1 Yalishca jipa pai cutin quilcarca alpapaj gobernadorman, pimi Pahorán carca, cai shimicuna carca imata pai quilcarca, nishpa: Riqui, ñuca carta Pahoránba can, Zarahemla llactapi, ricushpa chasquichijcunapaj yali mandaj can alpapaj gobernadorpapash, tucui maijanguna picuna ajllashcacuna can cai llactapuracunamanda mandachun, pushachunbash cai macanajuipaj ruraicunata.

2 Riqui, ñuca imatachari ninata charini paicunaman llaquichi tucushca layapi; riqui, cangunallata yachanguichi canguna ajllashcacuna canguichi runacunata tandachingapa, paicunata churachingapa espadacunahuan, cimitarracunahuan, tucui laya macanajunacunahuan tucui laya macanajuipa, Lamanitacunapaj contra cachana, maijan pushtucunata paicuna ñucanchi alpacunaman shamujpi.

3 Cunan riqui, cangunaman nini ñucallata, ñuca runacunapash, Helamán, paipaj runacunapash, ninanbacha jatun llaquicunata yalinajun; ari, yarjai, yacunayai, shaijui, tucui laya llaquicunatapash.

4 Ashtahuangari riqui, caillata llaqui yalishca cashpaca na huasha rimanchimanllu nacashpa na quejarinchimanllu.

5 Ashtahuangari riqui, jatun huañuchicuna cashca ñucanchi llactapuracunapi; ari, huarangacuna espadahuan urmashca, shuj laya cai ushanman carca, canguna ñucanchi macanajuj runacunaman minishtirishca shinllichita, ayudatapash cujpica. Ari, jatun cashca cangunapaj na ricuriai ñucanchihuan.

6 Cunan riqui, ñucanchi munanchi yachangapa imashpa cai ninan jatun na ricuriai cashcata; ari, ñucanchi munanchi yachangapa imashpa ñucanchita na yarishca cashcata.

7 Tiari ushani yanguichu cangunapaj jatun tiarinacunapi yaritapash na yarishpa, cangunapaj napacha na ricunayachijcuna chajchunajun huañuchinata cangunapaj muyundi? Ari, paicuna cangunapaj huauquicunata huaranga huarangacunata huañuchinajujpi—

8 Ari, maijanguna huacaichingami yashpa confiashcacuna, ari, cangunata churashca paicunata ayudai ushachun, ari, paicunaman macanajuj runacunata cachai ushachun, paicunata shinlliyachichun, quishpichimanbash huaranga huarangacunata ama urmachun espadahuan.

9 Ashtahuangari riqui, cai na tucuilla can—paicunaman minishtirishcacunata na cushcanguichi, shinashpa taucacuna macanajushca paicunapaj causaicunata cushca paicunapaj jatun munaicunamanda imami can cai llactapuracunapaj alicana; ari, caita rurashca paicuna ña tucurigrinajushpa yarjaihuan, cangunapaj ninan jatun negligenciamanda paicunaman.

10 Cunan, ñuca juyashca huauquicuna—juyashcacuna cangapa; ari, ashtahuan utsialla munaita jatarichina carcanguichi, cai llactapuracunapaj alicana libertadpash; ashtahuangari riqui, paicunata na ricuriashpa saquishcanguichi shinashpa huaranga huarangacunapaj yahuar cangunapaj uma jahuaman shamunga venganzapa; ari, Diospajpi yachashca carca paicunapaj tucui mañaicuna, paicunapaj tucui llaquiricunapash—

11 Riqui, tiari ushanchi yanguichichu cangunapaj jatun tiarinacunapi, Diospaj ninan alicaimandapash pai cacharichinga canguna nimata na rurajpi? Riqui, caita yashca cashpaca yanga yashcanguichi.

12 Yanguichichu, shina tauca cangunapaj huauquicuna huañuchi tucushca cai can paicunapaj na ali ruraicunamanda? Cangunaman nini, caita yashca cashpaca yanga yashcanguichi; cangunaman nini, taucacuna tian maijanguna espadahuan urmashca; riqui cai can cangunapaj ricushpa chasquichinaman;

13 Apunchijca saquin ali rurajcuna huañuchishca cachun paipaj alicai, ricushpa chasquichinapash shamuchun na alita rurajcunapa jahuaman; chaimanda na yana canguichichu ali rurajcuna chingashca cajta paicuna huañushca cashpa; ashtahuangari riqui, paicuna samangapa yaicun Apunchij paicunapaj Diospi.

