1 Yalishca jipa Alma llactapuracunaman Diospaj shimita villai callarirca, callari Zarahemla alpapi, chaimanda tucui alpacunaman.

2 Cai shimicunami can imami parlarca iglesia llactapuracunaman maijan Zarahemla llactapi shayachishca carca, imashna paipapacha tandachishca quilcashcapi, nishpa:

3 Ñuca, Alma, achil ajllashca caimanda ñuca taitahuan, sumo sacerdote cangapa Diospaj iglesiapi, paica ushaita, Diospaj autoridadtapash charirca tucui cuzascunata rurangapa, riqui, ñuca cangunaman nini pai callarirca alpapi iglesiata shayachishpa caica Nefipaj manñacunapi carca; ari, alpata maijan Mormónpaj alpa nishpa shutichishca carca; ari, paipaj huauquicunata Mormón yacucunapi bautizarca.

4 Riqui, cangunaman nini, paicuna cacharichishca carca jatun mandaj Noépaj llactapuracunapaj maquicunamanda, Diospaj llaquinahuan, ushaihuanbash.

5 Riqui, cai jipa, paicuna apamui tucurca huatai tucushcashnaman Lamanitacunapaj maquicunahuan jichushca pambapi; ari, cangunaman nini, paicuna huatai tucushcashnapi carca, Apunchij cutin huatai tucushcashnamanda cacharichirca shimi nishca ushaihuan; cai alpaman apamui tucurcanchipash, caipi callarircanchi Diospaj iglesiata shayachishpa tucui alpacunapipash.

6 Cunan riqui, cangunaman nini, ñuca huauquicuna, canguna cai iglesiata catijcuna, ali charishcanguichichu yuyaicunapi cangunapaj taitacunapaj huatai tucushcashnata? Ari, ali charishcanguichichu yuyaicunapi Diospaj llaquinata, longanimidadtapash paicunamanda? Ashtahuanbash, ali charishcanguichichu yuyaicunapi pai cacharichishca cashcata paicunapaj almacunata ucu pachamanda?

7 Riqui, paicunapaj shungucunata shujman tigrachirca; ari, rijchachirca ninan puñuimanda, Diosman rijcharirca. Riqui, yana ucu chaupipi carca; shina cashpapash, mana tucurina shimi micha paicunapaj almacunata punchayachirca; ari, huañui huatanacunahuan pillushpa charinajurca, ucu pachapaj huatashcacunapash, mana tucurina llaqui paicunata shuyajurca.

8 Cunan, cangunata tapuni, ñuca huauquicuna, paicuna tucuchi tucurcachu? Riqui, cangunaman nini, Na, na carcachu.

9 Cutin tapuni, huañuipaj huatana fitishcachu carca, ucu pachapaj huatashcacunapash paicunata pillurcachu, safarishcachu carca? Cangunaman nini, Ari, safarishca carca, paicunapaj almacuna punguirca, quishpichina juyaimanda cantarca. Cangunaman nini paicuna quishpirirca.

10 Cunan cangunata tapuni ima caicunapita quishpirin? Ari, imapita shinlliyan quishpirinata shuyangapa? Imamandata huañuipaj huatashcacuna safarirca, ari, ucu pachapaj huatashcacunapash?

11 Riqui, cangunata nini—Nachu ñuca taita Alma shimicunapi crirca imata Abinadípaj shimihuan cushca carca? Nachu shuj ali achil villachij carca? Nachu Diospaj shimicunata parlarca, nachu ñuca taita Alma chaicunata crirca?

12 Paipaj femanda ninanda shujman tigrachirca paipaj shunguta. Riqui cangunaman nini tucui caicuna ciertopacha can.

13 Riqui, cangunapaj taitacunaman Diospaj achil shimita yachachirca, ninanda shujman tigrachirca paicunapaj shungucunatapash, humillarirca, ciertopacha causajuj Diospi confianzata churarca. Riqui, tucurinacaman fielcuna carca; chaimanda paicuna quishpirirca.

