1 Cunan yalishca jipa imaura cai Lamanitacuna Nefitacunahuan macanajungapa rishcacuna yachashpa, paicunata tucuchingapa paicunapaj tauca fiñanajuicuna jipa, cai munai tucuchingapa yanga carca, Nefipaj alpaman cutin tigrarca.

2 Yalishca jipa Amalekitacuna, ninandapacha fiñashcacuna carca, paicunapaj chingachishcacunamanda. Imaura caita ricushpa paicunapash shinallata rurangapa munarca Nefitacunahuan, llactapuracunata tangaj shina fiñachi callarirca paicunapaj huauquicunapaj, Anti-Nefi-Lehipaj llactapuracunata contra; chaimanda cutin paicunata tucuchi callarirca.

3 Cunan cai llactapuracuna paicunapaj macanajunacunata cutin japingapa na munarca, saquirirca huañuchishca cangapa imashna paicunapaj na ricunayachijcunapaj munaihuan.

4 Cunan imaura Ammón paipaj huauquicunapash ricushpa cai tucuchinapaj ruraita maijanguna ninanda juyashcacunahuan, maijangunata ninanda juyashca cashcacunahuan—imashpa paicuna ricushca carca ángelcuna cajpishna Diosmanda cachamushca paicunata quishpichingapa mana tucurina tucuchinamanda—chaimanda, imaura Ammón paipaj huauquicunapash ricushpa cai jatun tucuchinapaj ruraita, ninanda llaquirirca, jatun mandajta nircapash:

5 Tandachishunchi cai Apunchijpaj llactapuracunata, urai rishunchi Zarahemlapaj alpaman ñucanchi Nefitacuna huauquicunapaman, ñucanchita na ricunayachijpaj maquicunamanda calpashunchi, ama tucuchi tucushca cangapa.

6 Ashtahuangari jatun mandaj paicunaman nirca: Riqui, Nefitacuna ñucanchita tucuchinga, tauca huañuchishcacunamanda juchacunamandapash paicunapaj contra ñucanchi rurashcamanda.

7 Ammón nirca: Ñuca risha Apunchijta tapusha, pai ñucanchita nijpica, urai ri ñucanchipaj huauquicunapaman, ringuichicha?

8 Jatun mandaj nirca: Ari Apunchij ñucanchita ri nijpica, urai rishunchi ñucanchi huauquicunapaman, ñucanchi esclavocuna cashunchi imaura aliman tigrachingacaman ñucanchi tauca huañuchicunata juchacunatapash paicunapaj contra rurashcata.

9 Ashtahuangari Ammón paita nirca: Cai ñucanchi huauquicunapaj catichunbacha saquishcacunapaj contra can, imami ñuca taita rurashca carca, paicunapi esclavocuna na tiana cajta; chaimanda urai rishunchi ñucanchi huauquicunapaj llaquijpi confiashpa.

10 Ashtahuangari jatun mandaj paita nirca: Apunchijta tapui, pai ñucanchita richi nijpica, rishunchi; nacajpica ñucanchi huañushunchi alpapi.

11 Yalishca jipa Ammón rirca Apunchijta tapurca, Apunchijca paita nirca:

12 Cai llactapuracunata cai alpamanda llujchichi, paicuna ama huañuchun; Satanás Amalekitacunapaj shungucunata ninandapacha mishashca can, pimi tangaj shina Lamanitacunata fiñachijun paicunapaj huauquicunata huañuchichun; chaimanda cai alpamanda llujshi; achilyachishca can cai llactapuracuna cai miraicunapi, paicunata ñuca alchishpa charisha.

13 Yalishca jipa Ammón rirca nircapash jatun mandajman tucui shimicunata imami Apunchij paiman nishcata.

14 Tucui paicunapaj llactapuracunata tandachirca, ari, tucui Apunchijpaj llactapuracunata, tandachirca tucui ataju llamacunata jihua micuj shuj animalcunatapash, llujshishpa rirca pambamanda, chayarcapash jichushca pambaman maipi chaupishca Nefipaj alpa Zarahemla alpamanda, alpa manña ladoman chayarcami.

15 Yalishca jipa Ammón paicunaman nirca: Riqui, ñuca, ñucapaj huauquicunapash Zarahemla alpaman yaicugrinchi, canguna caipi canguichi ñucanchi imaura tigramungacaman; ñucanchi huauquicunapaj shungucunata ricugrinchi, paicuna saquij na saquij paicunapaj alpaman yaicuchun.

16 Yalishca jipa Ammón pambaman rijujpi, pai paipaj huauquicunahuanbash Almahuan tuparirca, chai pushtupi imamanda parlashca can; riqui, cai carca shuj cushijuipacha tupari.

