1 Cunan, ñuca churi Helamán, ñuca mandani tandachishca quilcashcacunata japi imata ñucaman confiaguashca;

2 Ñuca mandanipashmi cai llactapuracunapaj tandachishca quilcashcacunata apangui, imashna ñuca rurashcani, Nefipaj jirru fangacunapi, tucui cai cuzascunata achil cachun alichi imata alichishcani, imashna chaicunata ñuca alichishcani; imashpa cai can shuj yachashca ruranapa caicuna alichishca can.

3 Cai bronce jirru fangacuna, imacuna cai quilcashcacunata charin, imami charin chaicunapaj jahuapi tandachishca quilcashcacunata achil quilcashcacunapaj, imami ñucanchi punda taitacunapaj genealogíata charin, callarimandapacha—

4 Riqui, cai ñucanchi taitacuna achil villachishca carca, caicuna alichishca cachun maquin maquin shuj miraimanda cutishujman yalishca cachun, alichishca, alchishpa charishcapash Apunchijpaj maquihuan imaura caicuna villashca cangacaman tucui jatun llactaman, reinoman, shimi rimaiman, llactapuracunamanbash, yachaj chayachun na villashcacunata caicuna imacunata charin.

5 Cunan riqui, alichishca cajpica caicunapaj punchapamba caita charinga; ari, tucui jirru fangacunapash imata charin imacuna can achil quilcashca.

6 Cunan quiquin yanguiman caica ñucapi juizu illa can; ashtahuangari riqui, ñuca ninimi, cai uchilla yangalla cuzascunamanda jatun cuzascuna yalichun apamushca canga; uchilla imashapash canacuna tauca viajecunapi yachajta pandachin.

7 Apunchij Dios cai imashapash canacunahuan paipaj jatun mana tucurina munaicunata ruran; ali uchilla imashapash canacunahuan Apunchijca yachajta pandachin, tucui almacunapaj quishpirinatapash apamun.

8 Cunan, Diospi jatun yachaipi cai cuzascunata cunangaman alchishpa charishca cana cashca; riqui, paipaj llactapuracunapaj yuyaicuna mirachishca can, ari, crichishcapash paicunapaj tauca pandashcacuna ñangunata, paicunata apamushcapash paicunapaj Diosta yachaiman paicunapaj almacuna quishpirinaman.

9 Ari, canman nini, na cai cuzascuna canman carca, maijan cai tandachishca quilcashcacunata charin, ima jirru fangacunapi can, Ammón paipaj huauquicunapash na crichinman carca tauca huaranga Lamanitacunata paicunapaj punda taitacunapaj panda yachachishcata; ari, cai tandachishca quilcashcacuna paicunapaj shimicunapash arrepentimientoman apamurca; nishpaca, Apunchij paicunapaj Diospaj yachaiman apamurca, cushijuchunbash Jesucristopi paicunapaj Jatun Causachij.

10 Pita yachan imashapash canata tauca paicunamanda huarangacunata apamungapa, ari, ñucanchi na cazuj huauquicunapaj tauca huarangacunatapash, Nefitacuna, picuna cunan paicunapaj shungucuna shinlliyashcacuna juchacunapi can, na ali ruraicunapipash, paicunapaj Jatun Causachijta yuyaipi chasquichun?

11 Cunan cai na villashcacuna nara tucuilla yachaj chayachihuashcachu; chaimanda jarcarisha.

12 Yalishca jipa chailla ali canga ñuca nijpi caicuna alchishpa charishca can shuj yachaj munaipa, maijan munai Diospaj yachashca can; paipaj yachaipi consejan tucui paipaj rurashcacunapi, paipaj chaquiñanguna derechocuna can, paipaj ñanga muyujunlla mana tucurin.

13 Oh yari, yari, ñuca churi Helamán, imashna ruranapacha can Diospaj rurachunbacha saquishcacuna. Pai nirca: Ñuca rurachunbacha saquishcacunata alichishpaca cai pambapi ali miranguichi—ashtahuangari paipaj rurachunbacha saquishcacunata na alichishpaca paipaj ñaupamanda anchuchi tucushca canguichi.

