1 Yalishca jipa jatun mandaj Lamoni mandarca paipaj sirvij runacunata ñaupaman rishpa testificachun tucui cuzascunata imata paicuna ricushcamanda.

2 Imaura paicuna tucuita testificashca cajpi imata ricushca cuzascunata, pai yacharca Ammónpaj fidelidadmanda paipaj ataju llamacunata alchishpa charinapi, paipaj jatun ushaimandapash macanajuipi paita huañuchingapa munajcunahuan, pai ninandapacha manllarishca carca, nircapash: Ciertopacha, shuj runata yali can yarin. Riqui, nachu can cai Jatun Espíritu pimi cachamun cashna jatun castigocunata cai llactapuracunapa jahuaman, paicunapaj huañuchicunamanda?

3 Paicuna jatun mandajman tigrachirca, nishpa: Jatun Espíritu pai cajta shuj runa cajtapash, ñucanchi na yachanchichu; ashtahuangarin caita ashtahuan yachanchi, jatun mandajpaj na ricunayachishpa catijcuna paita na huañuchi ushanllu; paicuna jatun mandajpaj ataju llamacunata caiman chaiman calpachitapash na usharca pai ñucanchihuan cajpi, paipaj imallata yachaimanda jatun shinllicaimandapash; chaimanda, ñucanchi yachanchi paica jatun mandajpaj amigo can. Cunan, Oh jatun mandaj, ñucanchi na crinchichu shuj runa cashna jatun ushaita charijta, imashpa ñucanchi yachanchita pai na huañui ushan.

4 Cunan, imaura jatun mandaj cai shimicunata uyashpa, paicunaman nirca: Cunan ñuca yachani cai Jatun Espíritu can; pai urai shamushca cai punllapi ñucanchi causaicunata alchishpa charingapa, ñuca cangunata ama huañuchichun cangunapaj huauquicunatashna. Cunan cai can Jatun Espíritu pimanda ñucanchi taitacuna parlashca can.

5 Cunan cai carca Lamonipaj punda rurai, imata paipaj taitamanda chasquishca carca, Jatun Espíritu tiajta. Masqui paicuna crishpa Jatun Espíritupi, paicuna yarca imata rurashpapash ali carca; shina cajpipash, Lamoni ninanda manllai callarirca, paipaj sirvij runacunata huañuchipi na alita rurashca manllaimanda.

6 Pai taucacunata huañuchirca paipaj huauquicuna caiman chaiman calpachishca carca paicunapaj ataju llamacunata yacu ufiana pushtupi, shina, llamacunata caiman chaiman calpachishcamanda paicuna huañuchishca carca.

7 Cunan cai Lamanitacunapaj rurai cai carca shayarina Sebúspaj yacu ladopi llactapuracunapaj ataju llamacunata caiman chaiman calpachingapa, cai laya tauca caiman chaiman calpachishcacunata paicunapaj propio alpaman apangapa, shina rurashpa paipuracuna shuhuangapa.

8 Yalishca jipa jatun mandaj Lamoni paipaj sirvij runacunata tapurca, nishpa: Cashna jatun ushaita charij runa maipita can?

9 Paicuna nirca: Riqui, quiquinba caballocunaman micuchijun. Cunan jatun mandaj paipaj sirvij runacunata mandashca carca, nara paicunapaj ataju llamacunata yacuta ufiachina cajllapita, paipaj caballocunata carretacunatapash ña cachun, Nefipaj alpaman paita pushangapa; chaipi shuj jatun ninan micui tiachun mandashca carca Lamonipaj taita, pimi tucui cai alpacunapaj jatun mandaj carca.

10 Cunan imaura jatun mandaj Lamoni Ammón paipaj caballocunata, carretacunatapash ña cachun rurajushcata uyashpa ashtahuan ninanda manllarirca, Ammónpaj fidelidadmanda, nishpa: Ciertopacha na tiashcachu ñuca tucuilla sirvij runacunamanda cai fiel runashna; pai yarinbash tucui ñuca rurachunbacha saquishcacunata rurangapa.

