1 Cunan yalishca jipa Almapaj churicuna llactapuracunaman rirca, paicunaman achil shimita villangapa. Almapash, paillapash na samai usharca, paipash rirca.

2 Cunan ñucanchi ashtahuan paicunapaj yachachishcacunata na nishunllu, achil shimita paicuna villachirca chaitalla nini, ciertopachata, achil villachinapaj espírituhuan, achil ricuchinahuanbash; paicuna yachachirca Diospaj achil ordenda catishpa imahuan paicuna cayashca carca.

3 Cunan ñuca tigrani macanajuicunapaj tandachishpa quilcashcaman Nefitacunahuan Lamanitacunahuan, chunga pusaj ricushpa chasquichijcunapaj reinado huatapi.

4 Riqui, yalishca jipa Zoramitacuna Lamanitacunaman tigrarca; chaimanda, chunga pusaj huata callaripi Nefitacunapaj llactapuracuna ricurca Lamanitacuna shamunajurca paicunapaman; chaimanda paicuna macanajungapa preparacióncunata rurarca; ari, paicunapaj macanajuj runacunata tandachirca Jersón alpapi.

5 Yalishca jipa Lamanitacuna shamurca huarangacunahuan; paicuna shamurca Antiónum alpaman, cai can Zoramitacunapaj alpa; Zerahemna nishca runa paicuna pushaj carca.

6 Cunan, imashna Amalekitacuna ashtahuan na alicuna, huañuchijcuna carca paicunapi shinacuna caimandallata, Lamanitacuna cajta yali, chaimanda, Zerahemna capitángunapa yalishca mandajcunata Lamanitacunapaj jahuapi ajllarca, paicuna tucuilla carca Amalekitacuna, Zoramitacunapash.

7 Cunan caita rurarca Nefitacunata paicuna napacha ricunayachinata alchishpa charingapa, paicunata apamungapa paipaj munaicunaman curichun rurangapa yuyashcacunaman.

8 Riqui, paipaj rurangapa yuyashcacuna carca Lamanitacunata tangaj shina fiñachingapa Nefitacunapaj contra; caita rurarca pai ushaita charingapa Nefitacunapa jahuapi paicunata huatai tucushcashnaman apamungapa.

9 Cunan Nefitacunapaj rurangapa yuyashca carca paicunapaj alpacunata jarcangapa, paicunapaj huasicunata, paicunapaj huarmicunatapash, paicunapaj huahuacunatapash, paicunapaj napacha ricunayachijcunapa maquicunamanda alchishpacharingapa; paicunapaj derechocuna, paicunapaj privilegiocunatapash alchishpa charingapa, ari, paicuna libertadtapash, paicuna Diosta adorangapa imashna paicunapaj munaihuan.

10 Paicuna yacharca Lamanitacunapaj maquicunapi urmashpaca, pipash Diosta adorajpi espíritupi, ciertopachapi, ciertopacha, causaj Diosta, Lamanitacuna tucuchinga.

11 Ari, paicuna yacharcapash Lamanitacunapaj ninanda napacha ricunayachijta paicunapaj huauquicunapaj contra, picuna carca Anti-Nefi-Lehi, picuna shutichishca carca Ammónpaj llactapuracuna—paicuna macanajunacunata na japi usharca, ari, paicuna shuj convenioman yaicushca carca, caita na faquingapa munarca—chaimanda, Lamanitacunapaj maquicunapi urmashpaca paicuna tucuchi tucuna carca.

12 Nefitacuna na saquina carca paicunata tucuchichun; chaimanda curca alpacunata paicuna chasquichun.

13 Ammónpaj llactapuracuna Nefitacunaman curca ashtacata paicunapaj causangapa minishtirishcapachacunamanda macanajuj runacuna causai ushachun; shina Nefitacuna paicunalla ruranapacha carca, Lamanitacunata jarcangapa, picuna carca Lamán, Lemuelpaj churicuna, Ismaelpaj churicuna, tucui picuna Nefitacunamanda chaupirirca, pimi carca Amalekitacuna, Zoramitacuna, Noépaj sacerdotecunapaj cati aillucunapash.

