1 Cunan, yalishca jipa ricushpa chasquichijcunapaj reinado ishcai chunga sujta huatapi Nefipaj llactapuracunapaj jahuapi, riqui, imaura Lamanitacuna rijcharirca ninan tutamanda callari quilla, riqui, paicuna tuparca Amalickíah paipaj propio facha huasipi huañushca cajta; ricurcapash Teáncum ña listo cajta paicunahuan macanajungapa chai punlla.

2 Cunan, imaura Lamanitacuna caita ricushpa manllarca; paicunapaj munaita saquirca vichai alpaman rinata; huashaman tigrarca tucui paicunapaj macanajuj runacunahuan Mulekpaj llactaman, paicunapaj shinlliyachishcacunapi huacaichirinata mascarca.

3 Yalishca jipa Amalickíahpaj huauqui cai llactapuracunapaj jatun mandaj cachun ajllai tucurca; paipaj shuti carca Ammorón; shina Ammorón jatun mandaj, Amalickíah jatun mandajpaj huauqui, paipaj pushtupi mandachun ajllashca carca.

4 Yalishca jipa pai mandarca paipaj llactapuracunata chai llactacunata charishpa catichun, maijangunata japirca yahuarta jichashpa; paicuna maijan llactatapash na japishca carca ashtahuangari ashtaca yahuarta jichashpalla.

5 Cunan, Teáncum ricurca Lamanitacuna llactacunata charishpa catingapapacha cajta imata paicuna japishca carca, chai alpa pushtucunatapash imata quichushpa charinajurca; paicunapaj yupangapa jatunbachata ricuimandapash, Teáncum yuyarca cai na minishtirishca cajta paicunapaj shinlliyachishcacunapi macanajungapa mascangapa.

6 Ashtahuangari paipaj runacunata muyundi shuyachirca, imashna macanajungapa prepararinajun laya; ari, ciertopacha prepararinajurca paicunallata huacaichiringapa paicunapamanda, muyundi pircacunata shayachishpa jarcana pushtucunatapash.

7 Yalishca jipa shina pai prepararishpa catirca imaura Moroni cachamushca carca taucapacha runacunata paipaj macanajuj runacunata shinllichingapa.

8 Moroni cacharcapash mandashcacunata japishpa charichun prezucunata paipaj maquicunapi urmajcunata; imashna Lamanitacuna tauca prezucunata japishca carca, pai japishpa charichun Lamanitacunapaj tucui prezucunata tigrai apamui layapi Lamanitacuna japishcacunamanda.

9 Cacharcapash mandashcacunata Ashtacapacha Tiaj alpata shinlliyachichun, quichiji ñan yalinata alichichun imami vichai alpaman apan, na cashpa Lamanitacuna cai pushtuta japishpaca ushaita charinga tucui ladocunamanda paicunata llaquichinmungapa.

10 Moroni cacharcapash, paipaj munaita yachaj chayachirca pai fiel cachun chai alpa pushtuta charishpa catichun, tucui oportunidadta mascachun llaquichingapa Lamanitacunata chai pushtupi, pai usharishcacaman, imashpapash cutin japinman umachishpa nacashpa shuj laya huaquin cai llactacuna paicunapaj maquicunamanda quichushcacuna carca; paipash jarcarca shinlliyachircapash muyundi llactacunata, imacuna Lamanitacunapaj maquicunapi na urmashca carca.

11 Pai nircapash, ñuca cangunahuan tandanajuiman, ashtahuangari riqui, Lamanitacuna ñucanchi jahuapi alpapaj manñacunapi jatun mama cocha indi huashajuj ladoman; riqui, paicunapaj contra rini, chaimanda na shamui ushani.

12 Cunan, jatun mandaj (Ammorón) Zarahemla alpamanda llujshishca carca, jatun mandaj huarmiman yachaj chayachishca carca paipaj huauqui huañushcamanda, taucapacha runacuna tandanajushca carca, rishca carca Nefitacunapaj contra jatun mama cocha indi huashajuj lado manñacunata.

