca, Pahorán cutinlla apamushca carca paipaj ricushpa chasquichina jatun tiarinaman.

9 Pacuspaj runacuna paicunapaj llaquichinacunata chasquirca, catichunbacha saquishcacuna layapi, chai jatun mandajta charingapa munaj runacunapash maijanguna japishpa cárcelman churashcacunapash; paicunapash huañuchi tucurca catichunbacha saquishcacuna layapi; ari, chai Pacuspaj runacuna, chai jatun mandajta charingapa munaj runacunapash, macanajunacunata japina randi paicunapaj llactata huacaichina randi, ashtahuangari paipaj contra macanajungapa munarca, paicuna huañuchi tucurca.

10 Shina cai minishtirishca tigrarca cai catichunbacha saquishcacuna ricushpa ruranapacha carca paicunapa llacta seguro cachun; ari, maijanbash paicunapaj libertadta na ninajujta tupashca cashpa ñapash huañuchina carca catichunbacha saquishcacunapaj layapi.

11 Shina tucurirca ricushpa chasquichijcunapaj reinado quimsa chunga huata Nefipaj llactapuracunapa jahuapi; Moroni, Pahoránpash sumaj causaita cutin shayachishpa Zarahemla alpapi, paicunapaj propio llactapuracunapi, huañuita churashca cashpa tucui maijanguna na fielcuna cajcunaman libertadmanda.

12 Yalishca jipa ricushpa chasquichijcunapaj reinado quimsa chunga shuj huata callaripi Nefipaj llactapuracunapa jahuapi, Moroni minishtirishcacunata ñapash cachachun mandarca, sujta huaranga macanajuj runacunatapash Helamánman cacharca, paita chai alpa pushtuta alchishpa charita ayudangapa.

13 Cachachun mandarcapash sujta huaranga macanajuj runacunata, minishtishca micunacunahuan, Lehipaj, Teáncumpaj macanajuj runacunapaman. Yalishca jipa cai rurashca carca alpata shinlliyachichun Lamanitacunapaj contra.

14 Yalishca jipa Moroni, Pahoránbash, tauca runacunata Zarahemla alpapi saquishpa, paicuna purinata catirca tauca runacunahuan Nefíahpaj alpaman, Lamanitacunata chai llactapi mishangapapacha.

15 Yalishca jipa imashna paicuna chai alpaman purishpa rinajurca, Lamanitacunapaj taucapacha runacunata japirca, paicunamanda taucacunata huañuchirca, paicunapaj minishtirishcacunata japirca, paicunapaj macanajunacunatapash.

16 Yalishca jipa paicunata japishca jipa, shuj convenioman yaicuchun rurachirca paicuna Nefitacunahuan macanajungapa ashtahuan macanajunacunata ama japichun.

17 Imaura paicuna cai conveniota rurajpi cacharca Ammónpaj llactapuracunahuan causachun, casi chuscu huarangacuna carca maijanguna huañushcacuna.

18 Yalishca jipa paicunata cachashca jipa paicuna purishpa catirca Nefíah alpaman. Yalishca jipa imaura paicuna Nefíah llactaman chayashpa, paicunapaj facha huasicunata shayachirca Nefíah pugru pambacunapi, imami Nefíah llacta ladopi can.

19 Cunan Moroni munashca carca Lamanitacuna paicunapaj contra macanajuj shamuchun, pugru pambapi; ashtahuangari Lamanitacuna, yachaimanda paicunapaj ninan jatun millaita, ricushpa paicunapaj taucapachacuna, chaimanda manllarca paicunapaj contra shamungapa; chaimanda chai punlla macanajungapa na shamurca.

20 Tutayajpi, Moroni yana tutapi rirca, pirca jahuaman vitsiarca ricungapa maijan llacta pushtupi Lamanitacuna causanajujta paicunapaj macanajuj runacunahuan.

21 Yalishca jipa paicuna indi llujshij ladoman carca, yaicunaman; paicuna tucuilla puñunajurca. Cunan Moroni paipaj macanajuj runacunapaman tigrarirca, ñapash rurachun mandarca shinlli cabiacunata, chacanacunatapash, jahua pircamanda pirca ucu pushtuman uriajungapa.

22 Yalishca jipa Moroni paipaj runacunata purishpa richun mandarca pirca jahuaman vitsiachun, uriajurca llactapaj chai pushtuman, ari, indi huashajuj ladomanbash, maipi Lamanitacuna causanajurca paicunapaj macanajuj runacunahuan.

