1 Cunan, Ammón Lamonipaj llactapuracunaman shina catilla yachachijujpi, ñucanchi tigrashunchi Aarónpaj, paipaj huauquicunapaj tandachishpa quilcashcacunaman; Aarón Middonipaj alpamanda llujshishca jipa Espírituhuan apai tucurca Nefipaj alpaman, jatun mandajpaj huasicaman pimi carca tucui alpapaj mandaj Ismaelpaj alpatalla na mandaj; pai carca Lamonipaj taita.

2 Yalishca jipa pai yaicurca chai alpaman jatun mandajpaj jatun huasiman, paipaj huauquicunahuan, jatun mandajpaj ñaupapi cungurirca, paita nirca: Riqui, Oh jatun mandaj, Ammónpaj huauquicuna canchi, picunata quiquin cárcelmanda cacharishca cangui.

3 Cunan, Oh jatun mandaj, ñucanchi causaicunata quishpichijpica, quiquinba sirvij runacuna cashun. Jatun mandaj paicunata nirca: Jatarichi, cangunapaj causaicunata saquisha, ñuca na saquisha canguna ñuca sirvij runacuna cachun; ashtahuangari ñuca minishtini canguna ñucata yachachichun; imashpa imachari ñuca yuyaita llaquichishca quiquinba huauqui Ammónpaj ninan jatunbacha shimicunamanda; ñuca yachangapa munani imamandata Middonimanda pai cangunahuan na vichai shamun.

4 Aarón jatun mandajta nirca: Riqui, Apunchijpaj Espíritu paita cayarca shuj pushtuman; pai rirca Ismaelpaj alpaman, Lamonipaj llactapuracunata yachachingapa.

5 Cunan jatun mandaj nirca: Imata can cai Apunchijpaj Espíritu nishcanguichi? Riqui, caimi can imami ñucata llaquichin.

6 Ashtahuan, imata can cai Ammón nirca—Canguna na arrepentirishpaca canguna na quishpiringuichichu, canguna na arrepentirishpaca, chai tucuri punllapi llujchishpa cachashca canguichi?

7 Aarón tigrachirca nishpa: Cringuichu can shuj Dios tiajta? Jatun mandaj nirca: Ñuca yachani Amalekitacuna shuj Dios tian nin, ñuca saquishcani paicunata shayachichun achil pushtucunata, paipuracuna tandanajui ushachun adorangapa. Cunan quiquin shuj Dios tiajta nijpi, riqui ñuca crisha.

8 Cunan imaura Aarón caita uyashpa, paipaj shungu cushijui callarirca, nircapash: Riqui, ciertopacha imashna quiquin causangui, Oh jatun mandaj, shuj Dios tian.

9 Jatun mandaj nirca: Dioschu chai Jatun Espíritu ñucanchi taitacunata apamurca Jerusalénpaj alpamanda?

10 Aarón nirca: Ari, pai can chai Jatun Espíritu, paimi rurarca tucui cuzascunata jahua pachapi cai pachapipash. Caita cringuichu?

11 Pai nirca: Ari, ñuca crini chai Jatun Espírituca tucui cuzascunata rurashcata, ñuca munanipash quiquin villahuachun tucui cai cuzascunamanda, ñuca crishami quiquinba shimicunata.

12 Yalishca jipa imaura Aarón ricurca jatun mandaj paipaj shimicunata crijta, pai callarirca Adánda rurashcamanda, achil quilcashcacunata liishpa jatun mandajman—imashna Dios rurashcata runata paipaj propio rijchata, Dios paiman rurachunbacha saquishcacunata cushcatapash, na ali ruraimanda, runacuna urmashcatapash.

13 Aarón paiman aliguta yachachirca achil quilcashcacunata Adánda rurashcamanda, paipaj ñaupapi ali yachachirca runacunapaj urmashcamanda, paicunapaj aicha canapi, jatun causachinapaj plandapash, maijan alichishca carca cai pachata rurashcamandapacha, Cristomanda, tucui maijangunapa paipaj shutipi cringapa munajpi.

14 Runacuna urmaimanda paimandallata nimata na chari ushan; ashtahuangari llaquiricuna Cristopaj huañuipash paicunapaj juchacunata anchuchin, fehuan, arrepentimientohuanbash, ashtahuanbash; huañuipaj huatashcacunata pai fitin, pambana pushtu ama mishachun, huañuipaj tujsinapash ama yalishca cachun punchapambapaj shuyaicunapi; Aarón jatun mandajta tucui cai cuzascunata ali yachachirca.

