1 Cunan ñuca churi, caipi can ashtahuan imatachari ñuca canman ningapa munani; ñuca yashpa ricuipica canba yuyaipi preocuparishca cangui huañuipaj cutin causarinamanda.

2 Riqui, ñuca nini, cutin causarina na tianllu—nacashpa ñuca munani ningapa, shuj laya shimicunapi, cai huañuna na churashca canllu na huañunapi, cai ismuna na churashca canllu na ismunapi—imaura Cristopaj shamushca jipacaman.

3 Riqui, pai apamunga yalichun huañushcapaj cutin causarinata. Ashtahuangari riqui, ñuca churi, cutin causarinaca narami. Cunan, canman na villashcata yachaj chayachini; shina cashpapash, tian tauca na villashcacunata imacuna pacashcacuna can, pipash na yachan shinapash Dioslla. Ashtahuangari canman ricuchini shuj cuzasta imata ñuca tapushcani Diosta ñuca yachangapa—cai can cutin causarinamanda.

4 Riqui, tian shuj punlla ricuchishca, tucui huañuimanda shamunga. Cunan imaura cai punlla shamunata pipash na yachanllu; ashtahuangari Dios yachan punllata imami ricuchishca can.

5 Cunan, shuj viaje tiana, nacashpa cati viaje, cati cati viajepash, tucui runacuna huañuimanda jataringa, na importanllu; Diosca yachan tucui cai cuzascunata; caita yachaillata alimi ñucapa cai shina can—shuj ricuchishca punlla tian tucuicuna huañuimanda cutin causaringa.

6 Cunan tianapacha can shuj chusha tiempo huañui punllamanda cutin causarina punllacaman.

7 Cunan ñuca tapuni ima tucunda runacunapaj almacuna cunan huañui punllamanda cutin causarina ricuchishca punllacaman?

8 Cunan ashtahuan tiajpi na tiajpi ricuchishca punlla runacunaman cutin jatarichun cai na importanllu; tucuilla na huañunllu shujlla punllapi, cai na importanllu; tucui can shuj punllashna Diospaca, punllaca runapallami tupushca can.

9 Chaimanda, shuj punlla tian ricuchishca runacunapaj paicuna huañuimanda cutin causarichun; shuj chusha tiempo tian huañuipaj punllamanda cutin causarina punllacaman. Cunan, cai chusha tiempomanda, ima tucunda runacunapaj almacuna cai cuzasta ñuca yachangapa Apunchijta utsialla tapushcani; cai cuzas can imamanda ñuca yachani.

10 Imaura punlla shamujpi imaura tucuilla cutin causaringa, shina paicuna yachanga Dios tucui punllacunata yachajta imacuna runacunaman ricuchishca can.

11 Cunan, almapaj imacanamanda huañui, cutin causarina chaupipi—Riqui, caita yachachihuashca shuj ángel, tucui runacunapaj espíritucuna, ñapash imashna paicuna cai mortal cuerpomanda shicanyarin, ari, tucui runacunapaj espíritucuna, ali cashpapash, na ali cashpapash, tigrai apai tucushca can Diospaman pimi paicunaman causaita curca.

12 Yalishca jipa yalingami, maijan alita rurashcacunapaj espíritucuna chasqui tucushca canga cushijui canapi, imami shutichishca can paraíso, shuj samana cai, shuj sumaj causana cai, maipi paicuna samanga tucui paicunapaj llaquicunamanda, tucui yuyaipi llaquicunamanda, llaquiricunamandapash.

13 Yalishca jipa yalingami, na alita rurajcunapaj espíritucunaca, ari, picuna na alicuna carca—riqui, paicuna ashatallapash na charingachu Apunchijpaj Espírituta; riqui, paicuna na ali ruraicunata ajllarca alita randi; chaimanda ayapaj espírituca paicunapaman yaicurca, paicunapaj huasita misharca—caicuna canlla yana yana pushtuman shitashca canga; tianga huacaicuna, quijaricunapash, quiru caniricunapash, paicunapaj propio na ali ruraicunamanda, ayapaj munaihuan huatashcashna apai tucushpa.

