1 Cunan yalishca jipa Alma paicunaman cai shimicunata parlashca jipa alpapi tiarirca, Amulek jatarirca paicunaman yachachi callarirca, nishpa:

2 Ñuca huauquicuna, ñuca yuyani cai na ushanapacha can canguna cuzascunamanda na yachashca cana, imacunata parlashcacuna can Cristopaj shamunamanda, pimanda ñucanchi yachachinchi Diospaj Churi cajta; ari, ñuca yachani cai cuzascuna ñucanchiman ninandapacha yachachishca carca nara cangunapaj ninanda fiñarishpa rimarinacunata ñucanchipuramanda.

3 Imashna canguna munashcanguichi ñuca juyashca huauquicunamanda cangunaman yachaj chayachichun imata canguna rurana canguichi, cangunapaj llaquicunamanda; pai parlashca can imata canguna ruranata cangunapaj yuyaicunata; ari, cangunata cutin yarichishca femanda, pacienciamandapash—

4 Ari, shina ashtaca feta charichun cangunapaj shungucunapi achil shimita tarpungapa, caicuna alicaita ricui ushanguichi.

5 Ñucanchi ricushcanchi jatun tapuita ima can cangunapaj yuyaicunapi achil shimi Diospaj Churipi can, nacashpa Cristo tiana na tiana.

6 Canguna ricushcanguichipash ñuca huauqui cangunaman ricuchishca, tauca viajecunapi, achil shimica Cristopi can quishpirinapa.

7 Ñuca huauqui Zenóspaj shimicunaman rishca, jatun causachinaca shamunmi Diospaj Churimanda, Zenocpaj shimicunamanbash; Moiséstapash villashca, cai cuzascuna ciertopacha cajta ricuchingapa.

8 Cunan, riqui, ñuca testificasha cangunaman ñucamandallata yachani Cristo shamunga runacunapaj huahuacunapaman, paipi japingapa paipaj llactapuracunapaj na ali ruraicunata, pai cai pachapaj juchacunamanda huañunga; Apunchij Dios caita parlashca can.

9 Cai minishtirishca can shujpa juchamanda huañui rurashca cana; Mana Tucurina Diospaj jatun planmanda tianapacha shujpa juchamanda huañuna, nacashpa tucui runacuna nimata na rurai ushajpillata chinganga; ari, tucuilla shinllicuna can; ari, tucuilla urmashca, chingashcacunapash can, chingangapacha imashpapash cai can shujpa juchamanda huañuimanda imami minishtirishca can rurashca cana.

10 Cai minishtirishca can tiana shuj jatun tucuri sacrificio; ari, na shuj runapaj sacrificio, na sacha animalpash, nima laya angashpa rij animalcunamanda; na shuj sacrificio humano cangachu; ashtahuangari cai cangapacha shuj mana tucurita charij, mana tucurina sacrificio.

11 Cunan na tianllu maijan runapash sacrificari ushaj paipaj propio yahuarta imahuan shujpa juchacunamanda huañuna. Cunan, shuj runa huañuchijpica, riqui ñucanchipaj catichunbacha saquishcacunata japingacha, imami ali can, paipaj huauquipaj causaita quichungapa? Ñuca cangunaman nini, Na.

12 Ashtahuangari catichunbacha saquishcacuna paipaj causaita minishtin maijan huañuchishcapata; chaimanda nipipash na tian shuj na tucurita charij shujpa juchacunamanda huañui imami shinallapacha canga cai pachapaj juchacunamanda.

13 Chaimanda, cai minishtirishca can tiachun shuj jatun, tucuri sacrificio, shina canga, nacashpa cai minishtirishca tiana, tucurichun yahuarta jichaita; shina Moiséspaj catichunbacha saquishcacuna pactachishca canga; ari, tucui pactashca canga, jotapash, tildepash, nima na chingangachu.

14 Riqui, cai can catichunbacha saquishcacunapaj tucuilla ima nij, tucui uchilla puntopash ricuchin jatun, tucuri sacrificioman, chai jatun, tucuri sacrificio canga Diospaj Churi, ari, na tucurita charij, mana tucurinapash.

15 Shina pai apamunga quishpirinata tucui maijanguna paipaj shutipi crijcunaman; cai tucuri sacrificiopaj munai canmi, ali shunguta pactachingapa, imami alicaita yalin, runacunaman cunbash imashna paicuna chari ushachun feta arrepentimientopa.

16 Shina shungumanda llaquinata pactachi ushan alicai mañajta, paicunata muyuchishca can alipacha cana rigracunapi, maijan na feta arrepentimientopa churajca na ali japinalla can tucui catichunbacha saquishcacuna alicanapaj mañaicunaman; chaimanda maijan feta arrepentimientopa charijmanlla ruraringa jatun, mana tucurina jatun causachinapaj planda.

17 Chaimanda Dios cangunaman saquichun, ñuca huauquicuna, cangunapaj feta arrepentimientopa churai callaringuichi, paipaj achil shutipi mañai callarijpica, pai cangunaman shungumanda llaquinata charipachun;

18 Ari, paita mañaichi shungumanda llaquinata; pai quishpichingapa ushaita charij can.

19 Ari, cangunamandallata humillarichi, paita achil mañashca catichipash.

20 Paita mañaichi cangunapaj tarpuj pambacunapi cashpa, ari, cangunapaj tucui ataju llamacunamanda.

21 Paita mañaichi cangunapaj huasicunapi, ari, tucui cangunapaj huasi ucupuracunamanda, tutamanda, chaupi punlla, tutayajpipash.

