1 Cunan yalishca jipa Moroni cai cartata chasquishpa ashtahuan fiñarca, pai yachaimanda Ammorón shuj alipacha yachaita charijta paipaj umachita; ari, pai yacharca Ammorón yachajta cai na carca alimanda imami apashca carca Nefipaj llactapuracunapaj contra macanajungapa.

2 Pai nirca: Riqui, ñuca na randipash cushachu prezucunata Ammorónhuan imashpapash paipaj munaita saquijpilla, ñuca cartapi imashna cashcata; imashpa na saquishachu ashtahuan ushaita charichun ña charishcata yalishpa.

3 Riqui, ñuca yachani maipi Lamanitacuna ñuca llactapuracunata alichijta maijangunata prezu japishcacunata; Ammorón ñuca cartapi mañashcata cunga, riqui, ñuca shimicuna nishcata rurasha; ari, huañuita munasha paicunapi imaura paicuna sumaj causaita mañangacaman.

4 Cunan yalishca jipa Moroni cai shimicunata nishpa, paipaj runacunapi mascachirca, imashpapash shuj runata taripapash Lamánpaj cati ailluta paicunapi.

5 Yalishca jipa shujta tarirca, paipaj shuti carca Lamán; pai carca jatun mandajpaj shuj sirvij pimi Amalickíah huañuchishca carca.

6 Cunan Moroni Lamánda, huaquin paipaj runacunahuan richun nirca ricuj runacunapaman picuna Nefitacunata ricunajurca.

7 Cunan Nefitacuna Gid llactapi alichishca carca; chaimanda Moroni Lamánda ajllarca huaquin runacunahuan richun.

8 Tutayajpi Lamán rirca ricuj runacunapaman picuna Nefitacunata ricunajurca, riqui, paicuna shamujujta ricurca, caparircapash; ashtahuangari paicunata nirca: Ama manllaichi; riqui, ñuca cani Lamanita. Riqui, Nefitacunapamanda calpamushcanchi, paicuna puñunajun; riqui ñucanchi paicunapaj vinota japishcanchi ñucanchihuan apamurcanchipash.

9 Cunan Lamanitacuna cai shimicunata uyashpa paita cuchijuihuan chasquirca; paicuna nirca: Cangunapaj vinota ñucanchiman carai, ñucanchi ufiangapa; ñucanchi cushijushca canchi shina vinota apamushcamanda imashpa ñucanchi shayajushca canchi.

10 Ashtahuangari Lamán paicunata nirca: Ñucanchi vinota alichishunchi imaura Nefitacunahuan macanajungapa ringacaman. Ashtahuangari cai nijurca paicuna ashtahuan vinota ufiangapa munachun;

11 Paicuna nirca: Ñucanchi shayajushca canchi, chaimanda vinota ufiashunchi, ashata cashpa ñucanchi ración vinota chasquishun, chai shinlliyachinga ñucanchita Nefitacunapaj contra ringapa.

12 Lamán paicunata nirca: Ruraichi cangunapa munaicunata.

13 Yalishca jipa paicuna vinota ashtacata ufiarca; cai carca ali paicunapaj malipi, chaimanda paicuna ashtahuanbacha ufiarca; cai carca fuerte, rurashca carca shinlli cachun.

14 Yalishca jipa paicuna ufiarca cushijushcapash carca, ashata cashpa paicuna tucuilla machashca carca.

15 Cunan imaura Lamán, paipaj runacunapash ricushpa tucuilla machashca cajta, sumaj puñuipi carca, Moronipaman tigrarca paiman nirca tucui cuzascuna ima cashcata.

16 Cunan cai carca Moronipaj rurangapa munashca. Moroni paipaj runacunata preparashca carca macanajunacunahuan; Gid llactaman rirca, Lamanitacuna sumaj puñuipi cajpi, machashcapash, macanajunacunata prezucunaman shitarca, shinashpa tucuilla macanajunacunata churajushca carca;

17 Ari, paicunapaj huarmicunatapash, tucui paicunapaj huahuacuna, macanajunacunata japi ushajcunatapash, Moroni tucui prezucunata macanajunacunata churachishpa; tucui chai cuzascunata rurashca carca ninan upallaguta.