14 Cunan cai can na alita rurajcunapaj almacunapaj cana, ari, yanallapi, manllanayai canapash, manllanayai shuyai ninan na alicachishca Diospaj fiñaita paicunapaj jahuapi; shina cai canapi canga, imashna alita rurajcuna paraísopi, imaura paicunapaj cutin causarina punllacaman.

15 Cunan, huaquinguna tian yuyaipi chasquishcacuna cai cushijunapaj canata, llaquinayai almapaj canatapash, cutin causarinapa ñaupaj, callari cutin causarij cajta. Ari, ari nini cutin causarina shutichishca ushan, jatarina espíritupaj nacashpa almapaj paicuna cachashca cushijuiman nacashpa llaquinayaiman, shimicunamanda imata parlashcani.

16 Riqui, cutin caita parlashcani, tian shuj callari cutin causarina, shuj cutin causarina tucui tiashcacunapa, nacashpa tiajcunapa, nacashpa tianacunapapash, huañuimanda Cristopaj cutin causarinacaman.

17 Cunan, ñucanchi na yanchichu cai callari cutin causarina, imata cai layapi parlashcani, almacunapaj cutin causarina can paicunapaj cachashca cushijuiman nacashpa llaquinayaiman. Na yai ushanguichu caimi imata ningapa munan.

18 Riqui, ñuca nini, Na; ashtahuangari cai ningapa munan almapaj cuerpohuan cutin tandanajui, picunapaj causarca Adánpaj punllacunamanda Cristopaj cutin causarinacaman.

19 Cunan, almacuna, cuerpocunapash maijangunamanda parlashcani tucui cutin tandanajushca cajpica shuj viajella, na alita rurajcuna alita rurajcunapash, ñuca na ninichu; chaillami, ñuca nini paicuna tucui jatarin; nacashpa shuj layapi nishpa, paicunapaj cutin causarina yalij shamun cutin causarinata ñaupa picunapaj huañun Cristopaj cutin causarinapa jipa.

20 Cunan, ñuca churi, ñuca na ninichu paicunapaj cutin causarina shamun Cristopaj cutin causarinahuan; ashtahuangari riqui, ñuca cuni ñuca yuyaitashna, almacuna, cuerpocunapash cutin tandanajushca can, alita rurajcunapaj, Cristopaj cutin causarinahuan, jahua pachaman paipaj vitsiaihuanbash.

21 Ashtahuangari paipaj cutin causarinapaj punllapi canga nacashpa jipaman, ñuca na nini; ashtahuangari ashtahuan caita nini, shuj chusha tiempo tian huañuimanda, cuerpopaj cutin causarinacaman, almapaj cushijunapi cana nacashpa llaquinayaipi imaura Diospaj ricuchishca punlla huañushcacuna jataringacaman, cutin tandanajushca canga, ishcandi almapash cuerpopash, Diospaj ñaupapi shayarichun apashca canga, paicunapaj rurashcacunamanda ricushpa chasquichishca cangapa.

22 Ari, cai pactachin cutinlla apamunata cuzascunamanda imamanda parlashca can achil villachijcunapaj shimicunahuan.

23 Almami cutin tandanajushca canga cuerpoman, cuerpopash almaman; ari, tucui miembrocuna, coyunturacunapash cutin tandanajushca canga paipaj cuerpoman; ari, nima shuj umamanda ajchapash na chingashca cangachu; ashtahuangari tucui cuzascuna cutin tandanajushca canga paicunapaj propio alipacha formaman.

24 Cunan, ñuca churi, cai can cutinlla apamuna imamanda parlashca can achil villachijcunapaj shimicunahuan—

25 Shina alita rurajcuna punchapamba canga Diospaj reinopi.

26 Ashtahuangari riqui, shuj manllanayai huañui shamun na alita rurajcunapaman; imashpa paicuna huañun imashna alita rurana cuzascunamanda; paicuna mapallacuna can, mapalla cuzas Diospaj reinota na chasqui ushanllu; ashtahuangari paicuna shitashca canga, cachashcapash paicuna rurashcacunapaj fucushcacunata japichun, imacunami na ali carca; paicuna ufiangapash mapacunata jaya copamanda.