17 Cunan Ammónpaj cushijui shina jatun carca ninanbacha; ari, pai mishai tucushca carca paipaj Diospaj cushijuipi, paipaj shinllicai tucuringacaman; pai cutinbash alpaman urmarca.

18 Cunan nachu cai ninandapacha cushijui carca? Riqui, cai can cushijui imami pipash na chasquinllu ashtahuangari ciertopacha arrepentiringapa munanajujcunalla humildadhuan cushijuitapash mascaj.

19 Cunan Almapaj cushijui paipaj huauquicunahuan tupari ciertopacha jatun carca, Aarónpaj cushijuipash, Omnerpaj, Himnipaj; ashtahuangari riqui paicunapaj cushijui na carcachu paicunapaj shinllicaita yali.

20 Cunan yalishca jipa Alma paipaj huauquicunata Zarahemla alpaman tigrai pusharca; paipaj propio huasiman. Paicuna rirca villarcapash ricushpa chasquichijcunapaj yalishca mandajman tucui cuzascuna paicunahuan imalla cashcata Nefipaj alpapi, paicunapaj Lamanita huauquicunahuan.

21 Yalishca jipa ricushpa chasquichijcunapaj yalishca mandaj cacharca shuj proclamaciónda tucui alpacunaman, munashpa llactapuracunapaj shimi rimaita paicunapaj huauquicunata chasquinamanda, picuna Anti-Nefi-Lehipaj llactapuracuna carca.

22 Yalishca jipa llactapuracunapaj shimi rimai shamurca, nishpa: Riqui, Jersónpaj pambata carashun, maijan indi llujshij jatun mama cocha ladoman can, caimi uraiman can Ashtacapacha Tiaj pambahuan; cai Jersón pamba can imata ñucanchi huauquicunaman carashun shuj chasquichinata.

23 Riqui, ñucanchi macanajuj runacunata cachashun Jersón alpa Nefi alpa chaupiman, ñucanchi cuidashun huauquicunata Jersón alpapi; caita ñucanchi huauquicunamanda rurashunchi, macanajunacunata japina manllaimanda paicunapaj huauquicunapaj contra, paicuna juchata ruraipapash; cai jatun manllai shamun paicuna nanaihuan arrepentirimanda imami paicuna charirca, paicunapaj tauca huañuchicunamanda, manllanayai na ali ruraicunamandapash.

24 Cunan riqui, caita ñucanchi rurashunchi ñucanchi huauquicunamanda, Jersón alpata chasqui ushachun; ñucanchi paicunata cuidashun paicunata na ricunayachijcunamanda ñucanchi macanajuj runacunahuan, paicunapaj asha minishtirishcapachata cujpi ñucanchi macanajuj runacunata minishtishcapi ayudangapa.

25 Cunan, yalishca jipa imaura Ammón cai uyashpa, pai tigrarca Anti-Nefi-Lehipaj llactapuracunapaman, Almapash paihuan, jichushca pambapi, maipi paicunapaj facha huasicunata shayachishca carca, tucui cai cuzascunata paicunaman yachaj chayachingapa. Almapash paicunaman paipaj crijman tigrashcata villarca, Ammónhuan, Aarónhuan paipaj huauquicunahuanbash.

26 Yalishca jipa cai jatunda cushichirca paipuracunapi. Urai rirca Jersón alpaman, cai alpata causangapa chasquirca; Nefitacuna Ammónpaj llactapuracunata shutichirca; chaimanda cati cai shutihuan ali rijsi tucushca carca.

27 Paicuna Nefipaj llactapuracunahuan causarca, yupai tucushcapash llactapuracunahuan picuna Diospaj iglesiapaj carca. Paicuna ali rijsi tucushcacunapash carca paicunapaj Diosta jatun munaimanda, runacunatapash; paicuna ali honestocunapacha carca tucui cuzascunapi; Cristopaj fepi shinllicuna carca, tucurinacaman.

28 Paicuna ricurca jatun millanayaihuan paicunapaj huauquicunapaj yahuarta jichanata; nimaurapash paicunata cutin macanajunacunata japichun tangashca carcachu paicunapaj huauquicunapaj contra; paicuna nimaura na ricurca huañuita nima manllaihuan, imashpa paicunapaj shuyaimanda, Cristopaj yachaicunamandapash, cutin causarinamandapash; chaimanda paicunapaj huañuica yalishca carca Cristo caita mishaimanda.

29 Chaimanda, paicuna huañuita llaqui yalirca, imami paicunapaj huauquicuna manllanayaihuan nanaihuanbash tucuchingapa ushaipi, paicunapaj espadata nacashpa cimitarrata huañuchingapa japina randi.

30 Shina paicuna shuj jatun munajcuna carca juyashca llactapuracunapash, Apunchijpaj ninanda ayudashca llactapuracuna.