13 Shina pai munashca carca Nefitacunata llaquichingapa, huaquin Nefitacunapaj macanajujcunata catichishpa apangapa chai alpacunaman, mandashca carca chai llactacunata ñana charishcacunata, Nefitacunata paicunapash llaquichichun jatun mama cocha indi llujshij lado manñacunapi, paicunapaj alpacunata japishpa cachun maicaman usharishcaman, paicunapaj macanajuj runacunapaj ushaihuan.

14 Shina Nefitacuna llaquipi carca ricushpa chasquichijcunapaj reinado ishcai chunga sujta huata tucuripi Nefipaj llactapuracunapaj jahuapi.

15 Ashtahuangari riqui, yalishca jipa ricushpa chasquichijcunapaj reinado ishcai chunga canchis huatapi. Teáncum, Moroni mandajpi—pimi shayachishca carca macanajuj runacunata urai, indi huashajuj lado alpa manñacunata huacaichichun, Ashtacapacha Tiaj alpaman ri callarirca, Teáncum ayudachun paipaj runacunahuan cutin llactacunata japichun imacunata chingachishca carca—

16 Yalishca jipa Teáncum mandashcacunata chasquishca carca Mulekpaj llactata macanajungapa mascachun, ushashpaca cutin japichun.

17 Yalishca jipa Teáncum prepararirca Mulekpaj llactata macanajungapa mascangapa, paipaj macanajuj runacunahuan rirca Lamanitacunapaj contra; ashtahuangari ricurca paicunata na mishai ushana carca paicunapaj shinlliyachinacunapi cajpica; chaimanda pai jichurca pai rurangapa munaicunata cutin tigrarcapash Ashtacapacha Tiaj alpaman, Moronipaj shamunata shuyangapa, paica macanajuj runacunapaj shinllichita chasquingapa.

18 Yalishca jipa Moroni paipaj macanajuj runacunahuan chayamurca Ashtacapacha Tiaj alpaman, ricushpa chasquichijcunapaj reinado ishcai chunga canchis huata tucurinapi Nefipaj llactapuracunapaj jahuapi.

19 Ishcai chunga pusaj huata callaripi, Moroni, Teáncum, tauca capitángunapaj yali mandajcunahuan charirca shuj macanajuna consejota—imata rurajpi Lamanitacuna llujshimunga paicunahuan macanajungapa; nacashpa imashnapash paicunata llujchimungapa paicunapaj shinlli jarcashcacunamanda, paicunapaj jahuapi mishai ushangapa Mulekpaj llactata cutin japingapa.

20 Yalishca jipa paicuna villajcunata Lamanitacunapaj macanajuj runacunapaman cacharca, maijanguna Mulekpaj llactata huacaichirca, paicunapaj pushajpaman, paipaj shuti carca Jacob, paita mañashpa paipaj macanajuj runacunahuan llujshimuchun ishcandi llactacunapaj chaupi pugru pambacunapi tuparingapa. Ashtahuangari, riqui, Jacob, pimi carca shuj Zoramita, paipaj macanajuj runacunahuan paicunahuan pugru pambacunapi tuparingapa na shamurca.

21 Yalishca jipa Moroni, nima shuyaitapash na charimanda paicunahuan chimbapurangapa pacta macanajungapa, chaimanda, shuj planda rurarca Lamanitacunata umachingapa paicunapaj shinlli jarcashcacunamanda llujshimuchun.

22 Chaimanda Teáncumda japichirca huaquin runacunata, jatun mama cocha pata manñacunaman urai richun; Moroni, paipaj macanajuj runacunapash, tuta, jichushca pambaman rirca, Mulek llactapaj indi huashajuj ladoman; shina, caya punlla, imaura Lamanitacunapaj ricuj runacuna Teáncumda tupajpi, paicuna calparca Jacobpaman, paicunapaj pushaj.

23 Yalishca jipa Lamanitacunapaj macanajuj runacuna Teáncumpaj contra rirca, Teáncumda mishachun yashpa huaquinlla caimanda. Shina Teáncum ricushpa Lamanitacunapaj macanajuj runacunata paipaj contra, vichai alpaman tigrai callarirca jatun mama cocha pata manñata.

24 Yalishca jipa imaura Lamanitacuna ricushpa pai calpajta, paicuna na manllarca millaihuan cati callarirca. Imaura Teáncum shina Lamanitacunata caruyachijujpi, yanga catishca cajpi, riqui, Moroni mandarca paipaj asha macanajuj runacunata maijanguna paihuan carca llacta ucuman richun, caita japishpa tiarichun.

