1 Yalishca jipa mashna Helamánpaj, paipaj huauquicunapaj shimicunata na uyanayachijcuna tandanajurca paicunapaj huauquicunapaj contra.

2 Cunan riqui, paicuna ninandapacha fiñashca carca, shinashpa huañuchingapa munashca carca.

3 Cunan maijanguna paicunapaj huauquicunata fiñashcacunapaj pushaj carca jatun, shinlli runa; paipaj shuti carca Amalickíah.

4 Amalickíah jatun mandaj cangapa munashca carca; chai llactapuracuna picuna fiñashcacunapash munashca carca pai paicunapaj jatun mandaj cachun; paicuna carca taucapacha llactapaj na yapa ushaita charij ricushpa chasquichijcuna, paicuna ushaita mascanajurca.

5 Paicuna Amalickíahpaj uyanayai llullacunahuan apai tucushca carca, paita shinllichishpaca paicunapaj pai jatun mandaj cachun churashpaca, paicunata llactapuracunapa jahuapi mandajcuna cachun churanga.

6 Shina paicuna panda apai tucushca carca Amalickíahhuan ninanda fiñarishpa rimarinacunaman, masqui Helamánpaj paipaj huauquicunapaj yachachishcacunapash, ari, masqui paicunapaj iglesiamandacunata ninandapacha ali cuidashcapash, paicuna iglesiapaj sumo sacerdotecuna carca.

7 Iglesiapi taucacuna tiarca picuna crirca Amalickíahpaj uyanayai llulla shimicunata, chaimanda iglesiamandapash chaupirirca; shina Nefipaj llactapuracunapaj ruranacuna napacha shinlli, llaquipipash carca, masqui paicunapaj jatun mishaita imata paicuna Lamanitacunapaj jahuapi charirca, paicuna jatun cushijuicuna imata paicuna charirca paicunata cacharichishcamanda Apunchijpaj maquihuan.

8 Shina ñucanchi ricunchi imashna ñapash runacunapaj huahuacuna Apunchij paicunapaj Diosta cungan, ari, imashna ñapash na ali ruraicunata ruran, ayahuan panda apai tucunbash.

9 Ari, ñucanchi ricushcanchipash shuj ninan na ali runapaj jatun na alita ruraicuna runacunapaj huahuacunapi shina rurachin.

10 Ari, ñucanchi ricunchi Amalickíah, pai carca na alita rurangapa yachashca runa, uyanayai llulla shimicunapaj runa, pai pandachirca tauca llactapuracunapaj shungucunata na ali ruraicunata rurachun; ari, Diospaj iglesiata tucuchingapa mascajpash, tucuchingapa libertadpaj imapi shayachinata imata Dios paicunaman cushca, nacashpa imata Dios achil yachita alpa jahuallaman cachashca carca alicunapaj alicachun.

11 Cunan yalishca jipa imaura Moroni, pimi carca comandante yali mandaj Nefitacunapaj macanajuj runacunapaj, cai ninanda fiñarishpa rimarinacunata uyashca cashpa, pai Amalickíahhuan fiñashca carca.

12 Yalishca jipa paipaj túnicata liquirca; caipaj shuj trozota japirca, caipi quilcarca—Yaringapa ñucanchi Diospajta, ñucanchi religiónda, libertadpash, ñucanchi sumaj causai, ñucanchi huarmicuna, ñucanchi huahuacuna—caita shuj lanza filopi huatarca.

13 Pai huatarirca paipaj uma jirrucuta, paipaj pechopaj jirrucuna, paipaj escudocuna, paipaj macanajunacunahuan paipaj lomocunata chumbilirca; japircapash lanzata, imami charirca filopi paipaj liquishca túnicata, (pai shutichirca caita libertadpaj estandarte) paillata alpacaman cumurirca, ninandapacha paipaj Diosta achil mañarca libertadpaj achilyachishcacuna paipaj huauquicunapaj jahuapi cachun, imaura Cristianocuna alpata chasquingapa tiangacaman—

14 Shina tucui Cristopi ciertopacha crijcuna carca, maijan Diospaj iglesiata catijcuna, shina shutichirca maijan na iglesiata catijcuna.

15 Maijanguna iglesiata catijcuna fielcuna carca; ari, tucui maijan Cristopi ciertopacha crijcuna, cushijushpa Cristopaj shutita paicuna jahuapi japirca, nacashpa Cristianocuna imashna shutichishca carca, Cristo crimanda pimi shamuna carca.