11 Cunan ñuca ciertopacha yachani cai can Jatun Espíritu, ñuca mañangapa munani pai ñucata ricuj shamuchun, ashtahuangari ñuca manllani.

12 Yalishca jipa imaura Ammón ña cachun rurashca cashpa caballocunata carretacunatapash jatun mandajpa paipaj sirvij runacunapapash, pai yaicurca jatun mandajpaman, pai ricurca jatun mandajpa ñavi shujpacha tucushca carca; chaimanda paipaj ñaupamanda ña tigragrijurca.

13 Jatun mandajpaj shuj sirvij runa nirca, Rabbánah, imami can, ima cajta nishpaca, ushaita charij nacashpaca jatun jatun mandaj, paicunapaj jatun mandajcuna ushaita charijcuna can yashpa; shina pai nirca: Rabbánah, jatun mandaj mañan quiquin caipi cachun.

14 Chaimanda Ammón jatun mandajpaman tigrarirca, paita nirca: Imata quiquinmanda rurachun munangui, Oh jatun mandaj? Jatun mandaj na tigrachirca shuj horasta, paicunapaj tiempohuan, imashpa pai imata ninata na yacharca.

15 Yalishca jipa Ammón cutin nirca: Imata munangui ñucamanda? Ashtahuangari jatun mandaj na tigrachirca.

16 Yalishca jipa Ammón, Diospaj Espírituhuan junda cashpa, chaimanda jatun mandajpaj yuyaicunata yacharca. Pai nirca: Cai can uyaimanda ñuca quiquinba sirvij runacunata quiquinba ataju llamacunatapash huacaichishcamanda, huañuchircani paicunapaj canchis huauquicunata huaracahuan espadahuanbash, cutishujcunapaj rigracunata fitircani, quiquinba ataju llamacunata quiquinba sirvij runacunatapash huacaichingapa; riqui, caimandachu quiquin manllarijungui?

17 Canman nini, imashpa quiquinba manllari jatun can? Riqui, ñuca cani shuj runa, quiquinba sirvij runa; chaimanda, imatapash can rurachun munashcata ali cajpica, ñuca rurasha.

18 Cunan imaura jatun mandaj cai shimicunata uyashca cashpa, cutin manllarirca, pai ricurca Ammón paipaj yuyaicunata yachai ushajta; ashtahuangari masqui, jatun mandaj Lamoni paipaj shimita pascarca, nirca: Pita cangui? chai Jatun Espírituchu cangui, pimi tucui cuzascunata yachangui?

19 Ammón tigrachirca paita: Ñuca na canichu.

20 Jatun mandaj nirca: Imashnata ñuca shungupaj yuyaicunata yachangui? Na manllashpa parlai ushangui, cai cuzascunamanda villahuai; villahuaipash ima ushaihuan huañuchircangui ñuca huauquicunapaj rigracunata fitircanguipash ñuca ataju llamacunata caiman chaiman calpachijcunata.

21 Cunan, cai cuzascunamanda ñucaman villajpica, ima munashcata cusha quiquinman; minishtishca cajpica, ñuca macanajuj runacunahuan huacaichisha; ashtahuangari ñuca yachani tucui paicunata yali ushaita charij cangui; shina cajpipash, ima munashcata quiquinman carasha.

22 Cuna Ammón yachashca caimanda, na na alita rurangapaca, pai Lamonita nirca: ñuca shimicunata uyanguicha, ima ushaihuan cai cuzascunata rurajta villajpica? Caimi can imata quiquinmanda ñuca munani.

23 Jatun mandaj tigrachirca, nishpa: Ari, tucui quiquinba shimicunata crishami. Shina ali yachaihuan ari nichirca.

24 Ammón manllai illa parlai callarirca, nirca: Cringuichu Dios tiajta?

25 Pai tigrachirca, nishpa: Ñuca na yachanichu ima cajta.

26 Shina Ammón nircapash: Cringuichu Jatun Espíritu tiajta?

27 Pai nircapash, Ari.

28 Ammón nircapash: Cai can Dios. Ammón cutin nirca: Cringuichu cai Jatun Espíritu, pimi Dios can, tucui cuzascunata rurashca jahua pachapi cajta cai pachapi cajtapash?