14 Cunan riqui, cangunata tapuni, iglesiamanda ñuca huauquicuna, nacirishcanguichichu espiritualmente Diosmanda? chasquishcanguichichu cangunapaj ñavi ricuipi paipaj rijchacaita? Charishcanguichichu cangunapaj shungucunapi cai ninan shujman tigranata?

15 Charinguichichu feta paipaj jatun causachinapi pimi cangunata viñachishcapi? Ricushcanguichichu feta charij ñavihuan, ricunguichichu cai huañuna cuerpo jatarijta na huañunapi, cai ismuna jatarijta na ismunapi, Diospaj ñaupapi shayarijta ricushpa chasquichi tucungapa ruraicunamanda cai huañuna cuerpopi imata rurashca caimanda?

16 Cangunaman nini, yuyashcanguichichu Apunchijpaj shimita uyai ushashpa, nijujta, chai punlla: Ñucapaman shamuichi achilyachishcacuna, riqui, cangunapaj alpa jahuapi ruraicuna ali ruraicunami cashca?

17 Nacashpaca yuyashcanguichichu chai punlla Apunchijta llullai ushanata, nishpa—Apunchij, ñucanchi alpa jahuapi ruraicuna ali ruraicunami carca—shina pai cangunata quishpichinga?

18 Nacashpa shuj layapi nishpa, yuyashcanguichichu apashca Diospaj jatun shayarina ñaupaman cangunapaj almacunata juchachihuan, llaquiyaicunahuanbash junda, tucui cangunapaj juchachita yarishpa, ari, alipacha yarishpa tucui na ali ruraicunata, ari, yarishpa Diospaj rurachunbacha saquishcacunata na cazushcata?

19 Cangunaman nini, Ricui ushanguichichu Diosta chai punlla mapa illa shunguhuan, maillashca maquicunahuan? Cangunaman nini, ricui ushanguichicha, cangunapaj ñavi ricuipi Diospaj rijchacaita gravashca charishpa?

20 Cangunaman nini, Quishpirishca casha yuyanguichichu ayapaj munaiman curishpa?

21 Cangunaman nini, chai punlla yachanguichi na quishpiri ushaita; pipash na quishpirishca cangachu, paipaj churajunacuna yura yura tajshashca cashpalla; ari, paipaj churajunacuna mapa illa cana maillashca imaura tucui mapa illa cangacaman, paipaj yahuarhuan pimanda cangunapaj taitacuna parlashca carca, pimi shamunga jatun causachingapa paipaj llactapuracunapaj juchacunamanda.

22 Cunan tapuni, ñuca huauquicuna, imashnashi sentiringa maijanbash cangunamanda, Diospaj jatun shayarina ñaupapi cashpa, churajunacunata yahuarlla cashpa, tucui laya mapacunahuan? Riqui, imatashi testificanga cai cuzascuna cangunapaj contra?

23 Riqui nachu testificanga canguna huañuchijcuna cajta, ari, canguna tucui laya na ali ruraicunapaj culpahuan cajta?

24 Riqui, ñuca huauquicuna, yanguichichu shinapacha caj shuj pushtuta charinga Diospaj reinopi tiaringapa, Abrahamhuan, Isaac-huan, Jacobhuan, tucui ali achil villachijcunahuan, chai churajunacuna mapa illacuna can, na mapayachishca illa, maillashca, yurapash?

25 Cangunaman nini, Na; cangunapaj Rurajta callarimanda llullapi churashpalla, nacashpa yanguichichu callarimanda pai shuj llulla cashca, na yaita ushanguichichu shina cajcuna jahua pacha reinopi shuj pushtuta chari ushan yaita; ashtahuangari shitashca canga ayapaj reinopaj huahuacuna caimanda.

