1 Cunan yalishca jipa ricushpa chasquichijcunapaj reinado ishcai chunga picha huata callaripi Nefipaj llactapuracunapaj jahuapi, sumaj causaita churashca cashpa Lehipaj llactapuracunapa, Moriantónpaj llactapuracunapaj chaupipi paicunapaj alpacunamanda, callarishca cashpa ishcai chunga picha huatata sumaj causaihuan;

2 Shina cashpapash, na yapa charirca shuj tucui sumaj causaita alpapi, tiai callarirca randimanda plituri llactapuracunapi, Pahorán ricushpa chasquichijcunapaj yali mandajmanda; riqui, llactapuracunamanda huaquin tiarca picuna munarca catichunbacha saquishcacunapaj huaquin pushtucunata shuj layata rurashca cachun.

3 Ashtahuangari riqui, Pahorán na cambiangapa munarca, na saquircapash catichunbacha saquishcacuna shuj laya cachun; chaimanda, pai na uyarca maijanguna, picuna cacharca paicunapaj shimirimaicunata paicunapaj mañaicunahuan catichunbacha saquishcacunata shuj layata ruranamanda.

4 Chaimanda, maijangunapa munashca carca catichunbacha saquishcacunata shuj layata rurashca cachun paihuan fiñashca carca, munarcapash pai ashtahuan ama cachun alpapi ricushpa chasquichijcunapaj yali mandaj; chaimanda ninan plituri jatarirca, ashtahuangari na yahuar jichaicaman.

5 Yalishca jipa maijangunapa munai carca Pahorán jatun tiarinamanda anchuchishca cachun shutichishca carca jatun mandajta charingapa munaj runacuna, paicunapaj munai carca catichunbacha saquishcacuna shuj laya rurashca cachun libre mandai tucurina layapi, shuj jatun mandajta alpapi churangapa.

6 Maijangunapa munai carca Pahorán ricushpa chasquichijcunapaj yali mandaj alpapi cashpa catichun, paicunapaj jahuapi libre runacuna shutita japirca; shina tiarca paipuracunapi chaupiricuna, libre runacuna jurashca carca nacashpa pactachinata rurashca charishpa catingapa paicunapaj derechocunata, privilegiocunatapash paicunapaj religiónmanda shuj libre mandajhuan.

7 Yalishca jipa cai carca paicunapaj randimanda plituricuna churashca carca llactapuracunapaj shimirimaihuan. Yalishca jipa llactapuracunapaj shimirimaicuna shamurca libre runacunata shinllichishpa, Pahorán ricushpa chasquichina jatun tiarinapi catirca, ashtacata cushichirca Pahoránpaj huauquicunapi libertadpaj tauca llactapuracunatapash, picuna jatun mandajta charingapa munaj runacunatapash upallayachirca, shina na usharca chimbapuraita ashtahuangari ruranapacha carca libertad canata charishpa catina.

8 Cunan maijanguna jatun mandajcunata munajcuna carca ilustre nacishcacuna, paicuna jatun mandajcuna cangapa munarca; paicuna shinllichishca carca maijanguna ushaita, autoridadta munajcunahuan llactapuracunapaj jahuapi.

9 Ashtahuangari riqui, cai carca shinlli punlla shinapacha fiñanajuicuna tiangapa Nefipaj llactapuracunapi; riqui, Amalickíah cutin Lamanita llactapuracunapaj shungucunata tangachishca carca Nefita llactapuracunapaj contra, pai tandachishca carca soldadocunata paipaj tucui alpacunamanda, paicunata macanajunacunata churachishpa, macanajungapa na shaijushpa prepararirca; pai jurashca carca Moronipaj yahuarta ufiangapa.

10 Ashtahuangari riqui, ñucanchi ricushun paipaj nishcapacha imata pai rurasha yarca yanga carca; shina cajpipash, paillata prepararca, paipaj macanajuj runacunatapash Nefitacunapaj contra macanajungapa shamurca.

11 Cunan paipaj macanajuj runacuna na ashta carca imashna punda cashcashna, tauca huarangacuna huañushca caimanda Nefitacunapaj maquicunamanda; ashtahuangari masqui paicunapaj jatun chingarishca, Amalickíah tandachishca carca jatun manllanayai macanajuj runacunata, shinashpa pai na manllarca Zarahemla alpaman urai shamungapa.