29 Pai nirca: Ari, ñuca crini pai rurashca tucui cuzascunata cai pachapi cajta; ashtahuangari jahua pachacunata ñuca na yachanichu.

30 Ammón nirca paita: Jahua pachacunaca shuj pushtu can maipi Dios causan paipaj tucui achil ángelcunahuan.

31 Jatun mandaj Lamoni nirca: Cai alpa jahuapichu?

32 Ammón nirca: Ari, pai urai ricun tucui runacunapaj huahuacunata; pai yachan tucui yuyaicunata shungupaj imata rurasha yaicunatapash; paipaj maquimanda tucui rurashca carca callarimanda.

33 Jatun mandaj Lamoni nirca: Ñuca crini tucui cai cuzascuna imata parlashcangui. Diosmanda cachamushcachu cangui?

34 Ammón nirca: Ñuca cani shuj runa; callaripi runaca Diospaj rijchapi rurashca carca, ñuca cayashca cani paipaj Achil Espírituhuan cai cuzascunata cai llactapuracunaman yachachingapa, paicuna apamui tucushca cachun yachajuiman imami ali ciertopacha can;

35 Chai Espíritupaj ashagu ñucapi caj, imami ñucaman yachajuita cuhuashca, ushaitapash ñuca femanda munaimandapash imami Diospi can.

36 Cunan imaura Ammón cai shimicunata nishca cajpi, pai callarirca cai pacha rurashcamanda, Adánpaj rurashcamandapash, villarca tucui cuzascunata runacuna urmashcamanda, cutinbash villarca tandachishpa quilcashcacunata llactapuracunapaj achil quilcashcacunatapash, imacunata parlashca carca achil villachijcuna, urai tiempo paicunapaj taita, Lehi, Jerusalénda llujshingacaman.

37 Paicunaman cutinbash villarca (cai carca jatun mandajpaj paipaj sirvij runacunamanbash) tucui paicunapaj taitacunapaj jichushca pambacunapi purishcacunata, tucui paicunapaj llaquiricunamanda yarjaihuan yacunayaihuanbash, paicunapaj llaquiyaicuna, ashtahuanbash.

38 Paicunaman cutin villarcapash Lamán, Lemuelpaj na cazuicunatapash, Ismael churicunapash, ari, tucui paicunapaj na cazuicunata paicunaman villarca; tucui tandachishpa quilcashcacunata achil quilcashcacunatapash villarca imaura Lehi Jerusalénmanda llujshimushcamanda cunan punllacaman.

39 Ashtahuangari cai na tucuilla can; jatun causachinapaj planmanda villarca, imami alichishca carca cai pachata rurashcamandapacha; paicunaman yachachircapash Cristopaj shamunamanda, tucui Apunchijpaj rurashcacunamanda paicunaman yachaj chayachirca.

40 Yalishca jipa tucui cai cuzascunata nishca jipa, jatun mandajman villarca, paipaj tucui shimicunata crirca.

41 Pai Apunchijta mañai callarirca, nishpa: Oh Apunchij, llaquihuai; quiquinba ashtaca llaquihuan imata Nefipaj llactapuracunapaj jahuapi charishcangui, ñucapapash charipai, ñuca llactapuracunapapash.

42 Cunan, imaura pai caita nishpa, alpaman urmarca, huañushca laya.

43 Yalishca jipa paipaj sirvij runacuna paita japishpa aparca paipaj huarmipaman, shuj camapi sirichirca; pai sirirca huañushca laya ishcai punlla ishcai tutacunata; paipaj huarmi, paipaj churicuna, paipaj ushicunapash llaquirinajurca, Lamanitacunapaj layapi, paita chingachinamanda ninandapacha llaquiyanajurca.