Miyuki ya mu Mifundu

Shapita 10: Yakoba ne Shelema

“Shapita 10: Yakoba ne Shelema,” Miyuki ya mu Mukanda wa Molomo (1997), 27–29

“Shapita 10,” Miyuki ya mu Mukanda wa Molomo, 27–29

Shapita 10

Yakoba ne Shelema

Nefi udi upesha Yakoba bitata — Kumpala kua Nefi kufua, wakapesha muakunyiende wa baluma Yakoba bitata bivuaye mufunda. Yakoba uvua muntu muakana.

Yakoba udi ufunda pa bitata — Nefi wakambila Yakoba bua afunda mâlu adi mua kuambuluisha bantu bua bitabuija Yezu Kilisto.

Nefi udi ubenesha Yakoba — Nefi wakapesha Yakoba bukola bua kuikala muakuidi mu Ekelezia ne bua kulongesha Bena Nefi mêyi a Nzambi.

Yakoba udi ulongesha bantu — Panyima pa lufu lua Nefi, Bena Nefi babungi bakalua bantu babi. Yakoba wakalongesha bantu ne wakabambila bua bakudimuna mitshima yabu bua mâlu mabi avuabu benza.

Shelema udi ulongesha — Muntu mubi uvua ubikidibua ne Shelema, wakaya munkatshi mua Bena Nefi, ubalongesha bua kabitabuiji Yezu Kilisto to.

Shelema — Shelema wakambila bantu ne kakuakuikala Kilisto to. Bantu babungi bakitabuija Shelema.

Shelema udi ukokangana ne Yakoba — Yakoba wakalongesha bantu bua bitabuija Kilisto. Shelema wakasua kukokangana ne Yakoba ne ukeba kumuenzeja bua itaba se kakuakuikala Kilisto to.

Yakoba ne Shelema — Ditabuija dia Yakoba mu Yezu Kilisto kadivua mua kunyunga to. Wakamona banjelu ne wakumvua dîyi dia Mukalenga. Uvua mumanye se Yezu nealua.

Yakoba udi ujadikila Shelema — Nyuma wa Tshijila uvua ne Yakoba pavuaye ufila bujadiki buenda bua Yezu kilisto kudi Shelema.

Shelema udi ukeba tshimanyinu — Shelema wakakonka bua amona tshimanyinu. Wakasua bua Yakoba amujadikila ne Nzambi udiku. Wakasua kumona tshishima.

Yakoba — Yakoba kavua musue kulomba Nzambi tshimanyinu to. Wakamba ne; Shelema ukavua mumanya se bivua Yakoba mulongesha bivua bilelela.

Yakoba ne Shelema — Yakoba wakamba ne pikala Nzambi mua kututa Shelema, etshi ne tshikala tshimanyinu tshia bukola bua Nzambi.

Shelema mudishinda panshi — Shelema wakadishinda panshi musangu umue. Kavua ne mushindu wa kujuka to bua matuku abungi.

Shelema — Shelema uvua muteketangana ne uvua mumanya se neafua. Wakabikila bantu bua batuilangana.

Shelema udi wakula kudi bantu — Wakabambila se uvua mushima. Wakabambila se badi ne bua kuitabuija Yezu Kilisto.

Shelema — Pakajikija Shelema kuakula ne bantu, yeye wakafua. Bantu ba kumvua bukola bua Nzambi, ne bakakuluka panshi.

Yakoba ne bantu bakuabu — Bantu bakabanga kukudimuna mitshima ne kubala mifundu. Bakasomba mu ditalala ne dinanga. Yakoba uvua ne disanka ne wakamanya se Nzambi uvua muandamuna ku masambila enda.