23 Yalishca jipa tuta tucuilla uriajurca llacta ucuman, paicunapaj shinlli cabiacunahuan, paicunapaj chacanacunahuanbash; shina punllayajpica tucuilla llacta pirca ucucunapi carca.

24 Cunan, imaura Lamanitacuna rijcharishpa, ricurcapash Moronipaj macanajuj runacuna pirca ucucunapi cajta, paicuna ninanda manllarirca, shinashpa paicuna calparca yaicunata.

25 Cunan Moroni ricurca paipaj ñaupata calpanajujta, paipaj runacunata mandarca purishpa shamuchun paicunapaj contra, taucata huañuchirca, tauca cutishujcunata chaupipi churarca, prezucunata japircapash; puchushcacunaca calparca Moronipaj alpaman, imami carca manñacunapi jatun mama cocha pata ladopi.

26 Shina Moroni, Pahoránbash Nefíah llactata mishashpa japirca ni shuj almata na chingachishpa; tauca Lamanitacuna tiarca picuna huañushca carca.

27 Cunan yalishca jipa tauca Lamanitacuna maijan prezucuna carca munarca Ammónpaj llactapurahuan tandanajungapa, libre llactapuracunamanbash tigrangapa.

28 Yalishca jipa mashna munashcacunaman, cushca carca paicuna imashna munashca layapi.

29 Chaimanda, tucui Lamanita prezucuna Ammónpaj llactapuracunahuan tandanajurca, ninanda trabajai callarirca, alpata tarpushpa, viñachishpa tucui laya muyucunata, ataju llamacunatapash, tucui laya huagracunatapash; shina Nefitacuna fangallayachirca paicunapaj llashacunata; ari, shinashpa paicuna fangallayachirca tucui Lamanita prezucunamanda.

30 Cunan yalishca jipa Moroni, Nefíah llactata mishashpa chasquishca jipa, tauca prezucunata charimanda, imami ninandapacha ashallayachirca Lamanitacunapaj macanajuj runacunata, tigrai charishpa tauca Nefitacunata picuna prezu japi tucushca carca, imami ninandapacha shinlliyachirca Moronipaj macanajuj runacunata; chaimanda Moroni Nefíahpaj alpamanda Lehipaj alpaman rirca.

31 Yalishca jipa imaura Lamanitacuna ricurca Moroni paicunapaj contra shamunajujta, cutin manllarca Moronipaj macanajuj runacunamanda ñaupashpa calparcapash.

32 Yalishca jipa Moroni paipaj macanajuj runacunahuan llactan llactan catirca, imaura paicuna Lehihuan, Teáncumhuan tuparingacaman; Lamanitacuna calparca Lehimanda, Teáncummandapash, urai manñacunaman jatun jatun mama cocha pata ladoman, Moronipaj alpaman chayamungacaman.

33 Lamanitacunapaj macanajuj runacuna tucuilla tandanajushca carca, shinashpa Moronipaj alpapi carca tucuilla shujlla tandanajushca. Cunan Ammorón, Lamanitacunapaj jatun mandajpash paicunahuan carca.

34 Yalishca jipa Moroni, Lehi, Teáncumbash shayarirca paicunapaj macanajuj runacunahuan muyundi Moronipaj alpapaj manñacunapi, shinashpa Lamanitacuna chaupipi churashca carca manñacunapi jichushca pamba urai ladoman, manñacunapi jichushca pamba indi llujshij ladomanbash.

35 Shina paicuna tuta shayarirca. Riqui, Nefitacuna, Lamanitacunapash shaijushca carca ashtacatapacha purishpa rishcacunamanda; chaimanda nima umachinacunata na rurarca tutapi, Teáncumlla; pai ninandapacha fiñashca carca Ammorónhuan, shinashpa pai yarca Ammorón, Amalickíahpash paipaj huauqui, picunamanda cashcata cai jatun tucuchina macanajui paicunahuan Lamanitacunahuan, imamanda carca shina ashtaca macanajui yahuar jichaipash, ari, shina ashtaca ninan yarjai.

36 Yalishca jipa Teáncum paipaj fiñaipi Lamanitacunapaj causana pambaman rirca, llactapaj pircacunamanda uriajurca. Pushtu pushtu rirca cabiahuan, shinashpa jatun mandajta tuparca; jabalinata yalichirca, ima yaicurca paipaj shungu ladopi. Ashtahuangari riqui, jatun mandajca rijchachirca sirvij runacunata nara huañushpallata, shinashpa paicuna Teáncumda catirca, paita huañuchirca.

