Miyuki ya mu Mifundu

Shapita 31: Kapitene Moloni udi Utshimuna Zelahemena

“Shapita 31: Kapitene Moloni udi Utshimuna Zelahemena,” Miyuki ya mu Mukanda wa Molomo (1997), 85–88

“Shapita 31,” Miyuki ya mu Mukanda wa Molomo, 85–88

Shapita 31

Kapitene Moloni udi Utshimuna Zelahemena

Bena Lamana badi bayukila — Zelahemena, mulombodi wa Bena Lamana, wakasua bua bantu bende batungunuka kukina Bena Nefi ne kubavuija bapika babu.

Masalayi a Bena Nefi — Bena Nefi bakasua kulama bulaba ne mêku abu mu budishikaminyi. Bavua kabidi basue bua bikale mu budishikaminyi bua kutendelela Nzambi.

Kapitene Moloni — Kapitene Moloni uvua mulombodi wa masalayi a Bena Nefi. Pakalua Bena Lamana bua kuluangana, Moloni ne masalayi ende bakasambakena mu bulaba bua Yêshona.

Kapitene Moloni ne masalayi — Kapitene Moloni uvua mulongolola masalayi ende ne biamua bia mvita, bibuikijilu, ngabu, ne bilamba bia mupimbu.

Masalayi a Bena Lamana — Bena Lamana bavua ne masalayi abungi, kadi bakakuatshika bowa pakamonabu ngabu ya Bena Nefi—Bena Lamana bavua baluata bilamba bipepele.

Bena Lamana badi basokoma mu tshipela — Masalayi a Bena Lamana kaakalekela bua kuluangana ne masalayi a Kapitene Moloni to. Bena Lamana bakanyema mu tshipela ne kusungulabu bua kukuata tshimenga tshia Bena Nefi tshikuabu.

Alama udi usambila — Moloni wakatuma batentekedi bua kutangila Bena Lamana Wakalomba kabidi kudi Alama bua asambila kudi Mukalenga bua diambuluisha. Mukalenga wakambila Alama muaba uvua Bena Lamana ne bua kukuata.

Moloni udi wenda ne masalayi ende — Pakapeta Moloni mukenji wa Alama, wakashiya basalayi ndambu bua balama Yêshona ne kuendaye ne bavua bashala bua kusambakena ne Bena Lamana.

Basalayi ba Moloni badi basokoma — Basalayi ba Kapitene Moloni bakasokoma mu nseka yonsu ibidi ya musulu wa Sidona, bindila bua kubambakaja masalayi a Bena Lamana

mvita mu musulu — Mvita yakabangisha, ne Bena Lamana bakasua kunyema bua kusabuka musulu, kadi Bena Nefi babungi bavua babindila ku luseka lukuabu.

Bena Nefi badi bakupa miketa — Zelahemena ne masalayi ende bakashipa Bena Nefi babungi bualu bakaluangana bikola bipita monsu mutubu baluangana. Bena Nefi bakela lubila kudi Mukalenga bua diambuluisha.

Bena Nefi mpala-ku-mpala ne Bena Lamana — Mukalenga wakakankamika masalayi a Bena Nefi. Masalayi a kanyunguluka Bena Lamana, ne Moloni kuimanyikaye mvita.

Moloni udi wakula ne Zelahemena — Moloni wakambila Zelahemena bua se Bena Nefi kabena ne disua dia kushipa Bena Lamana anyi kubavuija bapika babu to.

Moloni udi wakula — Moloni wakamba ne Bena Lamana kabena mua kunyanga ditabuija dia Bena Nefi mu Yezu Kilisto to. Wakamba se Nzambi neatungunuke mu kuambuluisha Bena Nefi pikalabu bamulamate.

Moloni udi utumina Zelahemena dîyi — Moloni wakenzeja Zelahemena bua afila biamua bienda bia mvita. Bena Lamana kabakushipibua to anu palayabu bua kubenga kuluisha kabidi Bena Nefi.

Zelahemena udi ufila biamua bia mvita kudi Moloni — Zelahemena wakapesha Moloni biamua bienda bia mvita kadi kakasua kulaya bua kubenga kuluangana to. Moloni wakapingaja biamua bia mvita kudi Bena Lamana bua badisungile nkayabu.

Musalayi muena Nefi udi ukosa muela wa Zelahemena — Zelahemena wakadikupa kudi Moloni bua kumushipa, kadi musalayi muena Nefi wa kakuma ne kukosolola muela wa Zelahemena.

musalayi udi ukosa nsuki ya Zelahemena — Pananku musalayi wakakosa tshiseba tshia nsuki ya Zelahemena, kuteka ku lusongo lua muela wende, ne kutshijula mûlu.

Tshiseba tshia nsuki tshia muena Lamana — Musalayi wakabambila Bena Lamana se badi ne bua kukuluka bumudi tshiseba tshia kumutu tshikuluka, anu bobu bafile biamua biabu bia mvita ne balaya bua kubenga kuluangana kabidi.

Bena Lamana badi bafila biamua bia mvita — Bena Lamana babungi bakateka biamua biabu bia mvita ku makasa a Moloni ne kulayabu bua kubenga kuluangana. Bakabanyishila bua kuyabu mu budishikaminyi.

Bena Lamana badi baluangana — Zelahemena wakasaka ne tshiji basalayi bende bavua bashala bua kuluangana. Basalayi ba Moloni bakashipa babungi babu.

Zelahemena udi ulomba Moloni — Pakamona Zelahemena se yeye ne bantu bende bavua ne bua kushipibua, wa kalomba Moloni bua abafuila luse. Wakalaya bua kaluangishi Bena Nefi kabidi nansha.

Bena Lamana badi bashiya Bena Nefi — Moloni wakimakija mvita ne kuangataye biamua bia mvita bia Bena Lamana. Panyima pa bobu balaya bua kubenga kuluangana, Bena Lamana bakaya.