1 Cunan yalishca jipa ricushpa chasquichijcunapaj reinado ishcai chunga iscun huata callaripi, Ammorón Moroniman cacharca mañaita prezucunata randipash cungapa.

2 Yalishca jipa Moronipaj cai mañai ninan cushijui carca, pai munarca alichishca micunacunata carashca cachun shinllichingapa Lamanita prezucunaman micuchingapa paipaj propio llactapuracunaman; pai munarcapash paipaj propio llactapuracuna paipaj macanajuj runacunata shinlliyachichun.

3 Cunan Lamanitacuna japishca carca tauca huarmicuna, huahuacunapash, na tiarca ni shuj huarmi, ni shuj huahua tucui Moronipaj tucui prezucunapi, nacashpa prezucuna picunata Moroni japishca carca; chaimanda Moroni umachinaman rirca mashna tauca Nefitacunapaj prezucunata Lamanitacunapamanda imashna usharishcata chasquingapa.

4 Chaimanda pai quilcarca shuj cartata, caita cacharca Ammorónpaj sirvij runahuan, paillata pimi Moroniman cartata apamushca carca. Cunan caicuna carca shimicuna imata Ammorónman quilcarca, nishpa:

5 Riqui, Ammorón, ñuca canman quilcashcani imatachari cai macanajuimanda imata callarichishcangui ñuca llactapuracunapaj contra, nacashpa imata quiquinba huauqui paicunapaj contra callarishca carca, caita munanguira catingapa paipaj huañui jipacaman.

6 Riqui, ñuca ningapa munani imatachari Diospaj alicaimanda, espadata paipaj tucui ushaita charij fiñai, imata canguna jahuapi huarcuchiriajun imashpapash arrepentirijpilla, macanajuj runacunata anchuchijpilla cangunapaj propio alpacunacaman, nacashpa cangunapaj chasquishca alpacunaman, imami can Nefipaj alpa.

7 Ari, cai cuzascunata ningapa munani caicuna uyai ushana cajpica; ari, canman ninimi manllanayai ucu pachamanda cai shuyajun chasquingapa shina huañuchijcunata can quiquinba huauqui laya cashcacunata, imashpapash can arrepentirijpilla saquinguichipash cangunapaj huañuchina munaicunata, tigrangichipash cangunapaj macanajuj runacunahuan, cangunapaj propio alpacunaman.

8 Ashtahuangari imashna punda cai cuzascunata na nishcanguichi, Apunchijpaj llactapuracunahuan macanajushcanguichi, shinallata shuyai ushani cutin caita rurachun.

9 Cunan riqui, ñucanchi prepararishca canchi cangunata chasquingapa; ari, shuyanchi cangunapaj munaicunata saquichun cangunapaj rurangapa munashcacunata, riqui, urai apamunguichi Diospaj fiñaita pita canguna na nishcanguichi, cangunapaj tucuilla tucuchinapa.

10 Ashtahuangari, imashna Apunchij causan, ñucanchi macanajuj runacuna shamunga cangunapa jahuaman imashpapash rijllapi na, canguna ña ricuj shamushca canguichi huañuihuan, ñucanchi llactacunata charishunchi, ñucanchi alpacunata; ari, ñucanchi charishpa catishunchipash ñucanchi religiónda ñucanchi Diosmanda.

11 Ashtahuangari riqui, cai yachihuan ñuca cai cuzascunata yanga parlani; nacashpa cai yachihuan quiquin cangui ucu pachapaj huahua; chaimanda ñuca cartata tucuchigrini canman nishpa ñuca na randipash cushachu prezucunata, ashtahuangari cai canacunapi cuhuangui shuj runata paipaj huarmihuan, paipaj huahuacunahuanbash, shuj prezumanda; cai shina caita rurajpilla, ñuca randipash cusha.

12 Riqui, caita na rurajpica, ñuca macanajuj runacunahuan cangunapaj contra shamusha; ari, ñuca huarmicunatapash, ñuca huahuacunatapash macanajunacunata churachisha, cangunapaj contra shamusha, cangunata catisha cangunapaj propio alpacaman, imami can ñucanchipaj callari chasquishca alpa; ari, cai canga yahuar yahuarmanda, ari, causai causaimanda; cangunaman macanajuita cusha imaura canguna tucuchishca canguichi cai alpa jahuamanda.

13 Riqui, ñuca cani fiñaihuan, ñuca llactapuracunapash; huañuchingapa munashcanguichi, ñucanchi munashcanchi ñucanchimanda huacaichiringapa. Ashtahuangari riqui, ñucanchita cutin tucuchingapa munajpica cangunata tucuchingapa munashunmi; ari, ñucanchi alpata munashun, ñucanchipa callari chasquishca alpata.

14 Cunan ñuca cartata tucuchini. Ñuca cani Moroni; Nefita llactapuracunapaj pushaj cani.

15 Cunan yalishca jipa Ammorón, imaura pai cai cartata chasquishpa, fiñarca; Moroniman cutishuj cartata quilcarca, cai carca shimicuna imata quilcarca, nishpa:

16 Ñuca cani Ammorón, Lamanitacunapaj jatun mandaj; ñuca cani Amalickíahpaj huauqui pitami canguna huañuchircanguichi. Riqui, paipaj yahuarta randi rurangapa cangunapaj jahuapi canga, ari, ñuca shamusha cangunapaj jahuaman ñuca macanajuj runacunahuan imashpa cangunapaj llaquichingapa nishcacunata na manllanichu.

17 Riqui, cangunapaj taitacuna paicunapaj huauquicunata pandaita rurarca, shinashpa paicuna shuhuarca paicunapaj derechota mandangapa paicunapallata cajta.

18 Cunan riqui, cangunapaj macanajunacunata ñucanchiman cujpi, ñucanchimanda mandai tucungapa curijpica maijangunahuan mandachun cajcunahuan, shina ñuca llactapuracunata paicunapaj macanajunacunata saquichisha ashtahuan na macanajuipi canga.

19 Riqui, nishcangui tauca llaquichingapa nishcacunata ñucapaj contra ñuca llactapuracunatapash; ashtahuangari riqui, ñucanchi na manllanchichu cangunapaj llaquichingapa nishcacunata.

20 Shina cajpipash, ñuca na randipash cushachu prezucunata imashna canguna mañashca laya, alchishpa charingapa ñuca micunata ñuca macanajuj runacunapa; ñucanchi macanajushun mana tucurinacaman, nacashpa Nefitacunata ñucanchi autoridadman curichun nacashpa tucuilla huañungacamanbacha.

21 Diosmanda pita canguna ninguichi ñucanchi na cazushcanchi, riqui, ñucanchi na rijsinchichu chai causajta; cangunapash na rijsinguichi; ashtahuangari shina causaj tian yashpapash, ñucanchi yaita ushanchi pai rurashcanga ñucanchitapash, cangunatapash.

22 Shuj aya tiajpipash, shuj ucu pachapash, riqui pai na cachangachu chaiman causachun ñuca huauquihuan pitami canguna huañuchircanguichi, pimi caiman rishcanga ninguichi shina pushtuman? Ashtahuangari riqui cai cuzascuna na minishtirishcachu.

23 Ñuca cani Ammorón, Zorampaj cati aillu, pita cangunapaj taitacuna munai na munai Jerusalénmanda apamurca.

24 Riqui cunan, ñuca cani millai Lamanita; riqui, cai macanajui catinga randi rurangapa paicunapaj pandaicunata, charishpa catingapa, chasquingapapash mandangapa derechocunata; ñuca tucuchini ñuca cartata Moroniman.