16 Chaimanda, chai punlla, Moroni achil mañarca yanapachun Cristianocunata, alpapaj libertadadtapash.

17 Yalishca jipa imaura paipaj almata Diosman jicharca, tucui alpacunata shutichirca Desolación alpamanda uraiman cajcunata, ari, tucuripipash, tucui alpacunata, ishcandi vichaiman, uraimanbash—Ajllashca alpa, libertadpaj alpa.

18 Pai nirca: Ciertopacha Dios na saquingachu ñucanchi, picuna millanayachi tucushca canchi Cristopaj shutita ñucanchi jahuapi japimanda, sarui tucushca, tucuchi tucushca cachun, imaura ñucanchillata mascajpi ñucanchi propio na ali rurangacaman.

19 Imaura Moroni cai shimicunata nishca cashpa, pai rirca llactapuracunahuan, paipaj churajunapaj liquishca pedazota huairapi cuyuchishpa, tucuicuna ricui ushachun quilcashcata imata pai liquishca pedazopi quilcashca carca, ninanda caparishpa shinlli shimihuan, nishpa:

20 Riqui, maijangunapash cai estandarteta cai alpapi charishpa catingapa, shamuichi Apunchijpaj shinllihuan, shuj convenioman yaicuichi paipaj derechocunata charishpa catingapa, paipaj religióndapash, Apunchij Dios achilyachipachun.

21 Yalishca jipa imaura Moroni cai shimicunata villashca carca, riqui, llactapuracuna calpashpa shamurca paicunapaj lomocunapi macanajunacunata chumbilishpa, paicunapaj churajunacunata liquishpa señalpi, nacashpa shuj pactachina layapi, Apunchij paicunapaj Diosta na saquingapa; nacashpa, shuj shimicunapi, paicuna Diospaj rurachunbacha saquishcacunata na alita rurashpaca, nacashpa na ali ruraipi urmashpaca, Cristopaj shutita paicunapaj jahuapi apangapa pinganayachijpica, Apunchijca paicunatapash tucuchinga imashna paicunapaj churajunacunata liquishca laya.

22 Cunan cai carca pactachina imata paicuna rurarca, paicunapaj churajunacunata Moronipaj chaquicunapi shitarca, nishpa: Ñucanchi Dios-huan pactachinata ruranchi, tucuchi tucushca cashun, ñucanchi huauquicunashna vichai alpapi, ñucanchi na alita rurainaman urmajpica; ari, ñucanchita shitanga ñucanchita napacha ricunayachijcunapa, chaquicunapi, imashna ñucanchipaj churajunacunata quiquinba chaquipi shitashcashna chaquicunahuan sarushca cachun, ñucanchi na alita ruraiman urmajpica.

23 Moroni paicunaman nirca: Riqui, Jacobpaj cati aillucunapaj puchucuna canchi; ari, Josépaj cati aillucunapaj puchucuna canchi, pipaj túnica liquishca carca tauca pedazocunapi paipaj huauquicunamanda; ari, cunan riqui, yarichi Diospaj rurachunbacha saquishcacunata alichinata, nacashpa ñucanchi churajunacuna liquishca canga ñucanchi huauquicunamanda, cárcelman shitai tucushun, nacashpa jatushca, nacashpa huañuchishca.

24 Ari, alchishpa charishunchi ñucanchi libertadta Josépaj puchucunatashna; ari, yarishun Jacobpaj shimicunata, pai nara huañushpa, riqui, pai ricurca Josépaj túnicapaj puchushca shuj pedazo alchishpa charishca carca na ismurcachu. Pai nirca—Ñuca churipaj churajuna cai puchu alchishpa charishca laya, shina Diospaj maqui alchishpacharinga ñuca churipaj cati aillu puchuta, paipaman japishca canga, ashtahuangari Josépaj puchu cati aillucuna tucuringa, paipaj churajuna puchu laya.

25 Cunan riqui, cai llaquichin ñuca almata; shina cajpipash, ñuca alma cushijun ñuca churipi, imashpa paipaj asha cati aillucuna Diospaman japishca canga.

26 Cunan riqui, cai carca Jacobpaj shimirimai.

27 Cunan pita yachan ashtahuangari Josépaj cati aillupaj puchucunaca, paipaj churajuna laya tucurinaca, picuna can ñucanchimanda chaupirishcacuna? Ari, ñucachillatapash cashun Cristopaj fepi mana shinllicuna cashpaca.