12 Ari, Amalickíah paillata urai shamurca, Lamanitacunapaj ñaupaman. Cai carca ricushpa chasquichijcunapaj reinado ishcai chunga picha huatapi; cai carca chai tiempollata imaura paicuna callarishca carca paicunapaj fiñanajuicunata tucuchinajurca Pahorán, ricushpa chasquichijcunapaj yali mandajmanda.

13 Yalishca jipa imaura runacuna maijanguna shutichishca carca jatun mandajta charingapa munajcuna uyashca carca Lamanitacuna urai shamunajujta paicunahuan macanajungapa, cushijushca carca paicunapaj shungucunapi; paicuna na nishca carca macanajunacunata japingapa, paicuna shina fiñashcacuna carca ricushpa chasquichijcunapaj yali mandajhuan, libertadpaj llactapuracunahuanbash, paicuna na japi usharca macanajunacunata paicunapaj llactata huacaichingapa.

14 Yalishca jipa imaura Moroni caita ricushpa, ricushpapash Lamanitacuna alpa manñacunata shamunajujta, pai ninandapacha fiñashca carca llactapuracunapaj na cazuimanda picuna trabajashca carca shina ashtaca utsialla alchishpa charingapa; ari, pai ninanda fiñashca carca; paipaj alma junda carca fiñaihuan paicunapaj contra.

15 Yalishca jipa pai shuj mañaita cacharca, llactapuracunapaj shimirimaihuan, alpapaj mandajpaman, mañashpa caita pai liichun, paiman (Moroni) ushaita cuchun munai na munai chaupirishcacunata paicunapaj llactata huacaichichun nacashpa paicunata huañuiman churachun.

16 Cai carca paipaj callari rurai tucuchingapa shinapacha fiñanajuicunata, ninanda fiñarishpa rimarinacunatapash llactapuracunapi; riqui, cunangaman cai cashca carca imamanda tucui paicunapaj tucuchina. Yalishca jipa caita cushca carca llactapuracunapaj shimirimaimanda.

17 Yalishca jipa Moroni mandarca paipaj macanajuj runacunata maijan jatun mandajta charingapa munaj runacunapaj contra richun, paicunapaj jariyaita jarcangapa, paicunapaj jatun cani yuyaicunatapash, alpacaman humillarichun, nacashpa paicuna macanajunacunata japichun, shinllichichunbash libertad canamanda.

18 Yalishca jipa macanajuj runacuna rirca paicunapaj contra; paicunapaj jariyaicunata jarcarca, paicunapaj jatun cani yuyaicunatapash, shinashpa imashna paicunapaj macanajunacunata alsajpi Moronipaj runacunahuan macanajungapa paicuna cuchushca carca alpaman shitashcapash.

19 Yalishca jipa tiarca chuscu huaranga maijanguna chaupirirca picuna cuchushca carca espadahuan; pushajcuna picuna macanajuipi na huañushcacuna japi tucurca cárcelman shitashcapash carca, na tiempo tiarcachu cai punllacunapi tandanajungapa paicunata imata ruranata ricungapa.

20 Chaupirishcacunapaj puchucuna, espadahuan alpaman shitaitucuna randi, libertadpaj estandarteman curirca, munai na munai carca libertadpaj estandarteta paicunapaj torre jahuacunapi churachun, paicunapaj llactacunapi, macanajunacunatapash japichun paicunapaj llactata huacaichichun.

21 Shina Moroni jatun mandajta charingapa munaj runacunata tucuchirca, pipash na tiarca shutichishca jatun mandajta munaj runacuna; shina pai tucuchirca na cazuicunata, jariyaicunata chai llactapuracuna picuna noblecunapaj yahuarta charinchi nirca; ashtahuangari munai na munai churashca carca humilde cachun paicunapaj huauquicuna laya, na manllashpa macanajuchun paicunapaj libertadta huatai tucushcashnamanda.

22 Riqui, yalishca jipa imaura Moroni shina tucuchijurca macanajuicunata, fiñanajuicunatapash paipaj propio llactapuracunapi, paicunata sumaj causai, civilizacióndapash churajurca, rurashpapash regulacióngunata prepararingapa Lamanitacunahuan macanajungapa, riqui, Lamanitacuna Moronipaj alpacunaman shamushca carca, chai carca jatun mama cocha pata manñacunapi.