18 Ashtahuangari Lamanitacuna rijcharijpica, riqui paicuna machashca carca Nefitacuna huañuchi usharca.

19 Ashtahuangari riqui, cai na Moronipaj munai carcachu; pai na cushijurca huañuchipi, nacashpa yahuarta jichaipi, ashtahuangari cushijurca paipaj llactapuracunapaj tucuchinamanda huacaichinapi; caimanda na alita ama apamungapa, Lamanitacuna jahuaman na shamurca paicuna machashca cajpi tucuchingapa.

20 Ashtahuangari paipaj munaita pactachirca; pai macanajunacunata Nefita prezucunaman churachishpa maijanguna llactapaj pirca ucupi cajcunaman, paicunaman ushaita cushpa mishachun chai pushtucunata pirca ucucunapi cajta.

21 Shina runacunata maijanguna paihuan carca paicunapamanda shuj pasota anchuchirca, Lamanita macanajuj runacunata muyushca cachun.

22 Cunan riqui cai rurashca carca tutapi, shina imaura Lamanitacuna tutamanda rijcharijpi paicuna ricurca canllapi Nefitacunahuan muyushca cajta, ucupi paicunapaj prezucunapash macanajunacunata churajushcacuna cajta.

23 Shina paicuna ricurca Nefitacuna ushaita charijta paicunapaj jahuapi; cashna caicunapi paicuna tuparca cai na minishtirishca cajta Nefitacunahuan macanajuna; chaimanda paicunapaj capitángunapaj yali mandaj paicunapaj macanajunacunata shitachun mandarca, paicuna apamurca Nefitacunapaj chaquicunapi shitarca, shungumanda llaquita mañashpa.

24 Cunan riqui, cai carca Moronipaj munai. Pai japirca macanajuipaj prezucunata, llactata misharcapash, tucui prezucunata cacharichirca, picuna Nefitacuna carca; paicuna Moronipaj macanajuj runacunapaman tandanajurca, paipaj macanajuj runacunata ninanda shinllichishca carca.

25 Yalishca jipa Lamanitacunata, maijangunata prezu japirca, paicunata trabajachi callarirca shinlliyachinacunapi Gid llactata muyundi shinlliyachishpa.

26 Yalishca jipa Gid llactata shinlliyachishpa, paipaj munaimanda, paipaj prezucuna Ashtacapacha Tiaj llactaman apashca carca; chai llactata huacaichircapash ninan shinlli macanajuicunahuan.

27 Yalishca jipa, masqui Lamanitacunapaj tucui pacalla ruraicunapash, alichirca, huacaichircapash prezucunata maijangunata japishca carca, charishpa catirca tucui alpacunata, ventajatapash imata cutin mishashca carca.

28 Yalishca jipa Nefitacuna cutin callarirca mishajcuna caita, mañangapa paicunapaj derechocunata, paicunapaj privilegiocunatapash.

29 Tauca viajecuna Lamanitacuna munarca paicunata chaupipi churangapa tutapi, ashtahuangari cai munaicunapi tauca prezucunata chingachirca.

30 Tauca viajecuna paicuna Nefitacunaman vinota carangapa munarca, paicunata tucuchi ushangapa venenohuan nacashpa machachihuan.

31 Ashtahuangari riqui, Nefitacuna na unayarca Apunchij paicunapaj Diosta yaringapa cai paicunapaj llaquipaj punllacunapi. Paicuna na japi tucurca paicunapaj umachicunapi; ari, paicunapaj vinota na ufiarca, imashpapash huaquin Lamanita prezucunaman callaringapa carashpara.

32 Shina cuidarirca ama venenota carai tucungapa; paicuna vino Lamanitata venenajpica Nefitatapash venenanga; shina tucui paicunapaj ufianacunata malirca.

33 Cunan yalishca jipa cai carca minishtirishca Moronipaj prepararingapa Moriantón llactata macanajui mascangapa; riqui, Lamanitacuna paicunapaj trabajohuan, Moriantón llactata shinlliyachishca carca imaura cai shinlli jarcashcapacha tigrangacaman.

34 Paicuna mushuj macanajujcunata llactaman apamushpa catirca, mushuj causangapa minishtirishca micunacunatapash.

35 Shina tucurirca ricushpa chasquichijcunapaj reinado ishcai chunga iscun huata Nefipaj llactapuracunapaj jahuapi.