37 Cunan yalishca jipa imaura Lehi, Moronipash yacharca Teáncum huañushcata ninandapacha llaquirirca; riqui, pai cashca carca shuj runa pimi na manllaihuan macanajushca carca paipaj llactamanda, ari, ciertopacha libertadpaj rijsi; pai yalishca carca tauca ninan shinlli llaquicunata. Ashtahuangari riqui, huañushca carca, catishca carcapash ñanda tucui alpaman.

38 Cunan yalishca jipa Moroni caya punlla purishpa rirca, Lamanitacunapaman chayarca, shinashpa paicunata huañuchirca jatun huañuchihuan; alpamanda calpachirca; paicuna calparca, chai punllacuna Nefitacunapaj contra na tigramurca.

39 Shina ricushpa chasquichijcunapaj reinado quimsa chunga shuj huata tucurirca Nefipaj llactapuracunapa jahuapi; shina macanajuicunata charishca carca, yahuar jichaicunatapash, ninan yarjaicunatapash, llaquitapash, tauca huatacunata.

40 Tiashca carca huañuchicuna, fiñanajuicuna, ninanda fiñarishpa rimanacunapash, tucui laya na ali ruraicunapash Nefipaj llactapuracunapi; shina cajpipash alicunapa alicachun, ari, alicunapaj achil mañaicunamanda, huacaichi tucushca carca.

41 Ashtahuangari riqui, ninanda macanajui catijuimandalla Nefitacunahuan Lamanitacunahuan shinllicuna tauca tigrarca, ninanda macanajui catijuimandalla; taucacuna amujyarca paicunapaj llaquicunamanda, shinashpa paicunallata humillarirca Diospaj ñaupapi, jatun humildadpipash.

42 Yalishca jipa Moroni chai alpa pushtucunata shinllichishca jipa imami Lamanitacunapaman ashtahuan na seguro carca, imaura paicuna alipacha shinlli carca, Zarahemla llactaman tigrarca, Helamánbash tigrarca paipaj chasquishca pushtucunaman; cutinbash sumaj causai Nefipaj llactapuracunapi shayachishca carca.

43 Moroni paipaj macanajuj runacunapaj mandota saquirca paipaj churipaj maquipi, paipaj shuti carca Moroníah; paipaj propio huasiman rirca paipaj puchu punllacunata sumaj causaipi yalingapa.

44 Pahorán paipaj ricushpa chasquichina jatun tiarinaman tigrarca; Helamán llactapuracunaman Diospaj achil shimita yachachingapa cutin japirca; tauca macanajuicunamanda, fiñanajuicunamandapash cai minishtirishca carca cutin shuj regulaciónda iglesiapi rurana.

45 Chaimanda, Helamán, paipaj huauquicunapash rirca, Diospaj shimita villarca ashtaca ushaihuan tauca llactapuracunata crichingacaman paicunapaj na ali ruraicunata, imami arrepentichirca paicunapaj juchacunamanda, bautizarichircapash Apunchij paicunapaj Diosman.

46 Yalishca jipa paicuna cutin Diospaj iglesiata shayachirca, tucui alpacunapi.

47 Ari, regulaciónguna rurashca carca catichunbacha saquishcacunamanda. Paicunapaj ricushpa chasquichijcuna, paicunapaj ricushpa chasquichijcunapaj yali mandajcunapash ajllashca carca.

48 Nefipaj llactapuracuna cutin ali mirai callarirca alpapi, aillucuna mirari callarircapash, cutin ninandapacha ushaihuan mirarca alpapi. Paicuna ninanbacha charijcuna mirai callarirca.

49 Ashtahuangari masqui paicunapaj charijyashcacuna, nacashpa paicunapaj ushai, nacashpa paicunapaj ali mirai, paicuna na vichai alsarirca paicunapaj ñavipi jariyaipi; na unayarca Apunchij paicunapaj Diosta yaringapa; ashtahuangari ninanda humillarirca paipaj ñaupapi.

50 Ari, paicuna yarirca imashna jatun cuzascuna Apunchij paicunamanda rurashcata, huañuimanda cacharichishca carca, huatai tucushcacunamandapash, cárcelcunamandapash, tucui laya llaquicunamandapash, paicunapaj napacha ricunayachijcunapa maquicunamanda cacharichishcapash carca.

51 Paicuna achil mañarca Apunchij paicunapaj Diosta punllan punllan, shinashpa Apunchij paicunata achilyachirca paipaj shimi nishcashna, shina paicuna shinllicunaman tigrarca, ali mirarcapash alpapi.

52 Yalishca jipa tucui cai cuzascuna rurashca carca. Helamán huañurca, ricushpa chasquichijcunapaj reinado quimsa chunga picha huatapi Nefipaj llactapuracunapaj jahuapi.