28 Cunan yalishca jipa imaura Moroni cai shimicunata nishpa rirca, cacharcapash tucui pushtu alpacunaman maiman chaupirishpa rishcaman, tandachirca tucui llactapuracunata maijanguna paicunapaj libertadta charishpa catingapa munajcunata, Amalickíahpaj contra shayarichun maijanguna chaupirishcacuna, picuna Amalickíahcuna shutichishca carca.

29 Yalishca jipa imaura Amalickíah ricushpa Moronipaj llactapuracuna Amalickíahcunata yali ashtacapacha cajta—pai ricurcapash paipaj llactapuracuna alicaimanda shinachu nachu shina yuyanajujta imamanda paicuna callarishca carca—chaimanda, manllashpa pai munashca na pactachinata, paipaj llactapuracuna maijan munajcunata japishpa Nefipaj alpaman rirca.

30 Cunan Moronipaj yaipi cai na alicarca Lamanitacuna ashtahuan shinlliyarichun; chaimanda pai yuyarca Amalickíahpaj llactapuracunata jarcangapa, nacashpa paicuna japishpa tigrachimungapa, Amalickíahta huañuchingapa; ari, yacharca cai Lamanitacuna tanganga fiñachun paicunapaj contra, caimanda paicunahuan macanajungapa shamugrijta; yacharcapash Amalickíah caita ruranman paipaj munashcata pactachingapa.

31 Chaimanda Moroni yarca cai alicana carca paipaj macanajuj runacunata japishpa, paipuracuna tandanajushca, macanajunacunata churajushcacuna, shuj convenioman yaicurca sumaj causaita huacaichingapa—yalishca jipa paipaj macanajuj runacunata japirca puricallarircapash paipaj facha huasicunahuan jichushca pambaman, Amalickíahpaj ñanda jarcangapa jichushca pambapi.

32 Yalishca jipa paipaj munashcata rurarca, jichushca pambamanbash purirca, Amalickíahpaj macanajuj runacunata jarcarcapash.

33 Yalishca jipa Amalickíah paipaj ashalla runacunahuan calparca, puchucuna Moronipaj maquicunaman cushca carca Zarahemla alpaman tigrachishcapash carca.

34 Cunan, Moroni shuj ajllashca runa caimanda ricushpa chasquichijcunapaj yali mandajcunamanda llactapuracunapaj shimihuanbash, chaimanda pai ushaita charirca paicunapaj munashcahuan Nefitacunapaj macanajuj runacunahuan, shayachingapa paicunapaj jahuapi autoridadta churangapapash.

35 Yalishca jipa tucui Amalickíahcunamanda shuj convenioman na yaicushcacuna shinllichingapa libertadmanda munajcunata, libre mandajta charirishpa catingapa, huañuipi churachirca; ashtahuangari huaquinlla tiarca libertadpaj conveniota negajcuna.

36 Yalishca jipapash, libertadpaj estandarteta churachirca tucui alpacunapaj tucui torrecunapi, Nefitacuna causanajujcunapi; shina Moroni Nefitacunapapi libertadpaj estandarteta tarpurca.

37 Paicuna cutin sumaj causaita alpapi chari callarirca; shina sumaj causaita alpapi charishpa catirca ricushpa chasquichijcunapaj reinado ña tucurinalla chunga iscun huatacaman.

38 Helamán, sumo sacerdotecunapash iglesiapi ordenda charishpa catirca; ari, chuscu huatacunata paicuna ashtaca sumaj causaita charirca iglesiapi cushijuitapash.

39 Yalishca jipa taucacuna tiarca picuna huañurca, crishpapacha paicunapaj alma jatun causachishca cajta Apunchij Jesucristomanda; shina paicuna alpamanda llujshirca cuchijuihuan.

40 Huaquinguna calenturahuan huañurca, huatapi huaquin estacioncunapi shinallata carca alpapi—ashtahuangari na tauca huañurcachu calenturamanda, tauca yuracuna, sapicunapash alipachacuna carca imacuna Dios preparashca carca unguicunata anchuchingapa, imaman runacuna curishca carca clima shina canamanda—

41 Ashtahuangari taucacuna huañurca rucuyaimanda; maijan Cristopaj fepi huañushcacuna paihuan cushijushca can, imashnami ñucachi yuyana canchi.