1 Yalishca jipa ishcai punlla ishcai tutacuna paipaj cuerpota ña apagrinajurca shuj utujupi saquingapa, caita rurashca carca paicunapaj huañushcacunata pambangapa.

2 Cunan jatun mandaj huarmi Ammónpaj famata uyashca cashpa, chaimanda pai cacharca mañarcapash paita ricuj shamuchun.

3 Yalishca jipa Ammón rurarca pai mandashca layata, jatun mandaj huarmita ricungapa yaicurca, tapurca yachangapa imata cai huarmi munan pai rurachun.

4 Pai nirca: Ñuca cusapaj sirvij runacuna yachaj chayachihuashca quiquin cajta achil Diospaj shuj achil villachij, ushaita charijtapash tauca jatun ruraicunata rurangapa paipaj shutipi;

5 Chaimanda, cai shina cajpica, ñuca munani yaicuchun ricuchunbash ñuca cusata, imashpa paipaj camapi ishcai punlla ishcai tutacunatapash sirijushca; shuj nin pai na huañushca can, ashtahuangari cutishujcuna nin pai ña huañushca can, ashnajumbash, pai churashca cana utujupi; ashtahuangari ñuca yaipica, na ashnanllu.

6 Cunan, cai carca Ammón imata munarca, pai yacharca jatun mandaj Lamoni Diospaj ushaihuan cajta; pai yacharca na crichij yanalla velo paipaj yuyaimanda anchurijujta, chai punchayachij maijan paipaj yuyaita punchayachin, maijan Diospaj punchapambapaj micha carca, cai carca shuj juyailla micha paipaj alicaipa—ari, cai micha ninan cushijuita paipaj almaman apamurca, yana yanapaj fuyu anchurishca cajpica, mana tucurina causaipaj micha paipaj almapi japirishca carca, ari, pai yacharca cai cuerpo naturalta yalishca cajta, Lamoni Diospi apai tucushca carca—

7 Chaimanda, imata jatun mandaj huarmi mañashca carca paipaj imatallata munai. Chaimanda, pai rirca jatun mandajta ricungapa imashna jatun mandaj huarmi mañashca laya; pai ricurca jatun mandajta, pai yacharca na huañushca cajta.

8 Pai jatun mandaj huarmita nirca: Pai na huañushcachu, ashtahuangari Diospi puñujun, caya punlla pai cutin jataringa; chaimanda paita ama pambaichu.

9 Ammón nircapash: Caita cringuichu? Jatun mandaj huarmi nirca: Ñuca na charini testimoniota ashtahuangari quiquinba shimi nitalla, ñucanchi sirvij runacunapaj shimicunatapash; shina cajpipash ñuca crini cai cachun imashna quiquin nishca layapi.

10 Ammón nirca: Achilyachishca cangui quiquinba ninan femanda; ñuca ninimi, huarmi, cashna jatun feta charij na tiashcachu tucui Nefitacunapaj llactapuracunapi.

11 Yalishca jipa paipaj cusapaj camata ali cuidarca, chai punllamanda caya punllacaman imaura Ammón villarca Lamoni jatarigrijta.

12 Yalishca jipa pai jatarirca, Ammónpaj shimi nishca laya; pai jatarishpaca, paipaj maqui chutarca huarmipaman, nircapash: Diospaj shutita achilyachishca cachun, quiquinbash achilyachishca cangui.

13 Ciertopacha imashna quiquin causangui, riqui, ñuca Jatun Causachijta ricushcani; pai shamunga, shuj huarmimanda naciringa, pai quishpichinga tucui runacunapaj huahuacunata maijan paipaj shutipi crin. Cunan, imaura pai cai shimicunata nijpi, paipaj shungu paipaj ucupi jundarca, cushijuihuan cutin urmarca; jatun mandaj huarmipash urmarca, Espírituhuan dominai tucushca caimanda.