14 Cunan cai cati aillucuna ashtacapacha carca, Nefitacuna caj shinallata ñalla carca; shina Nefitacuna paicunapaj huauquicunahuan macanajunapacha carca, yahuarta jichangacaman.

15 Yalishca jipa imashna Lamanitacunapaj macanajuj runacuna tandanajurca Antiónum alpapi, riqui, Nefitacunapaj macanajuj runacuna paicunahuan tuparingapa prepararishca carca Jersón alpapi.

16 Cunan, Nefitacunapaj pushaj, nacashpa chai runa pimi capitángunapaj yalishpa mandaj cangapa ajllai tucushca carca Nefitacunapaj jahuapi—cunan cai capitán yali mandaj mandota japirca Nefitacunapaj tucui macanajuj runacunapa—paipaj shuti carca Moroni;

17 Moroni tucui mandota japirca, macanajuicunapaj pushaitapash. Pai chaira ishcai chunga picha huatalla carca imaura pai Nefitacunapaj macanajuj runacunapaj capitán yali mandaj cachun ajllai tucuj horas.

18 Yalishca jipa paica Lamanitacunata tuparca Jersónpaj manñacunapi, paipaj llactapuracunaca macanajungapa espadacunahuan carca, cimitarracunahuan, tucui laya macanajunacunahuan.

19 Imaura Lamanitacunapaj macanajuj runacuna Nefipaj llactapuracunata ricushpa, nacashpa Moroni, paipaj llactapuracunata preparashcata pechopaj jirrucunahuan, maqui escudocunahuan, ari, escudocunahuanbash paicunapaj umacunata jarcangapa, paicuna churajushcapash carca racu churajunahuan—

20 Cunan Zerahemnapaj macanajuj runacuna shinapacha na preparishca carca; paicuna charirca espadacunalla, cimitarracuna, arcocuna, flechacuna, rumicuna, huaracacunapash; paicuna churajuna illacuna carca, paicunapaj lomocunatalla carahuan pillurishcacuna carca; ari, tucuilla churajuna illacuna carca, Zoramitacuna, Amalekitacunalla na shina carca;

21 Ashtahuangari paicuna na macanajungapa churajushcacuna carca pechopaj jirrucunata, nacashpa escudocuna—chaimanda, paicuna ninanda manllarca Nefitacunapaj macanajuj runacunata paicunapaj macanajungapa churajushcacunamanda, masqui paicuna Nefitacunata ashtahuan yali cashpapash.

22 Riqui, yalishca jipa paicuna manllarca ringapa Nefitacunapaj Jersónpaj manñacunaman; chaimanda Antiónum alpamanda llujshirca jichushca pambaman, paicuna muyushpa rirca jichushca pambapi, caru Sidón jatun yacu pujyucunata, Manti alpaman chayangapa chai alpata mishangapa; paicuna yuyaipi na yarcachu Moronipaj macanajuj runacuna maiman rishcata yachajta.

23 Ashtahuangari yalishca jipa, paicuna jichushca pambaman rijllapi Moroni cacharca ricuj runacunata jichushca pambaman paicunapaj causanajuj pambata ricuchun; Moronipash, yachaimanda Almapaj achil villashcacunata, huaquin runacunata cacharca, munashpa pai Apunchijta tapuchun Nefitacunapaj macanajuj runacuna maiman rinata Lamanitacunamanda huacaichiringapa.

24 Yalishca jipa Apunchijpaj shimi Almapaman shamurca, Alma villarca Moronipaj villanata apajcunaman, Lamanitacunapaj macanajuj runacunaca jichushca pambacunapi muyunajujta, Manti alpaman chayamungapa, macanajui callaringapa napacha shinlli llactapuracunahuan. Cai villanata apajcuna rirca Moroniman villagrirca caita.

25 Cunan Moroni, saquirca paipaj huaquin macanajuj runacunata Jersón alpapi, imashpapash Lamanitacuna cai alpata llactata mishangapa yaicumuipapash, paipaj macanajuj runacuna puchushcacunata apashpa rirca Manti alpaman.

26 Tucui llactapuracunata cai pushtu alpapi paipuracuna tandachirca Lamanitacunahuan macanajungapa, huacaichingapa paicunapaj alpacunata, paicunapaj llactata, paicunapaj derechocunata, paicunapaj libertadta; chaimanda paicuna prepararishca carca imaura Lamanitacuna shamujpi.