26 Cunan riqui, cangunaman nini, ñuca huauquicuna, shujman tigrarina shunguta charishca cashpaca, cantanata sentishca cashpa juyana cantai imami quishpichin, tapungapa munani, caita cunan sentinguichichu?

27 Purishcanguichichu, cangunapaj culpa illa caita alichishpa Diospaj ñaupapi? Ni ushanguichicha, cai punlla huañuna cashpa, cangunapaj ucupilla, ali humildepacha cashcanchi? Cangunapaj churajunacuna mapa illacuna can, yurayachishca can Cristopaj yahuarhuan, pimi shamunga paipaj llactapuracunata paicunapaj juchacunamanda jatun causachingapa?

28 Riqui, anchuchishcanguichichu jariyaita? Cangunaman nini, na shina cashpaca Diosta tuparingapa nara yachajushpa shuyanajunguichichu. Riqui ñapash yachajushpa shuyaj canguichi; ñalla chayamunga jahua pacha reino, na yachajushpa shuyajujca mana tucurina causaita na charingachu.

29 Riqui, ñuca nini, maijanbash cangunamanda tianllu pipash shujpa charishcata munaita nara anchuchishca? Cangunaman nini shina cajta nara yachajushpa shuyajunllu; munanimi ñapash yachajushpa shuyachun, horasca ñami caipi, na yachanllu punlla imaura shamunata; shina caj culpa illa na ricuringachu.

30 Cutin cangunaman nini, maijanbash tianllu cangunamanda paipaj huauquita asij, nacashpa paipaj jahuapi tandachij na ricunayachicunata?

31 Ay shina caj, pai na yachajushpa shuyajunllu, chai punlla ñalla shamunga pai arrepentirinapacha can nacashpaca na quishpiringachu!

32 Ari, ay tucui na ali ruraicunapi trabajajcuna; arrepentirichi, arrepentirichi, caita Apunchij Dios parlashca can!

33 Riqui, tucui runacunaman shuj cumbidaita cachashca, paicunaman alicai rigra chutashca can, pai nin: Arrepentirichi, cangunata chasquisha.

34 Ari, pai nin: Ñucapaman shamui micunguichi causai yuramanda fucushcata; ari, micuichi, ufiachipash tandamanda causana yacumandapash librepacha;

35 Ari, ñucapaman shamui ali ruraicunapaj ruraicunata mirachi, na cuchushpa ninaman na shitai tucungui—

36 Riqui, punlla ñalla caipi imaura pipash na ali fucushcata cujpi, nacashpa pipash na ali ruraicunata rurajpi, charinga imamanda caparingapa, llaquiyangapapash.

37 Oh na ali rurajcuna; canguna cai pachapaj yanga cuzascunapi yapa jariyashcacuna, canguna villashcacuna ali rurai ñangunata yachanchimi nishpa shina cashpapash chingarishpa rishcanguichi, michijta na charij llamagushna, masqui shuj michij cayashca cajpipash, cayajunra, ashtahuangari paipaj shimita na uyangapa munanguichi!

38 Riqui, cangunaman nini, ali michijca cayanmi; ari, paipaj shutipipacha cayan, caica Cristopaj shuti can; ali michijpaj shimita na uyangapa munashpaca, shutita imapi cayashca canguichi, riqui, ali michijpaj llamacuna na canguichichu.

39 Cunan ali michijpaj llamacuna na cashpaca; maijan ataju llamamandata canguichi? Riqui, cangunaman nini, cangunapaj michijca aya can, paipaj ataju llamacuna canguichi; cunan, pita caita neganguichi? Riqui, cangunaman nini, pipash negashpaca caica shuj llulla can, ayapaj huahuapash.

40 Cangunaman nini imapash alica Diospamanda shamun, imapash na alica ayamanda shamun.

41 Chaimanda, shuj runa ali ruraicunata rurashpa, ali michijpaj shimita uyashpa, paita catin; ashtahuangari pipash na ali ruraicunata rurashpa, ayapaj huahuaman tigran, paipaj shimita uyan, paita catin.