14 Cunan riqui, cangunaman nini, ñuca ninandapacha manllani Diospaj castigocuna cai llactapuracunapa jahuaman shamunga cangunapaj ninan quillamanda, ari, ñucanchi gobiernopaj quillamandapash, paicunapaj ninan jatun na ricuriai paicunapaj huauquicunaman, ari, maijanguna huañushca can.

15 Cai na canman carca na ali ruraicuna ima callaripi callarirca ñucanchipaj umapi cajcunahuan, ñucanchipaj napacha ricunayachijcunata jarcai ushanchiman carca shina paicuna ama charichun mishaita uhsaitapash ñucanchipa jahuapi.

16 Ari, ñucanchipura macanajui na tiashcajpi; ari, cai na shina cashcajpica cai jatun mandajta charingapa munaj runacuna, picuna shina ashtaca ñucanchipura yahuarta jichachirca; ari, ñucanchipura fiñanajuna randi, ñucanchi shinlliyachinacunata tandachina carcanchi imashna punda rurashcashna; ari, cai na canman carca ushaita, autoridadtapash charingapa munaimanda imata chai jatun mandajta charingapa munaj runacuna ñucanchi jahuapi charirca; fielcuna cashca cashpaca ñucanchi libertadmanda ñucanchiman tandanajushca cashpaca ñucanchipaj napacha ricunayachijcunapaj contra llujshishca cashpa, ñucanchipaj contra paicunapaj espadacunata alsana randi, imami carca shina ashtaca yahuar jichai ñucanchipura; ari, paicunapaj contra rishca cashpaca Apunchijpaj ushaihuan, ñucanchipaj napacha ricunayachijcunata caiman chaiman calpachinchiman carca, cai rurashca canman carca, paipaj shimipaj pactachinamanda.

17 Ashtahuangari riqui, cunan Lamanitacuna ñucanchi jahuaman shamunajurca, ñucanchi alpacunata japingapa, paicuna ñucanchi llactapuracunata espadahuan huañuchinajun, ari, ñucanchi huarmicunata, ñucanchi huahuacunatapash, paicunata apanajunbash huatai tucushcashnaman, paicuna llaquichishpa tucui laya llaquicunata, cai jatun na alita ruraicunamanda maijanguna mascanajun ushaita, autoridadtapash, ari, chai jatun mandajta charingapa munaj runacuna.

18 Ashtahuangari imashpata ashtacata nisha caicunamanda? Ñucanchi na yachanchi ashtahuangari cangunallata autoridadta mascanajujtapash. Ñucanchi na yachanchi ashtahuangari canguna cajta umachishpa japichijcuna cangunapa llactata.

19 Nacashpa ñucanchihuan na ricuriaj cashcanguichi ñucanchipa llacta chaupipi caimanda seguro canapash muyushca canguichi, caimanda ñucanchiman micunacunata na cachamuchun mandanguichi, runacunatapash ñucanchi macanajuj runacunata shinlliyachingapapash?

20 Cungashcanguichichu Apunchij cangunapaj Diospaj rurachunbacha saquishcacunata? Ari, cungashcanguichichu ñucanchi taitacunapaj huatai tucushcashnata? Cungashcanguichichu tauca viaje ñucanchipaj napacha ricunayachijcunapaj maquicunamanda cacharichishcata?

21 Nacashpa yanguichichu Apunchij ñucanchita cacharichingara, ñucanchi tianajujpi jatun tiarinacunapi Apunchij ñucanchiman cushcacunata na imatapash rurajpi?

22 Ari, imatapash na rurashpa tiajujpi huaranga huarangacuna muyushca, ari, huaranga huarangacuna, paicunapash tianajun imatapash na rurashpa, muyundipica alpapaj manñacunapica huaranga huarangacuna espadahuan urmanajun, ari, chugrishcacuna, yahuarllacunapash?

23 Yanguichichu Dios cangunata inocentepi churanga canguna tianajujpi cai cuzascunata ricushpa? Riqui cangunaman nini, Na. Cunan ñuca munani yarichun Dios nishca can vaso ucura maillashca canga, shina jipa vaso huashapash maillashca canga.

24 Cunan, imashpapash arrepentirishpalla imata rurashcacunamanda, utsia rurai callarishpa, ñucanchiman cachamushpapash micunata, runacunatapash, Helamánmanbash, pai shinllichi ushachun ñucanchipaj llacta chai pushtucunata imata cutin mishashca, ñucanchipash mishachun puchushca ñucanchipa charishcacunata chai pushtucunapi, riqui cai minishtirishca canga ñucanchi ama macanajuchun Lamanitacunahuan imaura ñucanchipaj vaso ucucunata maillangacaman, ari ñucanchipaj gobierno jatun umata.

