1 Yalishca jipa saquirca paicunamanda shuj chaqui purita huashanchirirca. Moroni Zerahemnata nirca: Riqui, Zerahemna, ñucanchi na munanchichu huañuchij runacuna cangapa. Can yachangui canguna ñucanchi maquicunapi canguichi, shina cashpapash ñucanchi na huañuchingapa munanchichu.

2 Riqui, ñucanchi cangunapaj contra macanajungapa na shamushcanchichu, cangunapaj yahuarta jichangapa ushaita mascashpa; na munanchipashchu pitapash huatai tucushcashnapaj yugoman apamungapa. Ashtahuangari caipacha can imamanda canguna ñucanchipaj contra shamushcanguichi; ari, ñucanchita fiñashcanguichi ñucanchi religiónmanda.

3 Ashtahuangari cunan, canguna ricuichi Apunchijca ñucanchihuan can; canguna ricuichi pai cushca cangunata ñucanchi maquicunapi. Cunan ñuca munani canguna yuyaipi chasquichun ñucanchita caita rurashca can ñucanchipaj religiónmanda ñucanchipaj Cristopi femanda. Cunan canguna ricuichi canguna na tucuchita ushanguichichu cai ñucanchi feta.

4 Cunan canguna ricuichi caica can ciertopacha Diospaj fe; ari, canguna ricuichi Dios shinllichinga, alichinga, alchishpa charinga ñucanchita, shina paipi ñucanchi fielcuna cangacaman, ñucanchi fepa, ñucanchi religiónba; nimaura Apunchij na saquingachu ñucanchita tucuchichun imashpapash ñucanchi urmajpilla na ali ruraipi ñucanchi feta negashpapash.

5 Cunan, Zerahemna, canda mandani, tucui ushaihuan Diospaj shutipi, pimi ñucanchi macanajuj runacunata shinllichishca ñucanchi cangunapaj jahuapi ushaita mishashcanchi, ñucanchi femanda, ñucanchi religiónmanda, ñucanchi adorangapaj ritocunamanda, ñucanchi iglesiamanda, achilyachishca shinllichimanda imata cunacanchi ñucanchi huarmicunaman, ñucanchi huahuacunaman, chai libertadmanda imami ñucanchita quimichin ñucanchipaj alpacunaman ñucanchipaj llactaman; ari, Diospaj achilyachishca shimita alichimanda, imamanda charinchi tucui ñucanchi cushijuita; tucui imata ashtahuan juyanchi—

6 Ari, cai na tucuilla can; ñuca mandani causangapa munaimanda imata tucuimanda munanguichi, cangunapaj macanajunacunata ñucanchiman cuichi, ñucanchi na mascashunllu cangunapaj yahuarta, ashtahuangari canguna causaicunata quishpichishun, canguna cangunapaj ñangunata rijpilla cutin ñucanchihuan macanajungapa ñana shamujpi.

7 Cunan, canguna caita na rurajpica, ñucanchi maquicunapi canguichi, ñucapaj runacunata mandasha cangunapaj jahuaman shamuchun, cangunapaj cuerpocunapi huañuipaj chugrichicunata churachun, shina canguna tucuchi tucunguichi; shina ñucanchi ricushun pimi cai llactapuracunapaj jahuapi ushaita charijta; ari, ñucanchi ricushunchi pimi huatai tucushcashnaman apaitucun.

8 Cunan yalishca jipa Zerahemna cai nishcacunata uyashpa ñauparca curca paipaj espada, paipaj cimitarra, paipaj arco Moronipaj maquicunapi, nircapash: Riqui, caipi can ñucanchipa macanajunacuna; ñucanchi cujrinchi, ashtahuangari na saquishunllu cangunaman ñucanchimandallata shuj juramentota, imata ñucanchi yachanchi faquishunmi, ñucanchi huahuacunapash; ashtahuangari japichi ñucanchi macanajunacunata, saquichi ñucanchi richun jichushca pambaman; na shina cajpica ñucanchi espadacunata tigrai japishun, huañungapa nacashpa mishangapa.

9 Riqui, ñucanchi cangunapaj femanda na canchichu; na crinchichu Dios ñucanchita cangunapaj maquicunapi cushcata; ashtahuangari ñucanchi crinchi cai can cangunapaj yachai ñucanchipaj espadacunamanda alchishpa charishcata. Riqui, cangunapaj pechopaj jirrucuna, cangunapaj escudocuna cangunata alchishpa charishca.

10 Cunan Zerahemna cai shimicunata parlaita tucuchijpi, Moroni Zerahemnaman tigrachirca espadata, macanajunacunatapash, imacuna pai japirca, nishpa: Riqui, ñucanchi tucuchigrinchi macanajuita.

