1 Cunan yalishca jipa, ñapash imashna Amalickíah reinota chasquishca carca callarirca Lamanitacunapaj shungucunata ruraipacha nishpa Nefipaj llactapuracunapaj contra; ari, runacunata ajllarca Lamanitacunaman parlachun paicunapaj torrecunamanda, Nefitacunapaj contra.

2 Shina pai ruraipacha nirca paicunapaj shungucunata Nefitacunapaj contra, shinashpa chunga iscun ricushpa chasquichijcunapaj reinado tucurigriju huatapi, paipaj rurangapa yuyashcacunata pactachishca carca cunangaman, ari, Lamanitacunapaj jahuapi jatun mandaj tucushca carca, mascarcapash mandangapa tucui alpacunata, ari, tucui llactapuracunata picuna alpapi cajta, Nefitacunata shinallata Lamanitacunatapash.

3 Chaimanda pai rurangapa munaicunata pactachishca carca, imashpa shinlliyachirca Lamanitacunapaj shungucunata paicunapaj yuyaicunatapash ñausayachirca, paicunata fiñachunbash tangachirca, shinashpa tandachishca carca shuj taucapacha macanajuj runacunata ringapa Nefitacunapaj contra macanajuchun.

4 Shina rurangapa carca, paipaj llactapuracuna ashtacapacha caimanda, Nefitacunata yalingapa huatai tucushcashnaman paicunata apangapa.

5 Shina Zoramitacunamanda capitán yali mandajcuna cachun ajllarca, paicuna ashtahuan rijsicuna caimanda Nefitapaj runacunata, pacajuna pushtucunahuan, llactapaj na yapa shinlli pushtucunahuanbash; chaimanda paicunata ajllarca paipaj macanajuj runacunapa jahuapi capitán yali mandajcuna cachun.

6 Yalishca jipa paicunapaj causana pambata aparca, ñaupashpa rirca Zarahemla pambaman jichushca pambata.

7 Cunan yalishca jipa Amalickíah shina ushaita chasquijushcarca pacalla umachishpa, Moroni, cutishuj ladoman, llactapuracunapaj yuyaicunata preparajushcarca Apunchijpaj paicunapaj Diospi fielcuna cachun.

8 Ari, pai Nefitacunapaj macanajuj runacunata shinlliyachijushcarca, uchilla jarcanacunata shayachirca, nacashpa pacajuna pushtucunata; alpa pircacunatapash muyundi shayachirca paipaj macanajuj runacunata chaupipi churangapa, shayachircapash rumi pircacunata paicunata chaupipi churangapa, chaupipi churangapa paicunapaj llactacunata paicunapaj alpa manñacunatapash; ari, tucui alpacunata muyundi.

9 Paicunapaj na yapa shinlli shayachishcacunapi taucapacha runacunata churarca; shina pai shayachirca shinllichircapash Nefitacuna chasquishca alpata.

10 Shina pai preparajushca carca shinllichingapa paicunapaj libertad, paicunapaj alpacuna, paicunapaj huarmicuna, paicunapaj huahuacuna, paicunapaj sumaj causai, Apunchij paicunapaj Diospa causangapapash, charishpa catingapa imami shutichishca carca paicunata napacha ricunayachijcunamanda Cristianocuna canamanda.

11 Moroni shuj racu, shinllipash runa carca; pai carca shuj alipacha yuyaipi chasquij runa; ari, yahuarta jichaipi na cushijuj runa; shuj runa paipaj alma cushijuj carca libertadpi paipaj llacta libre canapi, paipaj huauquicuna huatai tucushcashnamanda esclavitudmanda cacharirichunbash;

12 Ari, shuj runa paipaj shungu jundaj paipaj Diosta pagui nihuan, imashpa tauca privilegiocunamanda achil yachishcacunamanda imami paipaj llactapuracunaman curca; shuj runa pimi ninandapacha trabajarca paipaj llactapuracuna alicachun, huacaichishcapash cachun.

13 Ari, pai carca shuj runa pimi Cristopaj fepi shinlli carca, pai jurashca carca juramentohuan paipaj llactapuracunata huacaichingapa, paipaj derechocunata, paipaj llactapash, paipaj religiónbash, paipaj yahuarta jichangacamanbash.

