1 Yalishca jipa picha huata paicunapaj reinado callaripi llactapuracunapi randimanda plituri tiai callarirca; shuj runa, Amlici shutichishca carca, shuj ninan yachashca runa carca, ari, shuj yachashca runa cai pachapa yachaihuan, runapaj layata catishpa pimi Gedeónda espadahuan huañuchirca, pimi huañuchishca carca catichunbacha saquishcacuna laya—

2 Cunan cai Amlici, paipaj yachaihuan tauca llactapuracuna paita catichun aparca; ashtacapacha ninan ushaita charijcuna cai callarirca; paicuna munashpa callarirca shayachingapa Amlicita llactapuracunapa jatun mandaj cachun.

3 Cunan cai manllachirca iglesiapa llactapuracunata, tucui picuna Amlici nishcacunahuan catichun na apai tucushcacunapash; paicuna yacharca paicunapaj catichunbacha saquishcacunamanda, llactapuracunapaj shimi chai cuzascunata mandashca cana carca.

4 Chaimanda, llactapuracunapaj shimihuan Amlici ali cangapa munajpica, pai, shuj na ali runa cashpa, paicunapaj derechocunata, privilegiocunatapash iglesiamanda quichunga; Diospaj iglesiata tucuchingapa paipaj munaica carca.

5 Yalishca jipa llactapuracuna tandanajurca tucui alpacunapi, shujllangaman runacuna paipaj yuyaicunamanda, ima cashpapash Amlicihuan cashpa na cashpapash, shican tandanajushcacunapi, ashtaca fiñanajuita charishpa, caishuhuan chaishuhuan manllanayai fiñanajuicunata charishpa.

6 Shina paipuracuna tandanajurca paicunapaj shimicunata ima layamanda cajta ningapa; paicuna ricushpa chasquichijcunapaj ñaupapi saquirca.

7 Yalishca jipa llactapuracunapaj shimi shamurca Amlicipaj contra, llactapuracunapa jatun mandaj na rurarca.

8 Cunan paipaj contra cajcunapaj shungucunapi cai ninanda cushichirca; ashtahuangari Amlici maijan paihuan cajcunata fiñanajuiman tangaj shina cayachirca maijan paihuan na cajcunahuan.

9 Yalishca jipa paipuracuna tandanajurca, Amlici paicunapa jatun mandaj cachun achil ajllarca.

10 Cunan imaura Amlici paicunapa jatun mandajta rurajpi pai mandarca macanajunacunata japichun paicunapaj huauquicunapaj contra; caita rurarca paipaman paicuna curichun.

11 Cunan Amlicipaj llactapuracuna Amlici shutihuan rijsirishca carca, Amlicitacuna shutichishca carca; puchucuna Nefitacuna shutuchishca carca, nacashpa Diospaj llactapuracuna.

12 Chaimanda Nefitacuna Amlicitacunapaj munaita manllashca carca, chaimanda paicunata tuparingapa shuyanajurca; ari, paicuna macanajunacunata churajushca carca espadacunahuan, cimitarracunahuan, arcocunahuan, flechacunahuan, rumicunahuan, huaracacunahuan, tucui laya macanajungapa charishcacunahuan, tucui layacunahuan.

13 Shina Amlicitacunahuan tuparingapa shuyanajurca, imaura paicuna chayamujpi. Ajllashca carca capitángunata, mayores capitángunata, capitángunata yalishpa mandajcunatapash, paicuna mashna cajta ricushpa.

14 Yalishca jipa Amlicitacuna paicunapaj runacunata churachirca tucui laya macanajunacunahuan tandachishca macanajunacuna; ajllashcapash carca mandajcunata, paicunapaj llactapuracunapa pushajcunatapash, paicunapaj huauquicunahuan macanajungapa pushachun.

15 Yalishca jipa Amlicitacuna Amnihu urcuta chayamurca, Sidón jatun yacupaj indi llujchij ladopi carca, caica Zarahemla alpa ladota yalijurca, chaipi Nefitacunahuan macanajui callarirca.

16 Cunan Alma, ricushpa chasquichijcunapaj yalishca mandaj cashpa, Nefi llactapuracunapaj gobernadorpash, chaimanda paipaj llactapuracunahuan rirca, ari, paicunapaj capitángunahuan, capitángunata yalishpa mandajcunahuan, ari, macanajuj runacunapaj ñaupapi, Amlicitacunahuan macanajungapa.

17 Amlicitacunata huañuchi callarirca Sidón urcu indi llujshi ladopi. Amlicitacuna Nefitacunahuan macanajurca jatun shinlli caihuan, shinaca Amlicitacunapaj ñaupapi Nefitacunamanda tauca urmarca.

18 Shina cashpapash Apunchij shinllichirca Nefitacunapaj maquita, chaimanda Amlicitacunata huañuchirca jatun huañuchicunahuan, chaimanda paicunapaj ñaupamanda pacajushpa calpai callarirca.

19 Yalishca jipa Nefitacuna Amlicitacunata tucui punlla catirca, huañuchircapash jatun huañuchihuan, shinaca Amlicitacuna huañushca carca chunga ishcai huaranga picha patsaj quimsa chunga ishcai almacuna; Nefitacunapaj huañushcacuna carca sujta huaranga picha patsaj sujta chunga ishcai almacuna.