14 Cunan Ammón ricuimanda Apunchijpaj Espíritu jicharimujta paipaj achil mañaicunamanda Lamanitacunaman, paipaj huauquicuna, picuna Nefitacunapaj cashca carca ashtaca ayai ningapa, nacashpa tucui Diospaj llactapuracunahuan paicunapaj na ali ruraicunamanda paicunapaj punda ruraicunamandapash, pai cungurishpa urmarca, paipaj almata jichai callarirca achil mañaipi Diosta paguinishpa paipaj huauquicunamanda imata rurashcamanda; pai cushijuihuanbash apai tucushca carca; shina paicuna tucuilla quimsandi alpaman urmarca.

15 Cunan, imaura jatun mandajpaj sirvij runacuna ricurca paicuna urmajta, paicuna Diosta mañai callarirca, imashpa Apunchijpaj manllai paicunapamanbash shamushca carca, chaimanda paicuna carca picuna jatun mandajpa ñaupapi shayarishcacuna testificarcapash Ammónpaj jatun ushaimanda.

16 Yalishca jipa usharishcata Apunchijpaj shutipi mañarca, paicuna alpaman tucuilla urmangacaman, shuj Lamanita huarmilla na urmarca, paipaj shuti carca Abish, pai Apunchijpaman tigrashca carca tauca huatacunata, paipaj taitapaj juyailla achil ricuimanda—

17 Shina, Apunchijman tigrashca caimanda, caita na yachaj chayachishcarca, chaimanda, imaura pai ricurca Lamonipaj tucuilla sirvij runacuna alpaman urmashca carca, paipaj sirvij huarmicunapash, jatun mandaj huarmipash, jatun mandajpash, Ammónpash alpaman urmashca cajpi, pai yacharca cai cajta Diospaj ushai; yashpa cunan cai cajta, llactapuracunata ima tucushcata yachaj chayachina, ricuimanda cai imasha cashcataca paicuna Diospaj ushaipi crichun, chaimanda pai huasin huasin calparca, llactapuracunaman yachaj chayachishpa.

18 Paicuna tandanajui callarirca jatun mandajpaj huasipi. Ashtacapacha tandanajushcacuna shamurca, paicunapaj manllaripa ricurca jatun mandajta, jatun mandaj huarmitapash, paicunapaj sirvij runacunatapash alpaman urmashcata, tucuillacuna sirinajurca huañushca laya; Ammóndapash ricurca, riqui, pai shuj Nefita carca.

19 Cunan llactapura paipuracuna huasha rimai callarirca; huaquinguna ninajurca cai can shuj jatun aya paicunapaman shamushca, nacashpa jatun mandajpaman paipaj huasimanbash, pai saquishcamanda Nefitata llactapi causachun.

20 Ashtahuangari cutishujcuna rimarca, nishpa: Jatun mandajca cai llaqui apaicunata paipaj huasiman apamushca, paipaj sirvij runacunata huañuchimanda picuna paicunapaj ataju llamacunata caiman chaiman calpachimanda Sebúspaj yacucunapi.

21 Rimashcapash carca chai runacuna picuna Sebúspaj yacu ladopi shayanajushcacuna caiman chaiman calpachirca ataju llamacunata maijan jatun mandajpaj cajcunata, chaimanda paicuna Ammónhuan fiñashca carca paicunapaj mashnachari huauquicunata pai huañuchishcamanda Sebúspaj yacucuna ladopi, jatun mandajpaj ataju llamacunata mitsajushpa.

22 Cunan, paicunamanda shuj, maijanba huauqui huañuchishca carca Ammónpaj espadahuan, ninandapacha fiñashca carca Ammónhuan, paipaj espadata llujchirca rircapash urmachingapa Ammónpaj jahuapi, paita huañuchingapa; pai espadata alsajpica paita chugrichingapa, riqui, pai huañushpa urmarca.

23 Cunan ñucanchi ricunchi Ammón na huañuchishca cai ushajta, imashpa Apunchij nishca carca Mosíahta, paipaj taita: Paita ñuca huacaichishami, cai paihuan rurashca canga paipaj femanda—chaimanda, Mosíah Apunchijman paita mingarca.

