1 Riqui ñuca juyashca huauquicuna, shina ricuimanda cangunapaman shamuchun saquihuashcanguichi, chaimanda ñuca shimirimaipi parlangapa munani; ari, ñuca shimihuanllata, shina ricuimanda cunan cunan cangunaman parlajuni cai shimicunata ñuca shimihuan, ricushpa chasquichina jatun tiarinaman chaimanlla tucuilla jarcarishca cashcani, tauca ruranacunata charishcani chaimanda cangunata na ricuj shamui ushashcani.

2 Cunanbash na shamui ushaimanllu carcani, ricushpa chasquichina jatun tiarinata shujman na cushca cashpaca, ñuca pushtupi mandachun; Apunchij ashtaca alicaipi saquihuashca cangunpaman shamuchun.

3 Riqui, ñuca shamushcani ninan shuyaicunata charishpa, ashtaca munaihuan cangunata tupangapa Diospaj ñaupapi humillarishca cashcata, paipaj ninan juyaita mañashpa catishca cashcatapash, cangunata tupangapa paipaj ñaupapi culpa illacuna cajta, cangunata tupangapa ama llaquinayai caipi cashcata imapi cangunapa huauquicuna Zarahemlapi carca.

4 Ashtahuangari Diospaj shuti achilyachishca cachun, imashpa pai yachachihuashca, ari, ninan jatun rijsinapaj cushijuita cuhuashca, imashna paicuna cutin shayarishcacuna can paipaj ali rurai ñanbi.

5 Ñuca crini, Diospaj Espíritumanda imami ñucapi can, charishcanipash cangunamanda cushijuita; shina cajpipash na munanichu cangunamanda cushijui shamuchun ashtaca llaquicunamanda, llaquirinacunamandapash imacuna ñuca charishcani Zarahemlapi huauquicunamanda, riqui, paicunamanda ñuca cushijui shamurca ashtaca llaquicuna, llaquirinacunapash yalishca jipa.

6 Ashtahuangari riqui, ñuca crini canguna na canguichichu ashtacapacha na crishpa caipi imashna cangunapa huauquicuna carca; ñuca crini cangunapaj shungucunapi jariyaihuan na vichai alsarishca cajta; ari, ñuca crini cangunapaj shungucunata charijyanacunapi, cai pachapaj yanga cuzascunapi na churashcata; ari, ñuca crini canguna yanga dioscunata na adorajta, ashtahuangari ciertopacha, causaj Diosta adoranajujta, mana tucurina fehuan cangunapa juchacunata anchuchichun mascanajujtapash, imami shamuna can.

7 Riqui, cangunaman nini shamuna tauca cuzascuna tian; riqui, shujlla tian tucuimanda ashtahuan yali minishtirishca—riqui, punlla na carupi canllu Jatun Causachij causanga shamungapash paipaj llactapuracunapi.

8 Riqui, na ninichu pai shamunga imaura causajushpa paipaj huañuna tabernáculopi; riqui, Espíritu caica cashna canata na nihuanllu. Cunan caimanda na yachanichu; ashtahuangari caitaca yachanimi, Apunchij Dios ushaita charin tucui cuzascunata rurangapa imashina paipaj shimi nishcashna.

9 Ashtahuangari riqui, Espíritu caita nihuashca, nichun: Yachachi cai llactapuracunaman, nishpa—Arrepentirichi, Apunchijpaj ñanda alichi, paipaj chaquiñangunapi purichi, maijancuna derecho can; riqui, jahua pachapaj reino ñalla caipi can, Diospaj Churi cai alpa jahuaman shamun.

10 Riqui, Maríamanda nacirimunga, Jerusalénpi ñucanchi punda taitacunapaj alpapi, jarihuan na tacarishca cuitsagu cashpa, juyailla ajllashca vasopash, pimi llandu tucunga vijsayu tucungapash Espíritu Santopaj ushaihuan, shuj churita charinga, ari, Diospaj Churita.

11 Pai ringa nanaicunata yalishpa, llaquicunatapash tucui laya tentacióncunatapash; caica shimi nishca pactachun maijan pai nirca paipaj jahuapi japinata llactapuracunapaj nanaicunata, unguicunatapash.

12 Paipaj japingapash huañuita, cacharichingapa huañuipaj huatashcacunata imacuna paipaj llactapuracunata charinajun; paicunapaj unguicunatapash japinga, paipaj shungu llaquinahuan jundachishca cachun, aichapi caimanda, aichapi caimanda yachachun imashna ayudanata paipaj llactapuracunata, paicunapaj unguicunamanda.

13 Cunan Espíritu tucui cuzascunata yachan; shina cashpapash Diospaj Churi aicha caimanda llaqui yalinga, paipaj llactapuracunapaj juchacunata paipaj jahuapi japingapa, fichangapa paicunapaj na alita rurashcacunata paipaj cacharichina ushaimanda, cunan riqui, caimi testimonio can imami ñucapi can.

