1 Yalishca jipa Alma llactapuracunaman parlaicunata tucuchishca jipa paicunamanda taucacuna paipaj shimicunapi crirca, arrepentiri callarirca, achil quilcashcacunata mascarcapash.

2 Ashtahuangari tucuimanda yalishca paicunamanda Almata Amulektapash tucuchingapa munashca carca; imashpa paicuna Almahuan fiñashca carca, paipaj na pandanalla shimicunamanda Zeezromman nishca; paicuna nircapash paicunata Amulek llullashcata, paicunapaj catichunbacha saquishcacunata plitunbash paicunapaj abogadocunata, ricushpa chasquichijcunatapash.

3 Paicuna Almahuan Amulekhuanbash fiñashcacunapash carca; imashpa paicuna punchalla testificashca carca paicunapaj na ali ruraicunamanda contra, paicuna munanajurca upallamanda huañuchingapa.

4 Ashtahuangari yalishca jipa paicuna na rurarca; ashtahuangari japirca huatarcapash shinlli cabiacunahuan, paicunata aparcapash cai alpapaj ricushpa chasquichijcunapaj yalishca mandajpa ñaupaman.

5 Llactapuracuna rirca paicunapaj contra testificangapa—testificashpa paicuna plitushcata catichunbacha saquishcacunapaj contra, paicunapaj abogadocunatapash alpapaj ricushpa chasquichijcunatapash, tucui llactapuracunatapash maijan alpapi carca; testificarcapash ashtahuangari shujlla Dios tiajta, pai cachamunga paipaj Churita llactapuracunaman, ashtahuangari paicunata na quishpichingachu; tauca cashna cuzascunata llactapuracuna Almapaj, Amulekpaj contra testificarca. Cunan cai rurashca carca alpapaj ricushpa chasquichijpaj yali mandajpa ñaupapi.

6 Yalishca jipa Zeezrom shimicunata ima parlashcamanda ninanda manllarishca carca; pai yacharcapash yuyaicunapaj ñausayaicunamanda, ima pai llactapuracunata shina cachun rurashca carca paipaj llulla shimicunahuan; paipaj alma llaqui apai callarirca paipaj propio juchachita yaipi caimanda; ari, ucu pachapaj nanaicunahuan muyushca cai callarirca.

7 Yalishca jipa llactapuracunaman yachachi callarirca, nishpa: Riqui, ñuca culpable cani, cai runacunaca Diospaj ñaupapi mapa illacuna can. Paicunamanda chai punllamanda mañai callarirca; Ashtahuangari paita pliturca, nishpa: Quiquinbash aya jundashca cangui? Paita tʼucarca, paicunapamanda llujchishpa cacharca, Alma, Amulekpash achil shimicunata parlashcacunata tucui maijanguna crishcacunatapash; paicuna llujchishpa cacharca, runacunata rumicunahuan shitachunbash cacharca.

8 Tandachishpa apamurca paicunapaj huarmicunata huahuacunatapash, maijan crijcunata nacashpa Diospaj shimipi crinata yachachishcacunata, ninaman shitashca cachun; apamurcapash paicunapaj tandachishca quilcashcacunata caicuna achil quilcashcacunata charirca, ninamanbash shitarca, rupachishca cachun ninahuan tucuchishcapash cachun.

9 Yalishca jipa paicuna Almata, Amulektapash japirca, paicunata ninan llaquita yalina pushtuman aparca, paicuna ricui ushachun maijanguna ninahuan rupashpa tucurinajujta.

10 Imaura Amulek ricushpa huarmicunapaj huahuacunapapash nanaicunata picuna ninapi rupashca carca, paitapash nanachirca; Almata nirca: Imashnata ricuita ushanchi cai manllanayai llaquicunata? Chaimanda ñucanchi maquicunata chutashun, Diospaj ushaitapash churashun imami ñucanchipi can, quishpichishun paicunata nina rupajujmanda.

11 Ashtahuangari Alma paiman nirca: Espíritu tangahuanmi ama ñuca maquita chutachun; riqui Apunchijca paicunata paipaman chasquin, punchapambapi; pai saquinbash paicuna caicunata rurachun nacashpaca llactapuracuna caita paicunapa rurachun, paicunapaj shungucunapaj shinllicaimanda, ricushpa chasquichinacuna imami paicunapi churashcacuna canga paipaj fiñaipi ali cachun; nimatapash na yachajcunapaj yahuarca shuj testigo paicunapaj contra canga, ari, chai tucuri punllapi paicunapaj contra ninandapacha caparinga.

12 Cunan Amulek Almata nirca: Riqui, imashpapash paicuna ñucanchitapash rupachinga.

13 Alma nirca: Rurashca cachun Apunchijpaj munaihuan. Ashtahuangari, riqui, ñucanchi rurana na tucuchishca canllu; chaimanda paicuna ñucanchita na rupachingachu.

14 Cunan yalishca jipa imaura ninaman shitashca cuerpocuna rupashca cajpi, tandachishca quilcashcacunapash imacuna paicunahuan shitashca carca, alpapaj ricushpa chasquichijcunapaj yalishpa mandaj Almapaj, Amulekpaj ñaupaman shamushpa shayarirca, paicuna huatashcacuna cajpi; paipaj maquihuan paicunapaj ñavi chichuta huajtarca, paicunata nirca: Caita ricushpa jipa, cutin cai llactapuracunata canguna yachachinguichiracha, paicuna shuj nina azufreshna cochaman shitashca cagrijta?