14 Cunan yari, ñuca churi, Dios canman cai cuzascunata confiashca, maijan achilyachishcacuna can, imata pai achilyachishpa alichishca, pai alichingapash, alchishpa charingapash paipaj yachai munaipa, pai ricuchingapa paipaj ushaita cati aillucunaman.

15 Cunan riqui, canman villani achil villachinapaj espírituhuan, Diospaj rurachunbacha saquishcacunata na ali rurashpaca, riqui, cai cuzascuna imami achilyachishca can canmanda quichushca canga Diospaj ushaihuan, Satanásman cushca cangui, pai ujshatashna shushunga huaira ñaupapi.

16 Ashtahuangari Diospaj rurachunbacha saquishcacunata alichijpica, rurai cai cuzascunata imami achilyachishca can imashna Apunchij canda mandashca, (Apunchijta mañanapacha cangui tucui cuzascunamanda caicunahuan imatapash rurana cashpa) riqui, cai pachapaj ushaipash nacashpa ucu pachapaj ushaipash na quichui ushangachu, imashpa Dios ninan ushaihuan can tucui paipaj shimicunata pactachingapa.

17 Imashpa paipaj tucui nishcapachacunata pactachinga imata pai canman ruranga, paipaj nishcapachacunata pactachishca imata pai rurashca ñucanchi taitacunaman.

18 Paicunaman nishcarcapacha pai cai cuzascunata alchishpa charingapa paipi yachaj munaipa, ricuchij ushangapa paipaj ushaita cati aillucunaman.

19 Cunan riqui, shuj munaita pai pactachirca, tauca huaranga Lamanitacuna ciertopachata yachajuiman cutin apamuna; caicunapi paipaj ushaita ricushishca carca, pai ricuchingapash paipaj ushaita cati aillucunaman; chaimanda paicuna alchishpa charishcacuna canga.

20 Chaimanda canda mandani, ñuca churi Helamán, utsialla cai pactachingapa tucui ñuca shimicunata, utsialla cai Diospaj rurachunbacha saquishcacunata alichingapa imashna quilcashcacuna can.

21 Cunan, ñuca canman parlasha cai ishcai chunga chuscu jirru fangacunamanda, caicunata alichi, pipash na yachai ushashcacuna, yanallapaj ruranacunapash, paicunapaj pacalla ruranacunapash, nacashpa cai llactapuracunapaj pacalla ruranacuna imacuna tucuchishca carca, cai llactapuracunaman ricuchishcapash cachun; ari, tucui paicunapaj huañuchicuna, shuhuaicuna, shujpata japinacuna, tucui paicunapaj na ali ruraicunapash, millanayaicunapash, cai llactapuracunaman ricuchishca cachun; ari, cai yalichinacunatapash alchishpa charingui.

22 Riqui, Apunchij ricurca cai llactapuracuna yanallapi ruraita callarirca, ari, pacalla rurai, huañuchicuna, millanayaicunapash; chaimanda Apunchij nirca, paicuna na arrepentirijpica paicuna tucuchishca canga cai alpa jahuallamanda.

23 Apunchij nirca: Ñuca sirvij runa Gazelemman preparasha, shuj rumi, yanallapaj ruranacuna punchallayachinga micha tucungacaman, ñuca ricuchi ushasha ñuca llactapuracunaman maijan ñucata sirvijman, ñuca ricuchi ushasha paicunapaj huauquicunapaj rurashcacunata, ari, paicunapaj pacalla rurashcacuna, paicunapaj yanallapaj ruranacuna, paicuna na ali ruraicuna, millanayaicunapash.