22 Ari, paita mañaichi cangunapaj na ricunayachijcunapaj ushaipaj contra.

23 Ari, paita mañaichi ayapaj contra, pimi shuj na ricunayachij can tucui ali ruranacunapa.

24 Paita mañai cangunapaj fucuj pambacunapaj tarpushcacunamanda, caicunapi mirai ushanguichi.

25 Mañai canguna tarpuj pambacunapaj ataju llamacunamanda, paicuna mirarichun.

26 Ashtahuangari cai na tucuilla can; cangunapaj almacuna jichaichi cangunapaj huasi ucupi, cangunapaj pacalla pushtucunapi, cangunapaj jichushca pambacunapipash.

27 Ari, imaura canguna Apunchijta na mañanajushpa, saquichi cangunapaj shungucunata junda cachun, paita achil mañashpa catichi punllan punllan cangunapaj alicanamanda, cangunapaj muyundi cajcunapaj alicanamandapash.

28 Cunan riqui, ñuca juyashca huauquicuna, cangunaman nini, na yanachu canguichi cai tucui can; tucui cai cuzascunata rurashca jipa, minishtishcacunata, churajuna illacunata na ayudashpaca, ungushcacunata, llaquicunahuanda na ricungapa rishpaca, cangunapaj minishtirishcapachacunata na carashpa, charishpa, minishtinajujcunata—cangunata nini, nima cai cuzascunata na rurashpaca, riqui, cangunapaj achil mañaicuna yanga can, nimapash na valin, canguna hipócritacuna laya canguichi picuna feta negan.

29 Chaimanda, caridad charinata na yarishpaca, ari, mapacuna laya canguichi, imata refinajcuna shitan, (na valorta charijmanda) runacunapaj chaquicunahuan sarushcapash can.

30 Cunan, ñuca huauquicuna, ñuca munani, shina tauca testimoniocunata chasquishca jipa, ricuimanda achil quilcashcacuna testifican cai cuzascunamanda, shamuichi, cuichipash fucushcacunata arrepentimientopa.

31 Ari, ñuca munani shamuichi cangunapaj shungucunata ashtahuan ama shinlliyachichichu; riqui, cunan punlla can tiempo cangunapaj quishpirina; chaimanda, canguna arrepentirishpaca shungucunata na shinlliyachishpaca, cangunapi ñapash ruraringa cai jatun causachinapaj plan.

32 Riqui, cai causai can runacunapaj punlla Diospaman yaicungapa prepararina; ari, riqui cai causai punllami runacunapaj punlla can paicunapaj trabajocunata rurana.

33 Cunan, imashna punda nircani, shina tauca testimoniocunata charishpa, chaimanda, cangunata mañani, ama huashaman saquichi cangunapaj arrepentirina punllata tucuringacaman; imashpa cai causai punlla jipa, imata ñucanchiman cushca can prepararichun mana tucurinapa, riqui, cai punllacunata na ashtahuan ali cachun ruranchi cai causaipi cashpa, shina shamun yanalla tuta maipi nima trabajota na rurai ushana.

34 Na ni ushanguichichu, imaura apai tucushca cashpa chai manllanayai canaman, arrepentirisha, ñuca Diospaman tigrasha. Na, caita na ni ushanguichichu; chai espíritullata ima cai cuerpocunapi charinguichi chai punlla cai causaimanda ringuichi, chai espíritullata charinga ushaita cangunapaj cuerpocunata charingapa mana tucurina pachapi.

35 Riqui, canguna huashaman saquijpica cangunapaj arrepentirina punllata huañungacaman, riqui, ayapaj espírituhuan tangai tucushcashna tigranguichi, paiman cangunata sellanga; chaimanda, Apunchijpaj Espíritu cangunamanda anchurin, cangunapi na pushtuta charin, cangunapi aya tucui ushaita charin; cai can tucuri cana na alita rurajcunapa.

36 Caita yachani, Apunchij nishcamanda pai na causanllu na achil huasicunapi, ashtahuangari alita rurajcunapaj shungucunapi pai causan; ari, pai nishcapash alita rurajcunaca paipaj reinopi tiaringa, ashtahuan ñana ringa; ashtahuangari paicunapaj churajunacuna yurajyachishca canga Llamagupaj yahuarmanda.

37 Cunan, ñuca juyashca huauquicuna, ñuca munani canguna yarichun cai cuzascunata, cangunapaj quishpirinapa trabajaichi manllaihuan Diospaj ñaupapi, canguna ashtahuan ama negaichi Cristopaj shamunata;

38 Ashtahuan ama fiñaichichu Espíritu Santopaj contra, ashtahuangari chasquichi, cangunapaj jahuapi Cristopaj shutita; cangunamandallata humillarichi alpacaman, Diosta adoraichi, maijan pushtupi cashpapash espíritupi, ciertopachapipash; punllan punllan pagui nishpa causaichi, tauca shungumanda llaquishcacunamanda, achil yachishcacunamanda imacuna pai cangunaman carashca.

39 Ari, cangunaman cutinbash yarichini, ñuca huauquicuna, utsialla caichi achil mañaipi catingapa, canguna ama pushai tucunguichi ayapaj tentacióncunahuan, cangunata pai ama mishachun, paipaj munaiman ama tigranguichi chai tucuri punllapi; riqui, pai na randi caranllu ali cuzasta.

40 Cunan ñuca juyashca huauquicuna, cangunata cutinbash yarichini charichun pacienciata, tucui laya llaquicunata apanguichi; canguna ama plitunguichi maijanguna cangunata calpachirca cangunapaj ninan huajchacuna caimanda, paicunashna juchayucunaman tigranguichiman.

41 Ashtahuangari charichi pacienciata, llaquicunata apai ushanguichi, shuj shinlli shuyaihuan shuj punlla samanguichi tucui cangunapaj llaquicunamanda.