15 Riqui, canguna ricunguichi na ushaita charinguichi quishpichingapa maijangunata ninaman shitashcacunata; Diospash paicuna na quishpichirca quiquingunapaj fe paicuna caimanda. Ricushpa chasquichij cutin paicunapaj ñavi chichucunapi huajtarca, tapurcapash: Ima ninguichita cangunamandallata?

16 Cunan cai ricushpa chasquichij Nehorpaj ordenmanda femandapash carca, pimi Gedeónda huañuchirca.

17 Yalishca jipa Alma Amulekpash nimata na tigrachirca; paicunata cutin huajtarca, oficialcunata curcapash paicunata cárcelpi shitachun.

18 Imaura paicuna quimsa punllacunata cárcelpi cashca cajpi, chaiman shamurca tauca abogadocuna, ricushpa chasquichijcuna, sacerdotecuna, yachachijcunapash, picuna Nehorpaj femanda carca; paicuna cárcelpi ricuj shamurca, tapuchingapa tauca achil shimicunamanda; ashtahuangari paicuna nimata na tigrachirca.

19 Yalishca jipa ricushpa chasquichij paicunapaj ñaupapi shayarirca, nircapash: Imashpata na tigrachinguichi cai llactapuracunapaj tapuicunata? Nachu yachanguichi ñuca ushaita charijta nina rupajujman shitangapa? Pai mandarca paicuna parlachun; ashtahuangari nimata na tigrachirca.

20 Yalishca jipa paicuna saquishpa rircapash paicunapaj ñangunata, ashtahuangari cutin caya punlla shamurca; ricushpa chasquichijpash paicunata cutin huajtarca paicunapaj ñavi chichucunapi. Taucacunapash ñaupashpa, paicunata huajtarcapash, nishpa: Cutin shayaringuichicha cai llactapuracunata ricushpa chasquichingapa, ñucanchi catichunbacha saquishcacunata na alicachingapapash? Canguna shina jatun ushaita charishpaca imashpata na cangunamandallata cachariringuichi?

21 Tauca cashna cuzascunata paicunata nirca, quirucunatapash canirishpa, paicunapaj jahuapi tʼucashpa, ninajurca: Imashnashi ñucanchi ricurinajushun imaura llaquichi tucushca cashpa?

22 Tauca cashna cuzascunata, ari, tucui laya cashna cuzascunata ninajurca; shina paicunata asishpa ricunajurca tauca punllacunata. Micuna illa carca yarjachichun, yacu illa yacunayachichun; churajunacunatapash quichurca lluchulla cachun; shina paicunata huatarca shinlli cabiacunahuan, cárcelpi saquirca.

23 Yalishca jipa paicuna shina tauca punllacunata llaqui yalishca jipa, (cai carca Nefipaj llactapuracunapaj chunga ishcai punllapi, chunga quillapi, ricushpa chasquichijcunapaj reinadopaj chunga huatapi) Ammoníah alpapi ricushpa chasquichijcunapaj yalishpa mandaj tauca paicunapaj yachachijcunapash, paicunapaj abogadocunapash cárcelman rirca maipi Alma Amulekpash cabiacunahuan huatashca carca.

24 Ricushpa chasquichijcunapaj yalishpa mandaj paicunapaj ñaupapi shayarirca, cutin huajtarca, nircapash: Diospaj ushaita charishpaca cangunallata cai huatashcacunamanda cacharirichi, shina ñucanchi crishun Apunchij cai llactapuracunata tucuchinata cangunapaj shimi nishcamanda.

25 Yalishca jipa paicuna tucuilla ñaupaman rishpa huajtarca, chai shimicunatallata nishpa, tucuricaman; imaura tucuri parlashca jipa Diospaj ushai Almapaj, Amulekpaj jahuapi carca, paicuna jatarirca shayarircapash paicunapaj chaquicunahuan.

26 Alma mañarca, nishpa: Imauracaman ñucanchi cai jatun llaquicunata yalina canchi, Oh Apunchij? Oh Apunchij, ñucanchiman shinllicaita cuhuai ñucanchi femanda imami Cristopi can, cacharirita ushangacaman. Paicuna fitirca cabiacunata imahuan paicuna huatashca carca; caita llactapuracuna ricushpa, calpai callarirca, imashpa tucurinapaj manllai paicunapaj jahuapi carca.

27 Yalishca jipa jatun carca paicunapaj manllai alpaman urmarcapash, cárcelmanda llujshina punguman na chayarca, alpa ninanda chujchurca, cárcel pircacuna ishcaipi faquirirca, shina paicuna alpaman urmarca; pircacuna urmashpa huañuchirca ricushpa chasquichijcunapaj yali jatun mandaj, abogadocuna, sacerdotecuna, yachachijcunapash, picuna macarca Almata Amulektapash.

28 Alma Amulekpash cárcelmanda llujshimurca, paicuna na chugrishca carca; imashpa Apunchij paicunaman ushaita cushca carca, paicunapaj femanda imami Cristopi carca. Cárcelmanda ña llujshircapash; paicunapaj huatashcacunamandapash cacharishca carca; cárcel alpaman urmashca carca, tucui almacuna pirca ucupi cajcuna huañurca, Alma Amulekpash paicunalla na huañurca; paicuna ña llactaman rirca.

29 Cunan llactapuracuna uyashca cashpa shuj jatun bullata taucapachacunapi tandanajushpa cashpapash shamurca yachangapa imamanda cajta; paicuna Almata Amulektapash ricushpa cárcelmanda llujshijta, pircacuna alpaman urmashca cajta, paicuna manllarishca carca ninan manllaihuan, Almapaj Amulekpaj ñaupamanda calparca, shuj chivo laya paipaj viñajcunahuan ishcai leóngunamanda calpaj shina calparca Almapaj Amulekpaj ñaupamanda.