42 Pipash caita rurashpa paipaj pagota chasquinga; chaimanda, paipaj pago huañuita chasquinga, cuzascuna ali ruraicunapaj cajcuna, tucui ali ruraicunaman huañushca cashpa.

43 Cunan, ñuca huauquicuna, ñucata uyachun munani, ñuca almapaj shinllicaihuan parlashcani; riqui, ñuca cangunaman punchalla na pandanata parlashcani chaimanda na pandai ushanguichichu, nacashpa Diospaj rurachunbacha saquishcacunamanda.

44 Cayacachashca cani cashna laya parlangapa, Diospaj achil ordenmanda, imami Cristo Jesúspi can; ari, ñuca cani mandashca cai llactapuracunaman shayarishpa testificachun cuzascunata imata ñucanchi taitacuna parlashca can shamuna cuzascunamanda.

45 Cai na tucuilla canllu. Yanguichichu cai cuzascunata ñucallata yachajta? Riqui, ñuca testificani cangunaman ñuca yachanita cai cuzascuna imamanda ñuca parlashcani ciertopachacunami. Imashnata ñuca ciertopacha cajta yachajta yanguichi?

46 Riqui, cangunaman nini Diospaj Espíritu Santomi yachachihuashca. Riqui, ayunashcani tauca punllacuna achil mañashcanipash ñucamandallata cai cuzascunata yachangapa. Cunan ñucallata yachanipacha caicuna ciertopacha can; Apunchij Dios caicunata ricuchihuashca paipaj Espíritu Santohuan; caimi can achil ricuicunapaj espíritu maijan ñucapi can.

47 Ashtahuanbash, cangunaman nini shina ñucaman achil ricuchishca, ñucanchi taitacuna parlashca shimicuna ciertopacha can, achil villachinapaj espíritumanda laya imami ñucapi can, maijan can Diospaj Espíritu ricuchinamandapash.

48 Cangunaman nini, ñucallata yachani ashtahuanbash cangunaman nisha, ima shamunamanda, ciertopacha can; cangunaman nini, ñuca yachani Jesucristo shamunga, ari, Churi, Taitapaj Shujlla Churi, ninan juyaihuan junda, llaquihuanbash, ciertohuanbash. Riqui, paimi shamunga cai pachapaj juchacunata quichungapa, ari, shujllangaman runacunapaj juchacunata paipaj shutipi shinllipacha crijcunapata.

49 Cunan cangunaman nini cai ordenpi cayacachashca cani, ari, ñuca juyashca huauquicunaman yachachingapa, ari, shujllangaman pi cai alpapi causajcunaman; ari, tucuicunaman yachachingapa, rucucunaman viñaj huambracunamanbash, esclavocunaman librecunamanbash; ari, cangunaman nini rucucunaman, huaquin huatacunata ña causashcacunaman, viñaj miraicunamanbash; ari, paicunata yachachingapa arrepentirinapacha cajta, cutin nacirinapash.

50 Ari, shina Espíritu nin: Arrepentirichi, tucui alpa tucurinacunapi cajcuna, jahua pachapaj reino ñami caipi, ari, Diospaj Churi paipaj punchapambapi shamunga, paipaj jatun ushaipi, mandana ushaipi, ushaipi, dominiopipash. Ari, ñuca juyashca huauquicuna, cangunaman nini, Espíritu nin: Riqui, tucui cai pachapaj Jatun mandajpaj punchapamba caita; jahua pachapaj Jatun Mandajpatapash ñapacha punchayachinga tucui runacunapaj huahuacunaman.

51 Espíritu nihuanbashmi, ari, ninan shimi caparihuanbashmi, nishpa: Ri cai llactapuracunaman ni—Arrepentirichi, na arrepentirishpaca nimamanda jahua pachapaj reinota chasquinguichi.

