1 Cunan ñucanchi tigrashun ñucanchi tandachishca quilcashcacunapi Amalickíahpaman maijanguna jichushca pambaman calpashcacunapaman; riqui, pai japishca carca maijan paihuan rijcunata, Nefipaj alpaman vichai rircapash Lamanitacunahuan, tangarcapash fiñachun Lamanitacuna Nefipaj llactapuracunata, shinashpa Lamanitacunapaj jatun mandaj shuj proclamaciónda tucui paipaj alpacunaman cacharca, tucui paipaj llactapuracunaman, paipuracuna cutin tandanajuchun Nefitacunapaj contra macanajungapa ringapa.

2 Yalishca jipa imaura proclamación paicunapaman rijpi ninandapacha manllarishca carca; ari, paicuna manllarca jatun mandajta fiñachinata, manllarcapash Nefitacunahuan macanajungapa ringapa paicunapaj causaicunata chingachishun yashpa. Yalishca jipa paicuna na munarca, nacashpa tucuimanda yalishca paicunamanda na munarca, jatun mandajpaj rurachunbacha saquishcacunata cazungapa.

3 Yalishca jipa jatun mandaj fiñashca carca paicunapaj na cazuimanda; chaimanda Amalickíahman curca mandota paipaj huaquin macanajuj runacunata picuna paipaj mandashcacunata cazujcunata, paita mandarca richun, macanajunacunata japichunbacha.

4 Cunan riqui, cai carca Amalickíahpaj munai; caimanda shuj na alipa yachashca runa paipaj shungupi planda rurarca Lamanitacunapaj jatun mandajta jatun tiarinamanda anchuchingapa.

5 Cunan mandai ushashca carca chai Lamanitacunata maijanguna jatun mandajta shinlliyachinajurca; pai yuyaita misharca chai shinlliyachinajujcunapaj picuna na cazujcuna carca; chaimanda Onida shutichishca pushtuman rirca, chaiman tucui Lamanitacuna calparca; macanajuj runacuna shamunajujta yacharca, paicuna tucuchinga yashpa, chaimanda Onidaman calparca, macanajuna pushtuman.

6 Paicuna shuj runata ajllashca carca jatun mandaj apajpash paicunapaj jahuapi cachun, paicunapaj yuyaicunapi churarca shinlli ruranata paicuna na tangai tucushca cangapa Nefitacunapaj contra.

7 Yalishca jipa paipuracuna tandanajurca urcu jahuapi imami Antipas shutichishca carca, macanajungapa prepararingapa.

8 Cunan cai na carca Amalickíahpaj munai macanajuiman yaicungapa jatun mandajpaj rurachunbacha saquishcacunamanda; ashtahuangari riqui, cai carca paipaj munai Lamanitacunapaj macanajuj runacunapaj shinllichinata mishangapa, paimandallata paicunapaj umapi churaringapa jatun mandajta jatun tiarinamanda anchuchingapa reinota chasquingapa.

9 Riqui, yalishca jipa paipaj macanajuj runacunata paicunapaj facha huasicunata shayachichun mandarca pugru pambapi imami cai Antipas urcu ladollapi carca.

10 Yalishca jipa tuta cajpi cacharca shuj pacalla villajcunata Antipas urcuman, munashpa, pushajca pimi urcu jahuapi carca, paipaj shuti carca Lehonti, urcu chaquiman shamuchun, paihuan parlangapa munashpa.

11 Yalishca jipa Lehonti cai villaita chasquishpaca manllarca urcu chaquiman urai shamungapa. Yalishca jipa Amalickíah cutin cacharca cati viaje, urai shamuchun munashpa. Yalishca jipa Lehonti na munarca; cutinbash cacharca quimsa viaje.

12 Yalishca jipa imaura Amalickíah yachashpa Lehontita urcumanda na urai shamuchita ushashpa, pai urcuman vichai rirca, Lehontipaj causanajuj pamba ladoman; cutin cacharca chuscu viaje paipaj villanata Lehontiman, mañashpa pai urai shamuchun, paipaj ricuj runacunata paihuan apamuchun.

13 Yalishca jipa imaura Lehonti paipaj ricuj runacunahuan urai shamushpa Amalickíahpaman chayamurca, Amalickíah paita mañarca paipaj macanajuj runacunahuan tuta urai shamuchun, muyuchun chai runacunata paicunapaj causanajuj pambapi picunapaj jahuapi jatun mandaj paiman mandota cushcarca, paicunata Lehontipaj maquicunapi cungapa, paita (Amalickíah) cai gulpi macanajuj runacunapaj jahuapi cati pushajta cachun churajpica.

14 Yalishca jipa Lehonti urai shamurca paipaj runacunahuan Amalickíahpaj runacunata muyurca, shina nara rijcharijpi, punllayajpi paicuna muyushca carca Lehontipaj macanajuj runacunahuan.

15 Yalishca jipa paicuna ricurca muyushcacuna cajta, paicuna ninanda mañarca Amalickíahuan pai saquichun paicunapaj huauquicunahuan tandanajuchun, ama tucuchi tucushca cangapa. Cunan caitapacha Amalickíah munashca carca.

16 Yalishca jipa paipaj runacunata curca, jatun mandajpaj mandashca contra. Cunan cai carca imata Amalickíah munashca, pai rurangapa yuyashcacunata pactachingapa jatun mandajta jatun tiarinamanda anchuchingapa.

17 Cunan cai carca Lamanitacunapaj punda ruraicuna, paicunapaj yali pushaj huañujpica, cati pushajta ajllana paicunapaj yali pushaj cachun.