14 Cunan cangunaman nini arrepentirina canguichi, cutin nacirina canguichi; Espíritu nin, cutin na nacirijpica jahua pachapaj reinota na chasquinguichichu; chaimanda shamuichi, bautizarichi arrepentimientopa, cangunapaj juchacunamanda tajshashca cachun, Diospaj Llamagupi feta chari ushachun, pimi cai pachapaj juchacunata anchuchin, pimi tucui ushaita charin quishpichingapa, tucui na ali ruraicunatapash maillangapa.

15 Ari, cangunata nini shamuichi, ama manllaichi, tucui juchacunata saquichi, chaicuna cangunata urmachinalla, imami tucuchingacaman huatashca charinajun, ari, shamuichi, ñaupaichi cangunapaj Diosman ricuchichi arrepentiringapa munaita cangunapa juchacunamanda paihuan shuj convenioman yaicuichipash rurachunbacha saquishcacunata alichingapa, cai punlla paiman testificaichi bautismo yacucunaman rishpa.

16 Maijanbash caita rurashpa, alichishpa Diospaj rurachunbacha saquishcacunata cunanmanda chaiman, yaringa ima nijta, ari, yaringa ima nishcata, pai charinga mana tucurina causaita, Achil Espíritupaj testimoniomanda, imami ñucapi testifican.

17 Cunan ñuca juyashca huauquicuna, cringuichichu cai cuzascunata? Riqui, cangunaman nini, ari, canguna caicunata crijta yachani; imashna yachani caicunata crijta Espíritupaj ricuchimuimanda canmi imami ñucapi can. Cunan imashpa fe shinlli can caicunapi, ari, caicunata imata parlashcani, ñuca cushijui jatun can.

18 Imashna nishcani callarimanda, ashtacata munashcani canguna ama llaquinayai caipi cachun cangunapaj huauquicunashna, tupashcanimi ñuca munashcacuna rurashca cashca.

19 Ñuca yashpa ricuni ali rurai chaquiñangunapi cajta; ñuca yashpa ricuni chaquiñanbi cajta maijan Diospaj reinoman pushan; ari, ñuca yashpa ricuni canguna paipaj chaquiñangunata derecho ruranajujta.

20 Ñuca yashpa ricuni cangunaman yachachishcani, paipaj shimipaj testimoniohuan, pai na puri ushan pandashca chaquiñangunapi; ima nishcamandapash na shuj ladoman rin; paipi llandupash na tianllu ali ladomanda lluqui ladoman tigraringapa, nacashpa ima alimanda na aliman; chaimanda, paipaj ñanga muyujunlla mana tucurin.

21 Pai na causanllu mapa huasicunapi; mapallapash nima mapa cuzaspash Diospaj reinopi na chasquishca cangachu; chaimanda cangunaman nini punlla shamunga, ari, chai tucuri punllapi canga, maijan mapa cashpa paipaj mapapillata canga.

22 Cunan ñuca juyashca huauquicuna, ñuca cangunaman cai cuzascunata nishcani ñuca cangunapi rijchachingapa Diosman shuj rurana sentidota, paipaj ñaupapi culpa illa purichun, Diospaj achil ordenda catishpa purichun, imaman chasquishcacuna cashcanguichi.

23 Cunan ñuca munaiman humildecuna cachun, sumisocuna dócilcunapash; yachachinallacuna cachun; paciencia longanimidadpash junda; tucui cuzascunapi moderadocuna cachun; Diospaj rurachunbacha saquishcacunata utsia alichijcuna tucui punllacunapi; mañashpa ima minishtishca cuzascunata, ishcandi espiritual temporaltapash; punllan punllan Diosta pagui nishpa ima cuzascunata chasquishcamanda.

24 Ricuichi canguna feta charichi, shuyaita caridadtapash, shina canguna punllan punllan ali ruraicunapi jundanguichi.

25 Apunchij cangunata achilyachichun, cangunapaj churajunacunata mapa illa alichichun, tucuripi Abrahamhuan, Isaac-huan, Jacobhuan tiaringapa apai tucushca canguichi, achil achil villachijcuna picuna tiashca cai pacha callarimanda, cangunapaj churajunacuna mapa illata charishpa imashna paicuna churajunacuna mapa illa can, jahua pachapaj reinopi cutinga na llujshingapa.

26 Cunan ñuca juyashca huauquicuna, cangunaman cai shimicunata parlashcani Espírituhuan ima ñucapi testifican; ñuca alma ninanda cushijun, imashpa utsia ricuriashpapash ñuca shimicunata cushcamanda.

27 Cunan, Diospaj sumaj causai cangunapi cachun, cangunapaj huasicunapi alpacunapipash, cangunapaj ataju llamacunapipash, huagracunapipash, canguna tucui charishcacunapipash, cangunapaj huarmicunapi, cangunapaj huahuacunapi, cangunapaj femanda ali ruraicunamandapash, cunan punllamanda na tucurinacaman. Shina ñuca parlashcani. Shinacapashcachun.