15 Yalishca jipa Aarón cai cuzascunata ali yachachishca jipa, jatun mandaj nirca: Imata rurana cani ñuca cai mana tucurina causaita chari ushangapa imamanda quiquin parlashcangui? Ari, imata rurana cani Diospaj nacirishca cangapa, charishpa cai aya espírituta ñuca pechopi ñana sapiyashca, paipaj Espírituta chasquingapa, cushijui junda cai ushangapa, chai tucuri punllapi ama llujchishpa cachashca cangapa? Riqui, pai nirca, carasha tucui ñuca charishcacunata, ari, ñuca reinota saquishalla, cai jatun cushijuita chasqui ushangapa.

16 Ashtahuangari Aarón nirca: Cai quiquinba munai cajpica, Diospaj ñaupapi cungurijpica, ari, tucui quiquinba juchacunata arrepentirijpica, Diospaj ñaupai cungurijpica, paipaj shutipi fehuan cayajpi, chasquisha yashpa, shina quiquin chasquingui shuyaita imata quiquin munashcangui.

17 Yalishca jipa imaura Aarón cai shimicunata nijpi, jatun mandaj Apunchijpaj ñaupapi cungurirca, paipaj cunguricunahuan; ari, alpacaman cunguringacaman, ninandapacha caparircapash, nishpa:

18 Oh Dios, Aarón villahuashca shuj Dios tiajta; shuj Dios tiajpica, quiquin Dios cashpaca, ñucaman ricurihuai, tucui ñuca juchacunata saquisha quiquinda rijsingapa, huañuimanda jatari ushangapa, chai tucuri punllapi quishpirishca cangapa. Cunan imaura jatun mandaj cai shimicunata nishca cajpi, Espírituhuan huajtai tucurca huañushcashna carca.

19 Yalishca jipa paipaj sirvij runacuna calparca villarcapash jatun mandaj huarmiman jatun mandaj ima tucushcata. Pai jatun mandajpaman yaicumurca; imaura pai ricushpa huañushcashna sirijujta, Aarónbash paipaj huauquicunapash shayanajujta yarcami paicuna urmachishcata, paicunata fiñarca, mandarcapash paipaj sirvij runacunata, nacashpa jatun mandajpaj sirvij runacunata, paicunata japishpa huañuchichun.

20 Cunan sirvij runacuna ricushca caimanda imashpa jatun mandajpaj urmaita, chaimanda Aarónpaj paipaj huauquicunapaj jahuapi paicunapaj maquicunata churangapa manllarca; paicuna jatun mandaj huarmita ninanda mañarca nishpa: Imashpata quiquin mandangui cai runacunata ñucanchi huañuchichun, paicunamanda shujlla ninan ushaihuan can tucuilla ñucanchita yali? Chaimanda ñucanchi paicunapaj ñaupapi urmashun.

21 Cunan imaura jatun mandaj huarmi sirvij runacunapaj manllaita ricushpa paipash ninanda manllai callarirca, paipaj jahuaman imapash na ali shamunata. Pai mandarca paipaj sirvij runacunata paicuna richun, cayachun llactapuracunata, paicuna Aarónda paipaj huauquicunatapash huañuchichun.

22 Cunan imaura Aarón ricushpa jatun mandaj huarmipaj ruranata, yachashpa llactapuracunapaj shinlli shungucunata, manllarca ashtacapacha tandanajushcacuna paipura tandanajunata, shuj jatun randimanda plituri tianata, paipuracunapi fiñajuicunata; chaimanda paipaj maquita chutarca jatun mandajta alpamanda jatarichirca, paiman nirca: Shayari. Paipaj chaquihuan shayarirca, paipaj shinllicanata chasquishpa.

23 Cunan cai rurashca carca jatun mandaj huarmipaj ñaupapi tauca sirvij runacunapaj ñaupapipash. Imaura paicuna caita ricushpa ninandapacha cushijurca, manllai callarircapash. Jatun mandaj ñaupaman rirca, paicunata achil yachachi callarirca. Paicunata achil yachachirca, shinashpa paipaj tucuilla huasi ucupuracuna Apunchijpaman tigrarca.

24 Cunan ashtacapacha tandanajushcacuna tandanajushca carca jatun mandaj huarmi rurachunbacha saquishca caimanda, paipuracunahuan jatun huasha rimaicuna tiai callarirca Aarónmanda paipaj huauquicunamandapash.

25 Ashtahuangari jatun mandaj paicunapaj ñaupaman rishpa achil yachachirca. Paicuna casillayarca Aarónhuan maijan paihuan cajcunahuanbash.