14 Cunan Nefitacuna yachachishca carca paipuracuna huacaichirichun paicunata napacha ricunayachijcunamanda, yahuarta jichangacaman cai minishtirijpica; ari, yachachishcapash carca nimaura na fiñachina, ari, nimaura espadata alsana napacha ricunayachijpaj contra cajpilla, paicunapaj causaicunata alchishpa charina cajpilla.

15 Cai carca paicunapaj fe, shina rurajpica Dios cai alpapi paicunata ali mirachinga, nacashpa shuj shimicunapi nishpa, paicuna fielcuna cajpi Diospaj rurachunbacha saquishcacunata alichijpi, cai alpapi ali mirachinga; ari, paicunaman villashpa calpachun, nacashpa prepararichun macanajungapa, ima peligromandapash.

16 Shinapash, Dios yachaj chayachichunbash maiman rinata paicunapaj napacha ricunayachijcunamanda huacaichichun, shina rurashpaca, Apunchij paicunata quishpichinga; cai carca Moronipaj fe, paipaj shungupash caipi cushijurca; na yahuar jichaipi ashtahuangari ali ruraipi, paipaj llactapuracunata alchishpa charishpa, ari, Diospaj rurachunbacha saquishcacunata alichishpa, ari, na ali ruraicunata jarcarishpa.

17 Ari, ciertopacha, ciertopacha cangunaman nini, tucui runacuna cashcajpi, cashpa, imaurapash na tucurinacaman cai ushanmanbash, Moroni laya, riqui, ucu pachapaj ushaicunallata chaspirinman carca mana tucurinacaman; ari, aya nimaura ushaita na charinman runacunapaj huahuacunapaj shungucunapi.

18 Riqui, pai carca shuj runa Ammón laya, Mosíahpaj churi, ari, Mosíahpaj cutishuj churicunapash, ari, Alma paipaj churicunapapash laya, imashpa paicuna tucuilla Diospaj runacuna carca.

19 Cunan riqui, Helamán paipaj huauquicuna llactapuracunata na yali sirviciota cuj carca Moronishna; paicuna Diospaj achil shimita yachachirca, paicuna bautizarca arrepentimientopa tucui runacunata maijan paicunapaj shimicunata uyajcunata.

20 Shina paicuna llujshishpa rirca, llactapuracuna humillarircapash paicunapaj shimicunamanda, shinashpa paicuna jatundapacha ali cachishca carca Apunchijmanda, shina librecuna carca macanajuicunamanda paipura fiñanajuicunamandapash, ari, chuscu huatacunata.

21 Ashtahuangari, imashna nircani, jipalla chunga iscun huata tucurijujpi, ari, masqui paipurapi sumaj causaita tiajpipash, paicuna na munashpapash munai na munai churai tucurca macanajungapa paicunapaj Lamanita huauquicunahuan.

22 Ari, tucuripipash, paicunapaj macanajuicuna imaura na tucurirca tauca huatacunapi Lamanitacunahuan, masqui paicuna ashtaca na munashpapash.

23 Cunan, paicuna llaquirirca macanajunacunata japingapa Lamanitacunapaj contra, paicuna na cushijurca yahuarta jichanapi; ari, cai na tucuilla carca—paicuna llaquirirca imashapash canacuna tauca paicunapaj huauquicunamanda cai pachamanda cachashca cana carca mana tucurina pachaman, paicuna Diospaman yaicungapa na prepararishca cashpata.

24 Shina cajpipash, na saqui usharcachu paicuna causaicunata cuita, paicunapaj huarmicuna, paicunapaj huahuacuna llaquinayaita huañuchishca cachun manllanayai napacha llaquishpa picunamanda shuj punlla paicunapaj huauquicuna carca, ari, paicunapaj iglesiamanda chaupirishca carca, paicunapamanda saquishpa rishca carca paicunata tucuchingapa Lamanitacunahuan tandanajushpa.

25 Ari, paicuna na usharca paicunapaj huauquicuna cushijuchun Nefitacunapaj yahuar jahuapi, imaura pipash tiangacaman Diospaj rurachunbacha saquishcacunata alichijcuna, Apunchijpaj nishcapacha carca, paicuna paipaj rurachunbacha saquishcacunata alichijpica paicuna cai pambapi ali miranga.