1 Riqui, cunan yalishca jipa chai Lamanitacuna ashtahuan fiñashca carca paicunapaj huauquicunata huañuchishcamanda; chaimanda Nefitacunapa jahuapi jurarca vengazata; paicuna ñana mascarca huañuchingapa chai punllacunapi Anti-Nefi-Lehipaj llactapuracunata.

2 Ashtahuangari paicunapaj macanajunacunata japishpa rirca Zarahemlapaj alpa manñacunaman, macanajungapa quimirirca llactapuracunaman picuna Ammoníahpaj alpapi cajcunapaman paicunata tucuchircapash.

3 Chai jipa, Nefitacunahuan tauca macanajuicunata charirca, caicunapi calpachishca, huañuchishcapash carca.

4 Lamanitacunamanda maijan huañuchishca carca ña tucuilla Amulónpaj cati aillucuna paipaj huauquicunapash carca, picuna Noépaj sacerdotecuna carca, paicuna Nefitacunapaj maquicunahuan huañuchishca carca;

5 Puchushcacuna, jichushca pambapaj indi llujshij ladoman calpashca carca, ushaita autoridadtapash millaita quichushca carca Lamanitacunata, tauca Lamanitacunata tucuchichirca ninahuan paicunapaj crinacunamanda—

6 Paicunamanda taucacuna, llaquirishca jipa ashtaca chingachishcacunamanda ashtaca ninan llaquicunamandapash, tangaj shina yari callarirca shimicunata imata Aarón paipaj huauquicunapash paicunapaj alpacunapi yachachishca carca; chaimanda paicuna ñana crij callarirca paicunapaj punda taitacunapaj yachachishcacunata, Apunchijpi crircapash, pai Nefitacunaman jatun ushaita cushcatapash; shina paicunamanda taucacuna crij tigrarijcuna tiarca jichushca pambacunapi.

7 Yalishca jipa cai mandajcuna picuna Amulónpaj huahuacunapaj puchushcacuna carca huañuchishpa tucuchinata churachirca, ari, tucui maijanguna cai cuzascunapi crijcunata.

8 Cunan cai ninan llaquita yalina paicunapaj tauca huauquicunata tangaj shina fiñarirca; jichushca pambacunapi randimanda plituricuna tiai callarirca; Lamanitacuna Amulónpaj cati aillucunata paipaj huauquicunatapash mascashpa cati callarirca paicunata huañuchi callarircapash; paicuna indi llujshij lado jichushca pambaman calparca.

9 Riqui cai punllacaman Lamanitacunahuan mascashpa cati tucurca. Shina Abinadípaj shimicuna yalichun apamushca carca, imata pai nirca sacerdotecunapaj cati aillucunamanda, pimi ninahuan huañuita llaquichirca.

10 Imashpa paicunaman nirca: Imata ñucata ruranguichi shinallata ricuchishca cuzascuna shamunga.

11 Cunan Abinadí callari carca ninahuan huañui llaquita charishpa Diospi pai crimanda; cunan cai can ima can, taucacuna ninahuan huañui llaquita charirca, imashna pai llaquirirca laya.

12 Noépaj sacerdotecunaman nirca paicunapaj cati aillucuna taucacuna huañuchishca canga, pai huañushca layapillata, paicuna caiman chaiman calpachishcapash canga huañuchishcapash, llamacuna michijta na charishpa apai tucushca can huañuchishcapash sacha animalcunahuan; cunan riqui, cai shimicuna cierto carca, paicuna Lamanitacunahuan calpachishca carca, mascashpa catishca carca, chugrichishcapash carca.

13 Yalishca jipa imaura Lamanitacuna ricurca paicuna Nefitacunata na mishai ushajta cutin tigrarca paicunapaj propio alpaman; tauca paicunamanda Ismaelpaj alpapi causaj shamurca Nefipaj alpapipash, Diospaj llactapuracunaman paicunallata tandanajurca, picuna carca Anti-Nefi-Lehipaj llactapuracuna.

14 Paicunapash macanajunacunata pambarca, paicunapaj huauquicuna rurashca laya, paicuna ali ruraj llactapuracuna cai callarirca; Apunchijpaj ñangunapi purirca, paipaj rurachunbacha saquishcacunata pactachingapa atirirca paipaj ricuchunbacha saquishcacunatapash.

15 Ari, paicuna Moiséspaj catichunbacha saquishcacunata alichirca; cai minishtirishcara carca paicuna alichichun Moiséspaj catichunbacha saquishcacunata, cai nara tucuilla pactashca carca. Ashtahuangari masqui Moiséspaj catichunbacha saquishcacunata, paicuna shuyarca Cristopaj shamunata, yarishpa Moiséspaj catichunbacha saquishcacuna paipaj shamuita ricuchij cashpa, crishpa paicuna alichinapacha cajta canlla ruranacunata imaura paicunaman achil villashca cangacaman.

16 Cunan paicuna na crirca quishpirinaca Moiséspaj catichunbacha saquishcacunamanda shamunata; ashtahuangariMoiséspaj catichunbacha saquishcacuna carca shinlliyachingapa Cristopi paicunapaj feta; shina paicuna shuyaita charirca femanda, mana tucurina quishpirinata, achil villachinapaj espíritupi confiashpa, imami parlashca carca shamuna cuzascunamanda.

17 Cunan riqui, Ammón, Aarón, Omner, Himni, paicunapaj huauquicunapash ninandapacha cushijurca, Lamanitacunapi éxitota charishca caimanda, yachashpa Apunchijca paicunaman cushcamanda paicunapaj achil mañaicunamanda, paipaj shimita pactachishcapash caimanda tucuicunapi.