26 Yalishca jipa imaura jatun mandaj ricurca llactapuracuna casilla cajta, Aarónda paipaj huauquicunatapash ashtacapacha tandanajushcacunapaj chaupipi shayachirca, paicunaman achil shimita yachachichun.

27 Yalishca jipa jatun mandaj shuj proclamaciónda cacharca tucui alpacunaman, paipaj tucui llactapuracunaman maijanguna paipaj tucui alpacunapi cajcunaman, muyundi llactacunapi cajcunaman, cai carca mujunashca jatun mama cochahuan, indi llujshij ladoman, indi huashajuj ladomanbash, cai carca chaupishca Zarahemla alpamanda shuj quichiji largo jichushca pambahuan, cai rijurca indi llujshij lado jatun mama cochamanda indi huashajuj lado jatun mama cochacaman, muyundi jatun mama cocha patapi, jichushca pamba manñatapash maijan carca Zarahemla alpa vichaipi, Manti manñacunapi, Sidón jatun yacupaj pujyu ladopi, rijurca indi llujshijmanda indi huashajuj ladoman—shina Lamanitacuna Nefitacunamanda chaupirishca carca.

28 Cunan, ashtahuan quilla Lamanitacuna jichushca pambacunapi causarca, facha huasicunapi; caiman chaiman chajchurishcacuna indi huashajuj lado jichushca pambapi, Nefipaj alpapi; ari, Zarahemla alpapaj indi huashajuj ladomanbash, jatun mama cocha pata manñacunapi, Nefipaj alpa indi huashajuj ladomanbash, paicunapaj taitacunapaj callari chasquishca pushtupi, shina jatun mama cocha pata manñacunata catishpa.

29 Tauca Lamanitacuna jatun mama cocha pata indi llujshij ladoman tiarca, maiman Nefitacuna calpachirca. Shina Nefitacuna Lamanitacunahuan muyundi ladolla carca; shina cajpipash Nefitacuna mishashca carca tucui vichai pushtucunapaj manña alpacunata jichushca pambapi, Sidón jatun yacupaj pujyupi, indi llujshijmanda indi huashajujcaman, jichushca pamba ladoman; vichaiman Ashtacapacha Tiaj shutichishca alpaman chayangacaman.

30 Imapash Illaj shutichishca alpahuan mujun carca, maijan vichaimanbacha carca alpaman chayangacaman maipi llactapuracuna tiashcarca tucuchi tucurcapash, paicunapaj tullucunamanda parlashcanchi, maijangunata Zarahemla llactapuracuna tuparca, chai pushtu callari alpaman chayai caimanda.

31 Caimanda chayarca urai jichushca pambacaman. Shina vichai alpa shutichishca carca Imapash Illaj, urai alpa shutichishca carca Ashtacapacha Tiaj, jichushca pamba caimanda tucui laya sacha animalcuna paipuralla jundashca carca, caicunamanda huaquin vichai alpaman micunamanda shamushca carca.

32 Cunan, Nefitapaj shuj punlla chaupilla purishpa rina caru cai carca, Ashtacapacha Tiaj ladota, Imapash Illaj alpatapash, indi llujshij jatun mama cochamanda indi huashajuj ladocaman; shina Nefipaj alpa Zarahemla alpapash yacu muyushca carca, asha quichiji alpa tiarca vichai alpamanda urai alpacaman.

33 Yalishca jipa Nefitacuna Ashtacapacha Tiaj alpapi causarca, indi llujshij lado jatun mama cochamanda indi huashajujcaman, shina Nefitacuna paicunapaj yachaipi, paicunapaj ricujcunahuan macanajuj runacunahuanbash jarcashca carca, uraiman Lamanitacunata, caimanda paicuna ashtahuan ama mishachun vichaiman, paicuna ama mishashpa vichai alpata catichun.

34 Chaimanda Lamanitacuna ashtahuan na chari usharca Nefipaj alpatalla, muyundi jichushca pambata. Cunan cai carca Nefitacunapaj yachaipi—Lamanitacuna paicunata na ricunayachijcuna cajpi, ama saquingapa llaquichichun paicunapaj llaquicuna shuj shuj ladocunamanda, maiman calpana alpata charingapapash, paicunapaj munaimanda.

35 Cunan ñuca, caita nishca jipa, cutin tigrani Ammónpaj, Aarón, Omner, Himni, paicunapaj huauquicunapash tandachishpa quilcashcacunaman.