11 Cunan ñuca na nita na ushanichu shimicunata imata ñuca parlashcata, chaimanda imashna Apunchij causan, canguna na ringichichu imashpapash shuj juramento rurashpalla ringuichi canguna cutinga na tigramungapa ñucanchihuan macanajungapa. Cunan imashna canguna ñucanchi maquicunapi canguichi jichashunmi cangunapaj yahuarta alpaman, nacashpa canguna quimiringuichi imata nishcacunaman imata ñuca shina canata nishcani.

12 Cunan imaura Moroni cai shimicunata nijpi, Zerahemna paipaj espadata tigrai japirca, paica Moronihuan fiñashca carca, ñaupaman rirca Moronita huañuchingapa; ashtahuangari imashna paipaj espadata vichai churarca, riqui, Moronipaj shuj macanajuj runa huajtarca alpaman urmachirca, cai maquijapinapi faquirirca; Zerahemnatapash huajtarca paipaj umacarata fitirca cai alpaman urmarca. Zerahemna paicunapamanda anchurirca paipaj macanajun runacunapaj chaupipi.

13 Yalishca jipa macanajuj runa pimi carca ladolla, pimi Zerahemnapaj umacarata fitirca, umacarata alpamanda japirca ajchamanda, paipaj espada filopi churarca, paicunapaman chutarca, nishpa paicunaman shinlli shimihuan:

14 Imashna cai umacara alpaman urmarca, imami can cangunapaj mandajpaj umacara, shina canguna alpaman urmanguichi imashpapash canguna cushpalla canguna macanajunacunata sumaj causaipa shuj pactanahuan rishpalla.

15 Cunan taucacuna tiarca, cai shimicunata uyashca, ricushpa umacarata imami espada jahuapi carca, ninanda manllarishca carca; taucacuna ñaupashpa shamurca shitarca paicunapaj macanajunacunata Moronipaj chaquicunapi, sumaj causanapaj shuj convenioman yaicurcapash. Imashna taucacuna shuj convenioman yaicushpa paicunata saquirca jichushca pambaman richun.

16 Cunan yalishca jipa Zerahemna ninandapacha fiñashca carca, paipaj puchushca macanajuj runacunata fiñachun tangarca, ashtahuan ushaihuan Nefitacunapaj contra macanajuchun.

17 Cunan Moroni fiñashca carca, Lamanitacunapaj shungucunapaj shinlliyaimanda; chaimanda pai mandarca paipaj llactapuracunata paicunapaj jahuaman richun huañuchichun. Yalishca jipa paicuna huañuchi callarirca; ari, Lamanitacuna macanajurca paicunapaj espadacunahuan paicunapaj ushaihuanbash.

18 Ashtahuangari riqui, paicunapaj churajuna illa caracuna, paicunapaj lluchu umacuna na jarcashca carca Nefitacunapaj filo espadacunamanda; ari, riqui paicuna utujushca carca, chugrichishcapash, ari, ñapash ninanda urmarca Nefitacunapaj espadacuna ñaupapi; paicuna tucuchi tucui callarirca, imashna Moronipaj macanajuj runa achil villachishca shina.

19 Cunan Zerahemna, pai tucuilla tucuchi tucugrijujta ricushpa, ninandapacha mañarca Moronita, nishpapacha pai pactachinata paipaj llactapuracunapash paicunahuan, puchushcacunapaj causaicunata quishpichijpica, paicunapaj contra nimaurapash cutin na macanajungapa.

20 Yalishca jipa Moroni cai llactapuracunata huañuchinata saquichirca. Pai japirca macanajunacunata Lamanitacunapamanda; sumaj causanapaj shuj convenioman yaicushca jipa saquirca jichushca pambaman richun.

21 Cunan paicunapaj huañushcacuna na yupashca carca taucapacha caimanda; ari, paicunapaj huañushcacuna ninan jatunbacha carca, ishcandi Nefitacunapi, Lamanitacunapipash.

22 Yalishca jipa paicunapaj huañushcacunata Sidón yacucunaman shitarca, paicuna richun jatun mama cocha ucu ucupi pambarishca cachun.

23 Nefitacunapaj macanajuj runacuna, nacashpa Moronipaj, tigrarca, shamurcapash paicunapaj huasicunaman, paicunapaj alpacunamanbash.

24 Shina tucurirca chunga pusaj huata ricushpa chasquichijcunapaj reinado Nefipaj llactapuracunapaj jahuapi. Shina tucurirca Almapaj tandachishca quilcashca, imami Nefipaj jirru fangacunapi quilcashca carca.