24 Yalishca jipa imaura ashtacapacha tandanajushcacuna ricushpa runa huañushpa urmajta, maijan espadata alsajpi Ammónda huañuchinga, tucui paicunaman manllai shamurca, paicunapaj maquicunata na chutaitapash na usharca paita tacaringapa nacashpa nimaijanda picuna urmashcacuna carca; paicuna cutin ninanda cushijui callarirca paipuracuna imata cai ushan cai jatun ushaimanda, nacashpa ima tucui cai cuzascuna ima canacajpipash.

25 Yalishca jipa tauca paicunamanda tiarca picuna nirca Ammón Jatun Espíritu cajta, cutishujcuna nirca pai cachamushca cashca Jatun Espíritumanda.

26 Ashtahuangari cutishujcuna tucui paicunata rimarca, nishpa pai shuj manllanayairucu cajta, pimi Nefitacunamanda cachamushca paicunata ninanda llaquichingapa.

27 Tiarca huaquinguna picuna nirca Ammón Jatun Espíritumanda cachamui tucushca can paicunata llaquichinga paicunapaj na ali ruraicunamanda; cai cajtapash Jatun Espíritu pimi Nefitacunata punllan punllan cuidashca carca, pimi paicunata punllan punllan cacharichirca paicunapaj maquicunamanda; paicuna nircapash cai Jatun Espíritu carca pimi tauca paicunapaj huauquicunata, Lamanitacunata tucuchirca.

28 Shina randimanda plituri paipuracunapi ninandapacha shinlli cai callarirca. Paicuna shina randimanda fiñanajujpi, sirvij huarmi pimi ashtacapacha tandanajushcacunata tandachishpa shamuchirca, imaura pai ricurca randimanda pliturita ima carca ashtacapacha tandanajushcacunapi pai ninandapacha llaquiyashca carca, viquita jichangacaman.

29 Yalishca jipa pai rirca jatun mandaj huarmipaj maquita japircapash, imashpapash pai alpamanda jataripapash; ñapash paipaj maquita tacarijpica pai jatarirca paipaj chaquihuan shayarircapash, caparircapash shinlli shimihuan, nishpa: Oh achilyachishca Jesús, pimi ñucata quishpichihuashca manllanayai ucu pachamanda! Oh achilyachishca Dios, cai llactapuracunata llaquipai!

30 Imaura pai caita nishca cajpi, paipaj maquicunata charirirca, cushijui jundashca caimanda, tauca shimicunata parlashpa caicuna na ima nijta yacharca; imaura pai caita rurashpa, jatun mandaj, Lamonita japirca, maquimanda, riqui pai jatarirca paipaj chaquicunahuan shayarirca.

31 Pai, ñapash, paipaj llactapuracunata randimanda pliturita ricushpa, ñaupaman rishpa paicunata rimai callarirca, paicunata yachachingapapash shimicunata imacunata pai uyashca carca Ammónpaj shimimanda; mashna paipaj shimicunata uyarca crishpa, Apunchijpaman tigrarishcapash carca.

32 Ashtahuangari taucacuna tiarca paicunapi picuna paipaj shimicunata na uyanayachij; chaimanda paicunapaj ñanda rirca.

33 Yalishca jipa imaura Ammón jatarirca paicunapaj minishtishcacunapi ayudarca, Lamonipaj tucui sirvij runacunatapash; paicunapash tucuilla villarca chai cuzastallata llactapuracunaman—paicunapaj shungucuna cambiarishca cajta; paicuna ashtahuan na alita rurangapa ñana munajta.

34 Riqui, taucacuna llactapuracunaman villarca paicuna ángelcunata ricushca cashcata paicunahuan parlashca cashcatapash; shina paicuna Diospaj cuzascunata nishca carca, paipaj ali ruraicunamandapash.

35 Yalishca jipa taucacuna tiarca paicunapaj shimicunapi crijcuna; mashna crijcuna bautizarirca; ali ruraj llactapuracunaman tigrarca, shuj iglesiata paicunapurapi shayachirca.

36 Shina Apunchijpaj rurai Lamanitacunahuan callarirca; shina Apunchij paipaj Espírituta paicunaman jichai callarirca; ñucanchipash ricunchi pai rigra chutashca can tucui llactapuracunaman maijan arrepentiringapa munajman paipaj shutipi crijpipash.