1 Cunan Alma cai shimicunata parlashca jipa, cacharca yachangapa munashpa shuj Diospi crinachu nachu crina canchi nishpa, paicuna cai fucushcata chasquingapa imamanda pai parlashca can, nacashpa imashna paicuna tarpuna muyuta, nacashpa achil shimita imamanda pai parlashca can, imami pai nirca tarpunapacha canguichi cangunapaj shungucunapi; nacashpa ima layapi paicunapaj feta churai callarina can.

2 Alma paicunaman nirca: Riqui, canguna nishcanguichi cangunapaj Diosta na adorai ushanguichita cangunapaj tandanajuna huasicunamanda shitashca caimanda. Ashtahuangari riqui, ñuca cangunaman nini, cangunapaj Diosta na adorai ushanchichu yashpaca, jatunbacha pandaipi canguichi, mascana canguichi achil quilcashcacunata; caitami cangunaman yachachishcata yajpica, na yachajushcanguichichu.

3 Nachu yaringuichi liishcata imata Zenós, punda achil villachij, nishca can achil mañaimanda nacashpa adoranamanda?

4 Pai nirca: Quiquin llaquij cangui, Oh Dios, ñuca achil mañaita uyashcangui, imaura ñuca jichushca pambapi cajpipash; ari, llaquij cashcangui imaura ñuca achil mañarcani maijan ñucapaj na ricunayachijcunamanda, ñucapaman tigrachimurcangui.

5 Ari, Oh Dios, ñucata llaquij carcangui imaura quiquinda ninanda mañajpi ñuca pambapi; imaura ninanda mañajpi ñuca achil mañaipi, ñucata uyahuarcaguimi.

6 Cutin, Oh Dios, imaura ñuca huasiman tigrajpi uyahuarcangui ñuca achil mañaipi.

7 Imaura ñuca huasi ucuman tigrajpi, Oh Apunchij, quiquinda achil mañarcani, quiquin uyahuarcangui.

8 Ari, llaquij cangui quiquinba huahuacunahuan imaura paicuna quiquinda mañajpi, quiquinmanda uyashca cachun na runacunamanda, paicunata uyapangui.

9 Ari, Oh Dios, ñucahuanbash llaquij cashcangui, ñuca ninanda mañaicunata uyashcangui quiquinba tandanajushcacunapaj chaupipi.

10 Ari, ñucata uyahuashcangui imaura ñucata na ricunayachijcuna shitajpi, millanayachishca cajpipash; ari, ñuca ninanda mañaicunata uyahuarcangui, fiñarcangui ñucata na ricunayachijcunata, paicunata ricuj shamurcangui fiñaipi ñapash tucuchinahuan.

11 Uyahuarcangui ñucapaj llaquicunamanda, ñuca sinceridadpash; cai can quiquinba Churimanda shina llaquij ñucahuan cashcangui, chaimanda ñuca mañasha tucui ñuca llaquicunapi, quiquinbimi ñuca cushijui can; quiquinba ricushpa chasquichinacunata anchuchishcangui, quiquinba Churimanda.

12 Cunan Alma paicunaman nirca: Cringuichichu cai achil quilcashcacunata imacunata pundacuna quilcashcata?

13 Riqui, crishpaca, crinapacha canguichi imata Zenós nirca; riqui pai nirca: Quiquinba ricushpa chasquichinacunata anchuchishcangui quiquinba Churimanda.

14 Cunan riqui, ñuca huauquicuna, ñuca tapungapa munani liishcanguichichu achil quilcashcacunata? Liishca cashpaca, imashpata na cringuichi Diospaj Churipi?

15 Na quilcashca canllu Zenóslla parlashcata cai cuzascunamanda, ashtahuangari Zenocpash cai cuzascunamanda parlarca—

16 Riqui, pai nirca: Fiñashca cangui, cai llactapuracunahuan, Oh Apunchij, paicuna na yuyaipi chasquingapa munajpi quiquinba shungumanda llaquinacunata imata paicunaman cushcangui quiquinba Churimanda.

17 Cunan, ñuca huauquicuna, canguna ricuichi cati punda achil villachij testificarca Diospaj Churimanda, llactapuracuna paipaj shimicunata na yuyaipi chasquimanda rumicunahuan pigarca huañungacaman.

18 Ashtahuangari riqui, cai na tucuilla canllu; na paicunalla canllu picuna parlashca can Diospaj Churimanda.

19 Riqui, Moiséspash paimanda parlarca; ari, riqui shuj ricuchita shayachishca carca jichushca pambapi, pipash paita ricushpaca causai ushachun. Taucacuna ricurca, causarcapash.

20 Ashtahuangari huaquinlla cai cuzascuna ima cajta yuyaipi chasquirca, caica paicunapaj shungucuna shinllicuna caimanda. Ashtahuangari taucacuna tiarca picuna cashna shinllicuna paicuna na ricui usharca, chaimanda paicuna huañurca. Cunan imamanda paicuna na ricui usharca paicuna na crimanda paicunata cai jambi ushajta.

21 Oh ñuca huauquicuna, canguna jambishca cajpi cangunapaj ñavicunahuan ricuimandalla jambirishpa cangapa, nacha ñapash ricunguichiman? Nacashpa cangunapaj shungucunata na crishpa shinlliyachinguichimanlla, quillacuna canguichipash, cangunapaj ñavicunahuan na ricushpa, huañungapa?

22 Shina cajpica, ay cangunapaj jahuaman shamunga; ashtahuangari na shina cajpica, cangunapaj ñavicunahuan ricuichi Diospaj Churipi cri callarichi, pai shamunga paipaj llactapuracunata jatun causachingapa, pai llaquiringa huañungapash paicunapaj juchacunamanda; pai cutin jataringapash huañuimanda, cai yalichun apamunga cutin causarinata, tucui runacuna paipaj ñaupapi shayaringa, ricushpa chasquichi tucungapa tucuri ricushpa chasquichina punllapi, paicunapaj rurashcacunamanda.

23 Cunan, ñuca huauquicuna, ñuca munani tarpuchun cai achil shimita cangunapaj shungucunapi, imashna pungui callarijpi micuchichi caita cangunapaj fehuan. Riqui, shuj yuraman tigranga, vichai llujshimunga cangunapi mana tucurina causaicaman. Shina Dios cangunaman saqui ushanga cangunapaj llashaicuna fangalla cachun, paipaj Churipaj cushijuihuan. Munashpaca tucui caicunata rurai ushanguichi. Shinacapashcachun.