25 Imashpapash ñuca cartata chasquingui, llujshimushpa ricuchihuanguipash libertadpaj ciertopacha espírituta, atiringuipash shinllichingapa ñucanchi macanajuj runacunata shinlliyachingapa, paicunaman micunata caranguipash paicuna causachun, riqui ñuca huaquin libre runacunata saquisha charishpa catichun cai ñucanchi alpa pushtuta, paicunata ñuca mingasha ushaiman, Diospaj achil yachishcacunamanbash, nima cutishuj ushaipash paicunapaj contra ama cachun—

26 Cai paicunapaj ninan femanda, paicunapaj pacienciamanda paicunapaj llaquicunapi—

27 Cangunapaman shamusha, cangunapi maijanbash libertadta munaj tiajpica, ari, masqui ashalla libertadpaj ninagu puchushca, riqui ñuca cangunapi na cazunacunaman tangachisha, imaura maijanguna ushaita, autoridadta japingapa munajcuna tucuringacaman.

28 Ari, riqui ñuca na manllani cangunapaj ushaita nacashpa cangunapaj autoridadpash, ashtahuangari ñuca Diosmi pita ñuca manllani; cai can paipaj rurachunbacha saquishcacunamanda imamanda ñuca espadata japini ñuca llactamanda huacaichingapa, cai can cangunapaj na ali ruraicunamanda ñucanchi llaquirishcanchi shina ashtaca chingachicunata.

29 Riqui punlla can, ari, punlla caipi can, imashpapash cangunamanda ñaupanguichi cangunapaj llactata huacaichingapa, cangunapaj uchillagucunatapash, alicaipaj espadaca ña cangunapa jahuapi; ari, cai cangunapa jahuapi urmanga cangunata ricuj shamunga tucuilla tucuchingacaman.

30 Riqui, ñuca cangunapaj ayudata shuyani; imashpapash canguna ayudata na cunguichi, riqui, cangunapaman quimirini, Zarahemla alpapi, chugrichishapash espadahuan, shinashpa canguna ashtahuan ushaita na charinguichichu jarcangapa cai llactapuracunapaj miraita ñucanchi libertad yuyaicunamanda.

31 Riqui, Apunchij na saquingachu canguna causachun, shinllicunaman tigrachunbash na ali ruraicunapi tucuchingapa paipaj ali ruraj llactapuracunata.

32 Riqui, yanguichichu Apunchij cangunata huacaichingachu, shamungapash ricushpa chasquichinapi Lamanitacunapaj contra, paicunapaj punda taitacunapaj yachachishcata cai napacha ricunayaita cuchishca, ari, ninanda mirashcapash maijanguna ñucanchimanda chaupirishca, imaura cangunapaj na ali ruraicuna shamun cangunapaj juyaimanda cai pachapaj yanga, runa rurashca cuzascunamanda?

33 Yachanguichichu na ali rurashpaca Diospaj catichunbacha saquishcacunata, yachanguichi cangunapaj chaquicunahuan paicunata sarunguichi. Riqui, Apunchij nihuan: Picuna cangunapaj gobiernocunata ajllashcacuna na arrepentirijpica paicunapaj juchacunamanda, na ali ruraicunamanda, ringui paicunapaj contra macanajungapa.

34 Cunan riqui, ñuca, Moroni, munai na munai churashca cani, conveniomanda imata ñuca rurarcani ñuca Diospaj rurachunbacha saquishcacunata alichingapa; chaimanda ñuca munani Diospaj shimita cazuchun, ñapash cachamuchunbash ñucanchiman minishtirishcacunata, runacunatapash, ñucaman, Helamánmanbash.

35 Riqui, caita na rurajpica ñuca ñami shamuni; riqui, Dios na saquingachu ñucanchi yarjaihuan tucurichun; chaimanda pai caranga cangunapaj micunata, minishtirijpica espadahuan. Cunan ricuichi Diospaj shimita pactachichi.

36 Riqui, ñuca cani Moroni, cangunapaj capitán yali mandaj. Ñuca na mascani ushaita, ashtahuangari tucuchini caita. Ñuca na mascani cai pachapaj honorta, ashtahuangari ñuca Diospaj honorta, libertadtapash, ñuca llactapaj ali caitapash. Shina ñuca cartata tucuchini.