18 Yalishca jipa Amalickíah paipaj sirvij runamanda shujta venenota carachirca Lehontiman asha asha, huañungacaman.

19 Cunan, Lehonti huañujpica, Lamanitacuna Amalickíahta ajllarca paicunapaj pushaj cachun paicunapaj yali mandaj.

20 Yalishca jipa Amalickíah rirca paipaj macanajuj runacunahuan (imashpa paipaj munashcata charirca) Nefipaj alpaman, Nefipaj llactaman, cai carca yali llacta.

21 Jatun mandaj llujshimurca paipaj ricuj runacunahuan chasquingapa, paica yarca Amalickíah paipaj mandashcata pactachishca cajta, Amalickíah tandachishcarca shina jatun macanajuj runacunata Nefitacunahuan macanajungapa ringapa.

22 Ashtahuangari riqui, jatun mandaj chasquingapa llujshijpi Amalickíah paipaj sirvij runacunata cacharca jatun mandajta tuparichun. Paicuna rirca jatun mandajpa ñaupapi cungurircapash, imashna paita adoragrijuj laya jatunbacha caimanda.

23 Yalishca jipa jatun mandaj paipaj maquita chutarca paicunata jatarichingapa, imashna Lamanitacuna punda ruraicuna carca, sumaj causaipa señal laya, Nefitacunamanda cai punda ruraicunata japishca carca.

24 Yalishca jipa imaura pai callari runata alpamanda jatarichishca carca, riqui pai jatun mandajta shungupi puñalarca; pai alpaman urmarca.

25 Cunan jatun mandajpaj sirvij runacuna calparca; Amalickíahpaj sirvij runacunaca shuj caparita rurarca, nishpa:

26 Riqui, jatun mandajpaj sirvij runacuna paita shungupi puñalarca, urmajpi paicuna calparca; riqui, shamuichi ricuichipash.

27 Yalishca jipa Amalickíah mandarca paipaj macanajuj runacunata ñaupaman purichun ricuchunbash jatun mandaj ima tucushcata; paicuna shamushpa pushtuman, jatun mandajta tuparca paipaj yahuarpi sirijujta, Amalickíah fiñashca laya shinaj tucurca, nircapash: Maijanbash jatun mandajta juyashcacuna, richi, catichi paipaj sirvij runacunata huañuchingapa.

28 Yalishca jipa tucui maijan jatun mandajta juyashcacuna, cai shimicunata uyashpa, rirca catircapash jatun mandajpaj sirvij runacunata.

29 Cunan imaura jatun mandajpaj sirvij runacuna macanajuj runacuna catinajujta ricushpa, cutin manllarirca, jichushca pambaman calparca, Zarahemla alpaman chayarca Ammónpaj llactapuracunahuan tandanajurca.

30 Macanajuj runacuna picuna catishpa rinajurca tigramurca, yanga paicunata catishpa rinajushpa; shina Amalickíah, paipaj umachihuan, llactapuracunapaj shungucunata misharca.

31 Yalishca jipa caya punlla pai yaicurca Nefi llactaman paipaj macanajuj runacunahuan, llactata japirca causangapa.

32 Cunan yalishca jipa jatun mandaj huarmi, jatun mandajta huañushcata uyashpa—imashpa Amalickíah villajcunata cachaimanda jatun mandaj huarmiman villachun jatun mandaj huañuchishca cajta paipaj sirvij runacunamanda, paicunata paipaj macanajuj runacunahuan catishpa rishcata, ashtahuangari cai yanga cashcata, imashpa paicuna pacajurca calpashpa—

33 Chaimanda, imaura jatun mandaj huarmi cai villaita chasquishpa Amalickíahman cacharca, paita mañashpa llactapi causajcunata quishpichichun; mañashpapash paita ricuj shamuchun; mañarcapash ricushcacunata paihuan apamuchun testificachun jatun mandajpaj huañuimanda.

34 Yalishca jipa Amalickíah japirca chai jatun mandajta huañuchishca sirvij runatallata, tucuicuna paihuan cashcacunata, jatun mandaj huarmipaman rirca, pushtuman maipi pai tiajurca; tucuilla testificarca paiman jatun mandajca huañuchishca cashcata paipaj propio sirvij runacunamanda; paicuna nircapash: Paicuna calparca; nachu cai testifican paicunapaj contra? Shina jatun mandaj huarmita crichirca jatun mandajpaj huañuimanda.

35 Yalishca jipa Amalickíah munarca jatun mandaj huarmipaj alicachichun, paita japirca paipaj huarmipa; shina paipaj umachihuan, paipaj na alipa yachashcacuna ayudajpi, reinota chasquirca; ari, pai carca rijsishca jatun mandaj tucui alpacunapi, tucui Lamanitacunapaj llactapuracunahuan, picuna carca Lamanitacuna, Lemuelitacuna, Ismaelitacuna, tucui Nefitacunapamanda chaupirishcacuna, Nefipaj reinadomanda cunan punllacaman.

36 Cunan cai chaupirishcacuna, charishpa chai yachajushcatallata Nefitacunapaj chai villashcacunatallata, ari, charishpa yachachishca cashpa chai Apunchijpaj yuyaipi chasquinacunata, shina cashpapash, cai can extraño parlana, jipamanlla paicuna chaupirishcamanda paicuna tigrarca ashtahuan shinllicuna, na arrepentirijcuna, ashtahuan sacha runacuna, na alita rurajcuna, Lamanitacunatapash yali millaicuna—Lamanitacunapaj punda ruraicunapi ashtahuan causajcuna, na trabajajcuna, tucui laya mapata ruraiman curijcuna; ari, Apunchij paicunapaj Diosta cungaitapacha cungarca.