1 Yalishca jipa imaura paicuna shuj iglesiata alpapi shayachishca cashpa, jatun mandaj Lamoni mañarca Ammón paihuan richun Nefipaj alpaman, paipaj taitaman rijsichingapa.

2 Apunchijpaj shimi rimai Ammónpaman shamurca, nishpa: Nefipaj alpaman na ringuichu, riqui, jatun mandaj quiquinba causaita quichungapa munanga; ashtahuangari Middonipaj alpaman ringui; riqui, quiquinba huauqui Aarón, Mulokipash, Ammapash cárcelpi can.

3 Cunan yalishca jipa imaura Ammón cai uyashca cashpa, pai nirca Lamoniman: Riqui, ñuca huauqui, cumbacunapash Middoni cárcelpi can, ñuca rini paicunata cacharichingapa.

4 Cunan Lamoni Ammónda nirca: Ñuca yachani, Apunchijpaj ushaihuan tucui cuzascunata rurai ushangui. Ashtahuangari riqui, ñuca risha quiquinhuan Middonipaj alpaman; Middonipaj alpapaj jatun mandajca, pai shuti can Antiomno, ñuca ali rijsi can; chaimanda ñuca rini Middonipaj alpaman, chai alpapaj jatun mandajta alicachingapa, pai llujchingapash cárcelmanda quiquinba cumbacunata. Cunan Lamoni nirca: Pita villarca cumbacuna cárcelpi cajta?

5 Ammón nirca: Pipash na villahuarcachu ashtahuangari Dioslla; pai nihuarca—Ri quiquinba huauquicuntapash cachari, paicuna cárcelpi can Middonipaj alpapi.

6 Cunan imaura Lamoni caita uyashpa paipaj sirvij runacunata paipaj caballocuna paipaj carretacunapash ña cachun rurachirca.

7 Pai Ammónda nirca: Shamui, ñuca urai risha quiquinhuan Middoni alpaman, chaipi ñuca jatun mandajta ninanda mañasha pai quiquinba huauquicunata cárcelmanda cacharichun.

8 Yalishca jipa Ammónpash Lamonipash chaiman rinajujpi, Lamonipaj taitata tuparirca, pimi tucui alpacunapaj jatun mandaj carca.

9 Riqui, Lamonipaj taita nirca: Imashpata na shamurcangui jatun ninan micuiman chai jatun punlla imaura ñuca rurarcani jatun ninan micuita ñuca churicunapa, ñuca llactapuracunamanbash?

10 Pai nirca: Maimanda rijungui cai Nefitahuan, pimi shuj llullapaj huahua?

11 Yalishca jipa Lamoni villachirca paiman maiman rijujta, manllashpa paita ofendenata.

12 Pai villarcapash tucui imamanda alimanda saquirishcata paipaj propio reinopi, pai na rishcamanda paipaj taitapaj rurashca jatun ninan micuiman.

13 Cunan imaura Lamoni tucui cuzascunata villachishca cashpa, riqui, paipaj manllaripa, paipaj taita fiñarca paihuan, nirca: Lamoni, cai Nefitacunata cacharigringui, picuna shuj llullapaj churicuna can. Riqui, pai shuhuarca ñucanchi taitacunata; cunan paipaj huahuacunapash ñucanchipaman shamun paicuna ushachun, paicunapaj yachaihuan paicunapaj llullaicunahuanbash, ñucanchita pandachingapa, paicuna cutin ñucanchita shuhuai ushangapa ñucanchipaj charishcacunata.

14 Cunan Lamonipaj taita mandarca Ammónda espadahuan huañuchichun. Mandarcapash Middonipaj alpamanbash ama richun, ashtahuangari pai tigrachun paihuan Ismaelpaj alpaman.

15 Ashtahuangari Lamoni nirca: Ñuca na Ammónda huañuchishachu, Ismaelpaj alpamanbash na tigrashachu, ashtahuangari ñuca rini Middonipaj alpaman Ammónpaj huauquicunata cacharichi ushangapa, imashpa ñuca yachani paicuna ali runacuna ciertopacha Diospaj achil villachijcunapash cajta.

16 Cunan imaura paipaj taita cai shimicunata uyashpa, paihuan fiñarca, paipaj espadata llujchirca paita alpaman shitangapa.

17 Ashtahuangari Ammón ñaupaman shayarishpa nirca: Riqui, quiquinba churita na huañuchinguichu; shina cajpipash, ashtahuan alicanman pai urmachun quiquinba randi, riqui, pai arrepentirishca can paipaj juchacunamanda; ashtahuangari cai punlla quiquin urmajpica, quiquinba fiñaipi, quiquinba alma na quishpirishca cangachu.