27 Yalishca jipa Moroni paipaj macanajuj runacunata pacajuchirca pugru pambapi maijan carca Sidón jatun yacu pata manñallapi, cai carca Sidón jatun yacu indi huashajuj ladoman jichushca pambapi.

28 Moroni ricuj runacunata muyundi churarca, imaura Lamanitacunapaj macanajuj runacuna shamujta yachai ushangapa.

29 Cunan, imashna Moroni yacharca Lamanitacunapaj munaicunata, cai carca paicunapaj huauquicunata tucuchina, nacashpa paicunata dominangapa huatai tucushcashnaman apangapa shuj reinota paicunapalla churangapa tucui alpacunapi;

30 Pai yacharcapash Nefitacunapaj shujlla munaica carca alchishpa charina paicunapaj alpacunata, paicunapaj libertad, paicunapaj iglesia, chaimanda pai na juchachu yarca pai huacaichina umachishpa; chaimanda, pai yacharca ricuj runacunamanda Lamanitacuna maijan ñanda japishpa rinata.

31 Chaimanda, paipaj macanajuj runacunata chaupirca huaquinda pugru pambaman aparca, paicunata pacarca indi llujshij ladoman, Ripla uchilla urcu uraipi;

32 Puchushcacunata pacarca indi huashajuj lado pugru pambapi, Sidón jatun yacu indi huashajuj ladoman, shina Manti alpapaj manñacaman.

33 Shina paipaj macanajuj runacunata paipaj munashcapi saquishpa, paicunahuan tuparingapa prepararishca carca.

34 Yalishca jipa Lamanitacuna uchilla urcupaj vichaita shamurca, maipi huaquin Moronipaj macanajuj runacuna pacashca carca.

35 Imashna Lamanitacuna Ripla uchilla urcuta yalishpa pugru alpaman shamurca, Sidón jatun yacuta chimbai callarircapash, macanajuj runacuna picuna pacashca carca uchilla urcu uraipi, Lehi shuti runa pushajurca, pai paipaj macanajuj runacunata pusharca indi llujshij ladota Lamanitacunata muyurcapash paicunapaj huashata.

36 Yalishca jipa Lamanitacuna, Nefitacunata paicunapaj huashata shamunajujta ricushpa, chimbapura tigrarishpa macanajui callarirca Lehipaj macanajuj runacunahuan.

37 Ishcandi ladocunapaj huañuichina callarirca, ashtahuangari Lamanitacunapaj lado ninan manllanayai carca, paicuna churajuna illacuna caimanda Nefitacunapaj shinlli macashcacunata chayachirca paicunapaj espadacunahuan, paicunapaj cimitarracunahuan, ñalla huañuchirca shujllangaman chugrichinahuan.

38 Shuj ladoman, huaquinbi huaquinbilla shuj runa Nefitacunamanda urmarca, paicunapaj espadamanda yahuar jicharimandapash, protegeshca carca cuerpopaj ashtahuan vital partecunata, nacashpa ashtahuan cuerpopaj vital partecuna protegeshca carca Lamanitacunapaj chugrichinamanda, pechopaj jirrucunahuan, uchilla espadacunahuan, umapa jirrucunahuan; shina Nefitacuna huañuchinata aparca Lamanitacunapi.

39 Yalishca jipa Lamanitacuna manllai callarirca, jatun tucuchimanda paicunapi, Sidón jatun yacuman calpai callarirca.

40 Paicuna cati tucurca Lehi, paipaj runacunahuanbash; calpachi tucurca Sidón yacucunaman, Sidón yacucunata chimbarca. Lehi paipaj macanajuj runacunata Sidón jatun yacu patapi jarcarca ama paicuna chimbachun.

41 Yalishca jipa Moroni paipaj macanajuj runacunapash Lamanitacunata pugru pambapi tuparca, Sidón jatun yacu chaishu ladoman, paicunapaj jahuaman shamushpa huañuchi callarirca.