25 Paicuna shina rurarca, tucui maijanguna llactata huacaichingapa quidashcacunata huañuchirca, ari, tucui maijanguna macanajunacunata na cungapa munajcunata.

26 Shina Moroni Mulekpaj llactata japishpa tiarishca carca paipaj huaquin macanajuj runacunahuan, imaura pai rirca puchushcacunahuan Lamanitacunahuan tuparingapa imaura paicuna tigramujpi Teáncumda catishpa.

27 Yalishca jipa Lamanitacuna Teáncumda catirca Ashtacapacha Tiaj llacta ladocaman, shina Lehi, huaquin macanajuj runacunahuan tuparirca, maijanguna quidashca carca Ashtacapacha Tiaj llactata huacaichingapa.

28 Cunan riqui, imaura Lamanitacunapaj capitángunapaj yali mandajcuna Lehi paipaj macanajuj runacunahuan paicunapaj contra shamujta ricushpa, maitapash calparca, Mulekpaj llactacaman na chayai ushashun yashpa Lehi nara japimujllapita; shaijushcacuna carca paicunapaj purimanda, Lehipaj runacuna samashcacuna carca.

29 Cunan Lamanitacuna na yacharca Moroni paipaj macanajuj runacunahuan ñaupashca cajta; Lehita, paipaj runacunatalla manllarca.

30 Cunan Lehi na munarca japigringapa imaura Moroni, paipaj macanajuj runacunahuan tuparingacaman.

31 Yalishca jipa nara Lamanitacuna ashtacata huashaman tigrashpa Nefitacunahuan muyushca carca, Moronipaj runacunahuan shuj ladoman, Lehipaj runacuna cutishuj ladoman, tucui paicuna samashcacuna, shinllicuna; ashtahuangari Lamanitacuna shaijushcacuna carca caruta purishca caimanda.

32 Moroni mandarca paipaj runacuna macanajuchun imaura paicuna macanajunacunata cungacaman.

33 Yalishca jipa Jacob, paicunapaj pushaj carca, shuj Zoramita carca, millaipacha espírituta charishpa, pai Lamanitacunata macanajunapi ñauparca Moronipaj contra ninan fiñaihuan.

34 Moroni paicunapaj rina ñanbi carca, chaimanda Jacob paicunata huañuchinapacha carca paipaj ñanda pascangapa Mulek llactacaman. Ashtahuangari riqui, Moroni, paipaj runacunapash ashtahuan ninan ushaihuan carca; chaimanda Lamanitacunaman ñanda na curca.

35 Yalishca jipa ishcandi lado ninan fiñaihuan macanajurca; ishcandi ladopi tauca huañushca carca; ari, Moroni ninan chugrishca carca, Jacob huañurca.

36 Lehi huashamanda macanajurca shina fiñaihuan paipaj shinlli runacunahuan, shinamanda Lamanitacuna paicunapaj macanajunacunata curca; paicunapamanda puchucuna, ashtacata pandarca, na yacharca maiman rinata nacashpa macanajunata.

37 Cunan Moroni ricushpa paicunapaj pandaicunata, nirca: Cangunapaj macanajunacunata apamujpica caicunata cujpica, riqui cangunapaj yahuarta jichaita saquishun.

38 Yalishca jipa imaura Lamanitacuna cai shimicunata uyashpa, paicunapaj capitángunapaj yali mandajcuna, tucui maijanguna na huañushcacuna, shamushpa paicunapaj macanajunacunata Moronipaj chaquicunaman shitarca, mandarcapash paicunapaj runacunata shinallata rurachun.

39 Ashtahuangari riqui, taucacuna tiarca na munajcuna; paicunapaj espadacunata na cungapa munajcuna paicunata japishpa, huatashcapash, paicunapaj macanajunacunata quichurca, munai na munai richunbash paipaj huauquicunahuan Ashtacapacha Tiaj alpaman.

40 Cunan prezucuna huañushcacunata ashtahuan yali carca, ari, ishcandi ladomanda huañushcacunamanda yali.