18 Cutin, cai minishtirishca can quiquin caita rurachun; quiquinba churita huañuchijpica, shuj inocente runa cashpa, paipaj yahuar alpamanda mañanga Apunchij paipaj Diosta, venganza quiquinba umapi shamuchun; imashpapash quiquinba almata chingachinguiman.

19 Cunan imaura Ammón cai shimicunata paiman nijpi, tigrachirca, nishpa: Ñuca yachani ñuca churita huañuchishpaca, nimatapash na yachajpaj yahuarta jichasha; quiquinmari tucuchingapa mascashcangui.

20 Paipaj maquita chutarca Ammónta huañuchingapa. Ashtahuangari Ammón shinlli cai usharca paipaj huajtashcacunata, chugrichircapash paipaj rigrata ashtahuan ñana imatapash rurai usharca.

21 Cunan imaura jatun mandaj ricushpa Ammón paita huañuchi ushajta, Ammónta ninanda mañai callarirca paipaj causaita quishpichichun.

22 Ashtahuangari Ammón paipaj espadata jahuaman alsarca, nishpa: Riqui, ñuca quiquinda chugrichisha ñuca huauquicunata cárcelmanda llujchishpa cachachun saquijpilla na.

23 Cunan jatun mandaj, paipaj causaita chingachinata manllashpa, nirca: Ñucata quishpichijpica quiquin ima mañashcata cusha, ñuca reino chaupitapash.

24 Cunan imaura Ammón ricushpa rucu jatun mandajta paipaj imashna munashcahuan rurachijushpa, pai nirca: Ñuca huauquicunata cárcelmanda llujchishpa cachajpica, Lamonimanbash paipaj reinota charishpa catichun saquijpi, paihuan ñana fiñashpa cajpi, ashtahuangari saqui, paipaj propio munashcata rurachun ima cuzasta yuyashcata, shina ñuca quiquinda quishpichisha; na shina cajpica alpaman shitasha.

25 Cunan imaura Ammón cai shimicunata nishca cajpi, jatun mandaj cushijui callarirca paipaj causaimanda.

26 Imaura pai ricurca Ammón paipaj causaita na tucuchina yuyaita charijta, imaura ricushpapash jatun juyaita paipaj churi Lamoniman charijta, pai ninandapacha manllarishca carca, nirca: Cai tucui quiquinba munashca cashcamanda, quiquinba huauquicunata llujchisha, saquishapash ñuca churi Lamoni paipaj reinota charishpa catichun, riqui, saquigrini ñuca churi paipaj reinota charishpa cati ushachun cunan punllamanda mana tucurinacaman; ñuca na ashtahuan mandashachu—

27 Ñuca quiquinman saquigrinipash quiquinba huauquicuna cárcelmanda llujchishpa cachachun, quiquinbash quiquinba huauquicunapash ñucapaman ricuj shamuichi, ñuca reinopi; imashpa ninandapacha quiquinda ricungapa munasha. Jatun mandaj ninandapacha manllarishca carca shimicunamanda imata Ammón parlashca carca, shimicunatapash imata paipaj churi Lamoni parlashcatapash, chaimanda yachajungapa munashcapacha carca.

28 Yalishca jipa Ammón Lamonipash catirca paicunapaj purishpa rinahuan Middonipaj alpaman. Lamoni alicachi tucurca cai alpapaj jatun mandajpaj ñavicunapi; chaimanda Ammónpaj huauquicunata cárcelmanda llujchirca.

29 Imaura Ammón paicunata tupashpa ninandapacha llaquirirca, riqui paicuna churajunacuna illa carca, paicunapaj aicha caracuna ninandapacha chugrishca carca shinlli cabiacunahuan huatashca caimanda. Paicuna yarjaitapash yalishca carca, yacunayaita, tucui laya llaquicunatapash; shinapash paicuna tucui paicunapaj llaquicunapi pacientecuna carca.

30 Shina canacashcarca, cai paicunapaj suerte carca ashtahuan shinlliyashca na cazujcunapash llactapuracunapaj maquicunapi urmana; chaimanda paicunapaj shimicunata na uyangapa munarca, paicunata llujchishpa cacharca, macashcapash carca, paicunata huasin huasin llujchishca carca, llactan llactanpash, Middonipaj alpaman paicuna chayangacaman; chaipi paicunata japishpa cárcelman churai tucurca, shinlli cabiacunahuan huatashca, tauca punllacunata cárcelpi carca, cacharishca carca Lamonimanda Ammónmandapash.