24 Cunan, ñuca churi, cai yalichinacuna preparashca carca Diospaj shimicuna pactashca cachun, imata pai parlarca, nishpa:

25 Yanallamanda michaman llujchisha tucui paicunapaj pacalla rurashcacuna, paicunapaj millanayaicuna; arrepentirijllapi na, ñuca tucuchisha paicunata cai alpa jahuallamanda; ñuca ricuchishapash tucui paicunapaj pacalla, millanayaicunatapash, tucui llactacunaman jipaman alpata chasquijcunaman.

26 Cunan, ñuca churi, ñucanchi ricunchi paicuna na arrepentirirca; chaimanda paicuna tucuchi tucushca, shina cunangaman Diospaj shimi pactashca cashca; ari, paicunapaj pacalla millanayaicuna yanallamanda llujchishca cashca, ñucanchiman yachaj chayachishca cashca.

27 Cunan, ñuca churi, canda mandani jarcai tucui paicunapaj juramentocunata, paicunapaj pactachinacunata, paicuna ari nishcacunata, paicunapaj pacalla millanayaicunapi; ari, tucui paicunapaj señalcuna, paicunapaj juyailla ricurinacunapash cai llactapuracunamanda, jarcangui paicuna ama yachachun, imashpapash paicuna urmanman yanallamanbash, tucuchishcapash canman.

28 Riqui, tian shuj llaquichina tucui cai alpapi, tucuchinaca shamunga tucui maijan yanallapi rurashcacunaman, Diospaj ushaimanda, imaura paicuna yapata mirashca cajpi; chaimanda ñuca munani cai llactapuracuna ama tucuchishca cachun.

29 Chaimanda pacangui cai pacalla rurangapa paicunapaj juramentocunata, paicunapaj pactachinacunata llactapuracunamanda, paicunapaj na ali ruraicunatalla, paicunapaj huañuchicuna, paicunapaj millanayaicunapash paicunata yachaj chayachingui; paicunaman yachachinguipash ama ricunayachichun shina na ali ruraicunata, millanayaicunatapash, huañuchicunatapash; paicunaman yachachinguipash cai llactapuracuna tucuchishca carca paicunapaj na ali ruraicunamanda, millanayaicunamandapash, paicunapaj huañuchicunamandapash.

30 Riqui, paicuna huañuchirca tucui Apunchijpaj achil villachijcunata paicunapaman shamujcunata villangapa paicunapaj na ali ruraicunamanda; yahuar maijangunapaj paicunata huañuchirca Apunchijta paicunapaj Dios venganzamanda mañan maijangunamanda paicunapaj huañuchijcuna carca; shina Diospaj ricushpa chasquichinacuna shamurca cai yanallapi rurajcunapaman pacalla tandanajunacunamanbash.

31 Ari, llaquichishca canga cai alpa imaurapash na tucurina na tucurinacaman, punllan punllan chai yanallapi rurajcunapa, pacalla tandanajunacunapash, tucuringacaman, imashpapash paicuna arrepentirijpi paicunapaj juchacunapi nara fuchushcapapacha cajpita.

32 Cunan, ñuca churi, yari shimicunata imata ñuca canman parlashcani; ama confiai chai pacalla ruranacunata cai llactapuraman, ashtahuangari paicunaman yachachi mana tucurina juchata, na ali ruraicunata napacha ricunayachinata.

33 Paicunaman yachachi arrepentimietota, feta Apunchij Jesucristopi; yachachi paicunamanda humillarichun manso cachun, shungupi humilde cachun; yachachi jarcarichun tucui ayapaj tentacióncunata, paicunapaj fehuan Apunchij Jesucristopi.

34 Yachachi nimaurapash ali ruraicunata ama shaijuchun, ashtahuangari manso cachun, shungupi humilde cachun; imashpa paicuna taringa paicunapaj almacunapaj samanata.

35 Oh, yari, ñuca churi, yachajuipash quiquinba viñaj huambra canapi jatun yachaita; ari, yachajui quiquinba viñaj huambra canapi Diospaj rurachunbacha saquishcacunata alichinata.