23 Yalishca jipa Nefitacuna Moronipaj llactapi na ali shinllicuna carca; chaimanda Amalickíah paicunata calpachirca, taucacunata huañuchishpa. Yalishca jipa Amalickíah llactata japirca, ari, tucui paicunapaj shinllichishcacunata japirca.

24 Moronipaj llactamanda llujshishpa calpashcacuna Nefíahpaj llactaman shamurca; Lehipaj llactapuracunapash paipura tandanajurca, ña prepararirca listopash carca lamanitacunata chasquingapa macanajungapa.

25 Ashtahuangari yalishca jipa Amalickíah na saquirca Lamanitacuna richun Nefíahpaj llactahuan macanajungapa, ashtahuangari jatun mama cocha ladoman charirca, saquishpa runacunata tucui llactacunapi caita charingapa, huacaichingapapash.

26 Shina pai catirca, tauca llactacunata japishpa, Nefíahpaj llacta, Lehipaj llacta, Moriantónpaj llacta, Omnerpaj llacta, Gidpaj llacta, Mulekpaj llacta, tucui maijanguna indi llujshij lado manñaman carca jatun mama cocha pataman.

27 Shina Lamanitacuna mishashca carca, Amalickíahpaj na alipa yachaihuan, shina tauca llactacuna, paicunapaj na yupai ushai runacunahuan, tucui maijanguna ali shinllichishcacuna carca Moronipaj shinlliyachishcacuna layata catishpa; Lamanitacunapa tucuicuna shinlli jarcashcacuna cushca carca.

28 Yalishca jipa paicuna rirca Ashtacapacha Tiaj alpa manñacunaman, Nefitacunata calpachishpa paicunapaj ñaupamanda, taucacunata huañuchishpa.

29 Ashtahuangari yalishca jipa Teáncumhuan tuparingapa llujshimurca, pimi Moriantónda huañuchirca paipaj llactapuracunata jarcashca carca paicunapaj calpaicunapi.

30 Yalishca jipa pai Amalickíahtapash jarcarca, imashna pai rijushca carca paipaj na yupanalla macanajuj runacunahuan Ashtacapacha Tiaj alpata japi ushangapa, vichai alpatapash.

31 Ashtahuangari riqui pai na alicachirca huashaman tigrachi tucushpa Teáncummanda, paipaj runacunamandapash, paicuna jatun macanajungapa yachashcacuna carca; imashpa tucui Teáncumpaj runacuna Lamanitacunata yalirca paicunapaj shinllipi, macanajungapa ruraicunapi, shinashpa paicuna ñaupashpa misharca Lamanitacunata.

32 Yalishca jipa paicunata llaquichirca, shinashpa huañuchirca tutayangacaman. Yalishca jipa Teáncum paipaj runacunapash facha huasicunata shayachirca Ashtacapacha Tiaj alpapaj manñacunapi; Amalickíahpash paipaj facha huasicunata shayachirca jatun mama cocha pata ladolla manñacunapi, cashna laya paicuna calpachi tucushca carca.

33 Yalishca jipa tutayajpi, Teáncum, paipaj sirvij runapash upalla rishpa, tutapi yaicurca Amalickíahpaj causana pambaman; riqui, puñui mishashcacuna carca paicuna ashtaca shaijuimanda, punlla rupaipi trabashca caimanda.

34 Yalishca jipa Teáncum pipash na yachajta jatun mandajpaj facha huasiman yaicurca, paipaj shungupi javalinata churarca; jatun mandajta ñapash huañuchirca, chaimanda paipaj sirvij runacunata na rijchachirca.

35 Pai pacalla cutin tigrarca paipaj propio causana pambaman, riqui, paipaj runacuna puñunajurca, paicunata rijchachirca tucui cuzascunata imata rurashcata paicunaman villarca.

36 Paipaj macanajuj runacunata listolla cachun mandarca, imashpapash Lamanitacuna rijcharishpa paicunapa jahuapi shamuipapash.

37 Shina tucurin ricushpa chasquichijcunapaj reinado ishcai chunga picha huata Nefipaj llactapuracunapaj jahuapi; shina tucurin Amalickíahpaj punllacuna.