1 Yalishca jipa Nefitacuna maijan macanajuna armascunahuan na huañushcacuna, huañushcacunata pambashca jipa—cunan mashna huañushcacunata na yupashca carca, ashtacapacha caimanda—paicunapa huañushcacunata pambaita tucuchishca jipa paicunapa alpacunaman tucuilla tigrarca, paicunapa huasicunaman, paicunapa huarmicunaman, paicunapa huahuacunaman.

2 Cunan tauca huarmicuna huahuacunapash huañushca carca espadahuan, tauca ataju llamacunapash, huagracunapash; tauca muru tarpushca pambacunapash tucuchishca carca, caica sarushca carca taucapacha runacunahuan.

3 Cunan mashna Lamanitacuna, Amlicitacuna Sidón jatun yacu manñapi huañushcacuna Sidón yacucunapi shitashca carca; riqui paicunapaj tullucuna jatun mama cocha ucu ucupi can, caicuna tauca can.

4 Amlicitacuna Nefitacunamanda shican ricurishca carca, paicunamandallata puca marcata frentepi churashca caimanda Lamanitacunapaj layapi; ashtahuangari Lamanitacunashna paicunapaj uma ajchata na rutushca carca.

5 Cunan Lamanitacunapaj umacuna rutushca carca; churajunacuna illa carca, cara chumbihuanlla paicunapaj lomocunata huatarishca carca, armaduracunapash, caicunapi muyundi huatarishca carca, paicunapaj arcocuna, flechacuna, rumicuna, huaracacuna, ashtahuanbash.

6 Lamanitacunapaj aicha caracuna yanalla carca, paicunapaj taitacunaman marcata churashca caimanda, caica shuj llaquichina carca paicunapaj na ali ruraimanda, paicunapaj huauquicunata na cazuimanda, paicuna carca Nefi, Jacob, José, Sam, picuna ali carca, achil runacunapash.

7 Paicunapaj huauquicuna tucuchingapa munarca, chaimanda paicuna llaquichi tucushca carca; Apunchij Dios shuj marcata paicunaman churarca, ari, Lamánman, Lemuelman, Ismaelpaj churicunamanbash, Ismaelita huarmicunamanbash.

8 Caita rurashca carca paicunapaj cati aillucuna paicunapaj huauquicunapaj cati aillucunahuan shican ricurishca cachun, Apunchij Dios paipaj llactapuracunata chaimanda alchishpa charichun, ama chapurichun, ama na ali punda taitacunapaj ruraicunata crichun imami paicunata tucuchinga.

9 Yalishca jipa pipash paipaj cati aillucunata Lamanitacunahuan chapurishpaca chai llaquitallata paipaj cati aillucunaman apamunga.

10 Chaimanda, tucui maijan Lamanitacunahuan pandachi tucushpaca chai shutihuan shutichishca carca, shuj marcatapash churai tucushca carca.

11 Yalishca jipa pipash Lamanitacunapaj punda yachachishcata na crishpa, ashtahuangari crishpa chai tandachishpa quilcashcacunapi imacuna Jerusalénpaj alpamanda apamushca carca, paicunapaj punda taitacunapaj yachachishcatapash, caicuna alicuna carca, pipash crishpa Diospaj rurachunbacha saquishcacunapi caicunata alichishpa, Nefitacuna nishpa shutichishca carca, nacashpaca Nefipaj llactapuracuna, chaimanda ñaupaman—

12 Paicunami tandachishpa quilcashcacunata alichishca carca paicunapaj llactapuracunamanda, Lamanitacunapaj llactapuracunamandapash.

13 Cunan ñucanchi cutin tigrashun Amlicitacunaman, paicunatapash shuj marcata churashca carca; ari, paicunallata churarirca; ari, shuj puca marcata paicunapaj frentecunapi.

14 Shina Diospaj shimicuna pactashca can, caicunami Nefiman pai nishca shimicuna: Riqui, Lamanitacunata llaquichishcani, paicunaman shuj marcata churasha paicuna paicunapaj cati aillucunapash shican cai ushachun quiquinmanda quiquinba cati aillucunamandapash, cunan punllamanda chaiman mana tucurinacaman, paicunapaj na ali ruraicunamanda arrepentirishpalla, ñucapaman tigramujpi ñuca paicunata llaquichun.

15 Cutin: Ñuca shuj marcata churasha maijan paipaj cati ailluta chapujpi quiquinba huauquicunahuan, paicunapash llaquichishca cachun.

16 Cutin: Ñuca shuj marcata churasha maijan quiquinhuan quiquinba cati aillucunahuan macanajujcunatapash.

17 Cutin, ñuca nini maijan quiquinmanda partirin ashtahuan ñana quiquinba cati aillu nishpa shutichishca cangachu; ñuca quiquinda achilyachisha, maijan quiquinba cati aillu shutichishca cajtapash, cunanmanda chaiman mana tucurinacaman; caicuna carca Apunchijpaj nishcapachacuna Nefiman paipaj cati aillucunamanbash.

18 Cunan Amlicitacuna na yacharcachu Diospaj shimicunata paicuna pactachinajujta imaura marcata churai callarishpa paicunapaj frentecunapi; shina cashpapash tucui yachajta Diosta na cazunajurca; chaimanda minishtirishca carca paicunapaj jahuapi llaqui urmachun.

19 Cunan yachachun munani paicuna apamurca llaquita paicunapa jahuaman; shinallata tucui runacuna llaquichishca cashpaca paipa jahuaman paipaj ricushpa chasquichinata apamun.

20 Cunan yalishca jipa na tauca punllacuna jipa jatun macanajui Zarahemla alpapi macanajushca carca, Lamanitacuna, Amlicitacunapash, cutishuj Lamanitacunapaj macanajuj runacuna tiarca Nefi llactapuracunapaman shamurca, chai pushtullapita maipi callari macanajuj runacuna Amlicitacunahuan macanajushca carca.

21 Yalishca jipa shuj macanajuj runacunata cachashca carca paicunapaj alpamanda llujchishpa calpachichun.

22 Cunan Alma paipacha, shuj chugrihuan llaquichishca caimanda Lamanitacunahuan cai viaje macanajungapa na rirca;

23 Ashtahuangari paicunapaj contra taucapacha macanajuj runacunata cacharca; caicuna vichai rirca tauca Lamanitacunata huañuchircapash, puchushcacunata llujchishpa calpachirca paicunapaj alpa manñacunamanda.

24 Shina cutin tigramurca alpapi sumaj causaita churai callarircapash, ashtahuan na fiñachijpi huaquin punllacunata paicunapaj na ricunayachijcunahuan.

25 Cunan tucui cai cuzascuna rurashca carca, ari, tucui cai macanajuicuna, fiñanajuicuna callarishca carca, tucurishcapash ricushpa chasquichijcunapaj reinadopaj picha huatapi.

26 Shuj huatapi huaranga huaranga almacuna na tucurina pachaman cachashca carca, chasqui ushachun paicunapaj carashcata paicunapaj rurashcacunamanda, alicuna cashpapash na alicuna cashpapash, chasquina na tucurina cushijuita nacashpaca na tucurina llaquita, ima espírituta cazungapa ñapash cashca cashpapash, ali espíritu cashca cashpapash, na ali cashca cashpapash.

27 Tucui runacuna chasquin pagota maijan cazujmanda, caica achil villachinapaj espíritu shimi nishcamanda; chaimanda rurashca cachun ciertopamanda. Shina tucurirca picha huata ricushpa chasquichijcunapaj reinadopaj.