36 Ari, Diosta mañai tucui quiquinba causangapa minishtishcamanda; ari, saqui tucui quiquinba ruraicuna Apunchijpi cachun, maiman rishpapash saqui Apunchijpi cachun; ari, saqui tucui yuyaicuna Apunchijpaman richun; ari, saqui quiquinba shungumanda juyaicuna churashca cachun Apunchijpi mana tucurinacaman.

37 Tucui ruranacunapi Apunchijta tapui, pai apanga aliman; ari, imaura tuta siririshpa Apunchijpi siriri, pai ricuriachun canba muscuita; imaura tutamanda jatarishpa quiquinba shungu Diosta pagui ninahuan junda cachun; cai cuzascunata rurashpaca, chai tucuri punllapi vichai alsashca cangui.

38 Cunan, ñuca churi, ñuca imatachari ninata charini ñucanchi taitacuna shutichin esferamanda, nacashpa director—nacashpa ñucanchi taitacuna shutichirca Liahona, ima can, shuj shimirimaiman tigrachishpa, shuj compás; caita Apunchij preparashca carca.

39 Riqui, maijan runapash na rurai ushanllu ricuriashpa maquihuan rurashcata. Riqui, cai preparashca carca ñucanchi taitacunaman ñanda ricuchingapa maita paicuna jichushca pambapi purichun.

40 Cai rurarca paicunapaj femanda Diospi; chaimanda, paicuna cringapa feta charijpica Dios rurai ushajta chai aujacuna ñanda ricuchichun maita paicuna richun, riqui, cai rurashca carca; chaimanda paicuna cai juyailla ruraita ricuchita charirca, cutishuj juyailla ruraita ricuchinacunatapash rurarca Diospaj ushaihuan, punllan punllan.

41 Shina cajpipash, cai juyailla ruraita ricuchinacuna rurashca caimanda uchilla imashapash canacunamanda cai ricuchirca paicunaman juyailla rurashcacunata. Paicuna quillacuna carca, cungarcapash paicuna feta charinata, utsialla canatapash shina chai juyailla rurashcacuna tucurirca, paicunapaj puricunapipash na mirarca.

42 Chaimanda, jichushca pambacunapi jipayarca, nacashpa ñanda na catishpa rirca, yarjaihuan, yacunayaihuanbash llaquichishca carca, paicunapaj na ali ruraicunamanda.

43 Cunan, ñuca churi, ñuca munani canguna yuyaipi chasquichun cai cuzascunaca na canllu ima canata ricuchina illa; imashna ñucanchi taitacuna quillacuna carca yuyaipi uyangapa cai compásta (cunan cai cuzascuna temporal carca) paicuna na ali mirarca; shinallatami can cai cuzascunahuan imami espiritual can.

44 Riqui, cai na shinlli canllu Cristopaj achil shimita yuyaipi uyana, imami canman ricuchinga ñanda mana tucuri jatun cushijuiman, imashna cai carca ñucanchi taitacunapa yuyaipi uyanata cuna cai compásta, imami ricuchin paicunaman derecho ñanda cushapacha nishca alpaman.

45 Cunan ñuca nini, nachu tian shuj ricuchi cai cuzaspi? Imashna ciertopacha cai brújula ñucanchi taitacunata apamurca, caipaj ñanda catishpa, cushapacha nishca alpaman, shinami Cristopaj achil shimicuna, ñucanchi paipaj ñanda catijpica, ñucanchita apanga cai llaquirinapaj pugru pambata yalishpa cushapacha nishca alpata yali ashtahuan aliman.

46 Oh ñuca churi, ama quillacuna cashunchichu na shinlli ñanguna caimanda; shina carca ñucanchi taitacunahuan; shina paicunaman preparashca carca, paicuna ricushpaca causai ushachun; shinallata ñucanchihuanbash can. Ñanga preparashca can, ñucanchi ricujpica causashunmi mana tucurinacaman.

47 Cunan, ñuca churi, cai achil cuzascunata aliguta ricui, ari, Diospaman aliguta quimiri, causaipash. Cai llactapuracunaman ri achil shimita villaipash, serio cai. Ñuca churi, cayacaman.