52 Cutin cangunaman nini, Espíritu nin: Riqui, jachaca quiru sapipi churashca can; chaimanda shujllangaman quirucuna na ali fucushcata cujcuna cuchushpa ninaman shitashca canga, ari, shuj ninaman imami na tucurij, shuj huañushpa rupajuj ninashna laya. Riqui, yarichi, Achilmi parlashca can.

53 Cunan ñuca juyashca huauquicuna, cangunaman nini, cai nishcacunata shinlliyai ushanguichicha; ari, cai cuzascunata shitanguichicha, cangunapaj chaquicunahuan sarushpa yalinguichicha Israelpaj Achilta; ari, jariyaihuan cangunapaj shungucunata punguichi ushanguichichu; ari, catinguichiracha valishca churajunata churajushpa cangunapaj shungucunapi cai pachapaj yanga cuzascunata churashpa, cangunapaj charijyaicunapi?

54 Ari, catinguichiracha shujcunata yali ashtahuan alicunami canchi yashpa; ari, catinguichiracha cangunapaj huauquicunata na ricunayachishpa catishpa, picunami humillarin, purin Diospaj achil ordenda catishpa, maipicashpapash cai iglesiaman apamushca cashcamanda, achilyachishca cashpa Achil Espírituhuan, arrepentiringapa munai ruranacunata ruran—

55 Ari, catinguichiracha huajchacunaman huashacunata tigrachishpa, minishtijcunata, cangunapaj minishtirishcapachacunata na nishpa?

56 Tucuchingapa, tucuicuna na ali ruraicunapi catingapa munajcuna, ninimi caicunami cuchushpa ninaman shitai tucushca canga, paicuna arrepentirishpalla na.

57 Cunan cangunaman nini, tucuicuna ali michijta catingapa munashcacuna, na ali rurajcunapamanda llujshimuichi, shicanyarichi, paicunapaj mapa cuzascunata ama tacarichichu; riqui, paicunapaj shuticuna fichashca canga, na ali rurajcunapaj shuticuna na yupashca cangachu alita rurajcunapaj shuticunahuan, Diospaj shimi pactachishca canga, shina nin: Na alita rurajcunapaj shuticuna na chapuringachu ñuca llactapuracunapaj shuticunahuan;

58 Alita rurajcunapaj shuticuna causai quilcashca fangapi quilcashca canga, paicunaman ñuca carasha chasquinata ñuca ali lado maquiman. Cunan, ñuca huauquicuna, ima ningapa charinguichi caipaj contra? Ñuca nini cangunata imashpapash canguna caipaj contra parlashpaca, na imapash cangachu, Diospaj shimica pactashcapacha canga.

59 Ima michijta tian cangunapi tauca llamacunata charishpa na ali ricun, lobocuna yaicushpa paipaj ataju llamacunata micuchun? Riqui, shuj lobo paipaj ataju llamacunaman yaicujpi nacha llujchin? Ari, tucurinapi, tucuchita ushashpaca, rurangami.

60 Cunan cangunaman nini ali michijca cayajun; canguna paipaj shimita uyajpica paipaj ataju llamacunaman pushanga, canguna paipaj llamacuna canguichi; pai cangunaman mandan millai lobo ama cangunapi yaicuchun saquichun, ama tucuchi tucunguichi.

61 Cunan ñuca, Alma, mandani paipaj shimi rimaipi pimi ñucata mandashca, cai shimicunata ruraichipacha imata cangunaman parlashcani.

62 Ñuca parlani rurachunbacha saquishcacuna mandashca layapi canguna iglesiata catijcunata; maijan iglesiata na catijcunaman ñuca parlani cumbidai layapi, nishpa: Shamuichi arrepentimientopaj bautizarichi, cangunapash micunguichi causana quirumanda fucushcata.