42 Lamanitacuna cutin calparca paicunapaj ñaupamanda, Manti alpaman; cutin Moronipaj macanajuj runacunahuan tuparirca.

43 Cunan cai viaje Lamanitacuna ninandapacha macanajurca; ari, nimaura Lamanitacuna yachashca carca macanajunata shina ninanbacha jatun shinlli, na manllaihuanbash, na, callarimandapash.

44 Paicuna shina ruraipacha nitucushca carca Zoramitacunahuan, Amalekitacunahuanbash, picuna carca paicunapaj capitáncunapaj yali mandajcuna, pushajcuna, Zerahemnahuanbash, pimi carca capitán yali mandaj, nacashpa paicunapaj pushaj yali mandaj; ari, paicuna macanajurca dragóncuna laya, tauca Nefitacunamanda huañurca paicunapaj maquicunahuan, ari, paicunapaj umapa jirrucunata ishcaipi chaupimanda, tujsishpa yalirca paicunapaj pechocunapaj jirrucunata, cuchurcapash taucacunapaj rigracunata; shina Lamanitacuna macanajurca paicunapaj ninan fiñaipi.

45 Shina cajpipash, Nefitacuna ruraipacha nitucushca carca ashtahuan alipa, paicuna na macanajurcachu monarquiamanda nacashpa ushai ashtahuangari paicuna macanajunajurca paicunapaj huasicunamanda, paicunapaj libertad, paicunapaj huarmicuna, paicunapaj huahuacuna, tucui paicunapaj charishcamanda, ari, adorangapaj ritocunamanda, paicunapaj iglesiamanda.

46 Paicuna ruranajurca imata ruranata sentishcata paicunapa Dios-huan; Apunchijca nishca carca, paicunapa taitacunamanbash: Imashpapash canguna na culpayu cashpa callari macanajuipa, catipapash, canguna na saquinguichichu huañuchichun cangunata nimamanda na ricunayachijcunapaj maquicunahuan.

47 Cutinbash, Apunchijca nishca carca: Canguna cangunapaj aillucunata huacaichinguichi yahuarta jichangacamanbash. Chaimanda caicunamanda Nefitacuna Lamanitacunahuan macanajurca, paicunallata huacaichiringapa, paicunapaj aillucunata, paicunapaj alpacunata, paicunapaj llactata, paicunapaj derechocunata, paicunapaj religiónda.

48 Yalishca jipa imaura Moronipaj runacuna Lamanitacunapaj ninanbacha fiñaita, ñalla huashanchirirca calpangapa. Moroni, yashpa ricushpa paicunapaj munaita, llujchirca paicunapaj shungupi cai yuyaicunahuan ruraipacha nircapash—ari, yuyaicuna paicunapaj alpacuna, paicunapaj libertad, ari, paicunapaj huatai tucushcashnamanda libre cana.

49 Yalishca jipa Lamanitacunapaman tigrarca, paicuna mañarca shujlla shimihuan Apunchij paicunapaj Diosta, paicunapaj libertadmanda, paicunapaj huatai tucushcashnamanda libre canamanda.

50 Jarcai callarirca Lamanitacunata ushaihuan; chai horasllata paicuna Apunchijta mañajpillata paicunapaj libertadmanda, Lamanitacuna paicunapaj ñaupamanda calpai callarirca; Sidón yacucunacaman calparca.

51 Cunan, Lamanitacuna ashtahuan carca, ari, Nefitacunata ashtahuan chaupi yali; shina cajpipash, paicuna calpachi tucurca shujllapi tandachishca cangacaman pugru pambapi, Sidón jatun yacu manñapi.

52 Chaimanda Moronipaj macanajuj runacuna paicunata muyurca, ari, jatun yacumanda cai lado chai lado, riqui, Lehipaj runacuna indi llujshij ladopi carca.

53 Chaimanda Zerahemna Lehipaj runacunata Sidón jatun yacupaj indi llujshij ladoman ricushpa, Moronipaj macanajuj runacunata Sidón jatun yacupaj indi huashajuj ladoman, Nefitacuna muyushpa charinajujpi, ninan manllai paicunata japirca.

54 Cunan Moroni, paicunapaj ninan manllaita ricushpa, paipaj runacunata mandarca paicunapaj yahuarta jichaita saquichun.