20 Yalishca jipa imaura Alma Amlicitacunata ñana ashtahuan cati ushashpa paipaj llactapuracunata Gedeón pugru pambapi paicunapaj facha huasicunata shayachirca, pugru pamba shutichishca carca Gedeónmanda pitami Nehor maquihuan espadahuan huañuchi tucushca carca; cai pugru pambapi Nefitacuna facha huasicunata shayachirca tutata yalingapa.

21 Alma Amlicitacunapaj puchushcacunata catichun ricuj runacunata cacharca, yachai ushangapa paicunapaj imata ruranacunata, na alita rurangapa yuyanajuicunata, shinashpa paicunamanda huacaichiringapa, paipaj llactapuracunata tucuchinamanda alchishpa charingapa.

22 Cunan maijangunatami cachashca carca Amlicitacunapaj causanajuj pambata ricuchun shuticuna can Zeram, Amnor, Manti, Limher; caicunami carca picunami rirca runacunahuan Amlicitacunapaj causanajuj pambata ricungapa.

23 Yalishca jipa caya punlla Nefitacunapaj causanajuj pambaman tigramurca apurashpa, ninanda manllarishpa, ninan manllai junda, nishpa:

24 Riqui, Amlicitacunapaj causanajuj pambaman catircanchi, ñucanchi jatun manllaripa, Minón pambapi Zarahemla alpa vichaipi, Nefi alpaman shamuna ñanbi, ricurcanchi Lamanitacunapaj shuj taucapacha macanajuj runacunata; riqui, Amlicitacuna Lamanitacunahuan tandanajushca can;

25 Paicuna ñucanchipaj huauquicunata cai alpapi atacanajun; paicuna pacajushpa rinajun paicunapaj ñaupamanda paicunapaj ataju llamacunahuan, huarmicunahuan, huahuacunahuan, ñucanchi llactaman; imashpapash na apuranchi paicuna ñucanchi llactata causangapa mishanga, ñucanchi taitacuna, ñucanchi huarmicuna, ñucanchi huahuacuna huañuchishca canga.

26 Yalishca jipa Nefi llactapuracuna paicunapaj facha huasicunata japirca, Gedeón pugru pambamanda llujshirca paicunapaj llactaman, cai carca Zarahemla llacta.

27 Riqui, Sidón jatun yacuta chimbanajujpi, Lamanitacuna, Amlicitacuna, ashtacapacha cashpa ñalla, jatun mama cochapaj tʼiyushna cashpa, paicunapaman tucuchingapa shamurca.

28 Shina cashpapash, Nefitacuna Apunchijpaj maquihuan shinllichishca carca, paita ninanda achil mañashca carca paicunapaj na ricunayachijcunamanda cacharichishca cachun, chaimanda Apunchij paicunapaj mañaicunata uyarca, paicunata shinlliyachircapash, Lamanitacuna, Amlicitacunapash paicunapaj ñaupapi urmarca.

29 Yalishca jipa Alma Amlicihuan espadahuan macanajurca, ñavi ñavi; paicuna ishcandimanda ninanda fiñanajurca.

30 Yalishca jipa Alma, Diospaj runa caimanda, ashtaca feta chari caimanda, mañarca, nishpa: Oh Apunchij, llaquihuai ñuca causaita quishpichihuai, ñuca cangapa quiquinba maquipi imata ruranapash cai llactapuracunata quishpichingapa alchishpa charingapapash.

31 Cunan imaura Alma cai shimicunata nishpa Amlicihuan cutin macanajurca; shinlliyachishcapash carca, shinamanda Amlicita espadahuan huañuchirca.

32 Lamanitacunapaj jatun mandajhuanbash macanajurcapash; ashtahuangari Lamanitacunapaj jatun mandaj Almapaj ñaupamanda pacajushca calparca paipaj ricuj runacunata cachamurca Almahuan macanajuchun.

33 Ashtahuangari Alma, paipaj ricuj runacunahuan, macanajurca Lamanitacunapaj jatun mandajcunahuan imaura huañuchingacaman huashaman tigrachingacamanbash.

34 Shina pambata jarcashcacunata anchuchirca, nacashpa yacu patata, imami Sidón jatun yacu indi huashajuj ladoman carca, Lamanitacunapaj cuerpocunata maijan huañushca cashcacunata Sidón yacucunapi shitarca, llactapuracuna pushtuta charichun chimbangapa, macanajungapapash Lamanitacunahuan, Amlicitacunahuanbash Sidón jatun yacu indi huashajuju ladopi.

35 Yalishca jipa imaura paicuna tucuilla jatun yacu Sidónda chimbashca cajpi, Lamanitacuna, Amlicitacuna paicunapaj ñaupamanda calpai callarirca, masqui ashtacapacha cashpapash paicuna na yupashca cai usharca.

36 Nefitacunapaj ñaupamanda jichushca pambaman calparca caica indi huashajuj ladoman carca, vichaimanbash, pamba manñata yalishpa; Nefitacuna shinlli caihuan paicunata catirca, paicunata huañuchircapash.

37 Ari, tucui ladocunamanda llujshirca, huañuchirca, calparca, indi huashajuj ladoman caiman chaiman calpachi tucungacaman, vichaiman, jichushca pambaman chayangacaman, maijan Hermounts shutichishca carca; cai jichushca pambapaj pushtu carca maipi causashca carca sacha ninan yarjai animalcuna.

38 Yalishca jipa tauca jichushca pambapi chugricunamanda huañurca, micui tucushcapash carca chai animalcunamanda, jahuata rij angacunamandapash; paicunapaj tullucuna tupai tucushca, alpapi tandachishcapash carca.