1 Yalishca jipa Alma Amulekpash chai llactamanda llujshichun mandashca carca; paicuna llujshirca, Sidom alpaman rirca; riqui, chaipi tucuilla llactapuracunata tuparca picuna Ammoníah alpamanda llujshishca carca, picuna calpachi tucushca rumicunahuan shitashca carca, Almapaj achil shimicunata crimanda.

2 Paicuna villarca tucui imalla cashcata paicunapaj huarmicuna huahuacunapash, paicunamandallatapash, paicunapaj cachariringapa ushaimandapash.

3 Zeezrombash Sidompi ungushca sirijurca, rupajuj fiebrehuan, cai carca paipaj yuyaipi jatun llaqui yalimanda, paipaj na ali ruraicunamanda, Alma Amulekpash ñana ashtahuan causanllu yarca; pai yarca paicunaca huañuchishca canga paipaj na ali ruraicunamanda. Cai jatun jucha, paipaj tauca shuj juchacunapash, paipaj yuyaipi ninanda llaqui yalirca imaura ninanbacha nanaiman tigrangacaman, charirinata na charishpa; chaimanda pai rupajuj fiebrehuan llaquiyai callarirca.

4 Cunan, imaura pai uyashpa Alma Amulekpash Sidom alpapi cajta; paipaj shungu cushijuita japirca; paicunaman ñapash shuj villaita cacharca, paipaman paicuna shamuchun mañashpa.

5 Yalishca jipa paicuna ñapash rirca villaita cazushpa imata paicunaman cachamushcata; Zeezrom huasiman rirca; paita tuparca camapi, ungushca, ninan irqui rupajuj fiebrehuan; paipaj yuyaipash ninan nanaihuan carca paipaj na ali ruraicunamanda; paicunata ricushpa paipaj maquita chutarca, ninanda mañarca paicuna paita jambichun.

6 Yalishca jipa Alma nirca, maquimanda japishpa: Cringuichu Cristopaj ushaipi quishpiringapa?

7 Pai nirca: Ari, ñuca crini tucui achil shimicunata quiquin yachachishcata.

8 Alma nirca: Quiquin Cristopaj jatun causachinapi crishpaca jambishca cangui.

9 Pai nirca: Ari, ñuca crini quiquinba achil shimicunamanda.

10 Shina Alma mañarca Apunchijta, nishpa: Oh Apunchij ñucanchi Dios, cai runata llaquipai, paita jambipai paipaj femanda ima can Cristopi.

11 Imaura Alma cai achil shimicunata nijpi, Zeezrom shayarirca paipaj chaquicunahuan, puri callarircapash; cai rurashca tucui llactapuracunata jatun manllari carca; cai villai rirca tucui Sidom alpacunaman.

12 Alma Zeezromta Apunchijpi bautizarca; pai callarirca chai punllamanda llactapuracunata yachachingapa.

13 Alma shuj iglesiata shayachirca Sidom alpapi, achil ajllarca sacerdotecunata, yachachijcunatapash alpapi, Apunchijpi bautizachun maijan bautizaringapa munajcunata.

14 Yalishca jipa paicuna taucacuna carca; tucui muyundi Sidom uchilla llactacunamanda ataju shamurca, bautizarishca carca.

15 Ashtahuangari Ammoníahpaj alpapi caj llactapuracuna, shuj shinlli shinlliyashcacuna na cazujcunapash paicuna cashpa catirca; paicunapaj juchacunamanda na arrepetirircapash, ayaman churashpa Almapaj Amulekpajpash ushaita; imashpa Nehorpaj femanda carca, paicunapaj juchacunamanda arrepentimientota na crirca.

16 Yalishca jipa Alma Amulekpash, Amulek jichushca caimanda tucui paipaj curita, culquitapash, paipaj juyailla cuzascunatapash, imacuna Ammoníah alpapi carca, Diospaj shimimanda, na alicachishpa rimai tucushca caimanda paipaj shujras rijsicunamanda paipaj taitamandapash paipaj aillucunamandapash.

17 Chaimanda, Alma Sidompi iglesiata shayachishca jipa, ricushpa shuj jatun cambiota, ari, ricushpa llactapuracunata cambiashca carca paicunapaj jariyashca shungucunamanda, paicunallata Diospaj ñaupapi humillari callarirca, paicunallata tandanajui callarirca paicunapaj achil pushtucunapi Diosta adorangapa altar ñaupapi, velashpa mañashpapash punllan punllan, Satanásmanda cacharirishca cangapa, huañuimandapash, tucuchinamandapash—

18 Cunan imashna nircani, Alma tucui cai cuzascunata ricuimanda, chaimanda Amulekta paihuan aparca Zarahemla alpaman rirca, paipaj propio huasiman aparca, paita ricurca paipaj jatun llaquicunapi, Apunchijpi shinlliyachirca.

19 Shina tucurin chunga huata ricushpa chasquichijcunapaj reinado Nefipaj llactapuracunapa jahuapi.